KIO ခွင့်ပြုချက်နဲ့တရုတ်ကို မြေရှားတင်ပို့မယ့်စာရရှိတယ်လို့ မြေရှားလုပ်ငန်းရှင်နဲ့နီးစပ်သူတွေပြော
ကချင်လွတ်လပ်ရေးအဖွဲ့ KIO ရဲ့ ခွင့်ပြုချက်နဲ့ တရုတ်နိုင်ငံကို မြေရှားသတ္တုတွေတင်ပို့မယ့်စာရရှိတယ်လို့ မြေရှားလုပ်ငန်းရှင်နဲ့ နီးစပ်သူတွေဆီကသိရပါတယ်။
တရုတ်နိုင်ငံကိုမြေရှားသတ္တုတင်ပို့ခွင့်နဲ့ပတ်သက်လို့ ကချင်လွတ်လပ်ရေးအဖွဲ့ KIO က မတ်လ ၂၇ ရက်နေ့ မှာ ခွင့်ပြုလိုက်တာဖြစ်ကြောင်း ရိုက်တာသတင်းဌာနကရေးသားခဲ့ပါတယ်။
ဒါ့ကြောင့် မြေရှားလုပ်ငန်းရှင်နဲ့နီးစပ်သူတွေကို KNG ကဆက်သွယ်မေးမြန်းကြည့်ရာအခုလိုအကြောင်းပြန်ပါတယ်။
“အော်ဟုတ်ပါတယ်။ တင်ပို့လို့ရပြီဆိုပြီးမှ စာတော့ထွက်လာတယ်။ KIO ထုတ်ပေးတဲ့လုပ်ပိုင်ခွင့်သက်တမ်းကုန်တဲ့အထိ လုပ်ခွင့်ပေးထားတယ်။ ဒီလုပ်ပိုင်ခွင့်သက်တမ်းကတော့ ဒီနှစ်ကုန်ရင်ကုန်ပြီ။ အသစ်လည်းထပ်လျှောက်လို့မရသေးဘူး”လို့ မြေရှားလုပ်ငန်းရှင်နဲ့နီးစပ်တဲ့အမျိုးသားတစ်ဦးကပြောပါတယ်။
မြေရှားသတ္တုတင်ပို့ရာမှာတော့ ကချင်လွတ်လပ်ရေးအဖွဲ့ KIO က အခွန်ခအနေနဲ့ မြေရှားသတ္တုတစ်တန်ကိုယွမ် ၃၅၀၀၀ ကောက်ခံမယ်လို့ မြေရှားလုပ်ငန်းရှင်နဲ့နီးစပ်သူတွေကဆိုပါတယ်။
လက်တလော ကချင်လွတ်လပ်ရေးတပ်မတော် KIO ရဲ့ခွင့်ပြုချက်နဲ့ တရုတ်ကိုမြေရှားသတ္တုတင်ပို့မယ်ဆိုတာနဲ့ပတ်သက်လို့ KIO သတင်းနဲ့ပြန်ကြားရေးတာဝန်ခံဗိုလ်မှူးကြီးနော်ဘူကိုဆက်သွယ်မေးမြန်းကြည့်ရာ အခုလိုပြောပါတယ်။
“အဲ့တာကတော့ ကျနော်တို့သတင်းဌာနအနေနဲ့တော့ဘာမှမကြားမိပါဘူး။ ကျနော်တို့ကို ဘယ်သူမှတရားဝင်ပြောတာလည်း မရှိဘူး။ ဒါ့ကြောင့်ကျနော်ပြောဖို့အဆင်မပြေဘူးခင်ဗျ”လို့ ဗိုလ်မှူးကြီးနော်ဘူက ပြောပါတယ်။
ပြည်သူ့စစ်ခေါင်းဆောင် ဦးဇခုန်တိန့်ယိန်း နှစ်ပေါင်း ၅၈ ခန့ထိန်းချုပ်ခဲ့တဲ့ ကချင်အထူးဒေသ ၁ ဒေသတစ်ခုလုံးကို KIO က ပြီးခဲ့တဲ့ ၂၀၂၄ အောက်တိုဘာလမှာအပြီးသတ်ထိန်းချုပ်သိမ်းပိုက်ခဲ့ပါတယ်။
ဒါ့ကြောင့် အဲ့ဒီဒေသမှာရှိတဲ့ တရုတ်နိုင်ငံသားလုပ်ငန်းရှင်တွေရဲ့ ရာနဲ့ချီတဲ့ မြေရှားသတ္တုတွေကိုလည်း KIO ကရလိုက်သလို မြေရှားသတ္တုတူးဖော်ရေးလုပ်ငန်းတွေအားလုံးပိတ်ထားခဲ့တဲ့အပြင် မြေရှားသတ္တုတင်ပို့ခွင့်တွေပါရပ်နားသွားတာ ဒီနေ့အထိ ဖြစ်ပါတယ်။
တစ်ဖက်မှာ မြေရှားသတ္တုထွက်တဲ့ ကချင်အထူးဒေသ ၁ ကို KIA ကထိန်းချုပ်လိုက်ချိန်ကစလို့ တရုတ်နိုင်ငံကို မြေရှားသတ္တု တင်ပို့မှုတွေက သိသိသာသာကျဆင်းသွားတယ်လို့ တရုတ်အကောက်ခွန်စာရင်းတွေမှာဖော်ပြထားပါတယ်။
ဒါပေမဲ့ ရိုက်တာသတင်းဌာနရဲ့အဆိုအရတော့ KIO နဲ့ ပြည်သူ့စစ်၊နယ်ခြားစောင့်တပ်တွေရဲ့ တိုက်ပွဲအပြီး ကချင်အထူးဒေသ ၁ ကို KIO ကထိန်းချုပ်ပြီးတဲ့နောက် ၂၀၂၄ အောက်တိုဘာလမှာဘဲ မြေရှားသတ္တုတူးဖော်ရေးလုပ်ငန်းတွေစတင်ခဲ့တယ်လို့ ရေးသားထားပါတယ်။
လက်ရှိ မြန်မာနိုင်ငံကနေ တရုတ်ကိုတင်ပို့နေတဲ့ မြေရှားသတ္တု ၁ တန်ကို တရုတ်ငွေယွမ် ၁သိန်း ၇ သောင်းပေါက်ဈေးရှိတယ် လို့မြေရှားလုပ်ငန်းရှင်နဲ့နီးစပ်သူတွေဆီကသိရပါတယ်။
ကချင်ပြည်နယ်မှာ ချီဖွေမြို့နယ်ဟာ မြေရှားတူးဖော်မှုအများဆုံးဒေသဖြစ်ပြီး အာဏာသိမ်းမှုအလွန်မှာ မြေရှားသတ္တုတူးဖော်တဲ့လုပ်ကွက်တွေ သုံးဆဝန်းကျင်တိုးလာတယ်လို့ ISP Myanmar က မြန်မာ့မြေရှားအကြောင်းသိဖွယ် ၅ ချက်ခေါင်းစဥ်နဲ့ ထုတ်ပြန်ချက်ထဲမှာ ဖော်ပြထားပါတယ်။
၂၀၁၃–၂၀၂၄ အထိ ၁၂ နှစ်အတွင်းပေါ်ပေါက်လာတဲ့ မြေရှားလုပ်ကွက်ပေါင်း ၃၇၀ ထက်မနည်းရှိပြီး အဲ့ဒီထဲက လုပ်ကွက် ၂၄၀ ကျော်ဟာ အာဏာသိမ်းပြီးနောက်ပိုင်းပေါ်ပေါက်လာတာလို့ ထုတ်ပြန်ချက်ကဆိုပါတယ်။
မြန်မာနိုင်ငံကနေ တရုတ်နိုင်ငံကို ၂၀၁၇–၂၀၂၄ ခုနှစ်အထိ ရှစ်နှစ်အတွင်း မြေရှားသတ္တုတင်ပို့မှုဟာ အမေရိကန်ဒေါ်လာ ၄ ဒသမ ၂ ဘီလီယံကျော်ရှိသလို အဲ့ဒီထဲက အမေရိကန်ဒေါ်လာ ၃ ဒသမ ၆ ဘီလီယံဟာ အာဏာသိမ်းပြီးနောက်ပိုင်း လေးနှစ် အတွင်းမှာတင်ပို့ခဲ့တာလို့ ISP Myanmar ရဲ့ထုတ်ပြန်ချက်အရသိရပါတယ်။
By – အမိုး
