မြစ်ကြီးနား Wisdom Palace ကျောင်း တွင် Cambridge မှ အင်္ဂလိပ်စာ အခမဲ့ သင်ပေး

မတ် (၃) ရက်၊ Wisdom Palace ပုဂ္ဂလိက ကျောင်းသစ် ဖွင့်ပွဲ၊ မြစ်ကြီးနားမြို့

Cambridge University အသိအမှတ်ပြု (၆)လ အင်္ဂလိပ်စာ သင်တန်းကို မြစ်ကြီးနား Wisdom Palace ပုဂ္ဂလိက ကျောင်းသစ် တွင် ယခုနှစ်မှ စတင်ကာ အခမဲ့ သင်ယူနိုင်မည်ဖြစ်သည်။

အဆိုပါ Cambridge တက္ကသိုလ်၏ ဘာသာရပ်တစ်ခုအနေဖြင့် ‘Cambridge English Program’ ကို ၄င်း တက္ကသိုလ်မှ ဆရာများကိုယ်တိုင် လာရောက်သင်ကြားပေးမည်ဖြစ်ကြောင်း မတ်လ (၃) ရက်နေ့ Wisdom Palace ကျောင်းဖွင့်ပွဲတွင် ကျောင်း၏ ဒါရိုက်တာ ဒေါက်တာ ခွန်ဆိုင်း က ပြောပါသည်။

“Cambridge တက္ကသိုလ်မှ ဆရာများကိုယ်တိုင် လာသင်ပေးမယ်။ ၆ လသင်ပြီးရင် စာမေးပွဲဖြေဆိုရပါမယ်။ အဲဒီ စာမေးပွဲ စရိတ်တောင်မှ ဒေါ်လာ ၁၈၀ ကျပါတယ်။ ဒါပေမယ့် အဲဒီ စရိတ်မပေးရအောင် ပြင်ဆင်ထား ပါတယ်။ သင်ပေးတဲ့ဆရာတွေက စာမေးပွဲစစ်မှာ မဟုတ်ဘူး။ စာစစ်တဲ့ဆရာတွေ ကိုယ်တိုင် Cambridge တက္ကသိုလ်က မေးခွန်းကို Hard Copy ယူလာပြီး စာမေးပွဲခန်းရောက်မှ ဖွင့်မယ်။ စစ်ဆေးမေးမြန်းထားတဲ့ အဖြေစာရွက်တွေ၊ အသံဖိုင်တွေကို အကုန် Cambridge တက္ကသိုလ်ကို ယူသွားပြီး သူတို့ကိုယ်တိုင် စစ်ဆေးမယ်။ သူတို့ သတ်မှတ်ထားတဲ့အမှတ်မှီရင် Cambridge တက္ကသိုလ်က လက်မှတ်ပေးမှာ ဖြစ်တယ်။”

၎င်း ဘာသာရပ် အတွက် မြစ်ကြီးနား ရွှေစက်ရပ်ကွက်၊ ဆွတ်ငိုင်လမ်း တွင် အသစ်ဖွင့်လှစ်ထားသည့် Wisdom Palace ကျောင်းတွင် လာမည့် ဇွန်လတွင် စာရင်းပေးသွင်းရမည်ဖြစ်ပြီး စက်တင်ဘာမှ စတင်ကာ (၆) လ ကြာ သင်ကြားသွားမှာ ဖြစ်ကြောင်း သိရပါသည်။

သင်တန်း တက်ရောက်လိုသူများမှာ အခြေခံပညာ အထက်တန်းအဆင့် အောင်မြင်ထားသူ ဖြစ်ရမည်ဖြစ်ပြီး သင်တန်းပြီးဆုံးပါက လူမူအဖွဲ့အစည်း လုပ်ငန်းများမှာ ပါဝင်လိုသူ ဖြစ်ရမည်ဟု သိရပါသည်။

Wisdom Palace ကျောင်းတွင် အဆိုပါ အခမဲ့ ဘာသာရပ်အပြင် အင်္ဂလိပ်စာ စွမ်းရည်မြင့် တင်သင်တန်းများ၊ NGO အလုပ်သင် သင်တန်းများနှင့် နွေရာသီသင်တန်းများ တို့ကို သင်ကြားသွားမှာ ဖြစ်ကြောင်း ကျောင်း၏ ဒါရိုက်တာ က ပြောပါသည်။

နယ်ဝေးမှ လာရောက်သင်ယူလိုသူများ အတွက်လည်း နေရာအဆောင်နှင့် အစားအသောက်များ ပြင်ဆင်ထားပြီး ၄င်းအတွက် တစ်လလျှင် ကျပ် ၅ သောင်း ကုန်ကျမည်ဟု သိရပါသည်။

  • Popular

  • Latest