ဖားကန့် ကျေက်တူးသမားများ သတိဝိရိယ ရှိရန် ကချင် ၀န်ကြီး ပြော

ဖေဖေါ်ဝါရီ ၁၀၊ ၂၀၁၉ ရက်နေ့ ဆိပ်မူအုပ်စု စပေါ့မှော် ကမ်းပါးပြိုကျမှုကြောင့် လူ ၆ဦးသေဆုံးခဲ့တယ်

တပတ်အတွင်း ဖားကန့် တပိုင်တနိုင်ကျောက်တူးသမား ၉ ဦး သေဆုံးမှု ဖြစ်ပွားပြီးနောက် ‘ပြည်သူများ သတိဝိရိယနှင့် တူးဖော်စေလိုကြောင်း’ ကချင်ပြည်နယ် သယံဇာတနှင့် သဘာဝပတ်ဝန်းကျင်ထိန်းသိမ်းရေး ၀န်ကြီး သစ် ဦး Dashi La Seng ပြောသည်။

“ပြည်သူတွေအနေနဲ့ သတိဝိရိယထားပြီး တူးဖော်စေချင်တယ်” ဟု ၀န်ကြီး Dashi La Seng မှ တနင်္လာနေ့ ကချင်သတင်းဌာန KNG ကို ပြောပါသည်။

ကုမ္ပဏီကြီးများ နှင့် တပိုင်တနိုင်ကျောက်တူးဖော်နေသော ပြည်သူများအတွက် လိုအပ်သော စည်းမျဉ်းစည်းကမ်းနှင့်အတူ သတိပေးနိုးဆော်ချက်များ၊ ကျောက်တူးဖော်ခြင်းနှင့် ပတ်သက်သော ပညာပေးမှု၊ အရေးယူဆောင်ရွက်မှုများ ပြုလုပ်သွားရန်ရှိကြောင်း ၀န်ကြီး က ပြောပါသည်။

ဖေဖေါ်ဝါရီ ၄ ရက်နေ့ က ဆန်ခါကျေးရွာအနီး ရေမဆေးကျောက်ရှာဖွေများကို ကုမ္ပဏီစောင့် ရဲက သေနတ်ဖြင့်ပစ်သဖြင့် ၁ ဦးသေဆုံးပြီး ၎င်းနေ့မှာပဲ မှော်စီစာကျေးရွာအနီး မြေစာသွန်ကန်ထဲ မြေစာလျှောကျမှုကြောင့် ၂ ဦးသေဆုံးခဲ့သည်။ နောက်ထပ် ဖေဖေါ်ဝါရီ ၁၀ရက်နေ့ ဆိပ်မူအုပ်စု စပေါ့ကျေးရွာတွင် ကျောက်ကမ်းပါးပြိုကျမှုတွင် တပိုင်တနိုင်ကျောက်တူးသမား ၆ဦး ထပ်မံ သေဆုံးခဲ့သည်။

အစိုးရက ၂၀၁၈ ဒီဇင်ဘာလ ၁၈ ရက်နေ့ အစိုးရက အသစ် ပြဌာန်းသော အကြီးစား ကျောက်မျက်တူးဖော်မှုကို ပိတ်ပင်သည့် မြန်မာ့ကျောက်မျက်ဥပဒေ အရ ကုမ္ပဏီများကို ၅ဧက အောက်သာ တူးဖော်ရန် ခွင့်ပြုထားသည်။

ဥပဒေသစ် ထွက်မလာခင် အာဏာပိုင်များက ကျောက်မျက်ဥပဒေသစ် ရေးဆွဲမည်ဟုဆိုကာ ၂၀၁၆ ခုနှစ် ဧပြီလ က စပြီး ကျောက်မျက်လုပ်ကွက် သက်တမ်းတိုးပေးခြင်း ရပ်ဆိုင်းလိုက်ခြင်းဖြစ်သည်။

  • Popular

  • Latest