သတင်း

တရုတ်သမ္မတရောက်လာစဉ် မြန်မာအစိုးရတပ်မှ ကိုးကန့်စခန်းကို တိုက်ခိုက်

တရုတ်သမ္မတ Mr. Xi Jinping သည် မြန်မာနိုင်ငံ ချစ်ကြည်ရေးခရီးရောက်လာစဉ် တပ်မတော်က ရှမ်းပြည်မြောက်ပိုင်း မြန်မာ-တရုတ် နယ်စပ်အနီး ကိုးကန့် MNDAA စခန်းတစ်ခုကို ရည်ရွယ်ချက်ရှိရှိ အလစ် ဝင်တိုက်ခဲ့ကြောင်း ဒေသခံများဆိုပါသည်။

ဇန်နဝါရီ (၁၇)၊ သောကြာနေ့ နံနက်မိုးမလင်းခင် (၆)နာရီဝန်းကျင်ခန့် အဆိုပါ မူဆယ်မြို့နယ် Hpawng Seng ဒေသ မြန်မာအမျိုးသားဒီမိုကရက်တစ်မဟာမိတ်တပ်မတော် MNDAA စခန်းကို ခိုးဝင်ပြီး တပ်မ (၆၆)လက်အောက် ခမရ (၃၆၄)၏ တိုက်ခိုက်မှုသည် အချိန် မိနစ် (၂၀)ခန့်ကြာပြီး ကိုးကန့် စစ်သား ၁ဦး ကျဆုံးကြောင်း ဒေသခံများ ကချင်သတင်းဌာန KNG ကို ပြောပါသည်။

“ဒီနေ့မနက် ၆နာရီခန့်မှာ ဖောင်းဆိုင် ကိုးကန့်တွေရှိတဲ့ Puwang ကုန်းမှာ မြန်မာအစိုးရတပ်တွေ လာပစ်တော့ တစ်ဦးကျသွားတယ်လို့ ကြားရတယ်။ သမ္မတရှီကျင်ဖင် မြန်မာနိုင်ငံလာမယ်ဆိုတော့ သေနတ် မပစ်ဖောက်နဲ့ ဆိုထားစဉ် အချိန် လေးနာရီခန့် ကားနဲ့သွားရတဲ့ နေရာမှ မြန်မာစစ်တပ်တွေ ကား ၁စီးနဲ့ ညမှာ ခိုးဝင်လာပြီးတော့ မနက်စောစော လာပစ်ကာ ပြန်ခေါက်သွားတာ ဖြစ်ပါတယ်” ဟု ဖောင်းဆိုင် ဒေသခံ တစ်ဦး ကချင်သတင်းဌာန KNG ပြောပါတယ်။

ခြေမြန်တပ်ရင်း (၃၆၄) တပ်သည် Luyin Htang ကနေ ကား ၁စီးဖြင့် အချိန် ၄နာရီကျော် မောင်းရသော တရုတ်နယ်စပ်အနီး အဆိုပါ MNDAA စစ်သား (၁၀)ဦးကျော်ရှိသည့် စခန်းကို ကြာသပတေးနေ့ည ခိုးဝင်ပြီး အလစ် ပစ်ခတ်တိုက်ခိုက်ခဲ့ခြင်းဖြစ်သည်။

ယခုလို နယ်စပ်အနီး ကိုးကန့်စခန်းကို လာပစ်ခတ်ပြီး ပြန်သွားခြင်းသည် “မြန်မာစစ်တပ်က စနစ်တကျနဲ့ ရည်ရွယ်ချက်ရှိရှိဖြင့် စီစဉ်လုပ်ဆောင်တယ်လို့ မြင်ပါတယ်” ဟု နယ်စပ်မှ စစ်ရေးလေ့လာသူ တစ်ဦးပြောပါသည်။

တရုတ်သမ္မတ  Xi Jinping သည် သောကြာနေ့ မြန်မာနိုင်ငံကို ရောက်ရှိလာပြီ ဖြစ်ပြီး စနေနေ့ အထိ ခရီးပြုရန် စီစဉ်ထားပါသည်။

 

Show More

Related Articles

Back to top button