ဟုမ္မလင်းကောလိပ်မှာ ကျောင်းသားအချင်းချင်း သေနတ်ပစ်ခတ်မှုဖြစ် ၊ တစ်ဦးဒဏ်ရာပြင်းထန်
စစ်ကိုင်းတိုင်း၊ ဟုမ္မလင်းမြို့ရှိ ဟုမ္မလင်းဒီဂရီကောလိပ်ကျောင်းဝင်းထဲမှာ ကျောင်းသားအချင်းချင်း သေနတ်ပစ်ခတ်မှုဖြစ်ခဲ့ပြီး တစ်ဦး ဒဏ်ရာပြင်းထန်ရရှိခဲ့တယ်လို့ ဒေသခံတွေဆီက သိရပါတယ်။
အောက်တိုဘာ ၁၆ ရက် မနက်ပိုင်း ကျောင်းသားနှစ်ဦး စကားများရာကနေ ပစ်ခတ်မှုဖြစ်ခဲ့တာဖြစ်ပြီး SNA (ရှမ်းနီအမျိုးသားတပ်မတော်) တပ်ဖွဲ့ဝင်အဖြစ် တာဝန်ထမ်းဆောင်နေတဲ့ ကျောင်းသားက ပစ္စတိုသေနတ်နဲ့ ပစ်ခတ်ခဲ့တာလို့ ဖြစ်စဉ်သိတဲ့ ဟုမ္မလင်းမြို့ခံအမျိုးသမီးတစ်ဦးက KNG ကို ပြောပါတယ်။
“တစ်ယောက်က ရွာဘက်က၊ နောက်တစ်ယောက်က ဟုမ္မလင်းကပဲ။ သူက SNA ထဲဝင်ထားတာ တစ်နှစ်ကျော်ပြီ။ ရန်စတာက SNA စစ်သားလုပ်နေတဲ့ ကျောင်းသားလေးက စထိုးတာ သူစထိုးပြီး သူပဲ ပစ်လိုက်တာ။ သူ့လွယ်အိတ်ထဲက ပစ္စတိုထုတ်ပြီး ပစ်လိုက်တာ” လို့ သူက ပြောပါတယ်။
ပစ်ခတ်ခံရသူဟာ ဟုမ္မလင်းမြို့နယ်၊ စေတီဆိပ်ကျေးရွာကနေ ဟုမ္မလင်းဒီဂရီကောလိပ်မှာ အဝေးသင်တက်နေတဲ့ ပထမနှစ်ကျောင်းသားဖြစ်ပြီး ခေါင်းနဲ့ ခြေထောက်မှာ ကျည်ထိမှန်ခဲ့တယ်လို့ သိရပါတယ်။
ဒါ့အပြင်ပစ်ခံရသူဟာ ဒဏ်ရာပြင်းထန်တဲ့အတွက် ဟုမ္မလင်းဆေးရုံမှာ လက်မခံတာကြောင့် မန္တလေးဆေးရုံကို ပို့ဆောင်ထားပြီး အခြေအနေစိုးရိမ်ရတယ်လို့ နောက်ထပ် ဒေသခံအမျိုးသမီးတစ်ဦး ပြောပါတယ်။
“ခံရတဲ့ကလေးက စေတီဆိပ်ရွာက လာတက်တာ၊ အဝေးသင် ခေါင်းမှာတစ်ချက်မှန်တယ်၊ ရှပ်ထိသွားတာတဲ့။ နောက်ပြီး ခြေထောက်မှာတစ်ချက်မှန်တယ်။ ဟုမ္မလင်းဆေးရုံက မနိုင်လို့ မန္တလေးကို ပို့ထားတယ်။ ခြေအနေစိုးရိမ်ရတယ်လို့ ပြောတယ်”လို့ သူက ပြောပါတယ်။
ပစ်ခတ်မှုကျူးလွန်သူဟာ SNA တပ်ဖွဲ့ဝင်အဖြစ် တစ်နှစ်ကျော် တာဝန်ထမ်းဆောင်နေပြီး ဟုမ္မလင်းဒီဂရီကောလိပ်မှာ အဝေးသင်တတိယနှစ် တက်ရောက်နေသူဖြစ်တယ်လို့ သိရပါတယ်။
အဲဒီကျောင်းသားကို သက်ဆိုင်ရာက အရေးယူထားခြင်းရှိ၊ မရှိကိုတော့ KNG က စုံစမ်းနေဆဲ ဖြစ်ပါတယ်။
ဟုမ္မလင်းမြို့ကို လက်ရှိမှာ စစ်ကောင်စီတပ်နဲ့ SNA တပ်ဖွဲ့တွေက အပြည့်အဝထိန်းချုပ်ထားတဲ့မြို့ဖြစ်ပြီး ဒီကိစ္စကိုလည်း SNA နဲ့စစ်တပ်က အပြည့်ဝတာဝန်ရှိတယ်လို့လည်း ပြည်သူတွေကပြောပါတယ်။
စစ်တပ်အာဏာသိမ်းပြီးနောက်ပိုင်းဟုမ္မလင်းဒီဂရီကောလိပ်ရပ်နားထားရာကနေ ပညာရေးဝန်ကြီးဌာနက ၂၀၂၄ ခုနှစ်ကစပြီး အဝေးသင်တက်ရောက်ခွင့်ရှိကြောင်း စတင်ကြေညာခဲ့တာ ဖြစ်ပါတယ်။
By – Zaw Zaw
