ကချင်ပါတီများ ‘ဖယ်ဒရယ် သယံဇာတ ပေါ်လစီ’ ကိစ္စ အလုပ်ရုံ ဆွေးနွေးပွဲ လုပ်

ကချင်ပါတီများ ‘ဖယ်ဒရယ် သယံဇာတ ပေါ်လစီ’ ကိစ္စ အလုပ်ရုံ ဆွေးနွေးပွဲ လုပ်

ကချင်နိုင်ငံရေးပါတီများနှင့်သီးသန့် ‘ဖယ်ဒရယ်အုပ်ချုပ်ရေး စနစ်နှင့် သယံဇာတ ပေါ်လစီ (resource federalism)’ ပေါ် အလုပ်ရုံဆွေးနွေးကို မြစ်ကြီးနားမြို့ KDI Learning Center တွင် ပြုလုပ်ခဲ့သည်။

နှစ်ရက်ကြာ အလုပ်ရုံဆွေးနွေးပွဲနှင့် ပတ်သက်ပြီး အစီစဉ် ဦးဆောင်သော Kachin Democratic Institute က ဒါရိုက်တာ Dr. Hkan Naw ယခုလို ကချင်သတင်းဌာန KNG ကို ပြောသည်။

“ပြည်နယ်အတွင်းမှာရှိတဲ့သယံဇာတတွေကိုပြည်သူများ တရားမျှတစွာသုံးစွဲနိုင်ရေးအတွက် သယံဇာတနဲ့ပတ်သက်ပြီးပေါ်လစီကိုဘယ်လိုရေးဆွဲပြီး အကောင်အထည်ဖော်ရမယ်ဆိုတာကို အဓိကထားပြီး ကျနော်တို့ဆွေးနွေးခဲ့တာပါ။”

ဖေဖေါ်ဝါရီ ၂၁မှ ၂၂ ထိ ပြုလုပ်ခဲ့သော အလုပ်ရုံဆွေးနွေးပွဲကို ၀ါရှင်တန်ဒီစီ အခြေစိုက် Forest Trends အဖွဲ့မှ Mr. Kevin Woods က အဓိက ဦးဆောင်ခြင်းဖြစ်သည်။

ဆွေးနွေးပွဲသို့ ကချင်ပေါင်းစည်းပါတီအဖွဲ့ ၃ပါတီ (ကချင်ပြည်နယ် စည်းလုံးညီညွှတ်ရေးနှင့် ဒီမိုကရေစီ UDPKS၊ ကချင်ပြည်နယ်ဒီမိုကရေစီပါတီ KSDP၊ ကချင်ဒီမိုကရက်တစ်ပါတီ KDP) နှင့် ကချင်အမျိုးသားကွန်ကရက် (KNC) ပါတီတို့မှ စုစုပေါင်း ၂၂ ဦး ပါဝင်တက်ရောက်ခဲ့သည်။

ဆက်လက်ပြီး တရားဥပဒေစိုးမိုးရေး၊ ဖယ်ဒရယ်ဖွဲ့စည်းပုံ၊ လူငယ်ခေါင်းဆောင်ကောင်း မွေးထုတ်ခြင်း နှင့် သဘာဝပတ်ဝန်းကျင် ထိန်းသိမ်းရေး အစရှိသည့် သင်တန်းများ ပေးရန်ရှိသည်ဟု Dr. Hkan Naw ဆိုပါသည်။

KDI က နိုင်ငံရေး၊ စီးပွားရေး၊ လူမှုရေး လူထု အမြင်ဖွင့် အသိပညာပေး သင်တန်းအပြင် လူငယ်ခေါင်းဆောင်ကောင်းများ မွေးထုတ်ရေး ရည်ရွယ်ချက်ဖြင့် မြစ်ကြီးနားမြို့ Learning Center ကို ယခုလ ဖေဖော်ဝါရီ ၅ ရက်နေ့ ဖွင့်လှစ်ခဲ့သည်။

၂၀၁၈ ခုနှစ်အတွင်း KDI က ‘ကချင်ပြည်နယ် ဖယ်ဒရယ်ဖွဲ့စည်းပုံအခြေခံဥပဒေမူကြမ်း’ စာအုပ်ကို ထုတ်ဝေခဲ့ပြီးနောက် ‘ကချင်ပြည်နယ်ဖယ်ဒရယ်ဖွဲ့စည်းပုံ အခြေခံဥပဒေမူကြမ်း ရေးဆွဲရေးကော်မတီ’ ကို လည်း ဦးဆောင် ဖွဲ့စည်းပေးခဲ့သည်။

  • Popular

  • Latest