နမ်ဆန်ယန်တွင် စစ်ကောင်စီတပ် ဂျက်ဖိုက်တာ ၃ စီးဖြင့်လာရောက်ဗုံးကျဲတိုက်ခိုက်၊ ကျေးရွာအတွင်း ထိခိုက်ပျက်စီးမှုရှိ
တစ်လဝန်းကျင်ခန့်အကြာ စစ်ရေးတင်းမာမှုဖြစ်ပွားနေသည့် နမ်ဆန်ယန်ကျေးရွာတွင် စစ်ကောင်စီတပ်က ဇူလိုင် ၂၁ ရက်နေ့ ည ၁၁ နာရီဝန်းကျင် ဂျက်ဖိုက်တာ ၃ စီးဖြင့် လာရောက်ဗုံးကျဲသွားကြောင်း သိရသည်။
“၁၁ နာရီလောက်ဖြစ်မယ် ၃ စီးနဲ့လာတိုက်သွားတယ်။ နမ်ဆန်ယန်ရွာထဲမှာကို လာတိုက်သွားတာဟုတ်တယ်။ အချိန်ကတော့ ၁ နာရီခွဲလောက်ပဲကြာတယ်။ လူကတော့ ဘာမှထိခိုက်သေဆုံးတာမျိုးတော့မရှိဘူး”ဟု KIA ရှေ့တန်းသတင်းအရင်းအမြစ်တစ်ဦးက KNG ကိုပြောသည်။
နမ်ဆန်ယန်ကျေးရွာကို စစ်ကောင်စီတပ် လာရောက်ဗုံးကျဲတိုက်ခိုက်မှုတွင် လူသေဆုံးမှုမရှိပေမယ့် ကျေးရွာအတွင်းရှိသော အုပ်ချုပ်ရေးရုံး၊ နေအိမ်တစ်ချို့နှင့် အိမ်မွေတိရိတ္ဆန်များဖြစ်သည့် နွားအကောင်တစ်ချို့ ဗုံးကျည်စ ထိမှန်သေဆုံးမှုရှိခဲ့ကြောင်း သိရသည်။
အဆိုပါ ဂျက်ဖိုက်တာ ၃ စီးသည် မန္တလေးတံတားဦးက ည ၁၀ နာရီဝန်းကျင်အချိန် နမ်ဆန်ယန်ကျေးရွာဘက်ကို ဦးတည် ပျံသန်းလာပြီး လာရောက်ဗုံးကျဲတိုက်ခိုက်သွားကြောင်းသိရသည်။
ပြီးခဲ့သော ဇွန်လဝန်းကျင်က စစ်ကောင်စီတပ်ဖွဲ့သည် နမ်ဆန်ကျေးရွာဘက်ကို စစ်အင်အား အလုံးအရင်းဖြင့် စစ်ကြောင်း ၃ ခုနှင့် စစ်ကြောင်းထိုးဝင်ရောက်နေသည့်အတွက် ကချင်လွတ်လပ်ရေးတပ်မတော် KIA တပ်ဖွဲ့ ကြားထိတွေ့တိုက်ပွဲများပုံမှန်ဖြစ်ပွားနေပြီး စစ်တင်းမာမှုဖြစ်ပွားနေသည်မှာ တစ်လ ဝန်းကျင်ခန့် ကြာမြင့်လာပြီဖြစ်သည်။
နေရပ်ပြန် နမ်ဆန်ယန်စစ်ရှောင်ပြည်သူများလည်း စစ်ကောင်စီတပ်နှင့် KIA တပ်ဖွဲ့တိုးကြား တဖန်တိုက်ပွဲပြင်းထန်လာသောကြောင့် ၎င်းတို့ မူလတိမ်းရှောင်ခဲ့သည့် မြစ်ကြီးနား၊ ဝိုင်းမော် မြို့ပေါ် စစ်ရှောင်စခန်းနေရာများဘက်သို့ ပြန်လည် ထွက်ပြေးတိမ်ရှောင်ခဲ့ရခြင်းဖြစ်သည်။
