ကသာစစ်ဘေးရှောင်တွေ မိုးလေဒဏ်၊ နေပူဒဏ်ကြား နေထိုင်ရေးခက်ခဲ

စစ်ကိုင်းတိုင်း– ကချင်ပြည်နယ်အစပ် ထီးချိုင့်မြို့နယ်က စစ်ကော်မရှင်စစ်ကြောင်း ကသာမြို့ကိုဝင်ရောက်လာလို့ ထွက်ပြေးနေရတဲ့ ဒေသခံစစ်ဘေးရှောင်တွေ မိုးဒဏ်၊လေဒဏ်နဲ့နေပူဒဏ်တွေအကြားနေထိုင်ရေးနဲ့စားသောက်ရေးအခက်ကြုံနေရတယ်လို့ ဒေသခံတွေဆီကသိရပါတယ်။

ပြီးခဲ့တဲ့ သင်္ကြန်အကြိုနေ့ ဧပြီလ ၁၃ ရက်နေ့ကစလို့ စစ်ကော်မရှင်ရဲ့စစ်ကြောင်းဟာ ကသာမြို့နဲ့ထီးချိုင့်နယ်အစပ် ဧရာဝတီမြစ် ကြောင်းအတိုင်း စစ်ကြောင်းထိုးလာတာဖြစ်ပြီး ဒီကနေ့နောက်ဆုံးသိရတဲ့သတင်းတွေအရတော့ ကသာမြို့နယ်ဧရာဝတီမြစ်ကမ်း နဘေးက ကလုံကျေးရွာတစ်ဝှိုက်မှာလို့သိရပါတယ်။

စစ်ဘေးရှောင်တွေရဲ့အခြေနေနဲ့ပတ်သက်လို့ စစ်ဘေးရှောင်ဒေသခံတစ်ဦးက“ဒုက္ခတော့ရောက်ကြတယ်။ မိုးထဲလေထဲအိပ်ရ၊ နေ့လည်ကျ နေကပူပူနဲ့အကိူရေ။ တချို့က စားစရာသောက်စရာတွေ တော့မပါခဲ့ ကြဘူး။ အဲ့တာဆိုတော့ ပါတဲ့လူတွေကမျှတပြီးကျွေးရတာပေါ့။ တချို့တွေလည်း ရွာထဲပြန်ဝင်ကုန်ကြပြီ။ ကျနော်တို့တော့ သူတို့ ကိုမယုံဘူး။ ရှောင်နေတုန်း”လို့ပြောပါတယ်။

အဲ့ဒီစစ်ကြောင်းဝင်ရောက်လာတဲ့နေ့ကစလို့ ဒီကနေ့အထိ ထီးချိုင့်မြို့နယ်ထဲက ဇီးကုန်း၊ ကျောက်မှော်၊  နတ်အင်း၊ အိုးကုန်း၊ မဲဟင်း နဲ့ ကသာမြို့နယ်ထဲက သာဂရ၊ အင်းရွာလေး၊ ကလုံ၊ ကျောက်ပုံ၊ သံပုရာ၊ ညောင်ခြေထောက် စတဲ့ကျေးရွာဆယ်ရွာထက် မနည်းကဒေသခံတွေဘေးလွတ်ရာတွေမှာထွက်ပြေးတိမ်းရှောင်နေကြရတာပါ။

ဒီကျေးရွာတွေအားလုံးဟာ ထီးချိုင့်–ကသာမြို့နယ် ဧရာဝတီမြစ်ကမ်းနဘေး တစ်လျှောက်ကကျေးရွာတွေပဲဖြစ်ပါတယ်။

တစ်ဖက်မှာ ထီးချိုင့်မြို့နယ်ကနေစစ်ကြောင်းထိုးလာတဲ့တပ်ဖွဲ့တွေကို ကသာမြို့နယ်အထိုင်စစ်ကော်မရှင်တပ်ဖွဲ့တွေက စစ်ကြောင်း ထွက်ကြိုဆိုကာ စစ်ကြောင်းနှစ်ကြောင်းပေါင်းမယ့်အခြေနေရှိနေတယ်လို့လည်း စစ်ရေးသတင်းရင်းမြစ်တွေကပြောပါတယ်။

“ထီးချိုင့်ကနေ ကသာကိုလာပြီးတက်လာပေါင်းနေတဲ့အဖွဲ့ကတော့ ကလုံရွာကိုရောက်ထားပြီ။ အဲ့ဒီအဖွဲ့ကို ကသာကနေ ဆင်းကြိုတဲ့ စစ်ကောင်စီက သင်္ကြန်အကြိုနေ့မှာဘဲ ရေဘုတ်ရွာနားလေးမှာ တိုက်ပွဲဖြစ်ခဲ့တယ်ဆိုတာတော့သတင်းရတယ်။ အခုလောက်ဆိုတော့ သွားကြိုတဲ့အဖွဲ့နဲ့တွေ့လာမတွေ့ဘူးလာဆိုတာတော့ တိတိကျကျမသိရသေးဘူး။”လို့ စစ်ရေးသတင်းရင်းမြစ်တစ်ဦးကပြောပါတယ်။

စစ်ကော်မရှင်တပ်ဖွဲ့ဟာ ထီးချိုင့်မြို့၊တကောင်းမြို့တို့ကိုထိန်းချုပ်ပြီးတဲ့နောက်ပိုင်းကစလို ဧရာဝတီမြစ်ကမ်းတစ်လျှောက်ကို ပြန်လည်ထိန်းချုပ်ဖို့အတွက် ကြိုးစားလာနေတာဖြစ်ပြီး စစ်ကိုင်းနဲ့ကချင်အစပ်ဒေသတွေမှာတိုက်ပွဲတွေဖြစ်လာနိုင်တယ်လို့ စစ်ရေးလေ့လာသုံးသပ်သူတွေကခန့်မှန်းထားပါတယ်။

စစ်ကောင်စီတပ်ဟာ ဧရာဝတီမြစ်ရေတက်ချိန်ဖြစ်တဲ့ မိုးတွင်းကာလတိုင်းကိုမြစ်ကြောင်းကို အသုံးချကာ မန္တလေးမြို့ကနေ ဗန်းမော်မြို့အထိ နှစ်စဥ်နှစ်တိုင်းလိုလို စစ်သင်္ဘောကြီးတွေနဲ့ လေကြောင်းအင်အားပါအသုံးပြုကာ စစ်လက်နက် ရိက္ခာများ တင်ပို့လေ့ရှိ တာဖြစ်ပါတယ်။

ဒါ့ကြောင့် အခုလို ကချင်ပြည်နယ်ရဲ့ဝင်ပေါက်လည်းဖြစ်တဲ့ စစ်ကိုင်း– ကချင်အစပ်ကိုထိန်းချုပ်ဖို့ကြိုးစားလာတာလို့ စစ်ရေးနဲ့ နိုင်ငံရေးလေ့လာသုံးသပ်သူတွေကပြောကြပါတယ်။

By – အမိုး