ဖားကန့်မြို့ နယ်၊ ဆိုင်းတောင် (ဆိပ်မူအုပ်စု) ရှိ စပေါ့ကျေးရွာမှာ နွံကန်ကြီးပြိုကျမှုကြောင့် နေအိမ် ၅၀ ခန့် ပါသွားပြီး လူအသေအပျောက်များခဲ့တယ်လို့ ဒေသခံတွေ ပြောပါတယ်။
ဇန်နဝါရီလ ၁၃ ရက် ဒီမနက်ပိုင်း ၁ နာရီခွဲလောက်မှာ စပေါ့ကျေးရွာရှိ မြေစာပုံလောင်းချရာ နွံကန်ကြီး ပေါက်ကျပြီး နေအိမ် ၅၀ ခန့် မြေပိသွားကာ လူသေမှု ၁၂ လောင်းရှာဖွေ တွေ့ထားပြီလို့ ဒေသခံအမျိုးသမီးတစ်ဦး KNG ကို ပြောပါတယ်။
“အချိန်က ၁ နာရီခွဲလောက်မှာ ဖြစ်သွားတာ။ ရွာနေရာပါ။ အိမ်ခြေ လေး၊ငါးဆယ်လောက်ပါသွားတယ်။ လူကအရမ်းများတယ် ဆိုတော့ အခုထိ အတိအကျ မသိသေးဘူး။ အခုဆယ်ရထားတာက ၁၂ လောင်းရှိပြီ။ မိသားစုလိုက် ဖေါ်မရသေးတာတွေလည်း အများကြီးရှိသေးတယ်။ ဒီမနက်တွေ့ထားတဲ့ အလောင်းထဲမှာ သားအမိ ၃ ဦးပါတယ်။” လို့ စပေါ့မှော်အနီး နေထိုင်သူ အမျိုးသမီးတစ်ဦးက ပြောပါတယ်။
ဒီကနေ့ မနက်ပိုင်း ၁၁ နာရီဝန်းကျင်အထိတော့ လူသေအလောင်း ၁၂ လောင်းရှာဖွေတွေ့ရှိထားပြီး သေဆုံးသူတွေထဲမှာ လူကြီး ၉ ဦး ကလေး ၃ ဦး ပါဝင်တယ်လို့ သူက ပြောပါတယ်။
သေဆုံးသူတွေထဲမှာ မိသားစုလိုက်ပါဝင်သလို ထိခိုက်ဒဏ်ရာရရှိသူတွေကို ဆေးရုံတင်ထားရတယ်လို့လည်း သိရပါတယ်။
လက်ရှိမှာတော့ ကချင်လွတ်လပ်ရေးအစိုးရအဖွဲ့ KIO က ဦးဆောင်ပြီး ကယ်ဆယ်ရေး လုပ်ဆောင်နေတယ်လို့ သိရပါတယ်။
“အခုက နွံ၊မြေတွေကို ဘေးကနေ ဘတ်ဖောတွေနဲ့ အရင်တစ်ဆင့်ပြီးတစ်ဆင့်ဖယ်ရှားပြီး ရှင်းလင်းရေးလုပ်နေတယ်။ ဒီနွံကန်အိုင်က ဆက်မလုပ်သင့်တော့တဲ့ထဲမှာ ရှိနေပြီ။ အဲဒါကို ဆက်လုပ်ဆော့ နွံကန်အိုင်က အောက်ကနေ ပေါက်ကျလာတော့ဒါပဲ။ အခုဒါတောင် မိုးတွင်းမဟုတ်လို့ တစ်ရွာလုံးမမြုပ်သွားတာ။ ပြီးရင် ရေက အဲလောက်မပါလို့ လုပ်ကွက် ကုမ္မဏီတွေရဲ့ ဘေးပတ်ဝန်းကျင်ပဲ ပါသွားတာ။ ရေတာပါပြီး ပေါက်ထွက်လို့ကတော့ တစ်ရွာလုံး ပါသွားပြီ။” လို့ သူမက ဆက်ပြောပါတယ်။
ပြီးခဲ့တဲ့ နိုဝင်ဘာလ၊ ဒီဇင်ဘာလ လောက်ကစပြီး ဒီ နွံကန်ကြီးကို ပြိုကျမှာကို ဒေသခံတွေ စိုးရိမ်နေခဲ့တယ်လို့ ဆိုပါတယ်။
ဒါပေမဲ့ သက်ဆိုင်ရာ အာဏာပိုင်တွေနဲ့ လုပ်ငန်းရှင်တွေ ကျေးရွာတာဝန်ရှိသူတွေက မြေစာ မရပ်မနား လောင်းထည့်ပြီးနောက် နွံကန် ပိလာပြီး အောက်ကနေ ပေါက်ထွက် ပြိုကျလာခြင်း ဖြစ်တယ်လို့ ဒေသခံတွေ ပြောပါတယ်။
ပြီးခဲ့တဲ့ မိုးတွင်းကာလ ဖားကန့်ဒေသမှာ ရေကြီးရေလျှံမှုတွေကြောင့် နေအိမ်တွေ အများအပြား ဆုံးရှုံးလိုက်ရကာ ကျောက်စိမ်းလုပ်ကွက်တွေ နဲ့ နွံကန်တွေမကြာမခဏ ပြိုကျမှုတွေကြောင့် လူသေဆုံးမှုဖြစ်စဉ် မကြာမခဏဖြစ်ပွားနေတာလည်း ဖြစ်ပါတယ်။
By – ဂျာဘောက်ရာ
