မလေးရှားနိုင်ငံမှာကျင်းပတဲ့ သိုင်းပေါင်းစုံ Rage(MMA) Welterweight မှာ ချန်ပီယံသစ်ဖြစ်လာတဲ့ ကချင်သားလေး
မလေးရှားနိုင်ငံအခြေစိုက် သိုင်းပေါင်းစုံ Rage(MMA)Amateur level ချန်ပီယံသစ်ရှာဖွေပွဲမှာ မြန်မာပြည်ဖွား ကချင်သားလေး Joseph Sut Du Aung ဗိုလ်လုပွဲကိုအနိုင်ရပြီး ချန်ပီယံသစ်ဖြစ်လာခဲ့ပြီ ဖြစ်ပါတယ်။
ဒီပြိုင်ပွဲ ကွာလာလမ်ပူမြို့ Lalaport shopping mall the Cage မှာ စက်တင်ဘာ ၇ ရက်နေ့ ကျင်းပခဲ့တာဖြစ်ပြီး ပြိုင်ဘက်ကစားသမားဖြစ်တဲ့ မလေးရှားနိုင်ငံသား Kumarendran ကို ၅ ချီထိကစားကာ အမှတ်နဲ့အနိုင်ရခဲ့တာဖြစ်ပါတယ်။
ဒါပေမယ့် အနိုင်ရရှိတဲ့အပေါ် အားရကျေနပ်မှု သိပ်မရှိခဲ့ဘူးလို့ Joseph Sut Du Aung ခုလိုပြောပါတယ်။
“ပျော်လားဆိုတော့လည်း အဲလောက်မပျော်ဘူး ကျွန်တော်လုပ်ချင်သလောက်မလုပ်လိုက်ရဘူး ဘာလို့လဲဆိုတော့ မထိုးခင် နှစ်ပတ်လောက်မှာ ကျနော့်ပခုံးက ဒဏ်ရာအကြီးကြီးရခဲ့တယ်။ ကျနော်က သူထိုးကိုယ်ထိုးဘဲ ကြိုက်တာ ဒါပေမယ့်လည်း ပခုံးကအနာကြောင့် အမှတ်ရအောင်ဘဲ ဆော့ခဲ့လိုက်ရတယ်”လို့ ဆိုပါတယ်။
Joseph Sut Du Aung ဟာ ကစ်ဘောက်ဆာ ၆ ပွဲထိုးတဲ့ထဲမှာ ၃ ပွဲနိုင် ၃ ပွဲရှုံးထားပြီး သိုင်းပေါင်းစုံ Rage(MMA) ၄ ပွဲမှာ ၄ ပွဲစလုံးအနိုင်ရရှိထားပြီး မလေးရှားနိုင်ငံအခြေစိုက် သိုင်းပေါင်းစုံ Rage(MMA)Amateur level ချန်ပီယံသစ်ရှာဖွေပွဲရဲ့ ချန်ပီယံသစ်ဖြစ်ခဲ့ပြီဘဲ ဖြစ်ပါတယ်။
ဒါ့အပြင် သူ့အနေနဲ့ Rage(MMA)Amateur level မှာ နောက်ထပ် ၃ ပွဲလောက်အတွေ့အကြုံယူပြီးပါက ONE CHAMPIONSHIP မဟုတ်ရင် UFC မှာ ပရိုဖက်ရှင်နယ်အဆင့်အထိ ပြန်လည်ထိုးသတ်သွားချင်တယ်လို့ ခုလိုဆက်ပြောပါတယ်။
“ကျနော် ဘယ်မှာပြန်ထိုးမယ်ဆိုတာကတော့ ဆရာတွေအဖွဲ့အစည်းတွေနဲ့ဆိုင်တယ် ကျွန်တော်ကတော့ ဘယ်မှာဖြစ်ဖြစ်အဆင်ပြေတယ် သွားချင်တာကတော့ ONE CHAMPIONSHIP မဟုတ်ရင် UFC ”လို့ ဆိုပါတယ်။
Joseph Sut Du Aung ဟာ ၁၉၉၇ခုနှစ် ဖေဖော်ဝါရီလ၁၅ရက်နေ့ မွေးဖွားခဲ့တာဖြစ်ပြီး ရန်ကုန် သင်္ကန်းကျွန်းမြို့နယ်မှာဘဲ ကြီးပြင်းခဲ့ပြီး လက်ရှိ မလေးရှားနိုင်ငံမှာ Refugee ( ဒုက္ခသည်) အနေနဲ့ နေထိုင်နေသူလည်းဖြစ်ပါတယ်။
မွေးချင်းညီအစ်ကိုမောင်နှမ ၇ ဦးထဲမှာ အငယ်ဆုံးဖြစ်ပြီး မိဘနှစ်ပါးလုံးကတော့ ဘာသာရေးဆရာတွေဖြစ်တယ်လို့ သိရပါတယ်။
ဒါ့အပြင် သူဟာ ငယ်စဉ်ကတည်းက အစ်ကိုတွေကြောင့် ကရာတေးပညာရပ်နဲ့ထိတွေ့မှုရှိခဲ့တာဖြစ်ပြီး ၂၀၁၇ မှာ အစ်ကိုတွေရှိတဲ့မလေးရှားနိုင်ငံကို အလုပ်လုပ်ဖို့ ရောက်ရှိလာရာကနေ ၂၀၂၀ ဝန်းကျင်ကစပြီး ကစ်ဘောက်ဆာ၊နဘန်းစတဲ့ သိုင်းပေါင်းစုံတွေကိုလေ့လာသင်ယူခဲ့တယ်လို့ သူကဆိုပါတယ်။
By – Hope
