ဖားကန့် စစ်အာဏာရှင်ဆန့်ကျင်ရေး တာမခန် သပိတ်စစ်ကြောင်းတွင်ပါဝင်မှုကြောင့် ဇွန်လ ၃၀ ရက်နေ့က ဖမ်းဆီးခံရသောအမျိုးသား ၄ ဦးကို ယနေ့တွင် အာမခံဖြင့် ပြန်လွတ်ပေးလိုက်ကြောင်း သိရသည်။
နောက်နောင် စစ်အာဏာရှင်ဆန့်ကျင်သည့် သပိတ်စစ်ကြောင်းတွင် မပါဝင်တော့ပါကြောင်း အာမခံဖြင့် လက်မှတ်ရေးထိုးခိုင်းကာ ယနေ့ နံနက် ၇ နာရီက လွတ်ပေးခဲ့ခြင်း ဖြစ်သည်ဟု ပြန်လည်လွတ်မြောက်လာသူများနှင့် နီးစပ်သူ တာမခန်ပြည်သူတစ်ဦးက ယခုလိုပြောသည်။
“ဒီမနက် အစောကြီးမှာ အာမခံနဲ့ ၄ ယောက်စလုံးကို ပြန်လွတ်ပေးခဲ့တယ်။ ဒါပေမယ့် သူတို့ရဲ့ ဖုန်းတွေက ပြန်စစ်အုံးမယ်ဆိုပြီး ပြန်မပေးလိုက်ဘူး။ နောက် ဆန္ဒပြပွဲမှာသုံးတဲ့ ပစ္စည်းတွေလည်း ပြန်မပေးဘူး။ အာမခံတဲ့ အပိုင်းက နောက်ခါ သပိတ်ထဲမလိုက်ဖို့နဲ့ သပိတ်ပြန်မလုပ်ကြဖို့ ပြောခဲ့တယ်လို့သိရတယ်” ဟု ဆိုသည်။
ဖမ်းဆီးခံရသူ ၄ ဦး၏ ဖုန်းများနှင့် ဆန္ဒပြပွဲတွင် အသုံးပြုသည့် ဘောက်စပီကာနှင့်လော် များကို ပြန်မပေးဘဲ သိမ်းထားကာ ဆက်လက်စစ်ဆေးနေဆဲဖြစ်သည်ဟု သိရသည်။
ကချင်ပြည်နယ်တွင် ဖားကန့် တာမခန်သပိတ်စစ်ကြောင်းသည် အခြား မြို့များနှင့်မတူဘဲ အားဏာသိမ်းပြီး ၅ လ ကျော်တိုင်အောင် နေ့စဉ်မပြတ် စစ် အာဏာရှင်ကိုဆန့်ကျင် ဆန္ဒဖော်ထုတ်နေသော မြို့ဖြစ်သည်။
စစ်တပ်နှင့် ရဲဘက်ကလည်း နေ့စဉ် သေနတ်ပစ်ဖောက်ကာ ဆန္ဒပြပြည်သူများကို လိုက်လံဖမ်းဆီးမှုပြုနေသော်လည်း ပြည်သူများက ပျောက်ကြားသပိတ်၊ နံနက်ခင်း သပိတ်၊ ညသပိတ် နှင့် ဆိုင်ကယ်သပိတ်များဖြင့် ပုံမှန်ပြုလုပ်နေသည်။
ကချင်ပြည်နယ်အတွင်း အခြားဒေသများတွင်မူ စစ်အာဏာရှင်ဆန့်ကျင်ရေး လမ်းပေါ်ထွက် ဆန္ဒဖော်ထုတ်မှုများ မရှိတော့သည်ကို သိရသည်။
