လူ့အခွင့်အရေးချိုးဖောက်မှုသတင်း
မြစ်ကြီးနားတွင် လူငယ် ၇ဦးထက်မနည်းကို စစ်ကောင်စီ ဖမ်းဆီးသွား
မြစ်ကြီးနားမြို့တွင် အာဏာသိမ်းစစ်ကောင်စီက အင်အားအများအပြားဖြင့် လူငယ် ၇ဦးထက်မနည်းကို ကျောက်စိမ်းအဝိုင်းပတ်ရှေ့တွင် ဖမ်းဆီးခေါ်ဆောင်သွားကြောင်းသိရသည်။
ယနေ့ ညနေပိုင်း ၄နာရီခွဲ ဝန်းကျင်ခန့်တွင် အိမ်စီးကားများအပါ စစ်ကားများဖြင့် လူငယ် ၇ ဦးခန့်ကို ခြိမ်းခြောက်ကာ ဖမ်းဆီး ခေါ်ဆောင်သွားသည်ကို မြင်တွေ့ခဲ့ရသည်ဟု ပြည်သူတစ်ဦးက KNG သတင်းဌာနကို ယခုလိုပြောဆိုခဲ့သည်။
“အားလုံးက အမျိုးသားတွေကြီးဘဲ။ အနည်းဆုံး ၇ယောက် အထက်လောက်ရှိတယ်။ ဒူးထောက်ထားခိုင်းတယ်။ နောက် လက်ကိုလည်း ခေါင်းပေါ်တင်ထားခိုင်းတယ်။ အဲ့လူငယ်တွေက ဆိုင်ကယ်နဲ့ဟုတ်တယ်။ အဝေးကနေဘဲလှမ်းမြင်နေရတယ်။ ဘာကြောင့်ဖမ်းတာက ကျနော်လည်း မသိဘူး။ ဖမ်းသွားတာကိုဘဲ မြင်လိုက်ရတယ်”ဟု ပြောဆိုသည်။
ဖမ်းဆီးသွားသည့် လူငယ်များ မည်သူမည်ဝါများဖြစ်သည်ကို သေချာမသိရကြောင်း သူကဆက်ဆိုထားသည်။
