မြန်မာ အစိုးရတပ် နှင့် KIA တပ်ရင်း (၉) ဆက်လက် တိုက်ပွဲ ပြင်းထန်

မြန်မာ အစိုးရတပ် နှင့် KIA တပ်ရင်း (၉) ဆက်လက် တိုက်ပွဲ ပြင်းထန်

ယနေ့ ဒုတိယ နေ့ မြန်မာ စစ်တပ် နှင့် ကချင် လွတ်လပ်ရေး တပ်မတော် KIA တပ်ရင်း (၉) ကြား ရှမ်းပြည်မြောက်ပိုင်း ကွတ်ခိုင်မြို့နယ်အတွင်း ၃ နာရီခန့် တိုက်ပွဲ ပြင်းထန်စွာ ဖြစ်ပွားခဲ့သည်။


Hu Hpyet (ဟူးဖြတ်) ကျေးရွာဘက် KIA တပ်ရင်း (၉) တပ်ဖွဲ့များ စခန်းချသည့် Kawng Mu (ကောင်းမိုး) နှင့် Bang Nan (ဘန်နန်း) ရွာဟောင်း ဘက်ကို တက်လာသော မြန်မာ စစ်တပ် တပ်မ (၈၈) အောက် တပ်ဖွဲ့များနှင့် မွန်းလွဲ ၁ နာရီ ကျော်မှ ၄ နာရီ ခန့်အထိ တိုက်ပွဲ ပြင်းပြင်းထန်ထန် ဖြစ်ပွားခဲ့သည်ဟု ဒေသခံများ ကချင်သတင်းဌာန KNG ကို ပြောသည်။

အစိုးရတပ်ဘက် Nampaka (နမ့်ဖတ်ကာ) အမြောက်တပ်မှ လက်နက်ကြီးများ ပစ်ကူပေးသောကြောင့် Kawng Mu နှင့် Bang Nan ရွာဟောင်း မှ KIA တပ်များ နောက်ဆုတ်ပေးခဲ့ကြောင်း ဒေသခံများ ဆက်ဆိုသည်။

နှစ်ဖက် ထိခိုက်သေဆုံးမှု သတင်း ထုတ်ပြန်ခြင်း မရှိပါ။

ယခု တိုက်ပွဲသည် ကွတ်ခိုင်-မူဆယ် ကုန်သွယ်ရေးလမ်းမ ၏ အထဲဘက်မှာ ဖြစ်သောကြောင့် ကားလမ်းမကြီး ထိခိုက်မှု မရှိဘဲ ခရီးသွား၊ ကုန်သည်များ ကောင်းမွန်စွာ သွားလာနိုင်ကြောင်း သိရသည်။

သံလွင်မြစ် အရှေ့ဘက် ကိုးကန့်ဒေသသို့ စစ်အင်အား ဖြည့်တင်းမှု အနေဖြင့် ယနေ့ နံနက် မိုးမလင်းမီ ၃ နာရီ ခန့်တွင် လားရှိုးမှ မြန်မာ စစ်သားများ တင်ဆောင်ထားသော ကား (၂၃) စီး သည် Sinli (သိန်းနီ) လမ်းခွဲမှ ကွန်လုံ ဘက်ကို ဦးတည် သွားသည်ဟု မျက်မြင်များ ပြောပြချက်အရ သိရသည်။

ရှမ်းပြည်မြောက်ပိုင်းတွင် ယခု တဖန် မြန်မာစစ်တပ် နှင့် မြောက်ပိုင်းမဟာမိတ် (Northern Alliance-Burma) တိုင်းရင်းသား တော်လှန်ရေး တပ်ပေါင်းစု တပ်ဖွဲ့များ ကြား စစ်ရေး တင်မားမှုများ ပြန်လည် ဖြစ်ပေါ် လာခြင်း ဖြစ်သည်။

 

  • Popular

  • Latest