ကချင်ပြည်နယ် မြစ်ကြီးနားမြို့မှာ MPT ဖုန်းဆင်းကဒ် တစ်ကဒ်ကို ကျပ်သုံးသောင်းခွဲအထိ ဈေးမြင့်တက်နေတယ်လို့ မြစ်ကြီးနားမြို့ခံတွေ ပြောပါတယ်။
၂၀၂၄ ခုနှစ် ဇူလိုင်လစပြီး ကချင်ပြည်နယ်နေရာအနှံ့ ဖုန်းလိုင်းနဲ့ အင်တာနက်လိုင်းဖြတ်တောက်ခံထားရပေမယ့် မြို့တော် မြစ်ကြီးနားမှာတော့ MPT ဖုန်းလိုင်းအများပိုင်းရနေပြီး ဖုန်းဆင်းကဒ်တွေလည်း ဈေးတက်လာတာဖြစ်တယ်လို့ မြစ်ကြီးနားဒေသခံ အမျိုးသမီးတစ်ဦး အခုလိုပြောပါတယ်။
“ဒီမနက်မှသွားဝယ်တာ သုံးသောင်းငါးထောင်ပေးရတယ် ဈေးတက်ချက်ကတော့ဆိုးတယ်။ MPT လိုင်းပဲရတယ် တစ်ခြား အော်ရီဒူးလိုင်း၊ တယ်လီနောတွေက မရတော့ ဝယ်ကြတာ ဈေးက ကြောက်စရာကြီး“လို့ပြောပါတယ်။
မြစ်ကြီးနားမြို့ MPT ရုံးနဲ့ ရပ်ကွက်တစ်ချို့မှာ MPT ဖုန်းလိုင်းရရှိပြီး တစ်လအကြာ ဩဂုတ်လမှာ မြို့ပေါ်ရပ်ကွက် ၇၀ ရာခိုင်နှုန်း MPT ဖုန်းလိုင်းရရှိလာတာဖြစ်ပါတယ်။
အဲဒီနောက် MPT ဖုန်းဆင်းကဒ်ဈေး တစ်ဖြည်းဖြည်းမြင့်တက်လာတာဖြစ်တယ်လို့ မြစ်ကြီးနားမြို့ ဖုန်းအရောင်းဆိုင်ဝန်ထမ်းတစ်ဦး အခုလိုပြောပါတယ်။
“လိုင်းစပြတ်တဲ့ချိန်ဆို ဆင်းကဒ်က ရှစ်ထောင် အဲကနေ တစ်သောင်း၊ ခုဆို သုံးသောင်းကျော်သွားပြီ။ ဆင်းကဒ်က အဝယ်များတော့ ပစ္စည်းပျက်တယ်။ ပြီးတော့ လမ်းပိုင်းကလည်း အရမ်းခက်တော့ တစ်ခါရောက်လာဖို့ကြာတယ်“လို့ပြောပါတယ်။
ခုလို MPT ဖုန်ဆင်းကဒ်ဈေးမြင့်တက်လာတာဟာ မူရင်းဝယ်ဈေးမြင့်တက်လာသလို လမ်းပိုင်းကြန့်ကြာမှူတွေကြောင့်ဖြစ်တယ်လို့ သူက ဆက်ပြောပါတယ်။
၂၀၂၄ ခုနှစ် ဇူလိုင်လမှာ MPT ဆင်းကဒ်တစ်ကဒ်လျှင် ကျပ် ရှစ်သောင်း၊ နိုဝင်ဘာလ နှစ်သောင်းဝန်းကျင်ရှိရာကနေ ဒီဇင်ဘာလကုန်ပိုင်း သုံးသောင်းခွဲအထိ မြင့်တက်သွားတာဖြစ်ပါတယ်။
ခုလို ဖုန်းဆင်းကဒ်ဈေးမြင့်တက်လာတာကြောင့် သာမန်လက်လုပ်လက်စားပြည်သူတွေအနေနဲ့ ဆင်းကဒ်တစ်ကဒ်ဝယ်ဖို့ပင် ခက်ခဲလာတယ်လို့ မြစ်ကြီးနားမြို့နေထိုင်တဲ့ အမျိုးသားတစ်ဦး ခုလိုပြောပါတယ်။
“နေ့စားတစ်ရက်သွားရင် နှစ်သောင်းဘဲရတာ စားဖို့ သောက်ဖို့ ဆီဖိုးနဲ့ဆို တစ်သောင်းလောက်ကျန်တယ် အဲဆင်းကဒ်တစ်ကဒ်တောင် ဝယ်မသုံးနိုင်ဘူး“လို့ပြောပါတယ်။
မြန်မာနိုင်ငံမြောက်ပိုင်း တရုတ်နယ်စပ်နဲ့နယ်နမိတ်ချင်းထိနယ်နေတဲ့ ကချင်ပြည်နယ်မှာ စစ်တပ်အာဏာသိမ်းပြီးနောက် မကြာခနဆိုသလို ဖုန်းလိုင်း၊ အင်တာနက်လိုင်းဖြတ်တောက်ခံရပေမယ့် ဒီတစ်ကြိမ်ဖြတ်တောက်ခံရမှုက သက်တမ်းအကြာဆုံး ဖြစ်ပါတယ်။
By – Zami
