ဖားကန့်မှာလက်နက်ကြီးကျလို့ မိခင်ဖြစ်သူသေဆုံး၊ ကလေးငယ် ၂ ဦးဒဏ်ရာပြင်းထန်
ကချင်ပြည်နယ် ဖားကန့်မြို့ လုံးခင်းအုပ်စုမှာ မနေ့ညက လက်နက်ကြီးကျရောက်ပေါက်ကွဲလို့ အသက် ၃၇နှစ်အရွယ် ကလေးနှစ်ယောက်ရဲ့ မိခင်သေဆုံးခဲ့ရပါတယ်။
လုံးခင်းကျေးရွာအုပ်စု မှော်စီစာကျေးရွာအပိုင်ဖြူစင်ကုန်းက နေအိမ်တချို့ပေါ်ကျရောက်ပေါက်ကွဲခဲ့တာဖြစ်ပြီး အသက် ၁၅ နှစ်အရွယ်သမီးဖြစ်သူရဲ့လက်လည်းဖြတ်လိုက်ရသလို ၁၃ နှစ်အရွယ်သားဖြစ်သူကတော့ အပြင်းအထန်ဒဏ်ရာရရှိခဲ့တယ်လို့သိရပါတယ်။
ဖြစ်စဥ်ကတော့ မနေ့ကညပိုင်း ၈ နာရီကျော်လောက်မှာဖြစ်ပွားခဲ့တာဖြစ်ပြီးတော့ ဒီလက်နက်ကြီးဟာ စစ်ကောင်စီရဲ့ဗျူဟာကုန်းကနေပစ်ခတ်တာဖြစ်နိုင်တယ်လို့ ဒေသခံအမျိုးသားတစ်ဦးကခန့်မှန်းပြောပြပါတယ်။
“ဗျူဟာကုန်းကနေပစ်လိုက်တယ်လို့ယူဆရပါတယ်။ ဘာလို့ဆို မီးခိုးတန်းကြီးကအဲ့ဘက်နေထွက်လာတာဆိုတော့လေ။ အဲ့ဒီလက်နက်ကြီးက လုံးခင်းအုပ်စုက Wifi သုံးတဲ့ဆိုင်ပေါ်ကျတာ။ အဲ့ဒီအိမ်ထဲမှာလိုင်းသုံးနေသူတွေရော အဲ့ဘေးပတ်ဝန်းကျင်ကသူတွေရောထိပြီး တစ်ဦးသေဆုံးသွားတာပေါ့”လို့ပြောပါတယ်။
တစ်ဖက်မှာ အသက် ၂၀ ကျော်နဲ့ ၃၀ကျော်အရွယ် နောက်ထပ်အမျိုးသားနှစ်ဦးလည်းထိခိုက်ဒဏ်ရာရရှိခဲ့ပြီး နေအိမ်တစ်ချို့ထိခိုက်ပျက်ဆီးခဲ့ရတယ်လို့ဒေသခံတွေကပြောပါတယ်။
ဖားကန့်ဒေသမှာ လက်လွတ်လိုက်ရတဲ့နေရာတွေကို ပြန်ရဖို့အတွက် စစ်ကောင်စီတပ်က ပြီးခဲ့တဲ့ မေလနောက်ဆုံးအပတ်ကစတင်ပြီး စစ်အင်အားအလုံးအရင်းနဲ့စစ်မျက်နှာနှစ်သုတ်ခွဲပြီး ဝင်ရောက်လာနိုင်ခဲ့တာဖြစ်ပါတယ်။
ဒါ့အပြင်မကြာခဏ နှစ်ဖက်တပ်တွေထိတွေ့တိုက်ပွဲဖြစ်လေ့ရှိသလို စစ်ကောင်စီတပ်ကလည်း လေကြောင်းအသုံးပြုတိုက်ခိုက်တာတွေပါရှိတဲ့အခြေနေလို့ ဒေသခံတွေကပြောပါတယ်။
“စစ်ရေးအခြေနေကတော့ တအားကြီးပြင်းထန်နေတဲ့အနေအထားတော့မဟုတ်ဘူး။ဒီတိုင်းပဲစစ်ဆိုင်နေတဲ့အနေအထားဟုတ်ယ်။ မထင်ရင်မထင်သလိုတော့ ရှေ့တိုးလာရင်ပစ်လိုက်အဲ့လိုအနေအထားတွေတော့ရှိပါတယ်”လို့ဖားကန့်မြို့ရဲ့လက်ရှိအခြေနေကို အထက်ပါဒေသခံကဆက်ပြောပြပါတယ်။
တစ်ဖက်မှာ ဖားကန့်မြို့မှာ ကုန်စည်ဈေးနှုန်းတွေကလည်းဆက်လက်မြင့်တက်နေဆဲဖြစ်ပြီး ဖားကန့်မြို့ကိုဝင်ရောက်နိုင်တဲ့လမ်းကြောင်းတစ်ခုက အင်းတော်ကြီးဒေသမှာလည်း ကချင်လွတ်လပ်ရေးတပ်မတော် KIA ပူးပေါင်းတပ်တွေနဲ့ ရှမ်းနီအမျိုးသားတပ်မတော် SNA ပူးပေါင်းတပ်တွေအကြားတိုက်ပွဲတွေပြင်းထန်နေပါတယ်။
ဖားကန့်ဒေသထဲကို ကုန်စည်စီးဆင်းနေတဲ့ ကားမိုင်း – နန့်ယားလမ်းကြောင်းနဲ့ အင်းတောင်းကြီး – ဂွေခါလမ်းကြောင်း နှစ်ခုစလုံးကို စစ်ကောင်စီဘက်ကဖြတ်သန်းခွင့်ပိတ်ထားဆဲဖြစ်ပါတယ်။
ကားမိုင်း – နန့်ယား ကားလမ်းပိုင်းကို ပြီးခဲ့တဲ့ ဧပြီလကတည်းက ဖားကန့်ဒေသထဲကို စစ်ကောင်စီတပ်တွေ စစ်ကြောင်း ဝင်ရောက်လာချိန် KIA က သွားလာခွင့်ပိတ်လိုက်ပြီး ဇူလိုင်လ ၁၆ ရက်နေ့ ပြန်ဖွင့်ပေးလိုက်တာဖြစ်ပါတယ်။
အခုလို KIA ဘက်ကနေ လမ်းကြောင်းကို ပြန်ဖွင့်ပေးခဲ့ပေမဲ့ နန့်တိန့်ကျေးရွာအထက်ပိုင်းကနေ ဖားကန့် လုံးခင်းကျေးရွာအထိ စစ်တပ်က ထိန်းချုပ်ထားတာကြောင့် ယနေ့အထိ သွားလာခွင့်ပိတ်ထားဆဲလို့သိရပါတယ်။
တိုက်ပွဲဖြစ်ပွားကတည်းက ဖားကန့်ဒေသထဲကို အင်းတော်ကြီး – ဖားကန့် ဂွေခါလမ်းတစ်ခုတည်းကနေ ကုန်ကားတွေ သွားလာခွင့်ရရှိနေပေမယ့် အဲဒီလမ်းပိုင်းမှာအဓိက စစ်ရေးလှုပ်ရှားနေတဲ့ စစ်တပ်နဲ့ ရှမ်းနီ SNA တပ်တွေက လမ်းပိုင်းကို ဖွင့်လိုက် ပိတ်လိုက်နဲ့ ကန့်သတ်ချက်တွေနဲ့ သွားလာနေရတယ်လို့ ဒေသခံတွေကပြောကြပါတယ်။
By – အမိုး
