မြန်မာစစ်တပ် နှင့် KIA ၂ နေရာမှာ တိုက်ပွဲ ပြင်းထန်

မြန်မာစစ်တပ် နှင့် KIA ၂ နေရာမှာ တိုက်ပွဲ ပြင်းထန်

ယနေ့ ကချင်ပြည်နယ် မံစီမြို့နယ် နှင့် ရှမ်းပြည်နယ် မြောက်ပိုင်း နှစ် နေရာမှာ မြန်မာ အစိုးရတပ် နှင့် ကချင် လွတ်လပ်ရေး တပ်မတော် KIA ကြား တိုက်ပွဲ ပြင်းထန်စွာ ဖြစ်ပွားခဲ့သည်။

တိုက်ပွဲသည် မံစီမြို့ အရှေ့တောင်ပိုင်း ယမန်နှစ် ရွာသားများ စစ်ရှောင် စွန့်ပစ်သွားသည့် Bang Htan (ဘန်ထန်) ကျေးရွာ တွင် နံနက် ၁၁ နာရီကျော်မှ မွန်းလွဲ ၃ နာရီခန့် အထိ နှစ်ဖက် ထိတွေ့တိုက်ပွဲ ဖြစ်ပွားကြောင်း ဒေသခံ အရပ်ဖက် သတင်းရပ်ကွက် က ကချင်သတင်းဌာန KNG ကို အတည်ပြု ပြောပါသည်။

၎င်း တိုက်ပွဲ ဖြစ်ပွားသည့် နေရာသည် KIA တပ်မဟာ (၃) လက်အောက် တပ်ရင်း (၁၂) နှင့် (၂၇) နယ်နိမိတ် နယ်မြေဖြစ်သောကြောင့် နှစ်ဖက်တပ်ရင်းမှ တပ်ဖွဲ့များ ပူးပေါင်းတိုက်ခိုက်ခြင်း ဖြစ်သည်။

တပ်မတော်ဘက် မည့်သည့် တပ်ရင်းဖြစ်ကြောင်း မသိရသေး သော်လည်း သေဆုံးထိခိုက်မှု များသည် ဟု လူမှုရေးကွန်ရက် facebook သတင်းများတွင် ဖော်ပြကြသည်။ သို့သော်လည်း သီးခြား အတည်ပြုနိုင်ခြင်း မရှိသေးပါ။

ရှမ်းပြည်နယ် မြောက်ပိုင်း ကွတ်ခိုင်မြို့နယ်အတွင်း မြန်မာစစ်တပ် တပ်မ (၈၈) စစ်ကြောင်း နှင့် KIA တပ်မဟာ (၄) အောက် တပ်ရင်း (၉) MHH ပြည်သူ့စစ် တပ်ဖွဲ့ ကြား Kawng Mu (ကောင်းမိုး) ရွာဟောင်း တွင် ၂ နာရီကျော် တိုက်ပွဲ ဖြစ်ပွားခဲ့သည်ဟု KIA တပ်ရင်း (၉) သတင်းရပ်ကွက် က ဆိုသည်။

Dai Maw (ဒိုင်မော်) ရွာဘက်မှ ချီတက်လာသော အင်အား ၁၅၀ ခန့်ရှိ တပ်မ ၈၈ အောက် ခမရ (၈၃၊ ၁၀၃၊ ၁၀၅) ပူးပေါင်း စစ်ကြောင်း နှင့် မွန်းလွဲ ၁ နာရီကျော်မှ ၃ နာရီထိ ပြင်းပြင်းထန်ထန် တိုက်ပွဲ ဖြစ်ပွား ခဲ့ခြင်း ဖြစ်ကြောင်း ပြောသည်။

နှစ်ဖက် ထိခိုက်သေဆုံးမှု သတင်းကို မသိရသေးပါ။

ယခု အပတ် အတွင်း မြန်မာစစ်တပ် နှင့် KIA ကြား ဖြစ်ပွားသည့် တိုက်ပွဲများတွင် ယနေ့ နှစ်နေရာမှာ ဖြစ်ပွားသည့် တိုက်ပွဲသည် အပြင်းထန်ဆုံး ဖြစ်သည်။

 

  • Popular

  • Latest