မုံရွာကနေဆန်တက်တဲ့ စစ်သင်္ဘောတွေ ဟုမ္မလင်းမြို့မှာအများပိုင်းဆိုက်ကပ်ထား၊ ခန္တီးဘက် ၈ စီးဆန်တက်
စစ်ကိုင်းတိုင်းဒေသကြီး မုံရွာမြို့ကနေဆန်တက်လာတဲ့ စစ်တပ်ရဲ့ စစ်သင်္ဘောအုပ်စုဟာ ဇူလိုင်လ ၂၉ ရက်နေ့ ဟုမ္မလင်းမြို့မှာရောက်ရှိလာခဲ့ပြီဖြစ်တယ်လို့ ကာကွယ်ရေးတပ်တွေဆီကနေ သိရပါတယ်။
ဇူလိုင်လ ပထမအပတ်ကစလို့ စစ်ကောင်စီတပ်ရဲ့ စစ်သင်္ဘော စုစုပေါင်း ၃၈ စီး မုံရွာကနေစပြီး ဆန်တက်လာခဲ့ရာ ဇူလိုင် ၂၉ ရက်ည ဟုမ္မလင်းမြို့ကိုရောက်ရှိလာပြီး အဲ့ဒီထဲကသင်္ဘော ၈ စီးဟာ ဒီကနေ့မနက်ပိုင်းမှာပဲ ခန္တီးဘက်ကိုဆက်ဆန်တက်သွားတယ်လို့ ဟုမ္မလင်း ပြည်သူ့ကာကွယ်ရေးတပ်ဖွဲ့ဝင်တစ်ဦး KNG ကိုပြောပါတယ်။
“အားလုံးပေါင်းဆိုရင် ၃၀ ကျော်ပေါ့ အပေါက်အပြဲတွေပဲရောက်လာတယ်။ အကုန်လုံးဖလက်ယာဥ်တွေကြီးပဲ တချို့ကရေလယ်ခေါင်မှာပဲရပ်ထားတယ်။ တချို့က ကမ်းကပ်ထားတယ် အဲ့ထဲက ရှစ်စီးက ဒီမနက်ကခန္တီးဘက်ကိုတက်သွားတယ်”လို့ သူကပြောပါတယ်။
စစ်သင်္ဘောပေါ်မှာ စားနပ်ရိက္ခာနဲ့လက်နက်ခဲယမ်းတွေလို့ယူဆရတဲ့ သေတ္တာအပြင် ဆန်အိတ်တွေတင်ဆောင်လာပြီး ဟုမ္မလင်းမြို့တွင်းတပ်မှာလည်း စစ်သားအင်အား၊ဆန်အိတ်နဲ့သေတ္တာတွေ ချနေတယ်လို့ သိရပါတယ်။
“ပစ္စည်းတွေကတော့ချနေတုန်း ဆန်အိတ်တွေကော၊ပြီးရင်သေတ္တာတွေနဲ့ချနေတာ စစ်သားကတော့ မနေ့က ဖောကား ၂ စီးနဲ့အပြည့်ပဲ ဟုမ္မလင်းတပ်ထဲကိုပို့လိုက်တယ်။ ကုန်တွေများတယ် သင်္ဘောက သဲအိတ်တွေနဲ့အပြည့်ကာထားတော့ဘာမှအသေအချာမမြင်ရဘူး”လို့ အထက်မှာဖော်ပြခဲ့တဲ့ ကာကွယ်ရေးတပ် ဖွဲ့ဝင်တစ်ဦးကဆက်ပြောပါတယ်။
ဟုမ္မလင်းကာကွယ်ရေးတပ်တွေရဲ့ပြောဆိုချက်အရ စစ်သင်္ဘောတွေပေါ်ကနေ တပ်မ ၈၈ ဘတ်တံဆိပ်ပါတဲ့ စစ်သားတွေ FAW ကားနှစ်စီးအပြည့်တင်ပြီး ဟုမ္မလင်းမြို့တွင်းတပ်ထဲပို့ဆောင်ထားထားတယ်လို့ သိရပြီး ခန္တီးဘက်ကိုတက်သွားတဲ့ စစ်သင်္ဘော ၈ စီးထဲမှာ ကုန်တင်သင်္ဘောတွေက အများစုပါဝင်တယ်လို့သိရပါတယ်။
စစ်သင်္ဘောတွေဟာ မုံရွာကနေ ဟုမ္မလင်းဘက်ဆန်တက်လာတဲ့ မြစ်ကြောင်းတစ်လျှောက် မင်းကင်းနယ်၊ကနီနယ်၊ မော်လိုက်နယ်တွေထဲ ကာကွယ်ရေးတပ်တွေရဲ့ ကြားဖြတ်တိုက်ခိုက်မှုတွေကြောင့် ထိခိုက်ပျက်စီးတာ၊ စစ်ကောင်စီစစ်သားတွေ ထိခိုက်သေဆုံးတာတွေလည်းရှိခဲ့တယ်လို့ သိရပါတယ်။
စစ်ကောင်စီတပ်ဟာ ပြီးခဲ့တဲ့ ၂၀၂၄ ခုနှစ်တုန်းကလည်း မုံရွာ–ဟုမ္မလင်းရေလမ်းကြောင်းသုံးပြီး ဟုမ္မလင်း၊ခန္တီးဘက်ကို စစ်အင်အားဖြည့်တာတွေရှိပုံမှန်ရှိခဲ့ပေမယ့် ဒီနှစ်ထဲမှာတော့ဒီတစ်ကြိမ်ပထမဆုံးဖြစ်တယ်လို့ သိရပါတယ်။
ဟုမ္မလင်းမြို့နယ်ထဲက ရွှေပြည်အေးမြို့အပါအဝင် မြို့ရဲ့အနောက်ဘက်နဲ့တောင်ဘက်ခြမ်းတွေထဲက ရှေ့ရွာအများစုကို ကာကွယ်ရေးတပ်တွေထိန်းချုပ်ထားပြီး ဟုမ္မလင်းအရှေ့ဘက်ဖောင်းပြင်မြို့နယ်ထဲက ကျေးရွာအများစုကိုကာကွယ်ရေးတပ်တွေ ထိန်းချုပ်ထားတာကြောင့် အဲ့ဒီနေရာတွေကိုပြန်ယူဖို့ စစ်အင်အားဖြည့်တာဖြစ်နိုင်တယ်လို့ ဒေသခံတွေကသုံးသပ်နေကြပါတယ်။
By – Zaw Zaw
