သေမင်းဒီမိုကရေစီမှ အသက်ရှင်သောဒီမိုကရေစီသို့

thein-seinယနေ့သည် ကချင်လူမျိုးတို့ သားစဉ်မြေးဆက် နောင်လာနောက်သားများအတွက် အလေးအနက်ထား ဆုံးဖြတ်ချက်ချကာ ရပ်တည်ရှင်သန်သွားရန် အချိန်ကျရောက်လာပြီဖြစ်သည်။

နိုင်ငံတော်ဝန်ကြီးချုပ် နှင့် စစ်အစိုးရ၏ကြံ့ဖွတ်ပါတီ ခေါင်းဆောင် ဦးသိန်းစိန်က “ကချင်လွတ်မြောက်ရေးအဖွဲ့ (KIO) ကို အရှေ့တောင်အာရှအာဆီယံ (Association of South East Asian Nations) မှာ စံပြအနေနဲ့ ရှင်းပစ်မယ်”  ဟု ခြိမ်းခြောက်ခြင်းသည် မီးခဲပြာဖုံးဖြစ်နေသော ကချင်တမျိုးသားလုံးအား တပ်လှန့်လိုက်သော “တံပိုးမှုတ်သံ” ပင်ဖြစ်နေတော့သည်။  ယင်းတံပိုးသံအား သတိ မမူ ဂူ မမြင်ဘဲနေပါက သေမင်းခေါ်သံအဖြစ်သို့ ပြောင်းလဲသွားလိမ့်မည်။


ဦးသိန်းစိန်သည် ၎င်းတို့သစ္စာခံ ပန်ဝါအခြေစိုက်နယ်ခြားစောင့်တပ်ဖွဲ့ (ယခင် ကချင်ဒီမိုကရေစီသစ်တပ်မတော် (NDA-K)) နှင့် လ၀ါယန်အခြေစိုက်ပြည်သူ့စစ်အဖွဲ့ (ယခင် KIO ခွဲထွက် ဗိုလ်မှူးကြီးလဆန်အောင်ဝါအဖွဲ့) တို့ကိုသာ ဆင့်ခေါ်အသိပေးခြင်း မဟုတ်ဘဲ ကချင်တစ်မျိုးသားလုံးအား ခြိမ်းခြောက်လိုက်ခြင်းဖြစ်သည်။

ဤအချက်မှာ စစ်အစိုးရအဆက်ဆက် ကျင့်သုံးလာသည့် တိုင်းရင်းသားချေမှုန်းရေးပေါ်လစီကို ထုတ်ဖော်လိုက်ခြင်း လည်းဖြစ်သည်။ စစ်မှန်သောပြည်ထောင်စုတည်ဆောက်ရန် ကမ်းလှမ်းသည့် သြဂုတ် ၃၀ KIO ထုတ်ပြန်ချက်ကို လုံးဝပယ်ချကာ ကချင်တိုင်းရင်းသား ချေမှုန်းရေးကိုသာ အများသိ ကြွေးကြော်လိုက်ခြင်းဖြစ်သည်။

KIO လက်နက် မချခြင်းကြောင့်ချေမှုန်းပစ်ရမည်ဟူသော စစ်အစိုးရ၏အမြင်မှာ မှားယွင်းမှုကြီးတစ်ခု ဖြစ်သည်။

အမှန်မြင်သင့်သည်မှာ အဘယ်ကြောင့် KIO လက်နက်ကိုင်ထားရသနည်းဟူသော အချက်သာဖြစ်သည်။ KIO ကြေငြာချက်သည် KIO အတွက်လော။ ကချင်လူမျိုးအတွက်လော။ သို့မဟုတ် ပြည်ထောင်စုတစ်ခုလုံးအတွက်လော။ ဤအချက်များကို ထည့်သွင်းစဉ်းစားရန်လိုသည်။

ကချင်သည် မြန်မာ၏ရန်သူမဟုတ်ပါ
ရှေးပဝေသဏီမှ ယနေ့အထိ ကချင်တို့သည် မည်သူ့ရန်သူမှ မဟုတ်ပါ။ ပြည်ထောင်စုမြန်မာနိုင်ငံလွတ်လပ်ရေးမရခင် ပထမကမ္ဘာစစ်နှင့် ဒုတိယကမ္ဘာစစ်တို့တွင် ကချင်အမျိုးသားများသည် မဟာမိတ်ဖက်မှ (၁၀၁ လေးဝီးစ်တပ် (Lewis)) နှင့် အမေရိကန်ရ်ိန်းဂျားစ်တပ် (American Rangers) တပ်သားများအဖြင့်) ကူညီတိုက်ခိုက်ခဲ့သည်။ ဖက်ဆစ်ဂျပန်တို့ကို ယခုအထက်မြန်မာပြည်မှ မောင်းထုတ်ရာတွင် အဓိက အခန်းကဏ္ဍမှပါဝင်ခဲ့သည်။ လွတ်လပ်ရေးတောင်းဆိုခဲ့စဉ်က ဗမာခေါင်းဆောင်ဗိုလ်ချုပ်အောင်ဆန်းနှင့်အတူ ကချင်အမျိုးသားခေါင်းဆောင်များ ပြည်ထောင်စုမြန်မာနိုင်ငံတော်ကြီး (Union of Burma) ပေါ်ထွန်းလာရေးအတွက် ပါဝင်ကြိုးပမ်းခဲ့သည်။

ဗမာခေါင်းဆောင်ဝန်ကြီးချုပ်ဦးနု၏ပါလီမန်အစိုးရကာလ ကရင်တော်လှန်ရေးကိုတိုက်ခိုက်ချေမှုန်းကာ နိုင်ငံတော်ကို ကယ်တင်ခဲ့သည်။ မြန်မာ့တပ်မတော်တွင်လည်း ကချင်အမျိုးသားများ (ပြင်ဦးလွင်စစ်တက္ကသိုလ်ကျောင်းအုပ်အဖြစ် ဒုတိယဗိုလ်မှူးကြီးအယ်လ်ခွန်နောင်၊ ကချင်ပြည်နယ် မြောက်ပိုင်းတိုင်းစစ်ဌာနချုပ် တိုင်းမှူးများအဖြစ် တိုင်းမှူးလဘန်လ၊ တိုင်းမှူး အယ်လ်ကမ်ဖန် စသည်ဖြင့်) နိုင်ငံ့တာဝန်ကိုကျေပွန်အောင် ထမ်းဆောင်ခဲ့ကြသည်။

သို့သော် လူများစု ဗမာများခေါင်းဆောင်သည့်မြန်မာစစ်အစိုးရအာဏာရှင်များက ကချင်များကိုရန်သူအဖြစ် ကြေငြာခြင်းသည် ၀မ်းနည်းဖွယ်ဖြစ်သည်။

စစ်မှန်သောပြည်ထောင်စုအစား လူမျိုးကြီးဝါဒ ကျင့်သုံးခြင်း

လွတ်လပ်ရေးရချိန်မှ ယခုအချိန်ထိ နိုင်ငံတော်အာဏာကိုဆုပ်ကိုင်ထားသည့် ဗမာခေါင်းဆောင်များသည် အာဏာရှင်စနစ်၊ လူမျိုးကြီးဝါဒ၊ ဗုဒ္ဓဘာသာသွတ်သွင်းခြင်းဝါဒ သုံးခုဖြင့် ခရစ်ယာန်ကချင်တိုင်းရင်းသားများအား ဖိနှိပ်ထားသည်။

“KIO အား အာဆီယံတွင်စံပြအဖြစ် ပထမဆုံးချေမှုန်းမည်” ဟုကြုံးဝါးသော ဗမာခေါင်းဆောင်သိန်းစိန်၏ ဆိုလိုရင်းသည်-

(၁) စစ်မှန်သောဒီမိုကရေစီကို မလိုလားခြင်း
(၂) စစ်မှန်သောပြည်ထောင်စု ဖြစ်ပေါ်လာရေးကို မလိုလားခြင်း
(၃) ပြည်ထောင်စု (Union of Burma) အစ သမိုင်းဝင် ၁၉၄၇ ဖေဖော်ဝါရီ ၁၂ ပင်လုံစာချုပ်ကို ဖျက်ဆီးခြင်း
(၄) စစ်မှန်သောပြည်ထောင်စုပြန်လည်ထူထောင်ရေးကို လိုလားသော တိုင်းရင်းသားလက်နက်ကိုင်တပ်ဖွဲ့အားလုံးကို ရန်သူအဖြစ်သတ်မှတ်ခြင်း
(၅) ပြည်တွင်းပြည်ပ ဒီမိုကရေစီလိုလားသူများကို ရန်သူအဖြစ်သတ်မှတ်ခြင်း
(၆) ပင်လုံစာချုပ်အတိုင်း စစ်မှန်သောပြည်ထောင်စုကို လိုလားသော ကချင်တိုင်းရင်းသားများကို ရန်သူအဖြစ်သတ်မှတ်ခြင်း
(၇) ဒီမိုကရေစီအရေခြုံ စစ်အာဏာရှင်စနစ် ဆက်တည်ဆောက်ခြင်း
(၈) ပြည်ထောင်စုစိတ်ဓာတ်အပြည့်ဖြင့် စစ်မှန်သောဒီမိုကရေစီထူထောင်ရန် ကြိုးပမ်းသော KIO သည်  ပထမဆုံး ချေမှုန်းပစ်ရန်  ရန်သူဖြစ်လာခြင်း
(၉) အာဏာရှင်စနစ်ခိုင်မြဲရေးဝါဒ၊ ဗမာလူမျိုးကြီးစိုးရေးဝါဒ၊ ဗုဒ္ဓဘာသာသွတ်သွင်းရေးဝါဒတို့ကို ဆက်ကျင့်သုံးရန်  
တို့ဖြစ်သည်။

သြဂုတ် ၃၀ ထုတ်ပြန်ကြေငြာချက်ကို ကြည့်ြုခင်းအားဖြင့် KIO သည် ဒီမိုကရေစီပြည့်ဝသည့် စစ်မှန်သောပြည်ထောင်စုမြန်မာနိုင်ငံ ပေါ်ထွန်းလာရေးအတွက် အားထုတ်ကြိုးပမ်းနေသူများသာဖြစ်နေသည်။ ထို့အတူ ယခုအခါ ကချင်လူထုသော်လည်းကောင်း၊ မြန်မာနိုင်ငံသားများသော်လည်းကောင်း မျှော်လင့်သော ပန်းတိုင်မှာ KIO ၏ကြေငြာချက်နှင့် ထပ်တူဖြစ်နေသည်။ လူမျိုး၊ ဘာသာ၊ ဆင်းရဲချမ်းသာ အဆင့်အတန်းခွဲခြားမှုမရှိဘဲ တစ်ပြည်ထောင်သားများအားလုံးသည် စစ်မှန်သောဒီမိုကရေစီပြည်ထောင်စုကြီးကို လိုချင်တောင့်တ နေကြသူများသာဖြစ်သည်။

အလားတူပင် ပြည်တွင်းမှ လက်နက်ကိုင်အဖွဲ့အစည်း၊ လက်နက်မဲ့အဖွဲ့အစည်းအားလုံး၏  “မျှော်လင့်ချက်” နှင့် “ပန်းတိုင်” မှာလည်း တစ်ထေရာတည်းဖြစ်သည်။ စစ်မှန်သော ဒီမိုကရေစီဖြစ်သည်။ ထို့ကြောင့် KIO သည် ၎င်းဒီမိုကရေစီကိုပုံဖော်နေသူများအားလုံးနှင့် မိတ်ဆွေဖြစ်သည်။ ဆိုလိုရင်းမှာ စစ်အစိုးရ၏ KIO အား စံပြအဖြင့်ချေမှုန်းရေးမှာ စစ်မှန်သောပြည်ထောင်စုလိုလားသူ လက်နက်ကိုင်၊ လက်နက်မဲ့ ပြည်တွင်းပြည်ပ အဖွဲ့အစည်းအားလုံးတို့ကိုပါ စစ်ကြေငြာလိုက်ခြင်းဖြစ်သည်။

စစ်အစိုးရသည် ၎င်းတို့မှတစ်ပါး ကျန်လူတန်စားအားလုံးကို လူသားအဖြစ်မမြင်
ယနေ့တိုင်စစ်အစိုးရသည် ၎င်းတို့မှတစ်ပါး ကျန်လူတန်းစားများကို တန်ဖိုးထားခြင်းမရှိပါ။ ဤအချက်ကို ဦးသိန်းစိန်၏ ပြောဆိုချက်က သက်သေပြနေသည်။ ကျန်လူတန်းစားများအား ကျွန်ပြု ခိုင်းစေပြီး ၎င်းတို့ကိုယ်တိုင်မှာ မင်းမျိုးမင်းနွယ်အဖြစ်ခံယူထားပါသည်။ ကျန်လူတန်းစားများအား နေပြည်တော်အတွက် အခွန်ခံစေခြင်း၊  ၎င်းတို့ရာဇသံ နာခံလိုက်လျှောက်စေခြင်း၊ ရှိခိုးကိုးကွယ်စေခြင်းကဲ့သို့ တိရိစ္ဆာန်လို ဆက်ဆံသည်။

မြန်မာစစ်ခေါင်းဆောင်များက ကျန်လူတန်းစားများအား လူရိုင်း၊ တိရိစ္ဆာန်၊ အသိဥာဏ်မဲ့သူများ၊ လူပြိန်း၊ လူနုံ၊ လူအ၊ လူပေ၊ လူတေများ အဖြစ်သာ ယနေ့အထိ ထင်မြင်နေဆဲဖြစ်သည်။ KIO ကိုလည်း ထိုနည်းတူ မြင်နေခြင်းဖြစ်သည်။ ထို့ကြောင့် KIO မှ “စစ်မှန်သောပြည်ထောင်စု” ဟုဆိုစေကာမူ စစ်အစိုးရမှာ “လူလားမမြောက်သေးသောသူများ၏ အဆင့်မရှိသော တောခြောက်သံ” အဖြစ်သာ ပမာမခန့် ထင်မြင်နေဆဲဖြစ်သည်။

ထို့အပြင် စစ်အစိုးရ၏ ဒီမိုကရေစီသည် ၎င်း၏ ကွဲပြားသောတိုင်းရင်းသားလူမျိုးများအား လူမျိုးသုန်းသတ်ဖြတ်ခြင်း (Heterogeneous Genocide) သာဖြစ်သည်။

ယနေ့ စစ်အစိုးရ၏ အာဏာရှင်ဒီမိုကရေစီလမ်းကြောင်းပေါ် လိုက်လျှောက်နေမည်လော။  KIO သည် စစ်မှန်သောပြည်ထောင်စုအတွက် ကြိုးပမ်းနေပြီဖြစ်သည်။ စစ်အစိုးရ၏ ခြောက်လှန့်၊ သတ်ဖြတ်ခြင်းကတစ်မျိုး ချော့မြူ၊ ဖင်ပုတ်ခေါင်းပုတ် မြှောက်ပင့်ပြောဆို ဆက်ဆံခြင်းကတစ်ဖုံ နောက်ဆုံး မျိုးဖြုတ်သတ်ဖြတ်ခံရမည့်ဘ၀တွင် ပြည်သူများ ဆက် အသက်ရှင်နေထိုင်ကြမည်လော။ စိတ်ပိုင်းဖြတ်ကာ အဖြူအမည်း ဆုံးဖြတ်ရန်လိုအပ်ပြီဖြစ်သည်။

အမှန်တရားဘက် လိုက်လျှောက်ခြင်း မရှိသူများအတွက် ခေတ်ကုန်ဆုံးတော့မည်။ ယနေ့ KIO နှင့် ကချင်အမျိုးသားများသည် ရှောင်လွှဲ၍ မ ရသောမျက်မှောက်ကာလမှာ မိမိတို့မှာ လူရိုင်း တိရိစ္ဆာန်များလော။ လူနုံ လူအ လူပြိန်းများ ဖြစ်နေလော။ သို့မဟုတ် မဖြစ်နေလော။ ပညာရှိသလော၊ ပညာ မဲ့ သလော စသည်ဖြင့် မိမိကိုယ်ကိုလက်တွေ့ ပြသရန် အချိန်ကျရောက်လာပြီဖြစ်သည်။ စစ်အစိုးရ၏ လှည့်ဖျားသွေးဆောင်နေမှုအောက် အသက်ရှင်သန်နေသည့်ကာလ ကြာခဲ့ပြီဖြစ်သည်။ ပြောင်းလဲမှုအဘယ်မျှရှိခဲ့သနည်း။

KIO မည်သူနည်းဟူသောမေးခွန်းအတွက်အဖြေ ကြေငြာချက် ထွက်ပေါ်ခဲ့ပြီးဖြစ်သည်။ ဦးသ်ိန်းစိန်၏ KIO အား ချေမှုန်းရေးသည် “လူသားတိုင်း အသက်ရှင်သန်ခွင့်ရှိသောဒီမိုကရေစီနှင့် ပြောင်းပြန်” ဖြစ်နေသည်။

ထို့ကြောင့် KIO သည် မည်သူမည်ဝါဖြစ်ကြောင်း၊ ကချင်အမျိုးသားများသည် မည်သူမည်ဝါဖြစ်ကြောင်း သမိုင်းတွင် စာတင်ဖို့ရန် လက်တွေ့အကောင်အထည်ဖော်ဆောင်ရွက်ဖို့ရန် အချိန်ကျရောက်လာပါပြီ။


  • Popular

  • Latest