နှစ်ဖက် အပစ်ရပ်ကြောင်း တရားဝင် ကြေညာပြီးမှ Awng Lawt စစ်ရှောင်များ နေရပ်ပြန်လို

Awng Lawt စစ်ရှောင်စခန်း၊ မော်တောင်းကျေးရွာ၊ မြစ်ကြီးနား

အစိုးရနှင့် KIO တို့ နှစ်ဖက် အပစ်ခတ်ရပ်စဲကြောင်း နိုင်ငံတကာကို တရားဝင် ကြေညာပြီးနောက် လုံခြုံစိတ်ချမှုရှိကြောင်း သက်သေအခိုင်အမာပြသနိုင်မှ နေရပ်ပြန်လိုကြကြောင်း မြစ်ကြီးနားမြို့ Maw Tawng စခန်းမှ Awng Lawt စစ်ရှောင်များ ဆိုပါသည်။

နေရပ်ပြန်ချင်သော်လည်း လုံခြုံစိတ်ချမှု အခြေအနေမရှိသေးကြောင်း စစ်ရှောင်စခန်း တာဝန်ခံ Slg. Mung Ban (ဆလန် မုန်ဘန်) ယခုလို ကချင်သတင်းဌာန KNG ကို ရှင်းပြသည်။

“ရွာကိုခဏတဖြုတ်ပြန်သွားတဲ့ ရွာသားအချို့ မိုင်းနင်းမိပြီးထိခိုက်ဒဏ်ရာရခဲ့တာမျိုးတွေရှိခဲ့တယ် ဆိုတော့ ကျနော်တို့မမြင်နိုင်တဲ့မြေမြှုပ်မိုင်းတွေ ဘယ်လောက်တောင်ရှိနေအုံးမလဲမသိသေးဘူး” ဟု ဆိုသည်။

ကချင်ပြည်နယ် အနောက်ဘက် တနိုင်းမြို့နယ် Awng Lawt (အောင်လောဒ်) ဒေသတွင် မြန်မာအစိုးရတပ် နှင့် ကချင်လွတ်လပ်ရေးတပ်မတော် KIA တို့ ၂၀၁၈ မေလမှာ ဖြစ်ပွားသော တိုက်ပွဲများကြောင့် မြစ်ကြီးနားသို့ ထွက်ပြေးခိုလှုံနေရခြင်း ဖြစ်သည်။

Awng Lawt စစ်ရှောင်များသည် Jaw Masat ကချင်နှစ်ခြင်းခရစ်ယာန်အသင်းတော် ဘုရားကျောင်းဝင်းတွင် ၉လခန့် ခိုလှုံပြီး ဇန်န၀ါရီလ (၁၉)ရက်နေ့ Jaw Masat ရပ်ကွက် (၆) Maw Tawng (မော်တောင်း) ကျေးရွာ စခန်းသစ်သို့ ပြောင်းရွှေ့ခဲ့သည်။

စစ်ရှောင်အမျိုးသမီး Jan Hka Mai (ဒေါ်ခါးမိုင်) က “ရွာကိုမပြန်မနေရဆိုရင်တော့ ပြန်ရမှာပေါ့။ ဒါပေမယ့် ကျမတို့ဘယ်ကစပြီးလုပ်ကိုင် စားသောက်ရမလဲတောင်မသိသေးဘူး။ တိုက်ပွဲပြန်ဖြစ်လာမှာကိုလည်း စိုးရိမ်တယ်” ဟု KNG ကို ပြောပြခဲ့သည်။

အလားတူ ၂၀၁၁ မှ စစ်ရှောင်ခဲ့ရပြီး မြစ်ကြီးနား နှင့် ၀ိုင်းမော် ဒုက္ခသည်စခန်းများတွင် ၈ နှစ်ခန့် ခိုလှုံနေသော စစ်ရှောင်အများစုကလည်း လုံခြုံမှု အာမခံပေးနိုင်သော အခြေနေရှိချိန်မှ နေရပ်ပြန်ရန် လိုလားနေကြပါသည်။

ကချင်ပြည်နယ်အစိုးရအဖွဲ့ စီမံချက်ဖြင့် ပထမဆုံး မြစ်ကြီးနား နှင့် ၀ိုင်းမော် စစ်ရှောင်စခန်းများမှ Nam San Yang (နမ်ဆန်ယန်) စစ်ရှောင်မိသားစု (၁၇)စုကို တပ်မတော် စစ်ကားများဖြင့် ဇန်န၀ါရီလ (၃၀)ရက်နေ့ နေရပ်ပို့ဆောင်ခဲ့သည်။

၎င်းနောက် အသင်းတော် ဦးဆောင်သော ကချင်စစ်ရှောင်ကူညီရေးကော်မတီ KHCC က စစ်ရှောင်များ လုံခြုံစိတ်ချမှု အာမခံချက်ရှိကာ ကောင်းမွန်စွာနေရပ်ပြန်နိုင်ရေးအတွက် ယခု အစိုးရနှင့် ကချင်လွတ်လပ်ရေးအဖွဲ့ KIO ကို သီးခြားစီ တွေ့ဆုံညှိနှိုင်းမှုများ လုပ်ဆောင်နေခြင်း ဖြစ်သည်။

  • Popular

  • Latest