ဖားကန့်မြို့ လမောင်စခန်းသိမ်းတိုက်ပွဲမှာ စစ်သုံ့ပန်း ၁၂ ဦးကို KIA ပူးပေါင်းတပ် ဖမ်းဆီးရမိထားပြီး စစ်တပ်ဘက်က လေကြောင်းတိုက်ခိုက်မှုတွေ လုပ်နေဆဲဖြစ်တယ်လို့ KIA ရှေ့တန်းသတင်းရင်းမြစ်ကနေ သိရပါတယ်။
ဩဂုတ်လ ၁၄ ရက် မနက် ၃ နာရီဝန်းကျင် လမောင်ဗျူဟာစခန်းနဲ့ တောမှော်စခန်းတို့ကို KIA ပူးပေါင်းတပ် တပြိုင်နက်ထိုးစစ်ဆင်တိုက်ခိုက်ရာမှာ ဩဂုတလ ၁၅ ရက်နေ့ မနက် ၉နာရီမှာ လမောင်ဗျူဟာကုန်း သိမ်းပိုက်ရရှိခဲ့ပြီး စစ်တုံ့ပန်း ၁၂ ဦးကိုလည်း KIA ဘက်က ဖမ်းဆီးရမိထားတယ်လို့ သိရပါတယ်။
အဲဒီနောက် စခန်းလက်လွတ်လိုက်ရတဲ့ စစ်ကောင်စီတပ်က နေ့လည် ၁၂ နာရီ ၄၅ မိနစ်ဝန်းကျင်မှာ Y-12 လေယာဉ်နဲ့ဗုံးကြဲသွားတယ်လို့ KIA ရှေ့တန်းသတင်းရင်းမြစ်တစ်ဦးက KNG ကိုပြောပါတယ်။
“ဖမ်းမိထားတာက ၁၂ ယောက်ရှိတယ် ရာထူးတွေတော့မသိရသေးဘူးဗျ မနက်က ဖမ်းမိတာဟုတ်တယ် နေ့လည်ကတော့ လေယာဉ်နဲ့လာပစ်သေးတယ်။ ခုလည်း လေယာဉ်ကမကြာခန လာဝဲနေတုန်း”လို့ ပြောပါတယ်။
ဖားကန့်ဒေသခံတွေရဲ့ပြောဆိုချက်အရ လမောင်ကုန်းစခန်းကို KIA ပူးပေါင်းတပ်သိမ်းပိုက်လိုက်ကြောင်း သတင်းထွက်လာပြီးနောက် ဖားကန့်ဗျူဟာကုန်းကနေ စစ်ကြောင်းတစ်ကြောင်း အေးမြသာယာဘက် စစ်ကြောင်းထိုးလာတယ်လို့သိရပြီး ဒီစစ်ကြောင်းဟာ လမောင်စခန်းဘက် စစ်ကူသွားဖို့ ဖြစ်နိုင်တယ်လို့လည်း ဒေသခံတွေက သုံးသပ်နေကြပါတယ်။
ဩဂုတ်လ ၁၅ ရက် ညနေ ၅ နာရီဝန်းကျင်အထိ လက်နက်ကြီးပစ်ခတ်သံတွေဆက်တိုက်ကြားနေရဆဲဖြစ်ပြီး စစ်တပ်နဲ့ KIA ပူးပေါင်းတပ်ကြား နှစ်ဖက်စစ်ရေးတင်းမာနေဆဲဖြစ်တယ်လို့ ဒေသခံတွေကပြောပါတယ်။
ကချင်လွတ်လပ်ရေးတပ်မတော် KIA နဲ့ KPDF တပ်တို့် တိုက်ခိုက်သိမ်းပိုက်လိုက်တဲ့ လမောင်ဗျူဟာစခန်းကုန်းဟာ ဆယ်စုနှစ်တစ်စုကြာ အခိုင်အမာတည်ရှိတဲ့စခန်းဖြစ်ပြီး တပ်မ ၃၃ လက်အောက် ခမရ ၁၂ တပ်ရင်းအထိုင်ချစခန်းဖြစ်တယ်လို့လည်း သိရပါတယ်။
ဒီစခန်းကုန်းဟာ ဖားကန့်မြို့နယ်တစ်ခုလုံးကို အပေါ်စီးကနေ လှမ်းမြင်နိုင်ပြီး ဖားကန့်မြို့တွင်း စစ်တပ်ဗျူဟာကုန်း၊ လုံးခင်းယမ်းချက်နဲ့ မြို့တွင်းတပ်အားလုံးကို လက်နက်ပစ်ကူ လုံခြုံရေးယူပေးနေတဲ့ စခန်းဖြစ်သလို စစ်ရေးအရ အချက်ချာကျတဲ့နေရာဖြစ်တယ်လို့လည်း ဒေသခံတွေကပြောပါတယ်။
“သုံးပွင့်ဆိုင်ပုံစံမျိုးနေရာယူထားတာ ပြောမယ်ဆိုရင် ဖားကန့်ဗျူဟာကုန်း၊ လုံးခင်းယမ်းချက်၊ လမောင်းကုန်း နေရာ ၃ ခုက ဖိုခနှောင့်လိုဖြစ်နေတာ ခု လမောင်ကုန်းရသွားပြီဆိုတော့ စစ်တပ်အတွက် နောက်ကျောမလုံတော့ဘူး” လို့ ဖားကန့်မြို့ခံတစ်ယောက်က ပြောပါတယ်။
ယနေ့ ညနေပိုင်း ၆ နာရီဝန်းကျင်လောက်မှာလည်း သိမ်းဆည်းဖို့ ကျန်ရှိနေသေးတဲ့ တောမှော်တပ်စခန်းကိုလည်း သိမ်းပိုက်ရရှိခဲ့ပြီပြီလို့ သိရပေမယ့် KNG ကသီးခြားအတည်ပြုနိုင်ခြင်းမရှိသေးပါဘူး။
ဖားကန့်မြို့နဲ့ ၅ မိုင်အကွာမှာရှိတဲ့ လမောင်ကုန်းဗျူဟာမြောက်စခန်းဟာ KIA ပူးပေါင်းတပ်ဘက်က စစ်ရေးအရအသာစိီးရနိုင်တဲ့နေရာဖြစ်တာကြောင့် စစ်တပ်ဘက်ကလည်း လေကြောင်းနဲ့ထပ်ပြီးပစ်ခတ်နေတာဖြစ်တယ်လို့လည်း ဖားကန့်မြို့ခံတွေကပြောပါတယ်။
၂၀၂၄ ခုနှစ် နှစ်ဆန်းကတည်းကနေ ထိုးစစ်ဆင်တိုက်ခိုက်နေတဲ့ KIA ပူးပေါင်းတပ်တွေဟာ မြစ်ကြီးနား– ဖားကန့်လမ်းမပေါ်အရေးပါတဲ့ နန့်ယား၊ နန့်တိန်းအပါအဝင် စခန်းပေါင်း ၆ ခုထက်မနည်း သိမ်းပိုက်ရရှိထားပြီဖြစ်ပါတယ်။
By – Zami
