ကချင်လူငယ်များ ရွေးကောက်ပွဲ စိတ်ဝင်စားလာစေရန် သင်တန်းပေး

လူငယ်စင်တာ၊ မြစ်ကြီးနား

လာမည့် ၂၀၂၀ ရွေးကောက်ပွဲတွင် ကချင်လူငယ်များ၏ စိတ်ဝင်စား ပါဝင်မှု ပိုမိုအားကောင်းလာစေရန်အတွက် လွှတ်တော်ဆိုင်ရာ အသိပညာပေး သင်တန်းတစ်ခုကို ကချင်ပြည်နယ်မြို့နယ် မြစ်ကြီးနားတွင် ယနေ့စတင် ပြုလုပ်နေပါသည်။

သင်တန်းကို ကချင်တစ်မျိုးသားလုံးဆိုင်ရာ လူငယ်များသမဂ္ဂ (All Kachin Youth Union) မှ ဦးဆောင်ပြီး ဧပြီလ ၈ရက်မှ ၉ရက်ထိ လွှတ်တော်အကြောင်း သိကျွမ်းနားလည်သူများကို ဖိတ်ခေါ်ပြီး မန်ခရိန်ရပ်ကွက် Kachin Youth Center တွင် ပြုလုပ်ခြင်း ဖြစ်သည်။

မြန်မာနိုင်ငံအတွင်း လူငယ်များ ၅သန်းကျော်ရှိသည့်အနက် ကချင်လူငယ်များသည် ပြုလုပ်ပြီးခဲ့သောရွေးကောက်ပွဲများတွင် စိတ်ဝင်စားမှု အလွန်နည်းပါးကြောင်း မြင်တွေ့ရသောကြောင့် ၂၀၂၀ ရွေးကောက်ပွဲတွင် ကချလူင်ငယ်များ၏ပါဝင်မှု ပြန်လည်အားကောင်းလာစေရန် ရည်ရွယ်ချက်ဖြင့် ယခုသင်တန်း ပေးရသည်ဟု သင်တန်းတာဝန်ခံ Slg. La Ja က KNG ကချင်သတင်းဌာန ကို ယခုလိုပြောသည်။

“ပြောရမယ်ဆိုရင် မြန်မာပြည်မှာ လူငယ်တွေက ၅သန်းလောက်ရှိတယ်။ အဲ့ဒီထဲမှာမှ ကချင်လူငယ်တွေက လွတ်တော်ပိုင်းဆိုင်ရာကို စိတ်ဝင်စားတဲ့ လူငယ်တွေက အရမ်းအားနည်းတယ်။ ကျနော်တို့က လွတ်တော်ပိုင်းဆိုင်ရာ အကြောင်းအရာ တွေကို နားလည်သဘောပေါက်အောင် ပြောပြဖို့ တာဝန်ရှိတယ်။ ဒါမှလည်း သူတို့က အစိုးရပိုင်းဆိုင်ရာ အကြောင်းအရာတွေ နားလည်လာမယ်။ ပိုပြီးစိတ်ဝင်စားမှုရှိလာမယ်။ အဓိကတော့ ၂၀၂၀ရွေးကောက်ပါပဲ’’ ဟု ဆိုသည်။

လူငယ်များ လွှတ်တော်ဆိုင်ရာအကြောင်းများကို သိရှိရန်အလွန်အထူးလိုအပ်ကြောင်းနှင့် ပြဌာန်ထားသည့် ၂၀၀၈ အခြေခံဥပဒေမှ ဥပဒေပြုရေး၊ တရားစီရင်ရေး၊ အုပ်ချုပ်ရေး ၃ချက်ကိုလေ့လာဖတ်ရှု့မှသာ အထက်ပါအကြောင်းအရာများကို သိရှိမည်ဖြစ်ကြောင်းကို သင်တန်းပို့ချပေးသူ ရှေ့နေ ဒေါ်ဒွဲဘူ က ဆိုပါသည်။

“လူငယ်တွေအနေနဲ့ လွှတ်တော်နဲ့ ပတ်သက်ပြီး သိကို သိထားရမယ့် အချက်တစ်ခုဖြစ်တယ်။ ကိုယ်စားလှယ်တွေကို ဘယ်လိုရွေးချယ်တယ်။ ကိုယ်တိုင် ရွေးကောက်ပွဲတွေမှာ မဲဘယ်လို ထည့်တယ်။ ရွေးကောက်ပွဲအကြောင်းတွေလည်း နားလည်လာမယ်။ ပြီးရင်လွှတ်တော် ကိုယ်စားလှယ်တွေ ဘာလုပ်တယ်။ ဘယ်အလုပ်တွေက သူတို့ရဲ့အလုပ်ဖြစ်တယ်။ ဒါတွေကို သိကိုထားရမယ်ဖြစ်တယ်။ ဘာကြောင့်လဲဆိုတော့ ကိုယ်တိုင်မသိရင် ကိုယ့်ရဲ့ အကျိုးတွေလဲ ဆုံးရှုံးသလိုဖြစ်တယ်။ နောက်တစ်ခုက ကိုယ်စားလှယ်တွေအလုပ် လုပ်တယ် မလုပ်ဘူး ဆိုတာလဲမသိရဘူး” ဟု ဆိုသည်။

ယခုသင်တန်းတွင် လူငယ် ၂၀ခန့် ပါဝင်တက်ရောက်ပြီး ဧပြီလ ၉ရက်နေ့တွင် ကချင်ပြည်နယ်လွှတ်တော်သို့ လက်တွေ့ သွားရောက်လေ့လာမည်ဖြစ်ကြောင်း သိရသည်။

  • Popular

  • Latest