ဖားကန့်မြို့ ကချင်လွတ်လပ်ရေးတပ်မတော် KIA တပ်မဟာ ၉ တပ်ရင်း ၆ နယ်မြေဘက်သို့ စစ်ကောင်စီတပ်က ယနေ့ နံနက်ပိုင်း လက်နက်ကြီးဖြင့် ပစ်ခတ်နေကြောင်း ဒေသခံများထံမှ စုံစမ်းသိရှိရသည်
“လက်နက်ကြီးသံကတော့ ဟုတ်တယ် တော်တော်များမယ်ဗျ။ ငါးချက်ခြောက် ချက်လောက်ပစ်တယ်။ မနက်ခြောက် နာရီခွဲ လောက်ကပစ်တာ”ဟု ဖားကန့်မြို့နေအမျိုးသားတစ်ဦးကပြောသည်။
KIA တပ်မဟာ ၉ သည် ဖားကန့်မြို့နယ် ကံဆီး (Ginsi) ကျေးရွာဘက်တွင်တည်ရှိသည်။
ယနေ့ နံနက်ပိုင်းတွင် ဖားကန့်မြို့ နှင့် နန့်ရင်းကြားရှိ ကျောက်ဖျာနေရာတွင် KIA နှင့် စစ်ကောင်စီတပ်တို့ကြား တိုက်ပွဲဖြစ်ပွားခဲ့ကြောင်းသိရပြီး ယင်းတိုက်ပွဲကြောင့် ပစ်ခတ်ခြင်းဖြစ်နိုင်ကြောင်း ဆက်ပြောသည်။
ကျောက်ဖျာတွင် စစ်ကောင်စီတပ် နှင့် KIA တို့ တိုက်ပွဲဖြစ်ပွားခြင်းရှိ မရှိကို KNG က ဆက်လက် အတည်ပြုနေဆဲ ဖြစ်သည်။
အလားတူ ယနေ့ နံနက်ပိုင်းက အင်းတော်ကြီး ချောင်းဝပြည်သူ့စစ်စခန်းကို KIA နှင့် PDF ပူးပေါင်းတပ်တို့က သွားရောက်သိမ်းပိုက်ပြီး မီးရှို့ဖျက်ဆီးခဲ့သည်။
