FPNCC သို့ KIO ပြောင်းရခြင်း အကြောင်း ဗိုလ်ချုပ်ကြီး အင်ဘန်လ ရှင်းလင်း

လိုင်ဇာတွင် လုထူရှင်းလင်းပွဲ ပြုလုပ်နေသည့် KIO ဒုဥက္ကဌ ဗိုလ်ချုပ်ကြီး အင်ဘန်လ

ကချင် လွတ်လပ်ရေး အဖွဲ့ KIO အနေ နှင့် UNFC မှ နှုတ်ထွက်ပြီး UWSA ‘ဝ’ ဦးဆောင်သော နိုင်ငံရေးအဖွဲ့ နှင့် ပူပေါင်းရခြင်း ကိစ္စ ကို လုံခြုံရေးကြောင့် ကချင်လူထုထံ ကြိုတင် အသိပေးမှု မပြုလုပ်နိုင်ခဲ့ကြောင်း KIO ဒုဥက္ကဌ ဗိုလ်ချုပ်ကြီး အင်ဘန်လ မှ လိုင်ဇာ လူထု တွေ့ဆုံပွဲတွင် ရှင်းပြခဲ့သည်။

UNFC လမ်းကြောင်းမှ FPNCC (Federal Political Negotiation Co-ordination Committee) ဟုခေါ်သော UWSA ‘ဝ’ ဦးဆောင်သည့် ပြည်ထောင်စု ငြိမ်းချမ်းရေး ဆွေးနွေး ညှိ့နှိုင်းရေး ကော်မတီ ဘက်ကို KIO ပါဝင်လိုက်ခြင်းပေါ် ကချင်လူထုကြား ဝေဖန်မှု များနေချိန် KIO ဒုဥက္က က အခုလို ပြောလိုက်ခြင်း ဖြစ်သည်။

“ဝ အဖွဲ့နဲ့ပေါင်းဖို့ လူထုကို အရင်မတိုင်ပင်ဘဲ ကျနော်တို့ ဆုံးဖြတ် လုပ်ခဲ့ပြီးမှ လူထု သိရတာက မကောင်းဘူး။ ဒါက လူထုကို မလေးစားတာပဲ ဆိုပြီး ပြောသံတွေ အများကြီး ကြားရပါတယ်။ တကယ်တော့ အဲလို မဟုတ်ပါဘူး။ ဒီလို အရေးကြီးတဲ့ နိုင်ငံရေးကိစ္စတွေဟာ လျှို့ဝှက်ထားသင့်တဲ့အချက်တွေရှိတဲ့အတွက် ဘာမှ မလုပ်ခင် အားလုံးကို ဖွင့်ပြောလိုက် ဒီအတိုင်းပဲ သတင်းပျံ့နှံ့သွားမှာ မလိုလားဘူး။ အရင်က အတွေ့အကြုံတွေလည်း များခဲ့ပြီး။ ဒါပေမယ့် ဒီကိစ္စကို KIO ဗဟိုကော်မတီက အချိန်ကြာ ဆုံးဖြတ်ပြီးမှ လုပ်ဆောင်ခဲ့တာပါ”

ရှမ်းပြည်နယ် မြောက်ပိုင်း ဒေသအတွင်း တိုင်းရင်းသား တော်လှန်ရေး အဖွဲ့များ ပူးပေါင်းမှု မရှိရင် အချင်းချင်း ပြဿနာဖြစ်နိုင်ခြေ များပြားသည့်အတွက် အခြေအနေ အရ ပေါင်းစည်း လိုက်ခြင်း ဖြစ်သည်ဟု ပြောခဲ့သည်။

FPNCC ကို UWSA ‘ဝ’ အဖွဲ့က ဦးဆောင်ပြီး ကချင် လွတ်လပ်ရေး တပ်မတော် KIA၊ ရှမ်းပြည် တိုးတက်ရေး တပ်မတော် SSPP/SSA၊ တအောင်း လွတ်မြောက်ရေး တပ်မတော် TNLA၊ ကိုးကန့် MNDAA၊ မိုင်းလား NDAA နှင့် ရက္ခိုင်တပ်မတော် AA တို့ ပါဝင်ဖွဲ့စည်းထားသည်။

အဆိုပါ FPNCC အဖွဲ့ကို အစိုးရက သွေးခွဲအောင် ကြိုးပမ်းနေကြောင်း ဗိုလ်ချုပ်ကြီး အင်ဘန်လ က အခုလို ဆက်ဆိုသည်။

“မြောက်ပိုင်း မဟာမိတ် အဖွဲ့နဲ့ KIO ပေါင်းတာကို ကချင်လူထုကပဲ သိပ်မကြိုက်တာ။ ဒါပေမယ့် အစိုးရကတော့ အဲဒီ ၇ ဖွဲ့ ပေါင်းစည်းတာကို အရမ်းကြောက်နေတယ်။ အဲကြောင့် ဒီအဖွဲ့ကို ခွဲဖို့ သူတို့ နည်းလမ်း ရှာနေကြတယ်။ တစ်ခုက UWSA နဲ့ NDAA ရဲ့ နယ်မြေ ပြဿနာကို အရင်းခံပြီး ကြိုးစားနေကြတယ်။”

လူထု တွေ့ဆုံပွဲကို ဇူလိုင် ၁၅ နှင့် ၁၇ လိုင်ဇာမှာပြုလုပ်ခဲ့သည်။ ပထမနေ့ တွင် UNFC မှ နှုတ်ထွက်ရခြင်း၊ FPNCC နှင့် လက်တွဲရခြင်း၊ ၂၁ ရာစုပင်လုံညီလာခံ သွားတက်ရခြင်း နှင့် FPNCC ၏ ရှေ့ဆက် လုပ်ဆောင်သွားမယ့် လုပ်ငန်းစဉ် များကို KIO ဒုဥက္ကဌ က ရှင်းလင်းခဲ့ပြီး FPNCC ၏ ဖွဲ့စည်းပုံကို ကချင် လွတ်လပ်ရေး ကောင်စီ KIC အတွင်းရေးမှုး ဗိုလ်မှုးကြီး လဖိုင် ဇော်ရော် က ရှင်းပြခဲ့သည်။

ဇူလိုင် ၁၇၊ ဒုတိယနေ့ အဖြစ် လူထုမေးမြန်းထားသည့် မေးခွန်းများမှ အချို့ကို ပြန်လည်ဖြေကြားမှု အစီစဉ် ရှိခဲ့သည်။ ကမ္ဘာအရပ်ရပ်မှ မရောက်လာနိုင်သောသူများက KIO ထံ အကြံပြုစာ၊ သဘောထားအမြင်များကို ပေးပို့ခဲ့ကြောင်း သိရသည်။

ယခု ရှင်းလင်းသည့် အကြောင်းအရာများကိုပင် လွန်ခဲ့သော ဇွန်လ ၃ ရက်နေ့ KIO ဒုဥက္ကဌ ဗိုလ်ချုပ်ကြီး အင်ဘန်လ လိုင်ဇာတွင် ပြုလုပ်ခဲ့ပြီး လူထု ၅၀၀ ခန့် တက်ရောက်ခဲ့သည်။ သို့သော် ထိုအချိန်က မေးခွန်း မေးမြန်းခွင့် မပေးခဲ့ပေ။

ယခု ပြုလုပ်သည့် သုံးရက်ကြာ လိုင်ဇာ ကချင်လူထု အစည်းအဝေးကို လူထု ၇၀၀ ခန့် တက်ရောက်ခဲ့ပြီး မေးခွန်းများ မေးမြန်းခွင့် ပေးခဲ့သည်။ နောက်တစ်ခါ လူထုတွေ့ဆုံပွဲတွင် လူဦးရေ ၁၀၀၀ ကျော် မြင်တွေ့ လိုကြောင်း ဒုဥက္ကဌ က ပြောခဲ့သည်။

  • Popular

  • Latest