ဖားကန့်တိုက်ပွဲမှာ နှစ်ဖက်စစ်တပ်ရဲ့ပိတ်ဆို့မှုတွေကြား စစ်ရှောင်ပြည်သူတွေ အဖက်ဖက်ကကြပ်တည်းလာ
ဖားကန့်မှာ စစ်ကောင်စီတပ်နဲ့ ကချင်လွတ်လပ်ရေးတပ်မတော် KIA ပူးပေါင်းတပ်ကြား တိုက်ပွဲပြင်းထန်နေတဲ့အတွက် တိုက်ပွဲဧရိယာအတွင်းနေထိုင်တဲ့ ကျေးရွာ ၁၀ ရွာခန့်က ထောင်နဲ့ချီတဲ့ စစ်ရှောင်တွေဟာ နှစ်ဖက်လက်နက်ကိုင်တပ်ဖွဲ့ရဲ့ လမ်းပိုင်းပိတ်ဆို့ထားမှုတွေကြောင့် အစားအသောက်အကူညီတွေ လိုအပ်နေတယ်လို့ သိရပါတယ်။
ဇူလိုင်လ ၄ ရက်နေ့ကနေစတင်ပြီး ဖားကန့်ဗျူဟာကုန်းနဲ့ အနီးကပ်ဆုံး ရှရော်ခ(Sharaw Hka) ညောင်ပင်ကုန်း၊ မော်မောလယန်နဲ့ ဆွတ်ဘွမ့်(အမှိုက်ပုံ)ကျေးရွာ စတဲ့ စစ်မျက်နှာ ၃ နေရာမှာ တိုက်ပွဲဖြစ်နေတာကြောင့် ရှရော်ခ၊ ဆွတ်ရာ(ကျောက်ဖြူ) ၊ မှော်ဝမ်းကလေး၊ မော်မောလယန်၊ ဆွတ်ဘွမ့်(အမှိုက်ပုံ) ၊ ဆိုင်းကြိုင်၊ မှော်ဝမ်းကလေး၊ ဆွတ်ငိုင်ယန်၊ အင်းမိုင်းယန် စတဲ့ ကျေးရွာတွေက ပြည်သူတွေ စစ်ဘေးတိမ်းရှောင်နေရတာဖြစ်ပါတယ်။
“လက်ရှိမှာက ဆွတ်ဘွမ့်(အမှိုက်ပုံ) ၊ မှော်ဝမ်းကြီး၊ မှော်ဝမ်းကလေး၊ ဆွတ်ငိုင်ယန်၊ အင်းမိုင်းယန် ဒီကျေးရွာတွေကတော့ လောလောဆယ် အလောတကြီး ပြေးနေရတာပေါ့။ အဲဒီကျေးရွာတွေက စစ်ကြောင်းတိုက်ရိုက်ထိုးနေတော့ မရှောင်လို့လည်း မရတော့ဘူး။ တစ်ချို့ပြည်သူတွေက တိုက်ရိုက်ကြီး စစ်ကြောင်းထိုးတာမရှိပေမယ့် လက်နက်ကြီး အပြန်အလှန် ပစ်ခတ်မှုကြောင့် လက်နက်ကြီးကျတာတွေဖြစ်တော့ မရှောင်ချင်ဘဲ ရှောင်ကြရတာတွေရှိနေတယ်။ ဖားကန့် ဘာသာရေးဘုန်းကြီးကျောင်းနဲ့ ဘုရားကျောင်းတွေမှာဆိုရင် စစ်ရှောင်တွေ ပြည့်လျှံနေကြပြီ။ အခုချိန်မှာဆို အဓိကတော့ အစားအသောက်ပိုပြီးခက်ခဲတယ်လေ။ လောလောဆယ်က သက်ဆိုင်ရာ အဖွဲ့အစည်းတွေကနေပဲ ရသလောက်လုပ်ပေးနေတာပေါ့”လို့ဖားကန့်ဒေသခံအမျိုးသားတစ်ဦးက ပြောပါတယ်။
တိုက်ပွဲကြောင့် ထွက်ပြေးတိမ်းရှောင်လာတဲ့ စစ်ရှောင်ပြည်သူတွေဟာ လက်ရှိ တိုက်ပွဲနေရာမဟုတ်တဲ့ ဖားကန့်မြို့နဲ့ ဆိုင်းတောင်၊ လုံးခင်းကျေးရွာရှိ ဘုန်းကြီးကျောင်း၊ ကချင်နှစ်ခြင်းခရစ်ယာန် KBC ၊ ကက်သလစ် RC နဲ့ ဆွေမျိုးအိမ်တွေမှာ ခက်ခက်ခဲခဲတိမ်းရှောင်နေကြတယ်လို့သိရပြီး ဒီစစ်ဘေးရှောင်ပြည်သူတွေကို ဖားကန့်ဒေသက အရပ်ဖက်လူမှုကူညီရေးအဖွဲ့စည်းနဲ့ သက်ဆိုင်ရာ ဘာသာရေးကျောင်းအသီးသီးက တာဝန်ရှိသူတွေရဲ့ ကြီးကြပ်မှုအောက်မှာ သွားနေတယ်လို့ ဆိုပါတယ်။
သို့သော် ဘုန်းကြီးကျောင်းနဲ့ ဘုရားကျောင်းဝင်းနေရာတွေမှာ စစ်ရှောင်ပြည့်လျှံသွားတဲ့အတွက် နေရာအခက်အခဲကြောင့် စစ်ရှောင်တစ်ချို့က သစ်ပင်အောက်တွေမှာ မိုးကာတဲထိုးကာ တိမ်းရှောင်နေကြတယ်လို့သိရပါတယ်။
ဇူလိုင်လ ၄ ရက်နေ့ကစတင်ပြီး တိုက်ပွဲကြောင့် စစ်ဘေးတိမ်းရှောင်ကြတဲ့ ရှရော်ခ၊ ဆွတ်ရာ(ကျောက်ဖြူ) မှော်ဝမ်းကလေး၊ မော်မောလယန်၊ ဆွတ်ဘွမ့်(အမှိုက်ပုံ)၊ ဆိုင်းကြိုင် စတဲ့ ကျေးရွာ ၇ ရွာထဲကနေ ကချင်နှစ်ခြင်းခရစ်ယာန်အသင်းတော် KBC ရဲ့ လက်အောက်မှာ စစ်ရှောင်ပြည်သူ စုစုပေါင်း အိမ်ထောင်စု ၂၀၄ ခု၊ လူဦးရေ ၇၀၀ ကျော်အထိရှိတယ်လို့ စစ်ရှောင်တာဝန်ခံတွေဆီကနေ သိရပါတယ်။
ဒါပေမယ့် KBC လက်အောက်ထဲမှာ ပြီးခဲ့တဲ့ မေလအတွင်း ကားမိုင်း – ဖားကန့်လမ်း စစ်ကောင်စီတပ် ပထမအကြိမ် စစ်ကြောင်း စတင်ဝင်ရောက်လာချိန်ကတည်းက နန့်ယား၊ ဆိုင်းဖရာ၊ ခွန်စိုင်ဇွပ်၊ တံတားညီနောင်၊ ကပ်မှော်၊ ပျားအုံး စတဲ့ ကျေးရွာတွေထဲကနေ စစ်ရှောင်ပြည်သူတစ်ချို့ ဖားကန့် ဘက်ကို ထွက်ပြေးတိမ်းရှောင်လာတာကြောင့် လက်ရှိ စစ်ရှောင်ပြည်သူ ၁၄၀၀ ကျော်အထိရှိနေပါတယ်။
အဲဒီစစ်ရှောင်ပြည်သူတွေဟာ ကားမိုင်း – ဖားကန့် လမ်းဘက်ကို စစ်ကောင်စီတပ် စစ်ကြောင်းထိုး ဝင်ရောက်နေဆဲဖြစ်တဲ့အတွက် နေရပ်ပြန်နိုင်ခြင်းမရှိဘဲ ဖားကန့်ထဲမှာ တိမ်းရှောင်နေကြဆဲဖြစ်ပါတယ်။
KBC အသင်းတော် အောက်မှာရှိတဲ့ စစ်ရှောင်ပြည်သူတွေ စုစုပေါင်း စစ်ရှောင်လူဦးရေ ၂ ထောင်ခန့်ရှိနေပြီး နောက်ထပ် ဘာသာရေးကျောင်းအသီးသီးမှာ တိမ်းရှောင်နေကြတဲ့ စစ်ရှောင်ပြည်သူတွေအပါဆိုရင် ဖားကန့်ဒေသမှာ စစ်ရှောင်ပြည်သူ ၅၀၀၀ ကျော်ခန့်အထိ ရှိနိုင်တယ်လို့ ဖားကန့် ပြည်သူတွေ ဆီကနေ သိရပါတယ်။
ယခုလို ဖားကန့်ဒေသထဲမှာ တိုက်ပွဲကြောင့် စစ်ဘေးတိမ်းရှောင်ခိုလုံနေကြတဲ့ စစ်ရှောင်ပြည်သူတွေ များပြားလာသလို တစ်ဖက်မှာ စစ်ကောင်စီတပ်နဲ့ ကချင်လွတ်လပ်ရေးတပ်မတော် KIA ပူးပေါင်းတပ်တွေကြား တိုက်ပွဲတွေ နေ့စဉ်ဖြစ်ပွားနေသလို လမ်းပိုင်း ပိတ်ဆို့ မှုတွေလည်းရှိနေပါတယ်။
ဖာကန့်ဒေသဘက်ကို တိုက်ရိုက်သွားလာလို့ရတဲ့ မြစ်ကြီးနား – ကားမိုင်းကားလမ်းပိုင်းကို တိုက်ပွဲကြောင့် စစ်တပ်နဲ့ KIA နှစ်ဖက်က ပိတ်ဆို့ထားတာဖြစ်ပါတယ်။
လက်ရှိမှာ အင်းတော်ကြီး – ဖားကန့် ဂွေခါလမ်းတစ်ခုတည်းသာ ကုန်းစည် စီးဆင်းနေပြီး အဲ့ဒီလမ်းပိုင်းကိုလည်း စစ်တပ်က ဆန်သယ်ယူမှုကို ကန့်သတ်ထားတာ တစ်လခန့် ကြာမြင့်လာပြီလို့ ဖားကန့်ဒေသခံတွေ ဆီကနေ သိရပါတယ်။
ဒါကြောင့် လက်ရှိ စစ်ဘေးရှောင် ပိုမိုများပြားလာတဲ့ ဖားကန့်ဒေသမှာ ဆန်ပြတ်လပ်မှုတွေဖြစ်လာပြီး စစ်ရှောင်ပြည်သူတွေအတွက် အခက်အခဲဖြစ်နေတယ်လို့ KBC လက်အောက်မှာရှိတဲ့ စစ်ရှောင်ပြည်သူတွေကို ကူညီပေးနေတဲ့ နောက်ထပ် ဖားကန့် ဒေသခံ အမျိုးသားတစ်ဦးက အခုလိုပြောဆိုလာပါတယ်။
“စစ်ရှောင်အခက်အခဲဆိုင် လောလောဆယ်က ဆန်တစ်ခုတည်းပါပဲ။ ဆန်ဝယ်ရခက်လာတယ်။ စျေးဆိုင်တွေမှာ ဆန်ကရှိတယ်။ ဒါပေမယ့် တိုက်ပွဲတွေဖြစ်တော့ တစ်ချို့က ဆိုင်တွေမဖွင့်ကြဘူး။ တစ်ချို့ဆိုင်တွေက လာဝယ်ရင်တောင် မရောင်းပေးကြတော့ဘူး။ အဲလိုလုပ်လေ ပြည်သူတွေက ဆန်တွေ အလုအယက်ဝယ်ကြ။ အဲ့လိုနဲ့ တစ်ချို့ လန့်ပြီး ပြန်မရောင်းပေး။ နောက်ပြီး ဆန်တွေကိုလည်း စစ်တပ်က သယ်ယူခွင့်ပိတ်ထားတယ်လို့ ကားသမားတွေပြောတယ်။ မြို့နယ် ထောက်ခံစာတွေပါမှ သယ်ခွင့်ပေးတာတဲ့။ အဲ့ဒါကြောင့် စစ်ရှောင်တွေအတွက်က ပိုခက်ခဲလာတယ်”လို့ပြောပါတယ်။
ဖားကန့် ဂွေလမ်း ဆန်သယ်ယူမှုကို စစ်တပ်က ပြီးခဲ့တဲ့ လကတည်းက လုံးတုံနဲ့ နန့်မွန် စစ်တပ်ဂိတ်မှာ ကန့်သတ်လိုက်တာဖြစ်ပြီး ဆန်အဝင်နည်းပါးသွားတဲ့အတွက် ဖားကန့်ဒေသခံပြည်သူတွေ ဆန်ဝယ်ယူမှုခက်ခဲလာတာဖြစ်တယ်လို့ ဆိုပါတယ်။
ဖားကန့်ဒေသမှာ စစ်ကောင်စီတပ်နဲ့ ကချင်လွတ်လပ်ရေးတပ်မတော် KIA ပူးပေါင်းတပ်တွေကြား တိုက်ပွဲအခြေအနေ ပိုမိုဆိုးရွားလာသလို ပိတ်ဆို့မှုတွေလည်း ဆက်တိုက်ရှိလာတဲ့အတွက် ရေရှည်မှာ လက်ရှိအခြေအနေထက် ပိုပြီးကြပ်တည်းလာမှာကို ဖားကန့်ပြည်သူတွေ စိုးရိမ်နေကြပါတယ်။
လတ်တလော ဖားကန့်မြို့နဲ့ အနီးဆုံး ၃ နေရာမှာ တိုက်ပွဲဖြစ်နေတဲ့ အတွက်လည်း စစ်ရေးအခြေအနေရ လမ်းပိုင်းပိတ်ဆို့မှုကြောင့် ပြည်သူတွေလူထုတွေ သွားလာရေးမှာ အခက်အခဲကြုံတွေ့နေရတာလည်းရှိနေပါတယ်။
ပြီးခဲ့တဲ့ မေလကုန်ပိုင်းကနေ ဖားကန့် ဒေသထဲကို စစ်ကောင်စီတပ်တွေက ဖားကန့် တပ်မမှူးပြောင်းလဲဖို့ ခေါင်းစဉ်နဲ့ စစ်ကြောင်းထိုး ဝင်ရောက်လာခဲ့တာဖြစ်ပြီး တစ်လကျော်ခန့် ကြာမြင့်လာတဲ့ အချိန်ကာလတစ်ခုမှာ စစ်ကောင်စီတပ်တွေဟာ ဖားကန့်ဒေသအတွင်း လက်လွတ်လိုက်ရတဲ့ ဗျူဟာမြောက်စစ်တပ်နေရာတွေကို ပြန်လည်ရယူဖို့ ကြိုးပမ်းနေပြီဖြစ်ပါတယ်။
ဒါကြောင့်လည်း ပြီးခဲ့တဲ့ ဇူလိုင်လဆန်းပိုင်းကတည်းကနေ စစ်ဗျူဟာအတွက် အရေးပါတဲ့ လမောင်ကုန်းနဲ့ မော်မောဘွမ့် နှစ်နေရာကိုရယူဖို့ လမ်းကြောင်းနှစ်ခုကနေ စစ်အင်အားအလုံးအရင်းနဲ့ စစ်ကြောင်းထိုး တိုက်ပွဲဖော်ဆောင်နေတာဖြစ်ပါတယ်။
လက်ရှိမှာ ဖားကန့်ဗျူဟာကုန်းနဲ့အနီးဆုံးဖြစ်တဲ့ ရှရော်ခ ညောင်ပင်ကုန်းနဲ့ မော်မောလယန် လမ်းကြောင်းကနေ စစ်ကြောင်းတစ်ခု၊ ဆွတ်ဘွမ့်(အမှိုက်ပုံ) ကျေးရွာဘက်ကနေ စစ်ကြောင်းတစ်ခု ထိုးစစ်ဆင်နေတဲ့အတွက် တိုက်ပွဲဖြစ်ပွားနေတာဖြစ်ပါတယ်။
By – နော်ထွယ့်(ဟူးကောင့်)
