မြစ်ကြီးနား

မြစ်ကြီးနားမှာ စက်သုံးဆီဆိုင်ကြီးတွေပိတ်ထားပြီးနောက် ပုလင်းချိန်တွေ စျေးအဆမတန်တင်ရောင်းနေ

ရေဘေးအန္တရာယ်ကြုံတွေ့နေရတဲ့ မြစ်ကြီးနားမြို့ပေါ်မှာ စက်သုံးဆီဆိုင်ကြီးတွေပိတ်သွားပြီး လမ်းဘေး ပုလင်းချိန်နဲ့ ရောင်းချသူတွေ စျေးအဆမတန်ရောင်းချပေးနေတာကြောင့် ပြည်သူတွေစက်သုံးဆီရရှိဖို့ခက်ခဲနေတယ်လို့ သိရပါတယ်။ မြစ်ကြီးနား ပြည်သူတွေဟာ လက်ရှိမှာ ပြန်လည်ထူထောင်ရေးလုပ်ဖို့ စက်သုံးဆီတွေအရေးပေါ်လိုအပ်နေတာဖြစ်ပေမယ့် မြစ်ကြီးနားမြို့ပေါ်မှာ ရောင်းချပေးနေတဲ့ ဆီဆိုင်ကြီးတွေအားလုံးနီးပါးပိတ်ထားတယ်လို့သိရပြီး လမ်းဘေးပုလင်းချိန်နဲ့သာရရှိနေတယ်လို့ မြစ်ကြီးနားပြည်သူတွေကပြောပါတယ်။ “ကျနော်တို့ သိရသလောက် ဆိုင်ကြီးတွေမှာ ဓါတ်ဆီက လုံးဝမရောင်းပေးတော့ဘူး။ အခုက လမ်းဘေးဆိုင်တွေမှာ ဘယ်လိုရလာလဲတော့မသိဘူး။ တစ်လီတာပြည့်မပြည့် ရှိတဲ့ တစ်ပုလင်းကို မနေ့ကအထိတော့ တစ်သောင်းလောက်နဲ့ ရသေးတာ။ ဒီကနေ့ ဆိုင်ရင် တစ်သောင်းခွဲ ၊ နှစ်သောင်းလောက်ရှိနေပြီ။ အဲလိုဆိုတော့ ကျနော်တို့ ပြည်သူတွေက တော်ခက်ခဲနေတဲ့ အချိန်ဖြစ်နေပါတယ်။ သွားဖို့လာဖို့တောင်အရမ်းခက်ခဲသွားပြီ။ အခုဆိုရင် မီးလည်းမလားဘူး။ ရေလည်းကျလာပြီဆိုတော့ ပြည်သူတွေက ဘာပဲဖြစ်ဖြစ် စက်သုံးဆီက အရမ်းကို လိုအပ်နေတဲ့ အချိန်အပေါ့လေ”လို့ပြောပါတယ်။ မြစ်ကြီးနားမြို့မှာ ဇွန်လ ၃၀ ရက်နေ့ကစပြီး ဧရာဝတီမြစ်ရေဟာတစ်မြို့လုံးနီးပါးဝင်ရောက်ခဲ့ပေမယ့် ဇူလိုင် ၂ ရက်နေ့စပြီး တစ်ချို့ရပ်ကွက်တွေမှာ ရေတွေပြန်ကျသွားပြီဖြစ်ပါတယ်။  ခုလိုရေတွေပြန်ကျသွားတဲ့နောက် ပြည်သူတွေဟာသယ်ယူပို့ဆောင်ရေးအတွက်နဲ့  လူနေရပ်ကွက်တွေမှာ ကျန်ရှိနေသေးတဲ့ ရွံ့နွံတွေကို စက်နဲ့စုပ်ထုတ်တာ၊ ရေတွင်းထဲမှာကျန်ရှိနေတဲ့ ရေပုပ်တွေကို စုပ်ထုတ်ဖို့တာတွေလုပ်ဖို့လိုအပ်နေပေမယ့် စက်သုံးဆီတွေပြတ်နေတဲ့အခက်အခဲဖြစ်နေတယ်လို့ ပြောပါတယ်။ လက်ရှိ စက်သုံးဆီတွေရရှိနေသေးတဲ့ နေရာတွေမှာလည်း တစ်လီတာကို ၂ သောင်းဝန်းကျင်နဲ့ တစ်ဂါလံကို ၈ သောင်းခန့်အထိ စျေးတင်ရောင်းချနေတာကြောင့် ပြည်သူအပိုင်းဝယ်ယူဖို့ခက်ခဲနေတာလည်းဖြစ်ပါတယ်။ မြစ်ကြီးနားမြို့မှာ စက်သုံးဆီတွေပြတ်လပ်နေတာနဲ့ ပတ်သက်ပြီး ရေကြီးရေလျှံဖြစ်တဲ့နောက်ပိုင်း ဆီဆိုင်ကြီးတွေစက်သုံးဆီရောင်းချပေးတာကို ရပ်တန့်လိုက်ပြီး လမ်းဘေးဆိုင်ရောင်းချတဲ့ သူတွေကို စျေးနှုန်းမြင့်တင် ရောင်းချပေးတာကြောင့် အခုလို ဆီစျေးတွေအဆမတန်ထိုးတက်နေတာဖြစ်တယ်လို့ နောက်ထပ် မြစ်ကြီးနား ပြည်သူတစ်ဦးက ဆက်ပြောပါတယ်။ “ရေတွေပြန်ကျလာတဲ့အခါမှာ ပြည်သူတွေက ပြန်လည်ထူထောင်ရေးအတွက် စက်သုံးဆီတွေ အရမ်းလိုအပ်နေတဲ့ အချိန်လို့ပြောလို့ရမယ်။ ဒါပေမယ့် စက်သုံးဆီရောင်းတဲ့ ဆိုင်တွေက အကုန်မရောင်ပေးဘူး။ အဲဒါကြောင့် စျေးနှုန်းလည်းအရမ်းမြင့်သွားတယ်။ တစ်ချို့ဆိုင်မှာက ဒီဇင်တွေက ရသေးတယ်။ ဓါတ်ဆီဆိုရင် ရောင်းကို မရောင်းပေးတော့ဘူး။ တစ်ချို့ဆီဆိုင်တွေက ရေမြုပ်သွားတယ်လို့ ဆိုတာနားလည်တယ်။ တစ်ချို့ဆိုင်တွေက ရှိနေရဲ့သားနဲ့ မရောင်းပေးဘူး။ တစ်ဆင့်ခံစျေးနဲ့ ပြန်ရောင်းတဲ့ သူတွေကိုပဲ ရောင်းပေးနေတယ်။ အဲလိုဆိုရင်တော့ တစ်ပေပါကို သိန်း ၂၀ လောက်ပေါက်သွားတယ်”လို့ပြောပါတယ်။ အခုလို စက်သုံးဆီတွေ ပြတ်လပ်သွားတာကြောင့် ပြည်သူတွေအရေးတကြီးလိုအပ်နေတဲ့ သောက်သုံးရေရရှိဖို့ရေတွင်းနေရာတွေကို အမြန်ရှင်းလင်းဖို့လိုအပ်သလို ရေဝင်ထားတဲ့ နေအိမ်၊ ဂိုဒေါင်တွေကိုလည်း ရှင်းလင်းရေးမလုပ်ဆောင်နိုင်တဲ့ အခြေအနေကြုံတွေ့နေရတယ်လို့ သူက ဆက်ပြောပါတယ်။ ဒါ့အပြင် ရေပြည့်နေသေးတဲ့ရပ်ကွက်တစ်ချို့မှာ အရပ်သားတွေလည်းပိတ်မိတ်နေဆဲဖြစ်ပြီး လူမူကူညီရေးအဖွဲ့တွေအနေနဲ့ သွားရောက်ကယ်ထုတ်ချင်ပေမယ့် စက်သုံးဆီမရရှိတဲ့အတွက် မကယ်နိုင်ဘဲ အစားအသောက်သာသွားရောက်ဝေပေးနေတာတွေရှိတယ်လို့ သိရပါတယ်။ “ခုရေကျသွားလည်း တစ်ချို့နေရာမှာက ရေကျန်နေသေးတယ် သွားကယ်ဖို့ကလည်းလှေရရင် ဆီကမရဘူး အဲဒါကြောင့် ကျနော်တို့က အစားသောက်ဘဲလိုက်ဝယ်နေတော့တယ် ရေကလည်းကျနေပြီဆိုတော့လေ”လို့ ကယ်ဆယ်ရေးလုပ်နေတဲ့ လူမူကူညီရေးအဖွဲ့တစ်ဖွဲ့က တာဝန်ရှိသူတစ်ဦး ခုလိုပြောပါတယ်။ လက်ရှိ မြစ်ကြီးနားမြို့ ရေဝပ်နေသေးတဲ့ရပ်ကွက်တွေဟာ ဧရာဝတီမြစ်နဲ့အနီးမှာရှိတဲ့ ရပ်ကွက်တွေဖြစ်တဲ့ စီတာပူ၊ မန်ခိန်၊ မြို့သစ်ကြီး၊ ကြက်ပေါင်ခြံ စတဲ့မြေနိမ့်ပိုင်းနေရာတွေမှာ ရေပြည့်နေဆဲဖြစ်ပြီး ပြည်သူအများပိုင်းက ရေဘေးဒဏ်ကို ကြုံတွေ့နေရဆဲဖြစ်ပါတယ်။ ဇွန်လ ၂၉ ရက်ကနေ စတင်ပြီး ကချင်ပြည်နယ်တစ်ခုလုံးအတိုင်းအတာနဲ့ မိုးသည်းထန်စွာ ရွာသွန်းမှုကြောင့် မြို့နယ်အသီးသီးမှာ ရေကြီးရေလျှံဖြစ်ပေါ်နေပြီး မြစ်ကြီးနားမှာက ပြည်သူသောင်းနဲ့ချီ ရေဘေးအန္တရာယ်ကို ကြုံတွေနေရတာဖြစ်ပါတယ်။ မြစ်ကြီးနားမြို့ရဲ့ စိုးရိမ်ရေအမှတ်ဟာ ၁၂၀၀ စင်တီမီတာသာရှိပေမယ့် ပြီးခဲ့တဲ့ ၂၀၀၄ ခုနှစ် မြစ်ရေအမှတ်ဟာ ၁၄၀၈ စင်တီမီတာရှိခဲ့ပြီး ဒီနှစ် ၂၀၂၄ ခုနှစ်မှာ စိုးရိမ်ရေအမှတ် ၁၄၀၄ စင်တီမီတာအထိရောက်ရှိခဲ့တာဖြစ်ပါတယ်။ By…

Read More »

မြစ်ကြီးနားမှာ ဧရာဝတီမြစ်ရေကျနေပြီဖြစ်လို့ အောက်ဘက်ပိုင်းကမြို့တွေ ကြိုတင်ပြောင်းရွှေ့တာတွေ လုပ်ဖို့ မိုး/ဇလ အသိပေး

ကချင်ပြည်နယ် မြစ်ကြီးနားမြို့မှာ ဧရာဝတီမြစ်ရေတစ်နာရီကို ၄ လက်မနှုန်းနဲ့ကျနေပြီဖြစ်လို့ ဧရာဝတီမြစ်အောက်ဘက်ပိုင်းမြို့တွေက ဒေသခံတွေကြိုတင်ပြင်ဆင်မှုတွေလုပ်ကြဖို့ ကချင်ပြည်နယ် မိုး/ဇလ ဦးစီး အရာရှိကအသိပေးထားပါတယ်။ ဧရာဝတီမြစ်ရေဟာ မနေ့က ည ၉ နာရီခွဲအထိကို စိုးရိမ်ရေအမှတ် ၆ ပေခွဲအထိရှိခဲ့တာဖြစ်ပြီးတော့ ဒီကနေ့ မနက် ၇ နာရီ စိုးရိမ်ရေအမှတ် လေးပေခွဲဝန်းကျင်အထိဆက်ရှိနေပြီး တစ်နာရီကို ၄ လက်မနှုန်းနဲ့ မြစ်ရေပြန် ကျနေတယ်လို့ မိုး/ဇလ ဦးစီးဌာနက သတင်းထုတ်ပြန်ထားပါတယ်။ လက်ရှိ မြစ်ကြီးနားမြို့ ဧရာဝတီမြစ်ရေဆက်ကျလာတာနဲ့အတူ အောက်ဘက်ပိုင်းက မြို့တွေဖြစ်တဲ့ ထီးချိုင့်၊ ကသာ၊ ရွှေကူ၊ ဗန်းမော်၊ တကောင်း ၊ မန္တလေးနဲ့ စစ်ကိုင်း စတဲ့မြို့တွေက ဒေသခံတွေ ကြိုတင်ပြင်ဆင်တာ တွေလုပ်ကြဖို့ မိုး/ဇလက အသိပေးထားပါတယ်။ ဒါ့ကြောင့် ကသာဒေသခံတစ်ယောက်ကို KNG က ဆက်သွယ်မေးမြန်းတဲ့အခါ မြစ်ရေအရှိန်နဲ့တက်လာနေပြီး မြေနိမ့်ပိုင်းရပ်ကွက်ကဒေသခံတွေတော့ ရွှေ့ပြောင်းနေကြပြီလို့ အခုလိုပြောပါတယ်။ “ရေကတော့ အရှိန်တော့နည်းနည်းပါလာခဲ့ပြီ။ မြစ်ကြီးနားကျမယ်ဆိုရင်တော့ ကျနော်တို့ စိုးရိမ်ရေ အမှတ် တော့ရောက်နိုင်မယ့်အနေအထားအများကြီးရှိတယ်။ အခြေနေလောလောဆယ်တော့ အောက်ဘက် ပိုင်းက ဒေသခံတွေ ရွှေ့ပြောင်းနေတာမျိုးတော့ရှိလာပြီ“လို့ပြောပါတယ်။ တစ်ဖက်မှာ နှစ်ရက်တာ ရေဘေးအန္တရာယ်ကြုံခဲ့ရတဲ့ မြစ်ကြီးနားမြို့မှာတော့ ကူညီကယ်ဆယ်ရေးတွေ ဆက်တိုက်လုပ်ဆောင်နေရသလို ရေကြီးခဲ့တဲ့ရပ်ကွက်တွေမှာ အင်တာနက်၊ ဖုန်းလိုင်းမရတဲ့အပြင် မီးကတော့ မြစ်ကြီးနားမြို့တစ်မြို့လုံးပြတ်တောက်နေတယ်လို့ လူမှုကူညီရေးအသင်းတွေဆီကသိရပါတယ်။ လက်ရှိ မြစ်ကြီးနားမြို့မှာ မိုးလည်းဆက်ရွာနေသလို ရပ်ကွက်တစ်ချို့တွေမှာတော့ ရေတွေဆက်ဝပ်နေပြီး မြစ်ကြီးနားမြို့အခြေနေနဲ့ပတ်သက်လို့ ဒေသခံတစ်ယောက်က အခုလိုဆက်ပြောပါတယ်။ “မြို့ထဲသွားကြည့်ရသလောက်ကတော့ စီတာပူမနောကွင်းဘက်က မနေ့က ရေတွေအရမ်းကြီးထားတော့ ဒီနေ့လည်းသွားလို့မရဘူးထင်လို့ တပ်ကုန်းလမ်းမကြီးတစ်လျှောက်ပဲလာခဲ့လိုက်တယ်။အဲ့ကနေလာရင်းနဲ့ လမ်းမှာ ဂေါက်ကွင်းရဲစခန်းရှေ့ကရယ် အထက ၂ အဲ့နားတွေကတော့ ဒူးကျော်ကျော်လောက်ရေရှိသေး တယ်။ ကျနော်သွားတဲ့ လမ်းတစ်လျှောက်တော့ အပျက်အစီးတွေမတွေ့ရသလောက်ပဲ။သစ်ပင်လဲတာတို့ တော့ရှိတယ်။ အခုတော့မိုးကရွာနေတယ်။ အရမ်းတော့မရွာဘူး” လို့ပြောပါတယ်။ တစ်ဖက်မှာ ကချင်ပြည်နယ် ဖားကန့်မြို့နယ်ဘက်မှာလည်း မိုးအဆက်မပြတ်ရွာသွန်းနေတဲ့အတွက် ဥရု ချောင်းရေမြင့်တက်လာပြီးတော့ မနေ့က နေ့လည် ၁နာရီလောက်ကစလို့ ရပ်ကွက်တစ်ချို့ ရေကြီး ရေလျှံ မှုတွေဖြစ်နေတယ်လို့ ဒေသခံတွေကပြောပါတယ်။ ကချင်ပြည်နယ်မှာ ပြီးခဲ့တဲ့ ၂၀၀၄ ခုနှစ်က ဧရာဝတီမြစ်ရေ စိုးရိမ်ရေအမှတ် ၁၄၀၇ cm ၊ ၁၉၉၇ ခုနှစ်တုန်း က စိုးရိမ်ရေအမှတ် ၁၄၁၁ cm အထိ မြစ်ရေမြင့်တက်ခဲ့ဖူးပြီး ဒီနှစ် ၂၀၂၄ ခုနှစ်မှာတော့ ဧရာဝတီမြစ်ရေက စိုးရိမ်ရေအမှတ် ၁၄၀၄ cm အထိ တက်ခဲ့တာဖြစ်ပါတယ်။ By – အမိုး

Read More »

မြစ်ကြီးနားမြို့ စိုးရိမ်ရေအမှတ်ရောက်ရှိနိုင်တယ်လို့ ပြည်နယ်မိုးဇလသတိပေး

ကချင်တစ်ပြည်နယ် မြစ်ကြီးနားမြို့မှာ အခု နှစ်မိုးရာသီရဲ့ဧရာဝတီမြစ်ရေမှတ်ဟာ စိုးရိမ်ရေအမှတ်ရောက်ရှိနိုင်တယ်လို့ ကချင်ပြည်နယ် မိုးလေဝသနဲ့ဇလဗေဒညွှန်ကြားဦးစီးဌာနက ထုတ်ပြန်ထားပါတယ်။ မြစ်ကြီးနာမြို့မှာ မနေ့ကနေ ဒီကနေ့ နေလည်ပိုင်းအထိ ဧရာဝတီမြစ်ရေဆက်လက်မြင့်တက်နေဆဲဖြစ်ပြီး ဒီညပိုင်း စိုးရိမ်ရေအမှတ် ၁၂၀၀ စင်တီမီတာရောက်ရှိနိုင်တယ်လို့ ကချင်ပြည်နယ် မိုးလေဝသနှင့် ဇလဗေဒဦးစီးအရာရှိ ဦးနိုင်လင်းထွေး …

Read More »

မြစ်ကြီးနား – ပူတာအိုကားလမ်းမြေပြိုမှုကြောင့် ကားသေးတွေသာသွားလာလို့ရ

ကချင်ပြည်နယ် ပူတာအိို–မြစ်ကြီးနားကားလမ်းပိုင်းတစ်နေရာမှာမြေပြိုထားတဲ့အတွက် ကုန်ကားကြီးတွေပိတ်မိနေပြီး ကားအသေးတွေသာ သွားလာလို့ရနေတယ်လို့ ကားသမားတွေဆီကနေ သိရပါတယ်။ ပူတာအိုမြို့နယ်ထဲက တန်ဂျာကျေးရွာနဲ့ မဆွန်ဇွပ်ကျေးရွာကြားက (ဒေသအခေါ် )ကျောက်ရေတွင်းအနီးမှာ ဇွန်လ ၁၉ ရက်နေ့က မိုးရွာသွန်းမှုကြောင့်ကားလမ်းတွေမြေပြိုပြီးတံတားငယ်တစ်ခုပျက်စီးသွားတာကြောင့် လက်ရှိကုန်ကားကြီးတွေသွားလာလို့မရဖြစ်နေတယ်လို့ ပူတာအိုမြို့ခံအမျိုးသားတစ်ဦးကပြောပါတယ်။ “ကားလမ်းမြေပြိုတာတော့ဟုတ်တယ် တံတားသေးသေးလေးတစ်ခုလည်းပါသွားတယ်တဲ့။…

Read More »

အကျဲ- ဖရောရွာချင်းဆက်လမ်းဖြတ်တောက်လိုက်တဲ့နောက် စစ်တပ်ဘက်က စစ်ရေးလှုပ်ရှားတာတွေစတင်လာ

မြစ်ကြီးနားမြို့နယ် အကျဲရွာနဲ့ ဖရောရွာ ဆက်သွယ်ထားတဲ့လမ်းကို စစ်တပ်ဘက်က မြေကျင်းတူးပြီး လမ်းဖြတ်တောက်လိုက်တဲ့နောက် ဇွန်လ ၁၈ ရက်နေ့ကစပြီး စစ်ရေးလှုပ်ရှားတာတွေစတင်လာတယ်လို့ ဒေသခံတွေက ပြောပါတယ်။ ပြီးခဲ့တဲ့ ဇွန်လ ၁၇ ရက်နေ့ မနက်ပိုင်း အာကျဲနဲ့ဖရောရွာချင်းစပ်လမ်းကို စစ်ကောင်စီတပ်က ဘက်ဖိုးမြေကျင်းတူးပြီး ဖြတ်တောက်လိုက်တဲ့အတွက် ဒေသခံပြည်သူတွေ တစ်ခြားလမ်းကိုကွေ့ရှောင်ပြီး ခက်ခက်ခဲခဲသွားလာနေရတယ်လို့ ဒေသခံတစ်ဦးက ပြောပါတယ်။  “ရွာသားတွေရဲ့ အဓိကသွားလမ်းဖြစ်တယ် အောက်ဘက် မြစ်ကမ်းဘေးတစ်လျှောက်မှာ ခြံတွေလုပ်တော့ ခြံသွား အလုပ်သွားအဓိကလမ်း ဖြစ်တယ်။ တာလောကြီး–ဟိုကပ်ဘက်ကို အမြဲသွားလာပြီး အရောင်းအဝယ်လုပ်နဲ့ အသက်မွေးဝမ်းကျောင်းအတွက် အဓိကအသုံးပြုနေတဲ့လမ်းဖြစ်တယ်။ ဒါကြောင့် ဒီလမ်းကို တူးဖော် ဖြတ်တောက်လိုက်တော့ အခက်ကြုံသွားတာပေါ့”လို့ပြောပါတယ်။ စစ်ကောာင်စီတပ်လမ်းဖြတ်တောက်လိုက်တဲ့နေရာဟာ အကျဲကျေးရွာကနေ ၁ ဖာလုံလောက်အကွာမှာရှိပြီး ဘတ်ဖောနဲ့ ၄ ပေခန့်နက်အောင်တူးလိုက်တဲ့အပြင် အကျယ် ၅ ပေဝန်းကျင်လမ်းဖြတ်တောက်ထားတာဖြစ်ပါတယ်။  အဲဒီလမ်းဟာ ဒေသခံတွေ ဧရာ၀တီမြစ်ကမ်းဘေးတစ်လျှောက် စိုက်ပျိုးရေးနဲ့ ရွှေလုပ်ကွက်တွေဆီအဓိက သွားလာနေကြတဲ့လမ်းဖြစ်သလို တာလောကြီး – ဟိုကပ်နဲ့ ဆင်ဘိုမြို့  ကနေ ရွှေကူမြို့ဘက်နဲ့ဆက်သွယ်ထားတဲ့လမ်းကြောင်းတစ်ခုလည်း ဖြစ်ပါတယ်။ “အကျဲရွာကနေ ဖရောအောက်ဘက်ပိုင်း တာလောကြီး– ဟိုကပ် ဘက်သွားတဲ့ ကားတွေ၊ ပြီးတော့ ရွှေတူးဖော်တဲ့သူတွေ သွားသွားလာလာလုပ်တယ်။ ခရီးသည်ကားတွေနဲ့ ဓါတ်ဆီနဲ့ ရိက္ခာတွေ ကားကြီးတွေနဲ့ပဲ ပုံမှန်ဖြတ်နေတော့ သူတို့ (စစ်တပ်) က ဘယ်လိုမြင်လာလဲမသိဘူးလေ။ ဒါကြောင့် အဲဒီလမ်းကို တူးဖော်ဖြတ်တောက်လိုက်တာလို့မြင်တယ်။”လို့ အာကျဲကျေးရွာဒေသခံအမျိုးသားတစ်ဦးက ဆက်ပြောပါတယ်။ ဇွန်လ ၁၇ ရက်နေ့မနက် လမ်းဖြတ်တောက်လိုက်တဲ့နောက်  ဇွန်လ ၁၈ ရက်နေ့မှာတော့ နေ့လည် ၁၁ နာရီခွဲဝန်းကျင် စစ်အင်အား ၁၀၀ ဝန်းကျင်ရှိတဲ့ စစ်ကောင်စီတပ်ဟာ  အကျဲရွာနဲ့ဖရောရွာတောလမ်းဘက်ကို စစ်ကြောင်းထိုးပြီး စစ်ရေးလှုပ်ရှားလာတာတွေရှိနေတယ်လို့ သိရပါတယ်။ အဲဒီ စစ်ကောင်စီစစ်ကြောင်းကို KIA ပူးပေါင်းတပ်တွေက စောင့်ကြိုတိုက်ခိုက်ခဲ့တဲ့အတွက် အကျဲရွာနဲ့ဖရောရွာကြားမှာ စစ်တပ်နဲ့ KIA ပူးပေါင်းတပ်အကြား တိုက်ပွဲဖြစ်ခဲ့ပြီး စစ်တပ်ဘက်ကထိခိုက်သေဆုံးတာတွေရှိတယ်လို့ KIA ရှေ့တန်းသတင်းရင်းမြစ်တွေကပြောပါတယ်။ ဒါပေမယ့်  ထိခိုက်သေဆုံးမှုအသေးစိတ်ကိုတော့ မသိရသေးပါဘူး။ လက်ရှိ စစ်ကောင်စီဘက်က စစ်ရေးအခြေအနေ တင်းမာလာတဲ့နေရာတွေတိုင်းမှာ အများပြည်သူအသုံးပြုတဲ့ လမ်းတွေကိုတူးဖော် ဖြတ်တောက်တာတွေ ဆက်တိုက်ပြုလုပ်နေတာပဲ ဖြစ်ပါတယ်။ By – ဂျာဘောက်ရာ

Read More »

တစ်ပူပေါ် နှစ်ပူဆင့်နေတဲ့ ပူတာအိုပြည်သူများ

“ကုန်ကားတွေက ပူတာအိုရောက်လာပေမယ့် ဝိုင်းအုံလုဝယ်ကြဆိုတော့ ကုန်စျေးနှုန်းကလည်း မကျနိုင်ဘူး။ ပြီးတော့ ကုန်ပစ္စည်းတွေကလည်း ဘယ်နေရာမှာကုန်သွားလဲတောင် မသိလိုက်ဘူး”လို့မြစ်ကြီးနားကို ခေတ္တရောက်နေတဲ့ ပူတာအိုဒေသခံတစ်ယောက်က KNG ကိုပြောပါတယ်။

Read More »

မြစ်ကြီးနားမှာ ညမထွက်ရ အမိန့်ကြောင့် တစ်ပတ်ကျော်အတွင်း ဖမ်းဆီးခံရသူ ၃၀ ဝန်းကျင်ရှိလာ

ကချင်ပြည်နယ် မြစ်ကြီးနားမြို့မှာ အရပ်သားဖမ်းဆီးခံရမှု ခပ်စိပ်စိပ်ဖြစ်လာပြီး တစ်ပတ်ကျော်အတွင်းဖမ်းဆီးခံရသူ ၃၀ ထက်မနည်းရှိပြီဖြစ်တယ်လို့ ဖမ်းဆီးခံရသူတွက ပြောပါတယ်။ ‌စစ်ကောင်စီတပ်ဟာ ဇွန်လ လဆန်းပိုင်းကစပြီး မြစ်ကြီးနားမြို့ ရမ်ပူ၊ လယ်ကုန်း၊ ရှမ်းစုတောင်၊ ကြက်ပေါင်ခြံ၊ ခေမာသီရိ၊ မြို့သစ်ကြီး၊ အောင်နန်းစတဲ့ ရပ်ကွက်တွမှာ ည ၉ နာရီနောက်ပိုင်း လိုက်လံဖမ်းဆီးနေတာဖြစ်တယ်လို့ မြစ်ကြီးနားမြို့ခံပြည်သူတစ်ဦးက ဆိုပါတယ်။ “ကျနော့်ညီဖမ်းခံရတာ အိမ်ကသွားထုတ်လာတာ ၄ သိန်းကျော်ကုန်တယ်ပြောတယ်။ ခေမာသိီရိဘက်မှာဖမ်းခံရတာ အဲဒီညထဲမှာဘဲ အယောက် ၂၀ လောက်ဖမ်းခံရတာလို့ပြောတယ်။ အထဲမှာလည်း အများကြီးရှိသေးတယ် ထွက်လာလို့မရသေးတဲ့သူတွေ”လို့ ဆိုပါတယ်။ ဖမ်းဆီးခံရတဲ့သူတွကို ညမထွက်ရအမိန့်ကျူးလွန်တယ်ဆိုတဲ့အကြာင်းပြချက်နဲ့ ရဲစခန်းမှာဖမ်းထားပြီး ခံဝန်ကတိရေးထိုးစေကာ အာမခံကြေး၊ရှေ့နေငှားရမ်းခ အပြီးအစီး တစ်ဦးလျှင် ပျှမ်းမျှ ၄ သိန်းကျော်ကုန်ကျပြီး ထုတ်ခဲ့တာဖြစ်တယ်လို့ သူက ပြောပါတယ်။  လက်ရှိ မြစ်ကြီးနားမြို့မရဲစခန်းမှာလည်း ဖမ်းဆီးခံရသူ ၂၀ ဦးထက်မနည်းရှိတဲ့အပြင် ပလနကျေးရွာ နယ်မြေရဲစခန်းဘက်မှာလည်း ဖမ်ဆီးခံထားရသူ ၁၀ ဦးထက်မနည်းရှိတယ်လို့ နောက်ထပ် မြစ်ကြီးနားမြို့ခံတစ်ဦးကလည်း  ဆက်ပြောပါတယ်။ “ဟုတ်တယ် သူက ဖမ်းတဲ့နယ်မြေမှာဘဲချုပ်ထားတာ ဥပမာ မြစ်ကြီးနားမြို့တွင်းဆိုရင် ရဲစခန်းမှာချုပ်ထားတယ်။ ကျမအသိတစ်ယောက် ပလန ဘက်ဖမ်းခံရတာ။ အလုပ်ကိစ္စနဲ့ ည ၉ နာရီလောက်ပြန်လာတာ လမ်းမှာဖမ်းခံရတာဟုတ်တယ်။ ခုတော့ ထုတ်ခဲ့ပြီ”လို့ပြောပါတယ်။ ဖမ်းဆိီးခံရသူတွေကို စစ်ကောင်စီတပ်တွေက ဖုန်းစစ်ဆေးတာတွေပြုလုပ်ပြီး မသင်္ကာတဲ့သူတွေကလွှဲလို့ ကျန်တဲ့သူတွေကို ရုံးထုတ်စစ်ဆေးကာပြန်လွှတ်ပေးနေတယ်လို့လည်း သိရပါတယ်။ ဒီကိစ္စနဲ့ပတ်သက်ပြီး မြစ်ကြီးနားမြို့တွင်း တော်လှန်ရေးအဖွဲ့ကို ဆက်သွယ်မေးမြန်းကြည့်ရာမှာတော့ ခုလိုပြောပါတယ်။ “သူတို့က တစ်ချက်ခုတ် နှစ်ချက်ပြတ်သဘောလုပ်နေတာ ပိုက်ဆံလည်းရ တစ်ဖက်မှာ တော်လှန်ရေးတပ်ဖွဲ့တွေကိုလည်း စစ်ဆေးပြီးသားသဘော ဟုတ်တယ်။ မြစ်ကြီးနားမှာ လုံခြုံရေးခေါင်းစဉ်နဲ့ညတိုင်း ကင်းပတ်တယ် ကင်းပုန်းဝပ်တာပုံမှန်ရှိတယ် အဲဒါကြောင့် ပြည်သူတွေအနေနဲ့ အရေးမကြီးရင် အပြင်မထွက်ဖို့ပြောချင်တယ်”လို့ မြစ်ကြီးနားမြို့တော်လှန်ရေးတပ်ဖွဲ့ခေါင်းဆောင်တစ်ဦးက ပြောပါတယ်။ ဒါ့အပြင် မြစ်ကြီးနားမြို့ပေါ် ရပ်ကွက်တစ်ချို့မှာ ဧည့်စာရင်းလိုက်လံစစ်ဆေးတာတွေလည်း  ပုံမှန်ရှိနေတယ်လို့လည်း သိရပါတယ်။  မြစ်ကြီးနားမြို့ဟာ ကချင်ပြည်နယ်ရဲ့မြို့တော်ဖြစ်ပြီး လက်ရှိ မြို့ရဲ့ တစ်ဖက်ကမ်းမှာရှိတဲ့ ဝိုင်းမော်မြို့နယ်ဘက်ကို စစ်ရေးပြင်းထန်လာတာနဲ့အမျှ မြစ်ကြီးနားမြို့မှာလည်း စစ်ဆေးတင်းကြပ်တာတွေပိုများလာနေတယ်လို့လည်း မြစ်ကြီးနားမြို့ခံတွေကပြောပါတယ်။ မြစ်ကြီးနားမြို့မှာ စစ်ကောင်စီက ည ၁၀ နာရီနောက်ပိုင်းအပြင်ထွက်မရ အမိန့်ကို ပြီးခဲ့တဲ့မေလမှာ တစ်ဖန်ထုတ်ပြန်ထားပြီး လမ်းသွားလမ်းလာ ပြည်သူတွေကို စစ်ဆေးဖမ်းဆီးမှုတွေ ပြုလုပ်နေတယ်လို့ သိရပါတယ်။ By – CJ

Read More »

ကုန်ကား ၁၄ စီး ပူတာအိုရောက်ရှိ

ကချင်ပြည်နယ် ပူတာအိုမြို့နယ်ကိုတက်သွားတဲ့ ကုန်ကားတစ်ချို့ မနေ့က ဇွန်လ ၁၀ ရက်နေ့ ညနေပိုင်း ၄ နာရီလောက်မှာပဲ ပူတာအိုမြို့ကိုရောက်ရှိသွားပြီလို့ မြစ်ကြီးနား–ပူတာအို ကားပြေးဆွဲတဲ့ကားဆရာတွေဆီက သိရပါတယ်။ တင်ပို့လိုက်တဲ့ကုန်ပစ္စည်းတွေကတော့ အခြေခံစားသောက်ကုန်တွေဖြစ်တဲ့ ဆန်၊ဆီ၊ ဆား၊ ငရုတ်၊ ကြက်သွန် ကိုအဓိကထားတင်ပို့ခဲ့တာဖြစ်ပြီး မြစ်ကြီးနား–ပူတာအိုကားလမ်းကို အပြီးသတ်ဖွင့်ပေးတာမျိုးမဟုတ်ဘဲ ကုန်ကားတစ်ချို့သာတက်ခွင့်ရသေးတာလို့ဆိုပါတယ်။ ပြီးခဲ့တဲ့ ဇွန်လ ၈ ရက်နေ့ ညနေပိုင်းကတည်းက မြစ်ကြီးနားမြို့ကနေ အခြေခံစားသောက်ကုန်တင်ထားတဲ့ ကုန်ကား ၁၄ စီးလောက် ပူတာအိုမြို့ ကိုထွက်ခွာသွားတာဖြစ်ပြီး မနေ့က ညနေပိုင်းမှာပဲရောက်ရှိသွားတာ လို့ မြစ်ကြီးနား–ပူတာအို ကားပြေးဆွဲသူတစ်ယောက်ကပြောပါတယ်။ “မနေ့ကညနေပိုင်းလောက်ရောက်သွားတယ်။ အခြေနေက စစ်ဆေးရေးတွေတော့နည်းနည်းစစ်တယ်တဲ့ အဲ့လောက်ပါပဲ မူလာရှီးဒီးဂိတ်မှာတော့ စစ်ဆေးရေးကြမ်းတယ်တဲ့။ လမ်းမှာကတော့ နှစ်ဖက်အဖွဲ့တွေ များတယ်ပြောတယ်။ “ လို့ပြောပါတယ်။ မြစ်ကြီးနား–ပူတာအိုသွား ကားလမ်းမကို ပြီးခဲ့တဲ့ မတ်လ ၉ ရက်နေ့က စစ်ကောင်စီတပ်နဲ့ KIA ပူးပေါင်း တပ်တွေအကြား တိုက်ပွဲကြောင့် နှစ်ဖက်တပ်တွေဘက်က ကားလမ်းကိုပိတ်ခဲ့တာဖြစ်ပြီး ၃ လကျော်အကြာမှာ အခုလိုကုန်ပစ္စည်းတွေတင်ပို့နိုင်ခဲ့တာဖြစ်ပါတယ်။ ကုန်ပစ္စည်းကားတွေ ပူတာအိုမြို့ကိုရောက်ပြီဆိုတဲ့သတင်းသာ ကနဦးသိရသေးပြီး ရောက်ရှိလာတဲ့ အခြေခံစားသောက်ကုန်တွေကို ဘယ်လိုပုံစံမျိုးနဲ့ရောင်းချပေးမလဲဆိုတာတော့ ပူတာအိုမြို့မှာ ဖုန်းလိုင်းတွေ ပြတ်တောက်နေတဲ့အတွက် KNG ကအတည်မပြုနိုင်သေးပါဘူး။ ဒီအခြေနေမှာ ရောက်ရှိသွားတဲ့ ကုန်ပစ္စည်းတွေက ကုန်ပစ္စည်းလှောင်တဲ့သူတွေဆီသာရောက်ရှိသွားရင် ကုန်ပစ္စည်းသာရောက်လာပြီး ဈေးနှုန်းကတော့ကျမယ့်အနေအထားမရှိဘူးလို့ ကားဆရာ တစ်ယောက်က သုံးသပ်ပါတယ်။ “ ပစ္စည်းဈေးနှုန်းကတော့ကျမှာမဟုတ်ဘူးကျနော်တို့ထင်တာ။ ဘာကြောင့်ဆိုတော့ အခုကပူတာအိုမှာ ပိုက်ဆံရှိလည်းဝယ်လို့မရဘူးလေ။ အခုက ပစ္စည်းရောက်သွားတယ် ပိုက်ဆံရှိရင်ဝယ်လို့ရမယ် အဲ့လောက်ပဲ ဈေးကတော့ကြီးနေအုံးမယ်ထင်တယ်။ ကုန်တွေလှောင်တဲ့အဖွဲ့တွေပစ္စည်းရောက်သွားရင်ဘာမှထူးမှာ မဟုတ်ဘူး”  လို့ပြောပါတယ်။ ဒါ့ကြောင့် မြစ်ကြီးနား–ပူတာအိုလမ်းမဖွင့်ခင်မှာ ရောက်ရှိသွားတဲ့ကုန်စည်တွေကို အဖွဲ့အစည်းတစ်ခုခုက တာဝန်ယူပေးပြီး အကန့်အသတ်နဲ့ ရောင်းချပေးရင်တော့ အဆင်ပြေနိုင်မယ်ထင်တယ်လို့ သူကဆက်ပြော ပါတယ်။ ပူတာအိုမြို့ကို ပုံမှန်ဆိုရင် မြစ်ကြီးနားကနေ ၁၂ နာရီဝန်းကျင်ခန့်သာမောင်းရပြီး ဒီတစ်ကြိမ်တော့ လမ်းခရီး မှာ နှစ်ဖက်တပ်တွေရဲ့စစ်ဆေးရေးတင်းကြပ်တာ၊ ရာသီဥတုကြောင့်မြေပြိုတာ စတဲ့အခက်အခဲတွေကြောင့် ၂ ညအိမ် ၃ ရက် ကြာမြှင့်ခဲ့ရတယ်လို့ ကားသမားတွေကပြောပါတယ်။ ပြီးခဲ့တဲ့ ဇွန်လ ၈ ရက်နေ့ကစလို့ ကချင်ငြိမ်းချမ်းရေးအကျိုးဆောင်အဖွဲ့ PCG ရဲ့ အကူအညီနဲ့ ပူတာအိုမြို့ကို ကုန်ပစ္စည်းတစ်ချို့တင်ပို့ဖို့ကြိုးစားခဲ့တာဖြစ်ပြီး ဇွန်လ ၁၀ ရက်နေ့မနေ့ကပဲ ကုန်ပစ္စည်းတွေရောက်ရှိခဲ့တာ ဖြစ်ပါတယ်။ By – အမိုး

Read More »

လယ်ကုန်းရပ်ကွက်မှာ မူးယစ်ဆေးဝါးရောင်းဝယ်သုံးစွဲသူများလာတဲ့အတွက် ရပ်ကွက်နေပြည်သူတွေ လုံခြုံရေးအတွက်စိုးရိမ်နေရ

ကချင်ပြည်နယ် မြစ်ကြီးနားမြို့ လယ်ကုန်းရပ်ကွက် နယ်မြေ (၂) ဘုရားကျောင်းလမ်းပတ်ဝန်းကျင်တစ်လျှောက် မူးယစ်ဆေးဝါးရောင်းဝယ်သုံးစွဲသူတွေပိုများလာနေတယ်လို့ ရပ်ကွက်နေပြည်သူတွေဆီကနေ သိရပါတယ်။ ဧပြီလလောက်ကနေ ဘုရားကျောင်းသွားတဲ့လမ်းတစ်လျှောက်မှာ မူးယစ်ဆေးဝါးလာရောက်ရောင်းဝယ်သုံးစွဲသူတွေ အုပ်စုလိုက်ဖွဲ့ပြီး ဆေးထိုးအပ်တန်းလန်းနဲ့ လမ်းဘေးမှာပေါ်တင်လုပ်နေကြတာဖြစ်တယ်လို့ ရပ်ကွက်နေပြည်သူတွေက KNGကို ပြောပါတယ်။ ”ကျွန်မတို့က သူတို့ကို မြင်တာနဲ့‌ ကြောက်တယ်လေ သူတို့က နှစ်ယောက်သုံးယောက်အုပ်စုဖွဲ့ပြီး ရှိနေတာဆိုတော့ ပြီးတော့ သူတို့ကလက်မှာဘဲ ထိုးတာမဟုတ်ဘူးလေ မြင်လို့ မသင့်တော်တဲ့နေရာတွေမှာလည်း ထိုးတော့ ရှက်ကြောက်တာပေါ့”လို့ ဆိုပါတယ်။ လက်ရှိ မူးယစ်ဆေးဝါးရောင်းဝယ်သုံးစွဲသူတွေအများဆုံးလာရောက်လုပ်နေတဲ့နေရာဟာ လယ်ကုန်းရပ်ကွက် နယ်မြေ ၂ ဗက်လင်နှစ်ခြင်း ဘုရားကျောင်း၊ လီဆူဘုရားကျောင်း၊ ICM ဘုရားကျောင်းနဲ့ ကက်သလစ်ဘုရားကျောင်းရှိတဲ့လမ်းမှာဖြစ်ပြီး အရင်ကထက်နှစ်ဆပိုများလာနေတယ်လို့ သူကဆက်ပြောပါတယ်။ ခုလို မူးယစ်ဆေးဝါးတွေကို လူသွားလမ်းနဲ့ ဘုရားကျောင်းလမ်းကြားတွေမှာ အုပ်စုလိုက်ပေါ်ပေါ် တင်တင် ရောင်းဝယ်သုံးစွဲနေတာကြောင့် ရပ်ကွက်နေပြည်သူတွေအနေနဲ့ သွားရေးလာရေးအတွက်  စိုးရိမ်ပူပန်နေရတယ်လို့ လယ်ကုန်းရပ်ကွက် နယ်မြေ ၂က အမျိုးသမီး တစ်ဦးက ခုလိုပြောပါတယ်။ ဒါ့အပြင် မူးယစ်ဆေးဝါးရောင်းဝယ်သုံးစွဲတဲ့သူတွေထဲမှာ အသက် ၁၈ နှစ်ကနေ ၂၇နှစ်အောက် အရွယ်လူငယ်တွေ အများဆုံးပါဝင်တယ်လို့သိရပြီး များသောအားဖြင့် မနက်ပိုင်းနဲ့ ညနေပိုင်းအချိန်တွေမှာ အများဆုံးလာသုံးနေကြတယ်လို့ သိရပါတယ်။ လက်ရှိ ဘုရားကျောင်းလမ်းတစ်လျှောက်လမ်းကြိုလမ်းကြား နေရာ ၃ နေရာလောက်မှာ နေ့တိုင်းလို အုပ်စုလိုက်ရှိနေတဲ့အပြင် တစ်ခါတစ်ရံ ရပ်ကွက်နေတာဝန်ရှိသူတွေမောင်းထုတ်ချိန် လမ်းသွယ် ၂ ဘုရားကျောင်းလမ်းထဲက အရက်ဆိုင်မှာခေတ္တအရက်ဝယ်တဲ့ပုံစံမျိုးနဲ့ ပုန်းရှောင်လေ့ရှိတယ်လို့ လယ်ကုန်းရပ်ကွက်နေ အမျိုးသားတစ်ဦးက ခုလိုပြောပါတယ်။ “ရပ်ကွက်ထဲက မူးယစ်ဆေးဝါးနှိမ်နှင်းတဲ့အဖွဲ့တွေ လှုပ်ရှားမှုတွေ လုပ်တော့ မူးယစ်ဆေးဝါးရောင်းဝယ်တဲ့ သူတွေက အဲ အရက်ဆိုင်ထဲကိုဘဲ ကာဗာယူပြီး ပြန်ပြေးဝင်သွားကြတယ် ဆိုင်ကိုသွားပြောတော့လည်း သူတို့လာခဲ့ပါလို့ ခေါ်တာ မဟုတ်ဘူးပေါ့ သူတို့ဆိုင်ကလည်း တရားဝင်ဖွင့်ထားတဲ့ အရက်ဆိုင်ပြန်ဖြစ်နေတော့ ခက်နေတယ်”လို့ဆိုပါတယ်။ အခုလို ရပ်ကွက်အတွင်း မူးယစ်ဆေးဝါးရောင်းဝယ်သုံးစွဲတဲ့အခြေအနေတွေ အလွန်ဆိုးရွားလာနေပြီး လမ်းတစ်လျှောက်ရောင်းဝယ်သုံးစွဲသူတွေ ပြည့်နက်နေတဲ့အတွက် ရပ်ကွက်နေပြည်သူတွေဟာတစ်ဦးတည်း လမ်းသွားလမ်းလာဖို့တောင် ခက်ခဲနေတာဘဲ ဖြစ်ပါတယ်။  ဒါအပြင် အခုလိုအခြေအနေတွေကြောင့် လယ်ကုန်းနယ်မြေ ၂က လူငယ်တော်တော်များများလည်း မူးယစ်ဆေးဝါးသုံးစွဲသူတွေများလာနေတယ်လို့ သိရပါတယ်။လယ်ကုန်းရပ်ကွက်ဟာ မြစ်ကြီးနားမြို့စျေးကြီးကနေ ဆိုင်ကယ်နဲ့ ၁၀ မိနစ်ခန့်သွားတဲ့နေရာမှာရှိပြီး စစ်ကောင်စီတပ်ရဲ့ ရဲတပ်ရင်း ၃၀ ရှိတဲ့ရပ်ကွက်လည်းဖြစ်ပါတယ်။ အလားတူ လယ်ကုန်းရပ်ကွက်အပြင် မြစ်ကြီးနားမှာအဆိုးဆုံးမူးယစ်ဆေးဝါးရောင်းဝယ်သုံးစွဲနေတဲ့ ရပ်ကွက်တွေဟာ ရမ်ပူ၊ခေမာသိရိ၊တပ်ကုန်း၊ထွယ်ဆန်၊ကြာရာပါတီး ၊ အေးမြသာယာ၊ကြက်ပေါင်ခြံ ရပ်ကွက်တွေဘဲဖြစ်ပါတယ်။ အရင်က မူးယစ်ဆေးဝါး ရောင်းဝယ်သုံးစွဲတဲ့သူတွေကို ရပ်ကွက်ထဲမှာရှိတဲ့ အရပ်ဘက်အဖွဲ့အစည်းတွေက လိုက်လံဖမ်းဆီးအရေးယူတာတွေကိုလုပ်နိုင်ခဲ့ပေမယ့် အာဏာသိမ်းပြီးနောက်ပိုင်း နိုင်ငံရေးအခြေအနေတွေကြောင့် တွင်တွင်ကျယ်ကျယ်လုပ်ဖို့ အဆင်မပြေတော့တဲ့အတွက် ရပ်နားထားရတာဘဲ ဖြစ်ပါတယ်။ စစ်ကောင်စီ အာဏာသိမ်းပြီးနောက်ပိုင်း ကချင်ပြည်နယ်အနှံ့မှာလည်း လောင်းကစားရုံတွေအပြင်၊ မူးယစ်ဆေးဝါးရောင်းဝယ်သုံးစွဲမှုတွေ များလာတာနဲ့ အတူ ခိုးဆိုးလုနှိုက်တွေ များပြားလာတာဘဲ ဖြစ်ပါတယ်။ ဒါအပြင်  မြန်မာနိုင်ငံဟာ ဘိန်းစိုက်ထုတ်မှု အများဆုံး‌ ရှမ်းပြည်နယ်ဖြစ်ပြီး တစ်နိုင်ငံလုံးက စိုက်ပျိုးမှုနှုန်း ၈၈ ရာခိုင်နှုန်းက ရှမ်းပြည်နယ်က ဖြစ်တယ်လို့ UNODC မှာဖော်ပြထားပါတယ်။  အဲဒီထဲမှာတော့ ကချင်နဲ့ချင်းပြည်နယ်တို့က အများဆုံးစိုက်ပျိုးပြီး UNODC ရဲ့ ၂၀၂၃ ဒီဇင်ဘာ ၁၂ရက်နေ့ရဲ့ ထုတ်ပြန်ချက်မှာတော့ မြန်မာနိုင်ငံက ကမ္ဘာပေါ်မှာ ဘိန်းစိုက်ပျိုးမှုအများဆုံးနိုင်ငံဖြစ်တယ်လို့ထုတ်ပြန်ထားပါတယ်။ By…

Read More »

ပူတာအိုကို ကုန်ကားတစ်ချို့တက်ခွင့်ရမယ်လို့သိရ

ကချင်ပြည်နယ် ပူတာအိုမြို့နယ်ကို ကချင်ငြိမ်းချမ်းရေးအကျိုးဆောင် PCG ရဲ့အကူအညီနဲ့ ကုန်ပစ္စည်းတစ်ချို့တင်ပို့ဖို့အတွက် ကုန်ကားတစ်ချို့တက်ခွင့်ရမယ်လို့ မြစ်ကြီးနား–ပူတာအို ကားပြေးဆွဲတဲ့ကားသမားတွေဆီက သိရပါတယ်။ မြစ်ကြီးနား–ပူတာအိုသွား ကားလမ်းမကြီးကို ပြီးခဲ့တဲ့ မတ်လ ၉ ရက်နေ့ကစ ဆွမ်ပရာဘွမ်မြို့မှာဖြစ်ပွားခဲ့တဲ့ချိန် KIA ပူးပေါင်းတပ်နဲ့စစ်ကောင်စီတပ်ရဲ့တိုက်ပွဲအခြေနေတွေကြောင့် နှစ်ဖက်တပ်တွေက အဲ့ဒီကားလမ်းပိုင်းသွားလာခွင့်ကို ပိတ်ထားခဲ့တာဖြစ်ပါတယ်။ ကားလမ်းပိတ်ထားတဲ့ ၃ လဝန်းကျင်ကြာလာချိန် ပူတာအိုမြို့နယ်မှာတော့ ကုန်ပစ္စည်းတွေပြတ်လပ်နေပြီဖြစ်တာကြောင့်  ပူတာအိုမြို့နယ်ဒေသခံတွေအတွက်လိုအပ်တဲ့အခြေခံစားသောက်ကုန်တွေကို ကုန်ကားတစ်ချို့နဲ့ တင်ပို့မှာဖြစ်တယ်လို့ သိရပါတယ်။ သို့သော် ဒီအခြေနေဟာ ကားလမ်းကို တရားဝင်လွတ်လပ်စွာသွားလာခွင့်ဖွင့်ပေးတာမျိုးမဟုတ်ဘဲ အကန့်အသတ်နဲ့သာသွားခွင့်ရတာဖြစ်တယ်လို့ မြစ်ကြီးနား–ပူတာအို ကားပြေးဆွဲတဲ့ကားသမားတစ်ဦးကအခုလိုပြောပါတယ် “ လမ်းက ဖွင့်တာမျိုးတော့မဟုတ်ဘူး ငြိမ်းချမ်းရေးအကျိုးဆောင်အဖွဲ့တွေပေါင်းပြီးတော့ ကားအသေးတစ်ချို့ရယ် ကုန်ကားတစ်ချို့သွားလို့ရအောင်ပေါ့ ကားတွေဘာတွေကတော့ပြင်ဆင်ပြီးသွားပြီ တစ်ကြောင်းတက်သွားမှာပေါ့ တင်ရမယ့်ကုန်တွေကလည်းအကန့်အသတ်ရှိတယ် အဓိကက စားသောက် ကုန်တွေပေါ့ ပြောချင်တာကတော့ ပူတာအိုကို ရိက္ခာသွားပို့ပေးတဲ့သဘောမျိုးပဲ တစ်ကြောင်းစာ ပုံစံမျိုးပဲ” ပူတာအိုဒေသခံတွေအတွက် လိုအပ်တဲ့အခြေခံစားသောက်ကုန်တစ်ချို့သာတင်ပို့မယ်လို့သိရပြီး စက်သုံးဆီတွေတော့တင်ပို့မယ့်အခြေနေမတွေ့ရသေးဘူးလို့ ကားသမားတွေကပြောပါတယ်။ တစ်ဖက်မှာ လက်ရှိပူတာအိုကိုတက်မယ့်ကုန်ကားတစ်ချို့အတွက်လည်း စစ်ကောင်စီရဲ့ လုံခြုံရေးနဲ့ နယ်စပ်ရေးရာဝန်ကြီး လက်မှတ်နဲ့အတူတင်ပို့ရမယ့်အခြေနေဖြစ်တယ်လို့သိရပါတယ်။ “နယ်လုံတွေဘာတွေတောင်းပြီးသွားလို့ရမယ်ပြောတယ် ဒါပေမဲ့ တက်ခွင့်ပေးပေမဲ့စာတွေတော့ ရောက်မလာ သေးဘူး စာတွေတော့တောင်းထားတာ မနေ့ကတော့မကျသေးဘူးတဲ့ ဒီနေ့ညနေ ပိုင်းတော့ကျမလား မသိဘူး “အထက်မှာဖော်ပြတဲ့ ကားသမားက ဆက်ပြောပါတယ်။ ဒီအခြေနေနဲ့ပတ်သက်လို့ ငြိမ်းချမ်းရေးအကျိုးဆောင် PCG ကို KNG ကဆက်သွယ်ချိန်မှာတော့ PCG ရဲ့တာဝန်ရှိသူ တစ်ဦးကအခုလိုပြောပါတယ်။ “ဘယ်လိုအခြေနေမှန်းလည်းသိသေးဘူး အခုလောလောဆယ်ကတော့ ဘာမှပြောလို့တော့မရသေးဘူး အခြေနေအရထွက်သွားတဲ့အခါမှာပဲပြောလို့ရမယ် ကြိုးစားနေတာတော့မှန်ပါတယ်။ ဒါပေမဲ့လည်း ဘယ်နေ့ဘယ်အချိန် ဘာဖြစ်မယ် ဘယ်လိုထွက်သွားဘယ်လိုလုပ်မယ်ဆိုတာပြောလို့မရသေးဘူး”လို့ပြောပါတယ်။ မြစ်ကြီးနား–ပူတာအို လမ်းပိုင်းကို ပြီးခဲ့တဲ့ မတ်လ ၉ ရက်နေ့က ဖြစ်ပွားခဲ့တဲ့ ကချင်လွတ်လပ်ရေးတပ်မတော် KIA ပူးပေါင်းအဖွဲ့ရဲ့ ဆွမ်ပရာဘွမ်မြို့သိမ်းတိုက်ပွဲကြောင့် နှစ်ဖက်တပ်တွေက မြစ်ကြီးနား – ပူတာအိုလမ်းပိုင်းကိုပိတ်ထားခဲ့တာဖြစ်ပါတယ်။ ဒါပေမဲ့ ပြီးခဲ့တဲ့ ဧပြီလနောက်ဆုံးအပတ်မှာတော့ ကချင်လွတ်လပ်ရေးတပ်မတော် KIA ပူးပေါင်းတပ်ဘက်က မြစ်ကြီးနား–ပူတာအိုလမ်းပိုင်းကို ဖွင့်ဖို့အတွက် စစ်ကောင်စီတပ်နဲ့ ညှိနှိုင်းခဲ့ပေမဲ့ စစ်ကောင်စီတပ်ဘက်က လက်မခံဘဲ ဒီကနေ့ ၃ လနီးပါးကြာသည်အထိ လမ်းပိုင်းကပိတ်နေခဲ့တာဖြစ်ပါတယ်။ By – အမိုး

Read More »