-
Nov- 2024 -18 Novemberသတင်း
ကွတ်ခိုင်လေကြောင်းတိုက်ခိုက်ခံရမှု နှစ်လသားအရွယ်ကလေးတစ်ဦးအပါအဝင် ၃ ဦးသေဆုံး၊ သေဆုံးမှု ဆက်ရှိနိုင်သေး
ရှမ်းပြည်နယ်မြောက်ပိုင်း ကွတ်ခိုင်မြို့ ရပ်ကွက် ၄ ရှိ တရုတ်နှစ်ခြင်းခရစ်ယာန်ဘုရားကျောင်းအနီးတစ်ဝိုက် လေကြောင်းတိုက်ခိုက်ခံရမှုမှာ နှစ်လသားအရွယ်ကလေးတစ်ဦးအပါအဝင် ၃ ဦးသေဆုံးခဲ့ရတယ် လို့ ဒေသခံတွေကပြောပါတယ်။ မနေ့က နိုဝင်ဘာလ ၁၇ ရက် ည ၁၂ နာရီဝန်းကျင် စစ်ကောင်စီတပ်က လေကြောင်းကနေ ပေါင် ၅၀၀ ဗုံးဖြင့် ကြဲချတိုက်ခိုက်ခဲ့တာလို့သိရပြီး ဒီဖြစ်စဥ်မှာ နှစ်လသားအရွယ်ကလေးတစ်ဦး၊ အမေဖြစ်သူ နဲ့ အဖွားအိုတစ်ဦး သေဆုံးခဲ့ရတာလို့ သိရပါတယ်။ ဒါ့အပြင် ထိခိုက်ဒဏ်ရာရရှိသူက ၁၀ ဦးထက်မနည်းရှိပြီး သေဆုံးမှုဆက်ရှိနိုင်သေးတယ်လို့ ဒေသခံတစ်ဦး က အခုလိုပြောပါတယ်။ “ဖျက်အားပြင်းတဲ့ဗုံးပါ ပေါင် ၅၀၀ ဗုံးတစ်လုံးပဲချသွားတာ၊အရပ်သားက မနေ့ညအထိတော့ ၃ ယောက် သေဆုံးတယ်။ ဒီထက်တောင်မကလောက်ဘူး၊ နောက်ထပ် သေဆုံးနိုင်သေးတယ်။ ၁၀ ယောက်ဒဏ်ရာရ တဲ့ထဲ ၇ ယောက်ကအခြေနေမကောင်းဘူးပြောတယ်။ တစ်ချို့ဆို လူကအစအနပါပျောက်သွားတယ်တဲ့”လို့ပြောပါတယ်။ တစ်ဖက်မှာ လူနေအိမ် ၅ လုံး လုံးဝပြိုကျပျက်ဆီးသွားသလို တရုတ်နှစ်ခြင်း ခရစ်ယာန်ဘုရားကျောင်း နဲ့ ရေထွက်ဦးပန်ခြံဈေးက ဆိုင်ခန်းတစ်ချို့လည်းပျက်ဆီးခဲ့ရတယ်လို့ ဒေသခံတွေကပြောပါတယ်။ အဆိုပါ လေကြောင်းတိုက်ခိုက်ခံရမှုမှာ ထိခိုက်ပျက်ဆီးမှုတွေရှိခဲ့တဲ့ ရေထွက်ဦးပန်းခြံဈေးက ဈေးသည် တွေကတော့ ဝမ်းရေးအတွက်ဈေးထွက်နေကြတယ်လို့ ဒေသခံတစ်ဦးကပြောပါတယ်။ “မနေ့ညက ဗုံးချတယ်ဒီမနက်ကဈေးထွက်ကြပြီ၊ ဒေသခံတွေက အသက်ကိုပေးပြီး ဝမ်းစာအတွက် ရှာဖွေ နေရတယ်။ ဗုံးကြဲခံရလို့ တုန်လှုပ်မှုရှိပေမဲ့ ဝမ်းရေးအတွက် လုပ်ကိုင်စားသောက်ရတယ်လေ။”လို့ပြောပါတယ်။ တအာင်းတပ်မတော် TNLA ကလည်း ကွတ်ခိုင်မြို့လေကြောင်းတိုက်ခိုက်ခံရမှုမှာ အရပ်သား ၃ ဦးသေဆုံး ခဲ့ရပြီး ထိခိုက်ဒဏ်ရာရရှိသူ ၁၃ ဦးရှိကြောင်းနှင့် ဒေသခံများအနေဖြင့် စစ်ရေးသတိရှိကြရန်၊ လူစုလူဝေး မပြုလုပ်ကြရန်နှင့် လေကြောင်းကာကွယ်မှုနပတ်သက်တဲ့ အသိပေးထုတ်ပြန်ချက်တွေကို လိုက်နာကြဖို့ ဒီကနေ့မနက်ပိုင်းမှာပဲ ထုတ်ပြန်ထားပါတယ်။ လက်ရှိတော့ ကွတ်ခိုင်မြို့ကို တအာင်းတပ်မတော် TNLA က ထိန်းချုပ်ထားတာဖြစ်ပြီး ပြီးခဲ့တဲ့ နှစ်ဆန်းပိုင်း ဇန်နဝါရီလ ၇ ရက်နေ့က စစ်ကောင်စီလက်ထဲကနေ မြောက်ပိုင်းညီနောင် ၃ ဖွဲ့တို့ တိုက်ခိုက်သိမ်းပိုက်နိုင်ခဲ့ တာဖြစ်ပါတယ်။ အာဏာသိမ်းပြီးချိန်ကစလို့ မြန်မာနိုင်ငံတစ်ဝှမ်းက ဒီမိုကရေစီအရေးလှုပ်ရှားသူတွေအပါအဝင် သေဆုံးခဲ့ရတဲ့ ပြည်သူစုစုပေါင်း ၅၉၄၄ ဦးအထိရှိလာပြီလို့ AAPP က နိုဝင်ဘာ ၁၂ ရက်နေ့ ရက်စွဲနဲ့ ထုတ်ပြန်ထားပါတယ်။ ဒါ့အပြင် အာဏာသိမ်းချိန်ကနေ ၂၀၂၄ ခုနှစ် နှစ်လယ်ပိုင်းအချိန်အထိ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်မှု အကြိမ်ရေ ၂၅၀၀ နီးပါး ပြုလုပ်ခဲ့ပြီး ဘာသာရေးဆိုင်ရာ အဆောက်အအုံ ၂၀၄ ခု၊ ဆေးရုံဆေးခန်း ၅၇ ခုနဲ့ စာသင်ကျောင်း ၂၀၇ ကျောင်း ဗုံးဒဏ်ကြောင့် ပျက်စီးခဲ့တယ်လို့ အမျိုးသားညီညွတ်ရေး အတိုင်ပင်ခံကောင်စီ NUCC စက်တင်ဘာလ ၂၃ ရက်နေ့မှာ ထုတ်ပြန်ထားပါတယ်။ By – အမိုး
Read More » -
15 Novemberသတင်း
KIA သိမ်းပိုက်နယ်မြေတွေမှာ လူထုအသံနားထောင်တဲ့ အုပ်ချုပ်ရေးစနစ်နဲ့ တောင်းဆို
ကချင်ပြည်နယ်အရှေ့ဘက်၊ တရုတ်နယ်စပ်ရှိ ဦးဇခုန်တိန့်ယိန်း ဦးဆောင်တဲ့ နယ်ခြားစောင့်တပ်နဲ့ ပြည်သူ့စစ်နယ်မြေတွေကို သိမ်းပိုက်နိုင်ခဲ့တဲ့ KIO အစိုးရအနေဖြင့် အုပ်ချုပ်စနစ်ကို စတင်ထူထောင်တဲ့အခါ ဗဟိုအမိန့်နဲ့ တိုက်ရိုက်အုပ်ချုပ်တဲ့စနစ် မဟုတ်ဘဲ ဒေသခံအသံကို အခြေခံတဲ့ အုပ်ချုပ်ရေးစနစ်ဖြစ်ဖို့ လိုအပ်ကြောင်း ဒေသခံတချို့ ပြောဆိုပါတယ်။…
Read More » -
15 Novemberသတင်း
KIA ရဲ့စည်းရုံးမှုအပေါ် အမြင်မှန်ရပူးပေါင်းမှုကြောင့် ကချင်အထူးဒေသ ၁ နယ်မြေကို အချိန်တိုအတွင်း သိမ်းပိုက်နိုင်ခဲ့တာလို့ ဦးအားတီယောဟန်ပြော
ကချင်အထူးဒေသ ၁ နယ်မြေကိုအချိန်တိုအတွင်းသိမ်းပိုက်နိုင်ခဲ့တာဟာ စစ်ကောင်စီလက်အောက်ခံ ပြည်သူ့စစ်နဲ့ နယ်ခြားစောင့်တပ်ဖွဲ့တွေဘက်က KIA ရဲ့စည်းရုံးမှုအပေါ် အမြင်မှန်ရပူးပေါင်းခဲ့တာကြောင့်ဖြစ်တယ်လို့ လီဆူတိုင်းရင်းသားရေးရာဝန်ကြီးဟောင်း ဦးအားတီယောဟန်ကပြောပါတယ်။ ကချင်လွတ်လပ်ရေးတပ်မတော် KIA နဲ့ပူးပေါင်းတပ်ဖွဲ့တွေဟာ ကချင်အထူးဒေသ ၁ နယ်မြေအတွင်းမှာ ရှိတဲ့ ချီဖွေ၊ ပန်ဝါ၊ ဆော့လော် စတဲ့နယ်မြေတွေထဲက စစ်ကောင်စီလက်အောက်ခံ ပြည်သူ့စစ်နဲ့နယ်ခြား စောင့်တပ်တွေရဲ့ တပ်စခန်းတွေကို အချိန်တိုအတွင်းသိမ်းပိုက်နိုင်ခဲ့သလို တစ်ချို့စခန်းတွေဟာ ပစ်ခတ်မှု မရှိဘဲ သိမ်းပိုက်နိုင်ခဲ့တာဖြစ်ပါတယ်။ “ဗမာစကားပုံရှိတဲ့အတိုင်းပဲ ပြည်သူ့နှလုံးမသိမ်းကြုံးလျှင် ဓားသွားလည်းကြွေ လှံသွားလည်း ခွေဆိုသလို ပါပဲ။ နှစ်ပေါင်းများစွာအာဏာရှင်စနစ်လက်ဝါးကြီးအုပ်စနစ်ကို ပြည်သူလူထုမကြိုက်လို့သော် လည်းကောင်း၊ ဌာနေပြည်သူ့စစ်ခေါင်းဆောင်များက ပြည်သူ့အကျိုးရှေးရှုပြီးတော့ ကျနော်တို့ရဲ့ စည်းရုံး တာကိုအမြင်မှန်ရ ပူးပေါင်းလာတာကြောင့် အချိန်တိုအတွင်းနယ်မြေစိုးမိုးမှုရခဲ့တာလို့ ဒီလိုပဲမြင်ပါတယ်။”လို့ဦးအားတီယောဟန်ကပြောပါတယ်။ ကချင်အထူးဒေသ ၁ နယ်မြေအတွင်းရှိတဲ့ စစ်ကောင်စီလက်အောက်ခံ ပြည်သူ့စစ်နဲ့ နယ်ခြားစောင့်တပ်ဖွဲ့ တွေကို အဖွဲ့ပေါင်းစုံက ဘက်ပေါင်းစုံကဏ္ဍပေါင်းစုံကနေ စည်းရုံးဖို့ကြိုးစားခဲ့ကြတယ်လို့သိရပါတယ်။ ဒါ့အပြင် ဌာနေပြည်သူ့စစ်နဲ့နယ်ခြားစောင့်တပ်ဖွဲ့တွေကို စစ်ဆင်ရေးမတိုင်ခင် ၆ လလောက်အချိန်ယူပြီး စည်းရုံးခဲ့တယ်လို့ ဦးအားတီယောဟန်ကပြောပါတယ်။…
Read More » -
15 Novemberသတင်း
မြေစာပုံပြိုကျတဲ့နေရာ ၅ ရက်ကြာလာတဲ့အထိ ဝင်ခွင့်ပိတ်ထားဆဲဖြစ်သောကြောင့် သေဆုံးမှုစာရင်းမသိရ
ကချင်ပြည်နယ် ဖားကန့်မြို့နယ် လုံးခင်းကျေးရွာအုပ်စု မှော်စီဆာကျေးရွာ မြေစာပုံပြိုကျခဲ့တဲ့နေရာကို ၅ ရက်ကြာတဲ့အထိ ဝင်ဝင်ခွင့်ပိတ်ထားဆဲဖြစ်သောကြောင့် သေဆုံးမှုစာရင်းမသိရဘူးလို့ ဒေသခံတွေကပြောပါတယ်။ ပြီးခဲ့တဲ့ နိုဝင်ဘာလ ၁၀ ရက်နေ့ ညပိုင်း ၁၂ နာရီဝန်းကျင်လောက်မှာ မှော်စီစာရွာမှာရှိတဲ့ တင်အောင်ကြိုင် လုပ်ကွက်ဟောင်းမြေနေရာပြိုကျခဲ့တာဖြစ်ပြီး ဒေသခံတွေကတော့ သေဆုံးသူ ၂၀ ဦးထက်မနည်းရှိနိုင် တယ်လို့ ခန့်မှန်းကြပါတယ်။ ဒါပေမဲ့ မြေပြိုကျတဲ့အဲ့ဒီကုမ္ပဏီလုပ်ကွက်ဟောင်းထဲကို ဘယ်သူ့ကိုမှဝင်ခွင့်မပေးတဲ့အတွက် သေဆုံးမှုစာရင်း မသိရဘူးလို့ ဒေသခံတစ်ဦး ခုလိုပြောပါတယ်။ “လက်ရှိအနေ အထားက မြေပြိုတဲ့နေရာကို ဘယ်သူမှဝင်လို့မရဘူး။ ကယ်ဆယ်ရေးအဖွဲ့တွေလည်း ဝင်လို့မရဘူး ဖြစ်နေတယ်။ အဓိကပြောချင်တာက မြေပြိုတဲ့နေရာကိုဘယ်သူမှသတင်းယူပိုင်ခွင့်မရှိသလို ဘယ်လောက်သေဆုံးတယ်ဆိုတာလည်းမသိရဘူး။”လို့ပြောပါတယ်။ လက်ရှိ မြေပြိုကျမှုဖြစ်ပွားခဲ့တာဟာ မှောစီစာကျေးရွာထဲက (ဒေသအခေါ် ) တင်အောင်ကြိုင်လုပ်ကွက်ဟောင်းနေရာဖြစ်ပြီး မြေစာကားနှစ်စီးမြေစာသွန်ချရာကနေ မြေစာပြတ်ကျပြီးရေကန်ထဲလျောကျကုန်တာ လို့ ဒေသခံတွေကဆိုပါတယ်။ အဆိုပါ မြေစာပြတ်ကျရာမှာ ပျောက်ဆုံးနေတဲ့ မြေစာကားမောင်းသူ၊ မြေစာကားနောက်လိုက်သူတွေ အပါအဝင် ရေမဆေးသမားများပျောက်ဆုံးနေပြီး အခင်းဖြစ်နေရာကို မည်သည့်အဖွဲ့ကမ ဝင်ခွင့်ပိတ်ဆို့ထား တယ်ဆိုတာကိုတော့ မသိရသေးဘူးလို့ ဒေသခံတစ်ဦးကဆက်ပြောပါတယ်။ “တာဝန်ရှိတဲ့သူလား၊ ကုမ္ပဏီကအဖွဲ့ဝင်တွေလားတော့မသိရဘူး။ ကန့်သတ်ချက်ပဲမဟုတ်ဘူး။ အမှောင်ချ တာ။ ကုမ္ပဏီအနေနဲ့လည်းဒီသတင်းကိုမပေါက်ကြားစေချင်တဲ့သဘောပေါ့။ တာဝန်ရှိတဲ့သူတွေ ကလည်း ဒီသတင်းကိုအပြင်မထွက်စေချင်တဲ့သဘောပေါ့။”လို့ဒေသခံတစ်ဦးကပြောပါတယ်။ ဖားကန့်မြို့နယ်ဟာ အာဏာသိမ်းပြီးနောက်ပိုင်းကတည်းကစတင်လို့ အင်တာနက်ရော၊ ဖုန်းလိုင်းပါ ဖြတ်တောက်ခံထားရတဲ့အပြင် ဆိုင်းတောင်တိုက်ပွဲနောက်ပိုင်း ကချင်လွတ်လပ်ရေးတပ်မတော် KIA ဘက်က သတင်းထိန်းချုပ်မှုတွေလည်းရှိနေတဲ့အတွက် သတင်းအတိအကျရရှိဖို့ခက်ခဲတဲ့ဒေသလည်းဖြစ်ပါတယ်။ ဒါ့အပြင် ပြီးခဲ့တဲ့ နှစ်ဆန်းပိုင်း မတ်လအတွင်းစတင်ခဲ့တဲ့ ကချင်လွတ်လပ်ရေးတပ်မတော် KIAရဲ့ ကချင်ပြည်နယ်တစ်ပြည်နယ်လုံးအတိုင်းအတာထိုးစစ်ဆင်တိုက်ပွဲအတွင်း ဖားကန့်မြို့နယ်အတွင်းမှာလည်း နှစ်ဖက်တပ်တွေတိုက်ပွဲတွေအပြင်းအထန်ဖြစ်ခဲ့ကြတာဖြစ်ပါတယ်။ လက်ရှိတော့ ဖားကန့်မြို့နယ်တစ်ခုလုံးနီးပါးကို ကချင်လွတ်လပ်ရေးတပ်မတော် KIA က နယ်မြေစိုးမိုးထားပြီး စစ်ကောင်စီရဲ့ဖားကန့်ဗျူဟာကုန်းတစ်ခုသာကျန်ရှိတော့သလို အဲ့ဒီဗျူဟာကုန်းကစစ်ကောင်စီတပ်ဖွဲ့ဝင် တွေဟာလည်း စစ်ရေးလှုပ်ရှားတာတွေမရှိဘူးလို့ ဒေသခံတွေကပြောပါတယ်။ ဖားကန့်မြို့နယ်မှာ နှစ်စဥ်ဆိုသလို ကျောက်စိမ်းတူးဖော်တဲ့ကုမ္ပဏီတွေရဲ့ စွန့်ပစ်မြေစာပြိုကျမှုတွေကြောင့် ရေမဆေးသမားတွေနှစ်စဥ်သေဆုံးမှုတွေရှိနေပြီး ပြီးခဲ့တဲ့ ၂၀၂၀ ခုနှစ် ဇူလိုင်လကဖြစ်ပွားခဲ့တဲ့ ဝှေခါရွာ မြေပြိုမှုမှာ အရပ်သား ၂၀၀ အထိသေဆုံးခဲ့ရပါတယ်။ ဒါ့အပြင် ၂၀၂၄ ဇွန်လအတွင်းမှာတော့ မှော်စီစာကျေးရွာမှာပဲ ကျောက်စိမ်းလုပ်ကွက်တစ်ခု မြေစာပြိုကျခဲ့လို့ ရေမဆေးသမားတစ်ဦးသေဆုံးခဲ့တဲ့ဖြစ်စဉ်တွေ ရှိခဲ့ပါတယ်။ By – အမိုး
Read More » -
15 Novemberသတင်း
မြစ်ကြီးနားမြို့မှာ ဆီပန့်ဆိုင်တစ်ချို့ စက်သုံးဆီအကန့်သတ်နဲ့သာရောင်းချ
ကချင်ပြည််နယ် မြစ်ကြီးနားမြို့မှာ စက်သုံးဆီအဝင်ရပ်တန့်နေတဲ့အတွက် ဆီပန့်ဆိုင်ကြီးတစ်ချို့ အကန့်သတ်နဲ့သာရောင်းပေးနေတယ်လို့ မြစ်ကြီးနားမြို့မှာနေထိုင်တဲ့ပြည်သူတွေဆီကနေ သိရပါတယ်။ ပြီးခဲ့တဲ့ အောက်တိုဘာလ ၁၀ ရက်နေ့ဝန်းကျင် ကံပိုင်တည်မြို့– ဆဒုံးလမ်းပိုင်းရှိ နယ်ခြားစောင့်တပ်ရဲ့ အမှတ် ၁၀၀၃ စင်ကြိုင်စခန်းကို KIA ပူးပေါင်းတပ်ထိုးစစ်ဆင်လာချိန် မြစ်ကြီးနား– ကန်ပိုင်တည်လမ်း စစ်ရေးအခြေနေကြောင့် လမ်းပိုင်းသွားလာခွင့် KIA က ပိတ်ထားတာဖြစ်ပါတယ်။ အောက်တိုဘာလ ၁၇ ရက်နေ့ KIA ပူးပေါင်းတပ် စင်ကြိုင်စခန်းကိုသိမ်းလိုက်ပြီး မြစ်ကြီးနား– ကံပိုင်တည်လမ်းပိုင်း ပုံမှန်သွားလာခွင့်ရပေမယ့် ကံပိုင်တည်မြို့ကိုထိန်းချုပ်ထားဆဲဖြစ်တဲ့ စစ်ကောင်စီတပ်ဟာ ကံပိုင်တည်ကနေ မြစ်ကြီးနားဘက်ဆင်းမယ့် စက်သုံးဆီကားတွေ ထွက်ခွင့်မပေးပဲ ပိတ်ထားတယ်လို့ သိရပါတယ်။ ဒါကြောင့် မြစ်ကြီးနားမြို့ထဲ စက်သုံးဆီအဝင်ရပ်တန့်သွားပြီး နိုဝင်ဘာလ ၂ ရက်နေ့စ ဆီလက်ကျန်နည်းနေတဲ့ ဆီပန့်ဆိုင်တစ်ချို့အကန့်သတ်နဲ့ရောင်းပေးနေတယ်လို့ ဆီဆိုင်နဲ့ရင်းနှီးတဲ့မိတ်ဆွေတစ်ဦး ပြောပါတယ်။ “ဆီစျေးက လောလောဆယ် တစ်လီတာ တစ်သောင်းဝန်းကျင်ရှိတယ် ဝယ်လို့တော့ရတယ်။ ဒါပေမယ့် တချို့ဆိုင်ကြီးတွေက တစ်နေကုန်မဖွင့်ကြတော့ဘူး ဥပမာ ဒီနေ့ ပေပါ ၂၀ ဘဲရောင်းမယ်ဆိုရင် အဲဒါကုန်ရင် ဆိုင်ပိတ်ထားပြီ”လို့ ဆီအရောင်းဆိုင်နဲ့ရင်းနှီးသူတစ်ဦး ပြောပါတယ်။ နိုဝင်ဘာလ ၆ ရက်နေ့ကနေ ဆီလက်ကျန်နည်းလို့ အကန့်သတ်နဲ့ရောင်းနေတဲ့ ဆီပန့်ဆိုင်တွေဟာ တိုင်းကျော်၊ ရွှေလှိုင်း၊ ဆဲဗင်းဟွာကျန်း၊ရွှေမြေတို့ဖြစ်တယ်လို့ သိရပြီး တစ်နေ့တာရောင်းချမယ့် ဆီပမာဏကိုကန့်သတ်ထားတာဖြစ်ကြောင်း သူက ဆက်ပြောပါတယ်။ ခုလို စက်သုံးဆီဆိုင်ကြီးတွေ အကန့်သတ်နဲ့ရောင်းချလာတဲ့အတွက် လမ်းဘေးပုလင်းချိန်မှာ တစ်လီတာကို ကျပ် ၁၂၀၀၀ (တစ်သောင်းနှစ်ထောင်) အထိ ပေးဝယ်နေရတယ်လို့ ရွှေစက်ရပ်ကွက်နေ ဒေသခံတစ်ဦး ခုလိုပြောပါတယ်။ “လမ်းဘေးဆိုင်တွေမှာတော့ မနေ့ကမေးတာ တစ်ပုလင်းကို ၁၂၀၀၀ တဲ့ဒါတောင်အပြည့်မပါဘူး ဆီပန့်တွေကလည်းပိတ်တဲ့ဆိုင်ပိတ်တယ်တချို့ဆိုင်လေး နေ့တဝက်လောက်ပဲ ဖွင့်တယ် ဒါတောင် 95 မရဘူး ဆိုင်တိုင်း 92 ကြီးတွေပဲ”လို့ ပြောပါတယ်။ နိုဝင်ဘာလ ၁၅ ရက်နေ့ထိ မြို့တွင်း စက်သုံးဆီစျေး 92 တစ်လီတာ ကျပ် ၁၀၀၀၀ (တစ်သောင်း) လမ်းဘေးပုလင်းချိန် တစ်လီတာ ၁၂၀၀၀ (တစ်သောင်းနှစ်ထောင်) နဲ့ ဒီဇယ် တစ်လီတာ ကျပ် ၉၅၀၀ (ကိုးထောင့်ငါးရာ) အထိရှိပြီး ၂ လအတွင်း စက်သုံးဆီစျေး တစ်ဆ တက်လာတာလို့ မြစ်ကြီးနားမြို့နေပြည်သူတွေက ပြောပါတယ်။ မြစ်ကြီးနားမြို့အပါ ကချင်တစ်ပြည်နယ်လုံးအတွက် လိုအပ်တဲ့ စက်သုံးဆီတွေကို မန္တလေးဘက်ကနေလည်းတင်သွင်းသလို တရုတ်ပြည်ထဲကနေတစ်ဆင့် တင်သွင်းတာဖြစ်ပါတယ်။ သို့သော် ပြီးခဲ့တဲ့ သြဂုတ်လကတည်းက စစ်ကိုင်း– ကချင်အစပ် အင်းတော်နယ်ထဲမှာ တိုက်ပွဲတွေဖြစ်နေတာကြောင့် မန္တလေး – မြစ်ကြီးနားမိန်းလမ်းမကြီး ပိတ်သွားခဲ့ပြီး ဆီတင်ကားကြီးအဝင်မရှိတော့ပဲ ရပ်တန့်နေတာဖြစ်ပါတယ်။ အလားတူဘဲ တရုတ်နယ်စပ်ဂိတ်တွေဖြစ်တဲ့ ကံပိုင်တည်ဂိတ်ကို စစ်တပ်ကထိန်းချုပ်ထားပြီး ဆီကားဝင်ခွင့်မပေးသလို လွယ်ဂျယ်ဂိတ်ကိုတော့ တရုတ်ဘက်ကပိတ်လိုက်တဲ့နောက် KIA ကလည်း တန်ပြန်ပိတ်ထားတာဖြစ်ပါတယ်။ လက်ရှိ မြစ်ကြီးနားမြို့ပေါ်မှာ စက်သုံးစျေးတက်နေသလို တစ်ခြားသောအခြေခံစားသောက်ကုန်၊လူသုံးကုန်တွေလည်း အဆမတန်စျေးတက်နေတာဖြစ်ပါတယ်။ By – Zaw Zaw
Read More » -
15 Novemberသတင်း
တွဲလက်မေတ္တာစစ်ရှောင်စခန်း စစ်ရှောင်တဲများယိုယွင်းပျက်စီးလာတဲ့အတွက် နေရာထိုင်ခင်းအခက်ကြုံနေ
ကချင်ပြည်နယ် ဝိုင်းမော်မြို့ လဘန်ကျေးရွာမှာရှိတဲ့ တွဲလက်မေတ္တာလူမျိုးပေါင်းစုံစစ်ရှောင်စခန်း စစ်ရှောင်တဲများယိုယွင်းပျက်စီးလာတဲ့အတွက် အကူအညီတွေလိုအပ်နေတယ်လို့ စစ်ရှောင်တာဝန်ခံက KNG ကို ပြောပါတယ်။ ယခင်က တွဲလက်မေတ္တာ လူမျိုးပေါင်းစုံစစ်ရှောင်စခန်းမှာ အိမ်ခြေ ၂၇ သာရှိခဲ့ပေမယ့် ပြီးခဲ့တဲ့ ဩဂုတ်လကစပြီး အိမ်ထောင်စု ၈ စုထပ်တိုးလာတာကြောင့် အိမ်ခြေ ၃၅ စု၊လူဦးရေ ၁၄၅ ဦးထိရှိလာပြီး အိမ်ထောင်စုတစ်စုလျှင် မိုးကာနဲ့ဆောက်လုပ်ထားတဲ့ ၈ ပေပတ်လည် အခန်း ၁ ခန်းတွင်း ကျဉ်းကျဉ်းကြပ်ကြပ်စုပေါင်းနေထိုင်နေရတယ်လို့ စစ်ရှောင်တာဝန်ခံက ခုလိုပြောပါတယ်။ “အခုက အိပ်ယာတွေမှာလည်း မိုးစက်တွေက စိမ့်ပြီးကျလာတယ် မိုးကာတွေကလည်း သိပ်မကောင်းဘူး ဟောင်းလာပြီ သွပ်ပြားတွေလည်း လုံးဝအသုံးမပြုထားဘူး။ “အိမ်သားများတဲ့သူတွေအတွက်ဆို ၈ ပေခန်းမှာနေဖို့ မလွယ်ကူဘူး ဒါကြောင့် အခန်းတွေပြန်ဆောက်ချင်တယ်။ ဒါပေမယ့် အဲတာနဲ့ ပက်သက်ပြီး ကူညီမယ့်သူဘယ်သူမှ မရှိဘူးဖြစ်နေတယ်”လို့ ဆိုပါတယ်။ တွဲလက်မေတ္တာ လူမျိုးပေါင်းစုံ စစ်ရှောင်စခန်းဟာ ဝိုင်းမော်မြို့နယ် ဝူယန်ကျေးရွာမှာအခြေချထားပေမယ့် ပြီးခဲ့တဲ့ မတ်လ ၇ ရက်နေ့ KIA ပူးပေါင်းတပ်ရဲ့စစ်ဆင်ရေးစတင်ချိန်ကစပြီး ဝူယန်ကနေ ဒိန်ဂျာယန်ကျေးရွာမှာ သွားရောက်ခိုလှုံနေကြတာဖြစ်ပါတယ်။ သို့ပေမယ့် ဒိန်ဂျာယန်ကျေးရွာမှာ လမ်းပန်းဆက်သွယ်ရေးခက်ခဲမှု၊ကလေးတွေရဲ့ပညာရေး အခြေအနေအမျိုးမျိုးကြောင့် လဘန်ကျေးရွာဘက်ကို ပြန်လည်ပြောင်းရွေ့လာကြပြီး လဘန်ကျေးရွာမှာ ခိုလှုံနေတာ လေးလထိကြာမြင့်ပြီဖြစ်ပါတယ်။ ဒါ့အပြင် ၈ ပေ ပတ်လည် အခန်းတစ်ခန်းလျှင် မိသားစုဝင် ၄ ဦးကနေ ၈ ဦးထိ နေထိုင်ကြပြီး စစ်ရှောင်တဲနံရံနဲ့အမိုးအားလုံး ဝါးနဲ့မိုးကာအသုံးပြုပြီး ဆောက်လုပ်ထားတဲ့အတွက် ခိုင်ခန့်မှုမရှိပဲ အားလုံးပျက်စီးနေပြီဖြစ်တယ်လို့ စစ်ရှောင်တွေပြောပါတယ်။ ဒါကြောင့် စစ်ရှောင်တဲတွေအကုန်လုံး အသစ်ပြန်တည်ဆောက်ဖို့ ဝါးနဲ့သွပ်ပြား အများဆုံးလိုအပ်နေတယ်လို့ သိရပါတယ်။ စစ်ရှောင်တွေအတွက် စားနပ်ရိက္ခာကို တစ်လတစ်ကြိမ် WFP(World Food Program)ကနေ အစားအသောက်ထောက်ပံ့တာမျိုးတွေရှိပေမယ့်လည်း ကုန်စျေးနှုန်းမြင့်တက်မှုတွေကြောင့် စားနပ်ရိက္ခာလုံလောက်မှုမရှိဘဲ လိုအပ်ချက်တွေ ရှိနေဆဲဖြစ်တယ်လို့ စစ်ရှောင်တာဝန်ခံက ခုလိုဆက်ပြောပါတယ်။ “WFP ကနေပြီးတော့ ကူညီပေးနေတာဖြစ်ပေမယ့်လည်း သူတို့လာမပေးခင်ကတည်း တခြားသူတွေဆီက ချေးစားထားကြတွေလည်း ရှိတော့ ၅ ရက်စာလောက်ဘဲကျန်ပြီး ချွေချွေသာသာနဲ့စားနေကြတာပေါ့”လို့ဆိုပါတယ်။ ဒီစစ်ရှောင်စခန်းမှာ များသောအားဖြင့်ဝူယန်ကျေးရွာက ပြည်သူတွေနေထိုင်ကြတာဖြစ်ပြီး တစ်ခြားတိုင်းရင်းသားပေါင်းစုံနဲ့ မသန်စွမ်း ဦးရေ ၂၀ အပါအဝင် စုစုပေါင်း စစ်ရှောင်လူဦးရေ စုစုပေါင်း ၁၄၅ ဦးရှိတယ်လို့ စစ်ရှောင်တာဝန်ခံဆီကနေသိရပါတယ်။ ကချင်ပြည်နယ်မှာ ၂၀၁၁ စစ်ကောင်စီတပ်နဲ့ ကချင်လွတ်လပ်ရေးတပ်မတော် ကေအိုင်အေတို့ရဲ့ တစ်ကြော့ပြန်စစ်ပွဲပြန်လည် စတင်ချိန်ကတည်းကနေ ၂၀၂၁ ဖေဖော်ရီလထိ စစ်ရှောင်ဦးရေဟာ တစ်သိန်းတစ်သောင်းငါးရာ(၁၁၀၅၀၀ ) ထိရှိခဲ့တာ ဖြစ်ပြီး အာဏာသိမ်းပြီးနောက် ၂၀၂၄ ဩဂုတ်လ ၁၂ရက် မှာတော့ တစ်သိန်းကိုးသောင်းလေးထောင်ကိုးရာ( ၁၉၄၉၀၀)ထိ မြင့်တက်လာတယ်လို့ UNHCR ရဲ့ထုတ်ပြန်ချက်မှာ ဖော်ပြထားတာဘဲ ဖြစ်ပါတယ်။ ၂၀၁၁ခုနှစ်ကနေ၂၀၂၁ခုနှစ်အထိရှိခဲ့တဲ့ စစ်ရှောင်အရေအတွက်နဲ့ ၂၀၂၁ခုနှစ်ကနေ ၂၀၂၄ ဩဂုတ်လအထိ မြင့်တက်ခဲ့တဲ့ စစ်ရှောင်အရေအတွက် နှစ်ခုကိုနှိုင်းယှဉ်ကြည့်လိုက်ပါက အာဏာသိမ်းပြီးနောက် ၃နှစ်အတွင်း စစ်ရှောင်ဦးရေ ၈သောင်း၄ ထောင် ၄ရာ(၈၄၄၀၀)ထိ တိုးလာတာဘဲ ဖြစ်ပါတယ်။ By – Hope
Read More » -
14 Novemberသတင်း
ပူတာအိုမှာ ငွေကြေးတတ်နိုင်သူတွေကို လျှပ်စစ်မီးပုံမှန်ပေးမယ်လို့ဆိုကာ EPC တစ်နှစ်စာငွေယူပြီး မီးလိုင်းဖြတ်
ကချင်ပြည်နယ်၊ ပူတာအိုမြို့နယ် EPC ရုံးက ငွေကြေးတတ်နိုင်သူတွေကို လျှပ်စစ်မီးပုံမှန်ပေးမယ်လို့ဆိုကာ တစ်နှစ်စာငွေယူထားပြီး မီးလိုင်းဖြတ်ထားတယ်လို့ ပူတာအိုဒေသခံတွေဆီကနေ သိရပါတယ်။ ပူတာအိုမြို့ပေါ် ငွေကြေးတတ်နိုင်တဲ့ လူနေအိမ်၊ စားသောက်ဆိုင်၊ ဘာသာရေးအဆောင်နဲ့ စီးပွားရေးလုပ်ကိုင်တဲ့ လုပ်ငန်းရှင်တစ်ချို့ကို EPC ကနေ ၂၄ နာရီလျှပ်စစ်မီးပေးမယ်လို့ဆိုပြီး ပြီးခဲ့တဲ့ ဩဂုတ်ကလစ တစ်နှစ်စာမီတာခကြိုယူထားပေမယ့် မီးမပေးတော့ပဲ မီးလိုင်းတွေပြန်ဖြတ်လိုက်တယ်လို့ တစ်နှစ်စာလျှပ်စစ်မီးယူထားတဲ့ စားသောက်ဆိုင်ပိုင်ရှင်တစ်ဦး KNG ကိုပြောပါတယ်။ “ကြည့်ရတာအထက်က မသိဘူးထင်တယ် အောက်ခြေကဝန်ထမ်းတွေလုပ်စားတာဖြစ်မယ်။ ပိုက်ဆံ ရှိတဲ့လူကအချိန်ပြည့်မီးရပြီး ပိုက်ဆံမတတ်နိုင်တဲ့လူက မီးမလာတချက်လာတချက်ဆိုတော့တိုင်ကြတာပေါ့ အတိုင်ခံရပြီးနောက်ပိုင်း မီးကိုမလာတော့ဘူး။ အခုထိပိုက်ဆံပေးထားတာအလကားဖြစ်ပြီလေး”လို့ အသက် ၅၀ ကျော်အရွယ်အထက်ဖော်ပြပါအမျိုးသမီးတစ်ဦးကပြောပါတယ်။ ပူတာအို EPC ကနေ တစ်နှစ်စာ မီတာခကြိုရှင်းခိုင်းရာမှာ လူနေအိမ် တစ်အိမ်လျှင် တစ်နှစ်စာ ကျပ် ၆၀၀၀၀၀ (ခြောက်သိန်း) ၊ စားသောက်ဆိုင်နဲ့ကုန်စုံဆိုင် တစ်နှစ်စာကျပ် သိန်း ၂၀၊ ဘာသာရေးအဆောက်အအုံ ကျပ်သိန်း ၅၀ စသဖြင့် ငွေယူထားပြီး မီးမရတော့တဲ့အပြင် ယူထားတဲ့ငွေလည်းပြန်မအမ်းဘူးလို့ ကုန်စုံဆိုင်ပိုင်ရှင်အမျိုးသမီးတစ်ဦးက ပြောပါတယ်။ “ကျွန်မတို့ကတစ်နှစ်စာဆိုပြီး သိန်း ၂၀ ပေးထားတာ အခုထိငွေပြန်မအမ်းဘူး မီးလည်းမပေးတော့ဘူး အထက်ကပဲသိသွားတာလား။ ဘာလို့လဲအသေအချာကိုမသိရသေးဘူးအဟုတ်မှတ်ပြီးတပ်ထားတာ”လို့ သူကပြောပါတယ်။ တစ်နှစ်စာ မီးယူမယ့်သူတွေကို ပူတာအိုမြို့နယ် EPC ရုံးက ဝန်ထမ်းတစ်ချို့ဟာ စားသောက်ဆိုင်၊ငွေကြေးတတ်နိုင်တဲ့နေအိမ်တွေကို နီးစပ်ရာထရန်န်စဖော်မာကနေ မီးကြိုးသီးသန့်ဆွဲပြီး မီးထပ်ပြီးတပ်ဆင်ထားပေးတာလို့ ဆိုပါတယ်။ မီးတပ်ဆင်ရာမှာလည်း မီးတပ်ဆင်ခအဖြစ် တစ်အိမ်လျှင် ငွေကျပ် ၆၀၀၀၀ (ခြောက်သောင်း) သီးသန့်ပေးဆောင်ခိုင်းတယ်လို့ သိရပါတယ်။ တစ်နှစ်စာငွေကြိုပေးပြီး မီးလိုင်းယူထားတဲ့ နေအိမ်၊ ဘာသာရေးအဆောက်အအုံနဲ့ စီးပွားရေးလုပ်ငန်းရှင်တွေကို စက်တင်ဘာနဲ့အောက်တိုဘာလ ၂ လအတွင်း ၂၄ နာရီမီးပေးခဲ့ချိန် တစ်နှစ်စာမီးလိုင်းမယူနိုင်တဲ့ နေအိမ် ကုန်စုံဆိုင်၊စားသောက်ဆိုင်တွေကို နှစ်ညခြား သုံးရက်တစ်ကြိမ် မီးပေးလေ့ရှိတယ်လို့ လေယာဥ်ရပ်ကွက်နေအမျိူးသားတစ်ဦးက KNGကိုပြောပါတယ်။ “ပူတာအိုEPC ကအရမ်းလုပ်စားတယ်။ အခုလည်းဒီကောင်တွေအခုလည်း လုပ်စားနေတာပဲ အခုနည်းနည်းတော်သေးတယ်။ အရင်ခုနှစ်လ ရှစ်လပိုင်းကဆိုမီးကိုမလာတာတစ်ပတ်နှစ်ကြိမ်လောက်ပဲလာတာ ရေမရှိဘူးပြောရအောင် အဲ့ချိန်က မိုးတွင်းကြီးလေ”လို့အထက်ဖော်ပြပါအသက် ၄၀ ကျော်အရွယ် အမျိုးသားတစ်ဦးကပြောပါတယ်။ လက်ရှိ ပူတာအိုမြို့ပေါ်နဲ့မြို့နယ်အတွင်းက ကျေးရွာပေါင်း ၄၀ ဝန်းကျင်က အထက်နန့်ထွမ်ရေအားလျှပ်စစ်စ်ကရုံကနေ လျှစစ်မီးဖြန့်ဖြူးပေးနေတာဖြစ်ပါတယ်။ ဒီကိစ္စနဲ့ပတ်သက်လို့ ပူတာအို EPC ရုံးကို KNG သတင်းဌာနက ဆက်သွယ်ပေမယ့် ဆက်သွယ်လို့မရသေးပါဘူး။ ပူတာအို EPC အနေနဲ့ မီလိုင်းတွေကို ဒီနှစ် ဇွန်လကုန်ပိုင်း တပ်ဆင်ပေးခဲ့တာဖြစ်ပြီး သြဂုတ်လဆန်းပိုင်းအထိ ပုံမှန် ၂၄ နာရီမီးပေးခဲ့ပေမယ့် အဲ့ဒီနောက်ပိုင်း ဒီနေ့အထိ နှစ်လကျော်ကြာ မီးမပေးတော့ပဲ ပုံမှန်အလေ့အကျစနစ်နဲ့သာပေးတော့တယ်လို့ သိရပါတယ်။ By – Hope
Read More » -
14 Novemberသတင်း
နန်းယွန်းမြို့တစ်ခုလုံး လျှပ်စစ်မိီးပြတ်တောက်နေတာ ၆ ကျော်ကြာမြင့်လာ
စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသ နန်းယွန်းမြို့ပေါ် ရေကြီးရေလျှံဖြစ်ပြီးနောက် ဒီနေ့အထိ လျှပ်စစ်မီးတွေပြတ်တောက်နေဆဲဖြစ်တယ်လို့ နန်းယွန်းမြို့ခံတွေဆီကနေ သိရပါတယ်။ ပြီးခဲ့တဲ့ မေလ နန်းယွန်းမြို့တစ်မြို့လုံး ရေဘေးသင့်ခဲ့ချိန် ဓာတ်တိုင်အများအပြားပျက်စီးခဲ့ပြီး ဒီနေ့ထိအစားထိုးပြုပြင်တာမျိုးမရှိသေးတာကြောင့် လျှပ်စစ်မီးပြတ်တောက်နေတာ ၆ လကျော်ပြီလို့ နန်းယွန်းမြို့ခံအမျိုးသားတစ်ဦးက KNG ကိုပြောပါတယ်။ “ရေကြီးတုန်းက ပျက်သွားတဲ့မီးတိုင် အခုထိမလှဲသေးတော့ မီးလည်းမရသေးဘူး နှစ်တောင်ကူးတော့မယ် သူတို့မီလာဖို့နေနေသာသာ ဓာတိုင်တစ်တိုင်တောင် ပြန်မစိုက်သေးဘူး ဒီတိုင်းပဲဖြစ်သွားမလားမသိဘူးမီးက”လို့ အသက် ၃၀ ကျော်အရွယ်နန့်ယွန်းမြို့ခံအမျိုးသားတစ်ဦးကပြောပါတယ်။ နန်းယွန်းမြို့ပေါ်လျှပ်စစ်မီးတွေကို နန်းယွန်းချောင်းရေအားလျှပ်စစ်စက်ရုံကနေ ဓာတ်အားဖြန့်ဖြူးပေးနေတာဖြစ်ပြီး မေလတွင်း ရေဘေးသင့်ခဲ့ချိန် လျှပ်စစ်ဓာတ်အားပေးစက်ရုံထိခိုက်ပျက်စီးတာမျိုးရှိခဲ့သလို ရေအားလျှပ်စစ်စက်နဲ့ နန်းယွန်းမြို့ကြားမှာရှိတဲ့ဓာတ်တိုင်တွေနဲ့ မီးကြိုးအများပိုင်းပျက်စီးခဲ့တာဖြစ်တာလို့ သိရပါတယ်။ “ရေကာတာပေါ့အဲ့ဒီရေအားလျှပ်စစ် စက်ရုံနဲ့မြို့ကဆယ်မိုင်နီးနီးရှိမှာ အဲဲ့ကြားမှာသွယ်ထားတဲ့မီးကြိုးတွေ၊ ဓာတိုင်တွေက ရေထဲပါသွားတဲ့ဟာပါသွားပြီ။ ပြီးတော့ မြေပြိုလို့ လှဲတဲ့ဟာလှဲချိုးတဲ့ဟာချိုး မီးကြိုးတွေလည်းအများကြီးပါသွားတယ် တကယ်ပြင်မယ်ဆိုရင်ပြီးလောက်ပြီဗျ မပြင်လို့ခုထိမီးမရတာ”လို့ ပြောပါတယ်။ အခုလိုလျှပ်စစ်မီးပြတ်တောက်နေတာကြောင့် ဒေသခံတွေဟာ ဆိုလာမီး၊ ဖယောင်းတိုင်မီး အားထားနေရလို့ အခက်အခဲတွေဖြစ်နေတယ်လို့ သိရပါတယ်။ “အစပိုင်းကတော့မီးရမလားရမလားနဲ့စောင့်နေကြတာ။ အခုကြာလာတော့ တချို့ဆိုလာမီးသုံးတဲ့သူသုံး တချို့ဆိုလာမဝယ်နိုင်တဲ့လူက ဖယောင်းတိုင်မီးတွေ ၊ရေနံဆီမီးခွက်တွေပြန်သုံးနေကြတယ် နေမပူတဲ့နေ့တွေဆိုရင်မှောင်မှောင်မဲမဲပဲ”လို့ ဒေသခံအမျိုးသမီးတစ်ဦးကပြောပါတယ်။ ဒီသတင်းနဲ့ပတ်သက်ပြီးတော့ KNG သတင်းဌာနအနေနဲ့ နန်းယွန်းမြို့နယ် လျှပ်စစ်ဓာတ်အားရေးပေးရုံးကိုဆက်သွယ်ခဲ့ပေမယ့် နန်းယွန်းမြို့နယ်ထဲဖုန်းလိုင်းဖြတ်တောက်ထားတာကြောင့် ဆက်သွယ်လို့မရခဲ့ပါဘူး။ နန်းယွန်းမှာ မေလတုန်းဖြစ်ပွားခဲ့တဲ့ ရေဘေးကြောင့် အခုလို လျှပ်စစ်ဓာတ်အားတွေပြတ်တောက်ခဲ့ရသလို နန်းယွန်း– ရှင်ဗွေယန်ကြားရှိ နန်းယွန်းမြို့အဝင်က တံတားလည်းပျက်စီးသွားခဲ့ပြီး ဒီနေ့ထိပြန်လည်မပြုပြင်သေးတာကြောင့် လမ်းပမ်းဆက်သွယ်ရေးလည်း ခက်ခဲ နေဆဲဖြစ်ပါတယ်။ နာဂကိုယ်ပိုင်အုပ်ချုပ်ခွင့်ရဒေသထဲက အရေးပါတဲ့မြို့တစ်မြို့ဖြစ်တဲ့ နန်းယွန်းမြို့မှာတော့ NLD အစိုးရလက်ထက် ၂၄ နာရီလျှပ်စစ်ဓာတ်အားရရှိနိုင်ခဲ့တာဖြစ်ပါတယ်။ ဒါ့အပြင် နန်းယွန်းမြို့ဟာ စစ်တပ်အာဏာသိမ်းပြီးနောက် တိုက်ပွဲဖြစ်တာမရှိပေမယ့် ဖုန်း၊အင်တာနက်လိုင်းဖြတ်တောက်ခံထားရတဲ့အပြင် လမ်းပန်းဆက်သွယ်ရေးခက်ခဲမှု၊လျှပ်စစ်မီးမရရှိမှုတွေကြောင့် အဖက်ဖက်ကနေ ခက်ခဲနေကြတာလည်းဖြစ်ပါတယ်။ By – Zaw Zaw
Read More » -
14 Novemberသတင်း
နောင်ပိုအောင်ရွာမှာ အခွန်လျော့ကောက်ပေးဖို့ ဆိုင်ရှင်တစ်ချို့တောင်းဆို
စစ်ကိုင်းတိုင်း ၊ဟုမ္မလင်းမြို့နယ် နောင်ပိုအောင်ကျေးရွာမှာ SNA တပ်တွေအနေနဲ့ ဆိုင်အခွန်လျော့ကောက်ပေးဖို့ ဆိုင်ရှင်တစ်ချို့တောင်းဆိုနေကြပါတယ်။ ဟုမ္မလင်းမြို့နယ်တစ်ခုလုံးမှာ ရှမ်းနီအမျိုးသားများတပ်မတော် (SNA)တပ် အများဆုံးရှိတဲ့ နောင်ပိုအောင်ကျေးရွာမှာ SNA တပ်က ကုန်စုံဆိုင်အကြီး တစ်လ ကျပ် ၆၀၀၀၀၀ (ခြောက်သိန်း) ၊စားသောက်ဆိုင်အကြီး တစ်လ ကျပ် ၆၀၀၀၀၀(ခြောက်သိန်း) ၊ ကုန်ခြောက်ဆိုင်၊ လက်ဖက်ရှည်ဆိုင်တစ်လ ကျပ် ၃၀၀၀၀၀ (သုံးသိန်း) ၊ဆိုင်ကယ်ဝပ်လျော့ တစ်လ ကျပ် ၆၀၀၀၀ (ခြောက်သောင်း) စသဖြင့် အခွန်ကောက်ခံနေတာကြောင့် ဆိုင်လုပ်ငန်းလုပ်ကိုင်သူတွေ အခက်တွေ့နေကြတယ်လို့ နောင်ပိုအောင်ကျေးရွာနေအမျိုးသမီးတစ်ဦး KNG ကိုပြောပါတယ်။ “ဆိုင်အကြီးတွေဆို ခြောက်သိန်းတဲ့ ကွမ်းယာခုံတစ်ခုံဆိုလည်းခြောက်သောင်းတဲ့ တစ်လကိုနော် တောင်းတာတောင်တစ်နှစ်စာပေါင်းပြီးတောင်းတာ စာရွက်လေးတွေပေးပြီးတောင်းတယ် မပေးနိုင်ကြဘူးလေ တစ်နှစ်စာဆို ရာချီ၊ဆယ်ချီမပေးနိုင်လို့တချို့ဆိုင်တွေဖြုတ်လိုက်တဲ့လူတွေလည်းရှိတယ်”လို့ ကုန်ခြောက်ဆိုင်ဖွင့်ထားတဲ့ ဒေသခံအမျိုးသမီး ပြောပါတယ်။ ပြီးခဲ့တဲ့ အောက်တိုဘာလမတိုင်ခင်အထိ SNA အနေနဲ့ ကုန်စုံဆိုင်အကြီးတစ်လလျှင် အများဆုံးကျပ် ၃၀၀၀၀၀ (သုံးသိန်း) ၊ကုန်ခြောက်ဆိုင်နဲ့တစ်ခြားသော ဆိုင်အသေးတွေ တစ်လ အနည်းဆုံးအခွန်ကျပ် ၃၀၀၀၀ (သုံးသောင်း) အထိသတ်မှတ်ပြီး လပေးစနစ်နဲ့ကောက်ခံတာလို့ သိရပါတယ်။ သို့သော် နိုဝင်လစပြီး အခွန်တိုးမြင့်ကောက်ခံလိုက်တဲ့အပြင် တစ်နှစ်စာပေါင်းပြီး ကောက်ခံနေတာကြောင့် ရပ်နားသွားရတဲ့ ဆိုင်တွေလည်းအများအပြားရှိနေကြတယ်လို့ နောက်ထပ်ဒေသခံအမျိုးသားတစ်ဦး ဆက်ပြောပါတယ်။ “ဒီသုံးလေးလထဲအပြီးပေးရမယ်တဲ့ လျော့ပေးဖို့တောင်းဆိုကြတယ်အဆင်မပြေဘူး အဲ့ကြောင့်အရင်းအနှီးမရှိတဲ့လူတွေက မပေးနိုင်လို့ဆိုပြီးဆိုင်တွေရပ်ကုန်ကြတာ။ တချို့ဆိုစစ်ရှောင်ရင်းဒီရောက်လာပြီးရှိတာလေးနဲ့ဆိုင်လေးဖွင့်စားတာ သူတို့လည်းမရှိလို့ဆက်မရောင်းနိုင်ကြတော့ဘူး”လို့ ပြောပါတယ်။ လက်ရှိ နောင်ပိုအောင်ကျေးရွာက ကုန်စုံဆိုင်၊စားသောက်ဆိုင်လုပ်ကိုင်ကြတဲ့လူတွေထဲမှာ ရွာခံတွေရှိကြသလို ရွှေပြည်အေးမြို့၊လွှစင်ကုန်းနဲ့တစ်ခြားအနီးဝန်းကျင်ရွာကနေ စစ်ဘေးရှောင်ရင်း လာရောက်လုပ်ကိုင်သူတွေလည်းရှိတယ်လို့ သိရပါတယ်။ ဒါပေမယ့် ခုလို အခွန်တိုးကောက်လိုက်တဲ့အတွက် စစ်ရှောင်ရင်း ဆိုင်အသေးဖွင့်တဲ့သူအများပိုင်း ရပ်နားလိုက်ရကြပြီလို့ ဒေသခံတွေပြောပါတယ်။ နောင်ပိုအောင်ကျေးရွာဟာ ဟုမ္မလင်းမြို့နဲ့ဆယ်မိုင်ကျော်အကွာ ကချင်နဲ့ စစ်ကိုင်းတိုင်းအစပ်မှာရှိပြီး SNAစစ်သားတွေရာချီတပ်ထိုင်ထားသလို SNA တပ်သားသစ်တွေကိုစစ်သင်တန်းပေးနေတဲ့ နေရာလည်းဖြစ်ပါတယ်။ By – Zaw Zaw
Read More » -
14 Novemberသတင်း
အင်ဘာပါဒေသ တောင်ယာစပါးခင်းများ ကြွက်ဘေးကြောင့် ရိတ်သိမ်းဖို့စပါးမရှိတော့ဘူးလို့ တောင်သူတွေပြော
ဗန်းမော်ခရိုင် မံစီမြို့နယ် အင်ဘာပါဒေသထဲက ရွာပေါင်း ၁၀ ဝန်းကျင်က ဒေသခံတောင်သူတွေစိုက်ပျိုးထားတဲ့ တောင်ယာစပါးခင်းများ ကြွက်ဘေးဆိုက်သွားတဲ့အတွက် ရိတ်သိမ်းဖို့စပါးမရှိတော့တဲ့အတွက် တောင်သူတွေအခက်တွေ့နေကြတယ်လို့ သိရပါတယ်။ ပြီးခဲ့တဲ့ မေလကတည်းကစတင်စိုက်ပျိုးထားတဲ့ ဒေသခံတောင်သူတွေရဲ့တောင်ယာစိုက်ခင်းတွေ ဇူလိုင်လစ ကြွက်ဘေးဆိုက်လာတာကြောင့် အောက်တိုဘာ၊ နိုဝင်ဘာလ စပါးရိတ်သိမ်းမှာ ရိတ်ဖို့စပါးမရှိတော့ဘူးလို့ မိုင်ကုန့်ဒေသခံတစ်ဦး KNG ကိုခုလိုပြောပါတယ်။ “စပါးတွေက ပြီးခဲ့တဲ့ ဩဂုတ်လမှာ တစ်ဖန်ပြန်ပြီး နလန်ထူ…
Read More »
