ကချင်ပြည်နယ်၊ မိုးညှင်းမြို့နယ်ရှိ နန့်ပုတ်ကျေးရွာ ချောင်းတံတား ပျဥ်သယ်လာသည့် ကားဖြတ်သန်းစဥ် ကျိုးကျ၍ ကားသမားသေဆုံးမှု ဖြစ်ပွားခဲ့ကြောင်း ဒေသခံများထံမှ သိရသည်။
ဖြစ်စဥ်မှာ မတ်လ ၂၉ ရက်နေ့ညပိုင်းက ဖြစ်ပွားခဲ့ပြီး ပျဥ်တင်လာသည့်ကား နန့်ပုတ်ချောင်းတံတားပေါ်မှဖြတ်သန်းစဥ် ခံနိုင်ဝန်မမျှသဖြင့် တံတားကျိုးကျခဲ့ရာ ကားသမားသေဆုံးခဲ့ကြောင်း ဒေသခံတစ်ဦးက KNG သတင်းဌာနသို့ပြောသည်။
”မနေ့က ညဘက်မှာဖြစ်တာတဲ့ ၇ နာရီဝန်းကျင်ဖြစ်မယ်။ သူကတော့ လမ်းတံတားပါ ကားလမ်းတံတား မဟုတ်ဘူး။ အချိမဆံ့တင်လာတော့ တံတားရဲ့ ခံနိုင်ဝန်ကိုကျော်သွားတော့ သူ့ဟာသူကျိုးကျတာ”ဟု ဒေသခံတစ်ဦးကပြောသည်။
သေဆုံးသွားသော ကားသမားများ၏ ကိုယ်ရေးအချက်အလက်များကို KNG က အသေးစိတ်မသိရှိနိုင်သေးပါ။
အဆိုပါ တံတားသည် နန့်ပုတ်ကျေးရွာအလွန် ယခင် မီးရထားလမ်းဟောင်းအနီးတွင် တည်ရှိသည့် တံတားဖြစ်ပြီး ဒေသခံများက စားဝတ်နေရေး၊ စီးပွားရေးနှင့်အခြား ကိစ္စရပ်များအတွက် အသုံးပြုနေဆဲတံတားလည်းဖြစ်သည်။
