စစ်တပ်ပစ်လိုက်တဲ့ လက်နက်ကြီးကြောင့် သားအမိ ၂ ဦးသေဆုံးပြီး တစ်ဦး ဒဏ်ရာရရှိ
KIO ထိန်းချုပ်နယ်မြေ လိုင်ဇာမြို့အနီး စစ်တပ်စခန်းကနေ မြို့ထဲကို လက်နက်ကြီးပစ်ခတ်တာကြောင့် အရပ်သား ၂ ဦးသေဆုံးပြီး နောက်ထပ်အရပ်သား ၁ ဦးထိလည်း ဒဏ်ရာပြင်းထန်စွာရရှိထားတယ်လို့ ဒေသခံတွေဆီကနေ သိရပါတယ်။
မတ်လ ၇ ရက်နေ့ ဒီကနေ့ မနက်ပိုင်းကနေ လိုင်ဇာမြို့တစ်လျှောက် တိုက်ပွဲပြင်းထန်နေတဲ့အပြင် စစ်တပ်ရဲ့ခယာဘွမ်(Hkaya Bum) ၊ ဘွမ်ရေဘွမ်( Bum ye bum) နဲ့ ဖွန်းပြန်ဘွမ်( Hpun pyen bum) စတဲ့ တပ်စခန်းက စစ်ကောင်စီတပ်တွေကနေ မြို့ထဲလက်နက်ကြီး ဆက်တိုက်ရမ်းသမ်းပစ်ခတ်နေတဲ့တွက် သားအမိ ၂ ဦးပွဲချင်းပြီးသေဆုံးခဲ့ရတာဖြစ်တယ်လို့ သိရပါတယ်။
“လက်နက်ကြီးက ဘယ်ဘက်ကနေ ရမ်းတမ်းပစ်ခတ်နေတယ်ဆိုတာတောင် မသိနိုင်တော့ဘူး အရမ်းများလို့။ ကြည့်ရင်တော့ ဖွန်ပြန်ဘွန်(Hpun pyen Bum) ကနေဖြစ်ပုံရတယ်။ မုန်လိုင်ခက်လမ်းမှာ သွားနေတဲ့ တစ်ယောက်၊ ဝိုင်ကြိုင်နဲ့ မုန်လိုင်ခက်ကြားက အိမ်တစ်အိမ်မှာ လာကျတာက ၂ ယောက်သေတယ်။” ဟု ဒေသခံသတင်းရင်းမြစ်တစ်ဦးက ပြောပါတယ်။
လက်နက်ကြီးကျည်ထိမှန် သေဆုံးတဲ့သားအမိဟာ ဝေကျိုင်ရပ်ကွက်မှာ နေထိုင်တွေဖြစ်ပြီး ဒီနေ့မနက် ၁၀ နာရီဝန်းကျင် နေအိမ်မှာလက်နက်ကြီးကျရောက်ပေါက်ကွဲတဲ့အတွက် ကျည်ထိမှန်သေဆုံးရတာဖြစ်တယ်လို့ သိရပါတယ်။
ဒါ့အပြင် ဝေကျိုင် နဲ့မုန်လိုင်ခက်ကြား ဆိုင်ကယ်နဲ့သွားနေတဲ့ ပြည်သူတစ်ဦးလည်း လက်နက်ကြီးထိမှန် ဒဏ်ရာပြင်းထန်ခဲ့ကြောင်း သိရပါတယ်။
ထိခိုက်သေဆုံးခဲ့ရသူတွေရဲ့ နာမည် အသေးစိတ်အချက်အလက်တွေ မသိရှိရသေးဘူးလို့ သူကပြောပါတယ်။
KIO ဌာနချူပ် လိုင်ဇာမြို့အနီး စစ်တပ်စခန်းတွေနဲ့အတူ မြစ်ကြီးနား – ဗန်းမော်ကားလမ်းမ တစ်ကြောရှိ စစ်တပ်စခန်းတွေကို ဒီမနက်ကစပြီး ကချင်လွတ်လပ်ရေးတပ်မတော် KIA က ထိုးစစ်ဆင်တိုက်ခိုက်နေတာဖြစ်ပါတယ်။
ဒါကြောင့် စစ်တပ်ကလည်း လိုင်ဇာမြို့ထဲကို လက်နက်ကြီးနဲ့ ဆက်တိုက်ပစ်ခတ်နေတာဖြစ်ကြောင်း ဒေသခံတွေပြောပါတယ်။
“ပြည်သူတွေ ထိခိုက်ဒဏ်ရာရတာ ဘယ်လောက်ဖြစ်နေပြီဆိုတာတော့ အတိအကျမသိဘူး။ အခုက အားလုံး လောလောနဲ့ဆိုတော့။ အခုတောင် သက်ကြီးရွယ်အိုတွေကို ဘေးလွတ်ရာကို ရွှေ့ပြောင်းနေတယ်” ဟု နောက်ထပ် လိုင်ဇာမြို့ဒေသခံတစ်ဦးက ပြောပါတယ်။
လက်ရှိ လိုင်ဇာမြို့အတွင်း ပြည်သူတချို့ ဘေးလွတ်ရာကို စတင်တိမ်းရှောင်နေကြောင်း ပြောပါတယ်။
မတ်လ ၇ ရက်နေ့ မနက် ၆ နာရီလောက်ကစပြီး မြစ်ကြီးနား – ဗန်းမော် ကားလမ်းမပေါ်ရှိ ရွှေညောင်ပင် ခလရ ၃၂၁ စစ်တပ်စခန်း၊ ခယာဘွမ်နဲ့ ဘွမ်ရေဘွမ် တစ်ကြောရှိ စစ်ကောင်စီတပ်စခန်းကြီးတွေနဲ့အတူ မြို့သစ်၊ ကုန်းလော စတဲ့နေရာတွေဘက်က စစ်ကောင်စီတပ်စခန်းတွေကို ကချင်လွတ်လပ်ရေးတပ်မတော် KIA စတင်ထိုးစစ်ဆင်တိုက်ခိုက်နေတာဖြစ်ပါတယ်။
By – ဂျာဘောက်ရာ
