ကချင်ပြည်နယ်၊ မံစီမြို့နယ်၊ နမ်ဆာကျေးရွာက နေရပ်ပြန်ပြည်သူတွေအတွက် နေရာထိုင်ခင်းနဲ့ ကျန်းမာရေးစောင့်ရှောက်မှုအကူအညီတွေလိုအပ်နေတယ်လို့ စစ်ရှောင်တာဝန်ခံတွေဆီကနေ သိရပါတယ်။
နမ်ဆာကျေးရွာမှာ ပြီးခဲ့တဲ့ ဖေဖော်ဝါရီလကရောက်ရှိလာကြတဲ့ အိမ်ခြေ ၅၀ ကျော်နဲ့ မတ်လ ၁၈ရက်နေ့ ပြန်လည်ရောက်ရှိလာကြတဲ့ အိမ်ခြေ ၂၁ အိမ်၊ စုစုပေါင်း အိမ်ခြေ ၇၀ ကျော်နဲ့ လူဦးရေ ၃၀၀ ဝန်းကျင်ပြန်လည်ရောက်ရှိနေပြီ ဖြစ်တယ်လို့ သိရပါတယ်။
ဒါပေမယ့် ဆယ်စုနှစ်ကျော်စွန့်ခွာခဲ့ရတဲ့ ရွာဖြစ်တာကြောင့် နေအိမ်တွေ အကုန်ပျက်စီး ယိုယွင်းသွားခဲ့ပြီဖြစ်တဲ့အတွက် နေအိမ်တွေပြန်ဆောက်ဖို့ သွပ်၊ မိုးကာ အကူအညီတွေ လိုအပ်နေတယ်လို့ စစ်ရှောင် တာဝန်ခံတစ်ဦး KNG ကို ခုလိုပြောပြပါတယ်။
“တဲအိမ်တွေဆောက်တဲ့နေရာမှာတော့ ကျွန်တော်တို့တောရွာမှာက သစ်၊ ဝါးတွေက အဆင်ပြေသလို ခုတ်ယူလို့ရတယ် ပိုက်ဆံပေးစရာမလိုဘူး ။ ဒါပေမယ့်လည်း အမိုးအတွက် သွပ်မရရင်တောင် ပလပ်စတစ် မိုးကာတွေ ကူညီပေးဖို့ တောင်းဆိုချင်တာပေါ”လို့ဆိုပါတယ်။
လက်ရှိ ကျေးရွာထဲပြန်လည်ရောက်ရှိလာတဲ့သူတွေထဲမှာ မသန်စွမ်းဖြစ်နေတဲ့ သက်ကြီးရွယ်အို ၅ ဦး၊ နို့တိုက်အရွယ် မိခင်နဲ့ကလေး ၄ ဦး နဲ့ စာသင်အရွယ်ကလေးသူငယ် ၇၀ ဝန်းကျင်ထိရှိတယ်လို့သိရပါတယ်။
ဒါပေမယ့် လက်ရှိနမ်ဆာကျေးရွာမှာနေရပ်ပြန်နေတဲ့ကျေးရွာဖြစ်ပြီး ဆေးပေးခန်း၊ ဆေးရုံတွေမရှိတဲ့သေးတဲ့အတွက် နေရပ်ပြန်ပြည်သူတွေဟာ အရေးပေါ် ကျန်းမာရေးစောင့်ရှောက်မှုတွေလည်း လိုအပ်နေတယ်လို့ ဆက်ပြောပါတယ်။
“တောင်ပေါ်ပြန်ရောက်တော့ ဆေးခန်းတွေမရှိတဲ့အတွက် သူတို့အတွက် စိုးရိမ်တာတွေလည်း ရှိတာပေါ့။ ဒါပေမယ့်လည်း သက်ဆိုင်တဲ့ တာဝန်ရှိသူတွေအနေနဲ့ အချိန်မှီ လုပ်ဆောင်ပေးမယ်လို့တော့ သူတို့ မျှော်လင့်နေကြတာပေါ့”လို့ စစ်ရှောင်တာဝန်ခံက ပြောပါတယ်။
နမ်ဆာကျေးရွာပြည်သူတွေဟာ ပြီးခဲ့တဲ့ ၂၀၁၁ ခုနှစ်တစ်ကြော့ပြန် တိုက်ပွဲဖြစ်ကတည်းကနေ မန့်ဝိန်းကြီးမြို့နယ်ခွဲ အင်ဘာပါကျေးရွာအနီး လနားဇွပ်ဂျာစစ်ဘေးရှောင်စခန်းမှာ တိမ်းရှောင်နေခဲ့တာ ဖြစ်ပြီး ၂၀၂၆ ခုနှစ် ဖေဖော်ဝါရီကစပြီး နေရပ်ပြန်နေကြပြီဖြစ်ပါတယ်။
နမ်ဆာကျေးရွာဟာ အိမ်ခြေ ၄၀၀ နီးပါးရှိပြီး လူဦးရေ တစ်ထောင်ကျော်ရှိတဲ့ ကျေးရွာဖြစ်တယ်လို့လည်း သိရပြီး လက်ရှိ အိမ်ခြေ ၇၀ ကျော်ရောက်ရှိလာပြီဖြစ်တယ်လို့ သိရပါတယ်။
ဒါပေမယ် ရွာမှာမူလတန်းကျောင်းအထိသာရှိနေသေးတဲ့အတွက် ကျောင်းတွေသေချာဖွင့်လှစ်ပေးဖို့ လိုအပ်နေသလို တစ်ဖက်မှာလည်း အထက်တန်းကျောင်းမရှိသေးတဲ့အတွက် တစ်ချို့အိမ်ထောင်စုတွေ ကလေးတွေရဲ့ပညာရေးကြောင့် နေရပ်ပြန်မလာသေးသူးတွေလည်း ရှိနေတယ်လို့သိရပါတယ်။
ဒါကြောင့် သက်ဆိုင်ရာတာဝန်ရှိသူတွေအနေနဲ့စာသင်ကျောင်းတွေကို စနစ်တကျအမြန်ဖွင့်ပေးဖို့ တောင်းဆိုနေကြပါတယ်။
ကုလသမ္မဂဒုက္ခသည်များဆိုင်ရာမဟာမင်းကြီးရုံး(UNHCR) ရဲ့ ၂၀၂၄ ဩဂုတ်လ ထုတ်ပြန်ချက်မှာ တစ်ကြော့ပြန် တိုက်ပွဲဖြစ်တဲ့ ၂၀၁၁ခုနှစ်ကနေ ၂၀၂၁ ဖေဖော်ဝါရီထိ စစ်ရှောင် ဦးရေဟာ ၁၁၀,၅၀၀ ရှိတာဖြစ်ပြီး ၂၀၁၁ခုနှစ်ကနေ ၂၀၂၅ ဇွန်လထိ ၁၄နှစ်အတွင်း ၂၃၂,၉၀၀ ဦးရှိခဲ့တယ်လို့ သိရပါတယ်။
၂၀၁၁ ဇွန်လကနေ ၂၀၂၁ခုဖေဖော်ဝါရီလအထိ ရှိခဲ့တဲ့ စစ်ရှောင်ဦးရေနဲ့ ၂၀၁၁ဇွန်လကနေ ၂၀၂၅ဇွန်လထိ ရှိခဲ့တဲ့ စစ်ရှောင်ဦးရေတွေကို နှိူင်းယှဉ်လိုက်လို့ရှိရင် ကချင်ဒေသမှာ ၄နှစ်အတွင်း စစ်ရှောင်ဦးရေ ၁၂၂,၄၀၀ဦး ထိတိုးလာတာဘဲ ဖြစ်ပါတယ်။
By – Hope
