ဟူးကောင်း ချိုင့်ဝှမ်းဒေသ ထိုးစစ်ကြီး ဖြစ်ပေါ် လာနိုင်

မြန်မာ့ တပ်မတော်သားများ

ဟူးကောင်း ချိုင့်ဝှမ်းဒေသ ကချင် လွတ်လပ်ရေး တပ်မတော် KIA တပ်မဟာ ၂ ကို တပ်မတော် က စစ်အင်အား အလွန်အကျွံ ပို့ဆောင်နေသဖြင့် တိုက်ပွဲကြီး ဖြစ်လာနိုင်ကြောင်း ဒေသခံများ ပြောသည်။

လွန်ခဲ့သည့် ၂ လ ခန့်မှ မြန်မာ့ တပ်မတော် စစ်အင်အား တိုးချဲ့မှု ပိုမိုများလာပြီး အထူးသဖြင့် ညပိုင်းမှ သွားလာ လေ့ရှိကြောင်း လီဒိုလမ်း အောင်ရာ ကျေးရွာက ဒေါ်ဘောက်ဂျာ က ယခုလို ပြောသည်။

“ကျမတို့ ဒေသမှာ ညမထွက်ရ (ည ၆ မနက် ၆) အမိန့် ထုတ်ထားတယ်။ ညဆို ခွေးဟောင်တိုင်း အပြင်ကို ကြည့်လိုက်ရင် စစ်သားတွေပဲ တွေ့ရတယ်။ လွန်ခဲ့တဲ့ ၂ လ လောက်ကစပြီး လီဒိုလမ်း နဲ့ ဖားကန့် လမ်းဘက်ကို တပ်မတော် စစ်အင်အား ၅၀၀၀ လောက်ရောက်နေပြီလို့ ခန့်မှန်း ရတယ်။”

တပ်အင်အား တိုးချဲ့ခြင်း များလာသည့် တစ်ဖက်တွင် အစိုးရ တပ်မတော်သားများ က ဒေသခံများကို နိုင်ငံသား စိစစ်ရေး ကတ်ပြား (မှတ်ပုံတင်) တင်းကြပ်စွာ စစ်ဆေးမှု ပြုလုပ်လာကြောင်း ဒေသခံများ ပြောသည်။

တနိုင်းဒေသ တရားမဝင် ရွှေမှော်၊ ပယင်းမှော် လုပ်သားများ ကို ဇွန်လ ၁၅ ရက် နောက်ဆုံးထား ထွက်ခွာရန် တပ်မတော် က ထိုလ တွင် သတိပေးခဲ့သည်။ လုပ်သားပြည်သူများ ထွက်ခွာသွားသည့် နောက် ၄င်းနေရာများတွင် တပ်မတော် က တပ်စခန်း ချ နေထိုင်လိုက်ကြောင်း ဒေသခံများ မှ သိရသည်။

အစိုးရတပ်မှ တနိုင်းဒေသကို ဆန် နှင့် စက်သုံးဆီ တင်သွင်းမှု တားမြစ်ခြင်းသည် KIA တပ်မဟာ ၂ ကို အင်အားနည်းအောင် ပြုလုပ်ပြီး တိုက်ခိုက်ရန် ကြိုတင်ပြင်ဆင်သည့် အဆင့် တစ်ခုဖြစ်ကြောင်း ဟူးကောင်းဒေသခံ ဦးလရှီး အောင်လတ် က ခန့်မှန်း ပြောဆိုသည်။

မြန်မာ စစ်တပ်၏ စစ်အင်အား သယ်ယူ ပို့ဆောင်မှုကို ယခင်လို နေ့ခင်းဘက် သိပ်မတွေ့ရတော့ဘဲ ညပိုင်းမှ သာ တွေ့ရကြောင်း တနိုင်း မြို့ခံ တစ်ဦး ပြောသည်။ ထို့အပြင် အရပ်ဝတ် စစ်သားများ ကိုလည်း တွေ့ရသည်ဟု ပြောသည်။

သြဂုတ်လတွင် စစ်ရှောင်ကူညီရေး အဖွဲ့များ၊ ဘာသာရေးအဖွဲ့များ၊ ငြိမ်းချမ်းရေး အကျိုးဆောင် အဖွဲ့ PCG တို့ ပူးပေါင်းပြီး တနိုင်းမြို့ရှိ စစ်ပြေးဒုက္ခသည်များ နေရပ် ပြန်နိုင်ရေး အချက်အလက် ကောက်ယူပြီး မြောက်ပိုင်းတိုင်း စစ်ဌာနချုပ်ကို တင်ပြထားပြီ ဖြစ်ကြောင်း စစ်ရှောင်ကူညီရေးအဖွဲ့များ ပြောသည်။

သို့သော်လည်း လပိုင်းမှ စပြီး လီဒိုလမ်း တနိုင်းမြို့ ဘက်ကို တပ်မတော်၏ စစ်အင်အား အလွန်အကျွံ ပို့ဆောင်ထားမှုကြောင့် တိုက်ပွဲကြီး ဖြစ်လာမည်ကို စိုးရိမ်ကြောင်း ဒေသခံများ ပြောသည်။

ကချင် လွတ်လပ်ရေး အဖွဲ့ KIO ပြန်ကြားရေး တာဝန်ရှိသူ ဒုဗိုလ်မှူးကြီး နော်ဘူ က ‘သူတို့က အဲဒီဒေသ ကို ရှင်းလင်းမယ်လို့ တရားဝင် လွတ်တော်မှာလည်း ပြောထားတဲ့အတိုင်း လုပ်လာမှာဘဲ။ သူတို့ဘက်က ကျနော်တို့ နေရာကို ဝင်လာရင်တော့ တိုက်ပွဲ ဖြစ်မှာတော့ သေချာတာပေါ့” ဟု ပြောသည်။

ယမန်နှစ် စက်တင်ဘာလ နေပြည်တော်တွင် ပထမအကြိမ် ၂၁ ရာစုပင်လုံ ညီလာခံ ကျင်းပနေချိန် တပ်မတော်က ကချင် လွတ်လပ်ရေး တပ်မတော် KIA ၏ အမာခံ Gidon တပ်စခန်းကို ပြင်းထန်သည့် ထိုးစစ်ဆင်မှု ပြုလုပ်ခဲ့သည်။

ထို့ကြောင့် ယခု နှစ်ကုန်ပိုင်း တတိယအကြိမ် ၂၁ ရာစု ပင်လုံညီလာခံ ကျင်းပရန် ရှိပြီး ထိုချိန် ဟူးကောင်း ဒေသတွင် တိုက်ပွဲကြီး ဖြစ်လာမလား စိုးရိမ်သည့် ပြည်သူများ လည်း ရှိနေပါသည်။

 
 

  • Popular

  • Latest