ကောလင်းမြို့နယ် ကျောင်းဆရာတစ်ဦးအပါအဝင် ပြည်သူ ၄ ဦးထက်မနည်းကို စစ်ကောင်စီ သတ်ဖြတ်ခဲ့
စစ်ကိုင်းတိုင်း၊ ကောလင်းမြို့နယ်၊ တောင်မော်ကျေးရွာနေထိုင်သည့် ပြည်သူ ၄ဦးထက်မနည်း ယနေ့ (နိုဝင်ဘာလ ၃ရက်) နေ့လယ်ခန့်က အသတ်ခံထားရကြောင်း ဒေသခံများထံမှ သိရသည်။
“ဖြစ်စဥ်က နေ့လည်လောက်မှာဖြစ်တာဗျာ၊ အတည်ပြုနိုင်ခဲ့တာတော့ ညနေပိုင်းမှပါ။ မတရားဖမ်းဆီးသတ်ခံထားရတာ အမျိုးသားကြီးဘဲ။ လူငယ်ပိုင်း သုံးဦးနဲ့ လူကြီး တစ်ဦး ၄ ရှိပြီ” ဟု ဒေသခံတစ်ဦးက KNG ကို ပြောသည်။
သတ်ဖြတ်ခံထားရသူများမှာ ကိုအောင်ကြည်လွင်၊ ကိုဝေမင်းသူ ( အထက်တန်းပြ) ၊ ကိုအောင်နိုင်ဝင်း၊ ကိုဖိုးလပြည့် (ခ)ကျော်လင်းအောင်တို့ဖြစ်ကြောင်း သိရသည်။
တောင်မော်ကျေးရွာသည် ကောလင်းခရိုင်၊ ကောလင်းမြို့နယ်၊ အရှေ့ဘက် ၈ မိုင် အကွာတွင် တည်ရှိသည့်ကျေးရွာဖြစ်ကာ လက်ရှိချိန် ကျေးရွာရှိပြည်သူအချို့ ထွက်ပြေးတိမ်းရှောင်နေရပြီဖြစ်ကြောင်း နီးစပ်သူများကပြောသည်။
ကျေးရွာအတွင်း သတင်းပေး(ဒလန်)များ လက်ညိုးထိုးရာအိမ်များနှင့် မသင်္ကာကာသည့် အိမ်များတွင်းသို့ စစ်ကောင်စီတပ်သည် ဝင်ရောက်စစ်ဆေးဖမ်းဆီးနှိပ်စက် သတ်ဖြတ်မှုများ ကျူးလွန်နေဆဲဖြစ်ကြောင်း ၎င်းက ဆက်ပြောသည်။
“စစ်သားတွေက ခုထိ ရွာထဲမှာ ရှိနေတုန်းမို့ ခုသတ်ခံရတာ ဘယ်လောက်တောင်ရှိနေပြီလဲဆိုတာ တိတိကျကျမသိရသေးဘူး” ဟု ဒေသခံများနှင့် နီးစပ်သူများ ပြောသည်။
လက်ရှိ တောင်မော်ကျေးရွာတွင် ဝင်ရောက်နေသည့် စစ်ကောင်စီတပ်များသည် နိုဝင်ဘာလ ၂ ရက်နေ့ ၁ နာရီဝန်းကျင် ကောလင်းမှ စစ်ကား ၇ စီးဖြင့်ချထားခဲ့သည့် တပ်ဖွဲ့ဖြစ်ကာ အင်အား ၅၀ ခန့်ရှိကြောင်း သိရသည်။
စစ်ကိုင်းတိုင်းတွင် စက်တင်ဘာလ ၂၂ ရက်နေ့ နောက်ပိုင်း စစ်ကောင်စီတပ်များ စစ်အင်အားပိုမိုဖြည့်တင်းလာသည့်အပြင် ဒေသခံကာကွယ်ရေးတပ်နှင့် စစ်ကောင်စီတပ် နေ့စဉ်နှင့်အမျှ တိုက်ပွဲဖြစ်ပွားနေဆဲဖြစ်သည်။
