![](https://i0.wp.com/burmese.kachinnews.com/wp-content/uploads/2023/03/336649774_937099357326278_7075979366258521463_n.jpeg?resize=780%2C470&ssl=1)
ဖားကန့်မြို့ လုံးခင်းကျေးရွာအနီးရှိ သာသနာ့နယ်မြေ(ဒေသအခေါ် မျောက်ကုန်း)တွင် စစ်ကောင်စီတပ်ဖွဲ့ဝင်များနှင့် KIA,PDF ပူးပေါင်းတပ်တို့ တိုက်ပွဲဖြစ်ပွားရာ လမ်းသွားလမ်းလာ အရပ်သားပြည်သူ ၆ ဦး ကျည်ထိမှန်သေဆုံးကြောင်း ဒေသခံများမှ သိရသည်။
အဆိုပါ တိုက်ပွဲသည် ယမန်ည ၆ နာရီဝန်းကျင်ဖြစ်ပွားခဲ့ရာမှ လမ်းသွားလမ်းလာ အရပ်သား ပြည်သူ ၆ ဦးကျည်ထိမှန်သေဆုံးသည့်အပြင် အမျိုးသမီးတစ်ဦးနှင့် ကလေးငယ်တစ်ဦးလည်း ကျည်ထိမှန် ဒဏ်ရာရရှိထားကြောင်း ဒေသခံတစ်ဦးကပြောသည်။
“ဘယ်သူဘယ်ဝါဆိုတာတော့ တိတိကျကျ မသိရသေးဘူး အဲရပ်ကွက်မှာနေတဲ့သူတွေတော့ မဟုတ်ဘူးလို့ သိရတယ်။ ခု ဆေးရုံမှာ သားအမိ ၂ ယောက် ဒဏ်ရာရထားတာလည်း ရှိသေးတယ်”ဟုပြောသည်။
ကျည်ထိမှန် သေဆုံးသူများတွင် အမျိုးသား ၄ ဦး အမျိုးသမီး ၁ ဦး ကလေးငယ် ၁ ဦးပါဝင်သည်။
ထို့အပြင် လက်ရှိချိန်ထိ အဆိုပါ မျောက်ကုန်းစခန်းအနီး စစ်ဆေးမှုတင်းကြပ်ထားကြောင်းလည်း သိရသည်။
“ခုကအဲဘက်ပိတ်ထားတယ် ဝင်လို့မရဘူး အရမ်းစစ်နေတယ်လို့ သိရတယ်” ဟုနောက်ထပ်ဒေသခံ တစ်ဦးကပြောသည်။
စစ်ကောင်စီတပ်သည် လုံးခင်းကျေးရွာဘက်နှင့် ဖားကန့်မြို့တွင်း နေရာအချို့ စစ်ဆေးမှုတင်းကြပ်နေသည့်အပြင် ရပ်ကွက်အချို့ရှိ နေအိမ်များတွင်လည်း ဝင် ရောက် စစ်ဆေးမှု ပြုလုပ်နေကြောင်း သိရသည်။