စစ်ကောင်စီ နှင့် ကိုးကန့် MNDAA တို့ နိုဝင်ဘာ ၁၁ ရက်နေ့က မုံးကိုး နှင့် သိန္နီ မြို့နယ်တွေမှာ တိုက်ပွဲ ဆက်လက် ဖြစ်ပွားခဲ့ပြီး စစ်ကောင်စီဘက်မှ စစ်ကူလာတဲ့ ယာဉ်တန်းအနက် စစ်ကား ၉ စီးကို MNDAA က ဖျက်ဆီးနိုင်ခဲ့ကြောင်း ကိုးကန့် သတင်းမှာ ဖော်ပြထားပါတယ်။
“မန်းယန် ဘက်မှာတော့ သူတို့ (စစ်ကောင်စီ) အကြီးအကျယ် လှုပ်ရှား နေကြတယ်။ နောင်ထွဲဘက်မှာရော။ မန်းယန်မှာ ဗျူဟာ ၁ ခု ထိုင်တယ်။ ဖောင်းဆိုင်မှာ ရောပဲ။ မနက်ဖြန် သဘက်ခါ ဘယ်လို ဖြစ်လာမလဲတောင် မသိဘူး။” လို့ ဖောင်းဆိုင် ဒေသခံ တစ်ဦးက ပြောပါတယ်။
နိုဝင်ဘာလ ၁၁ ရက်နေ့ မနက်ပိုင်းက သိန္နီမြို့နယ် နမ့်စလပ် မှ ကိုးကန့် ကွမ်းလုံဒေသသို့ စေလွှတ်လိုက်တဲ့ စစ်ကူကား ၂၈ စီးကို ကိုးကန့် MNDAA မှ အဆင့်အဆင့် ကြားဖြတ်တိုက်ခိုက်ရာ စုစုပေါင်း ကား ၉ စီး ဖျက်ဆီးခဲ့ကြောင်း ကိုးကန့် သတင်းအရ သိရပါတယ်။
ဒါ့အပြင် အဲဒီနေ့ကပဲ စစ်ကောင်စီက မုံးကိုး ပန်ရင်လပ်ကို ထိုးစစ်ဆင်တိုက်ခိုက်လာတာကြောင့် ညနေပိုင်းထိ တိုက်ပွဲများ ဖြစ်ပွားခဲ့ကြောင်း၊ မုံးကိုးမြို့နယ် မန်ဖာရွာ နှင့် သိန္နီမြို့နယ် ပန်လုံရွာ တို့တွင်လည်း တိုက်ပွဲများဖြစ်ပွားခဲ့ကြောင်း သိရပါတယ်။
လက်ရှိ အဆိုပါနေရာများရှိ ပြည်သူများကို အမြန်ပြောင်းရွေ့ရန် စစ်ကောင်စီဘက်မှ ပြောဆိုနေကြောင်း မုံးကိုးဒေသခံတစ်ဦးကပြောပါတယ်။
“စစ်ကောင်စီက ရွာထဲမှာ တယောက်မှ မနေခိုင်းတော့ဘူးခု နမ့်ဟာ၊ ကောင်းလုံမှာ။ အားလုံး မုံးကိုးဘက် ပြောင်း လာခဲ့ပြီ။ စစ်ကောင်စီ တပ်က ကောင်းလုံမှာ နေနေတယ်။ ရွာမှာ နေရင် ရန်သူလို့ သတ်မှတ်လိုက်တာကို သူတို့က။” လို့ မုံးကိုး စစ်ရှောင် ပြည်သူတစ်ဦးက ပြောပါတယ်။
စစ်ကောင်စီနဲ့ ကိုးကန့် MNDAA တို့ အကြား ပြီးခဲ့တဲ့ ဇူလိုင်လဆန်းကစ မုံးကိုးမြို့နယ်မှာ တိုက်ပွဲဖြစ်ပွားနေပြီး သိန္နီမြို့နယ် အတွင်း မှာလည်း ဩဂုတ်လ ကစ ကြိုကြား တိုက်ပွဲ ဖြစ်ပွား နေတာ လည်း ဖြစ်ပါတယ်။
Bum Shep
