ပန်ဝါမြို့အနီး မြေရှားလုပ်ကွက်မြေပြိုပြီး လုပ်သားတစ်ဦးသေဆုံး
ချီဖွေ– ပန်ဝါကြား မြေရှားလုပ်ကွက်တစ်ခုမြေပြိုမှုဖြစ်ပြီး လုပ်သားတစ်ဦးသေဆုံးသွားတယ်လို့ မြေရှားလုပ်သားတွေဆီကနေ သိရပါတယ်။
ဧပြီ ၁၈ ရက်နေ့ ဒီနေ့ညနေ ၆ နာရီခွဲဝန်းကျင် ချီဖွေကနေတက်လာရင် ပန်ဝါမရောက်ခင် လုပြည်ရွာနားက မြေရှားကုမ္ပဏီတစ်ခုမြေပြိုမှုဖြစ်တာလို့ ဆိုပါတယ်။
“ချီဖွေ–ပန်ဝါကားလမ်းမဘေးမှာပဲ မြေရှားလုပ်ကွက်တောင်ပြိုလာတာဟုတ်တယ်။ သူတို့ ရေအရမ်းများထည့်လိုက်လို့ထင်တယ်။ အလုပ်သမားတစ်ဦး ပါသွားတယ်”လို့ပန်ဝါရှိ မြေရှားလုပ်သားတစ်ဦးက ပြောပါတယ်။
လုပြည်ရွာမရောက်ခင် တစ်မိုင်လောက်အလိုမှာ အရင်ကတည်းက လုပ်နေတဲ့တစ်ခုထဲရှိတဲ့ ကုမ္ပဏီလုပ်ကွက်ဖြစ်တယ်လို့ သိရပါတယ်။
မြေပြိုမှုထဲမှာ မြေရှားလုပ်သားတစ်ဦး အသက်သေဆုံးသွားပြီး အခြားထိခိုက်တာတွေတော့ မရှိဘူးလို့ သိရပါတယ်။
လက်ရှိ လုပ်ကွက် မြေပြိုမှုဖြစ်ပွားတဲ့ နေရာက ချီဖွေ – ပန်ဝါကားလမ်းမ အပေါ်ဘက်ကပ်ရပ်မှာဖြစ်ပြီး အထက်ကနေ ပြိုကျလာတဲ့ နွံတွေ လမ်းမကြီးမှာ ပိတ်နေတယ်လို့ ဆက်လက်သိရပါတယ်။
“မိုးတောင်မရွာဘူး ဒီနေ့တစ်နေကုန်နေပူတယ်။ သူတို့တောင်မှာ ရေထည့်တာတော်တော်များသွားပုံရတယ်။ ကားလမ်းမကြီးအထက်မှာပဲဆိုတော့ တောင်ပြိုလာတာ လမ်းတွေပိတ်ကုန်တယ်။ အခုဆက်ပြီး ပြိုနေတုန်းဟုတ်တယ်။ ဘတ်ဖောတွေလည်း အဆင့်သင့်တော့စောင့်နေတယ်။ နွံတွေဖယ်ဖို့”အထက်ဖော်ပြပါမြေရှားလုပ်သားတစ်ဦးပြောပါတယ်။
တောင်ပြိုပြီး နွံတွေလမ်းပေါ်မှာ ပိတ်ဆို့နေတာကြောင့် လမ်းသွားလမ်းလာလည်း ကား၊ဆိုင်ကယ်တွေပိတ်မိနေတယ်လို့ ပြောပါတယ်။
ပန်ဝါမှာ မြေပြိုမှုတွေ မကြာခဏဖြစ်ပွားနေပြ အလုပ်သမားတွေ အသက်သေဆုံးမှုဖြစ်စဉ် ၂၀၂၆ ခုနှစ် ဒီနှစ်အတွင်း အခုပထမဆုံးအကြိမ်လို့ စုံစမ်းသိရှိရပါတယ်။
နှစ်စဉ် ပန်ဝါမှာမြေပြိုမှုဖြစ်ပြီး လူသေဆုံးမှုဖြစ်စဉ်တွေ ဖြစ်ပွားနေတာလည်းဖြစ်ပါတယ်။
By – ဂျာဘောက်ရာ
