မိုးမိတ်ဘက်စစ်ကြောင်းထိုးလာတဲ့ စစ်ကောင်စီယာဉ်တန်း KIA ပူးပေါင်းတပ်တိုက်ခိုက်လို့ ယာဉ်တန်းပြန်ဆုတ်ခွာ
ရှမ်းမြောက် မိုးမိတ်မြို့ဘက် စစ်ကြောင်းထိုးလာတဲ့ စစ်ကောင်စီယာဉ်တန်းကို KIA ပူးပေါင်းတပ်တွေကကြားဖြတ်တိုက်ခိုက်လိုက်တဲ့အတွက် ယာဉ်တန်းပြန်လည်ဆုတ်သွားတယ်လို့ မိုးမိတ်ဒေသခံတွေပြောပါတယ်။
နိုဝင်ဘာလ ၃၀ ရက်နေ့ည ၉ နာရီဝန်းကျင် မိုးကုတ်ဘက်ကနေ မိုးမိတ်ဘက်ကိုဦးတည်လာတဲ့ စစ်ကောင်စီတပ်ဖွဲ့ရဲ့စစ်ကား ၅ စီးကို မိုးမိတ်မရောက်ခင် ကချင်လွတ်လပ်ရေးတပ်မတော်
KIA နဲ့ တော်လှန်ရေးတပ်ပေါင်းစုတွေက ကြားဖြတ်ပစ်ခတ်တိုက်ခိုက်ခဲ့တာကြောင့် ပြန်ခေါက်သွားတယ်လို့ မိုးမိတ်ဒေသခံအမျိုးသားတစ်ဦး KNG ကို ပြောပါတယ်။
“မိုးမိတ်မြို့တွင်းမှာတော့ မနေ့ကစပြီး စစ်တပ်တွေ ယူနီးဖောင်းတွေနဲ့ထင်ထင်ရှားရှား ဝင်ရောက်နေပြီ။ KIA နဲ့ တော်လှန်ရေးတပ်ပေါင်းစုတွေကတော့ မြို့ပြင်တွေမှာ နေရာယူထားတယ်။ မနေ့ညကတော့မိုးမိတ်နဲ့ ဘောတဲကြားမှာ စစ်တပ်ကား ၅ စီးလောက် ထွက်လာချိန် KIA ဘက်မှ ကြားဖြတ်တိုက်ခိုက်လိုက်လို့ ပြန်ခေါက်သွားတယ်။ အဲဒီချိန်မှာပဲ လေယာဉ်လည်း လာဝဲသွားတယ်။အရမ်းကြီးအပြန်အလှန် တိုက်ပွဲဆက်ဖြစ်နေတာမျိုးတော့ မရှိဘူး” လို့ ပြောပါတယ်။
စစ်ကောင်စီတပ်ဖွဲ့တွေဟာ မိုးကုတ်မြို့နဲ့ မိုးမိတ်မြို့ထဲကို အစပိုင်းမှာ TNLA တပ်ဖွဲ့ဝင်တွေနဲ့ ရောနှောကာ အရပ်ဝတ်တွေနဲ့စတင်ဝင်ရောက်လာခဲ့ပေမဲ့ နိုဝင်ဘာလ ၂၉
ရက် ညမှာတော့ TNLA က လုံခြုံရေးယူပေးကာ စစ်တပ်ယာဉ်တန်းအမြောက်အများဝင်ရောက်နိုင်ခဲ့တာဖြစ်တယ်လို့ မိုးမိတ်ဒေသခံက ပြောပြပါတယ်။
မိုးမိတ်ဒေသခံ ပြောဆိုချက်အရ နိုဝင်ဘာ ၃၀ ရက်နေ့ မနေ့ကစပြီး မိုးမိတ်မြို့တွင်းမှာ TNLA တပ်ဖွဲ့ဝင်တွေကို ယူနီးဖောင်းနဲ့တကွ မတွေ့ရတော့ဘူးလို့ ဆိုပါတယ်။
တစ်ဖက်မှာလည်း မိုးကုတ်၊ မိုးမိတ်မြို့တွေထဲကနေ TNLA တပ်ဖွဲ့တွေဆုတ်ခွာပြီးနောက်မှာတော့ စစ်ကောင်စီတပ်ကို PDF တပ်ပေါင်းစုတွေနဲ့ ကချင်လွတ်လပ်ရေးတပ်မတော် KIA ဘက်မှ တိုက်ခိုက်နိုင်တဲ့ အနေအထားမှာ ရှိနေတယ်လို့ ဒေသခံတွေကသုံးသပ်ပြောဆိုနေကြပါတယ်။
“လက်ရှိထိတော့ KIA နဲ့ PDF တွေက မိုးကုတ်၊ မိုးမိတ်တွေမှာ TNLA နဲ့ပါ ပြဿနာမဖြစ်အောင် အပစ်အခတ်မဖြစ်ကြအောင် အရမ်းကို သတိထားနေတဲ့ အခြေအနေလို့ မြင်ရတယ်။ ဒါပေမဲ့ဆက်လက်ပြီးပဲ TNLA က စစ်တပ်နဲ့ အတူ လှုပ်ရှားသွားလာနေတယ်၊ စစ်ရေးလှုပ်ရှားတာတွေရှိလာရင်တော့ ဘယ်လိုမှမတတ်နိုင်တဲ့အဆုံး စစ်ကောင်စီနဲ့အတူလှုပ်ရှားနေတဲ့ TNLA နဲ့ PDF တွေတိုက်ပွဲမဖြစ်ပွားလာနိုင်ဘူးလို့ မပြောနိုင်ဘူး။ ဒါမျိုးအခြေအနေ မဖြစ်လာရင်တော့ ပိုကောင်းတာပေါ့။အခြေအနေတော့ TNLA တွေအကုန်ထွက်ခွာပြီဆိုရင်တော့ စစ်တပ်နဲ့ KIA၊ PDF တပ်ပေါင်းစုတွေတိုက်ပွဲဖြစ်ပွားလာနိုင်တယ်”လို့ ရှမ်းမြောက်စစ်ရေး၊ နိုင်ငံရေးလေ့လာသုံးသပ်သူ အမျိုးသားတစ်ဦးကလည်း ပြောဆိုထားပါတယ်။
လက်ရှိ မိုးမိတ်မြို့ပြင်မှာတော့ KIA အပါအဝင် PDF တပ်ပေါင်းစုတွေ နေရာယူလှုပ်ရှားထားပြီး စစ်တပ်နဲ့ KIA ပူးပေါင်းတပ်အကြား အခြေအနေတင်းမာနေသလို မြို့ပြင်နေရာတချို့မှာတော့ ပစ်ခတ်မှုတစ်ချို့ရှိနေတယ်လို့ ဆိုပါတယ်။
မိုးမိတ်မြို့တွင်းထဲကနေ ထွက်ခွာသွားပြီဖြစ်တဲ့ တအာင်း(ပလောင်) တပ်ဖွဲ့ TNLA တွေက မနေ့ညမှာပဲ ရွှေလီမြစ်ဆုံဘက်ကို ရောက်ရှိလာခဲ့ပြီး နေရာယူထားတယ်လို့သိရပါတယ်။
ဒီဇင်ဘာလ ၁ရက်နေ့ ဒီနေ့မနက်မှာတော့ မိုးကုတ်မြို့ပြင်ဘက်မှာ လက်နက်ကြီးပစ်ဖောက်သံတွေ ကြားခဲ့သလို မနေ့ညမှာလည်း မိုးကုတ်မြို့ပြင် အရှေ့ဘက်ခြမ်းမှာပစ်ခတ်သံတွေ ကြားနေရတယ်လို့ ဒေသခံတွေဆိုပါတယ်။
မိုးကုတ်နဲ့ မိုးမိတ်မြို့ကို စစ်ကောင်စီလက်ထဲကို လက်မလွှဲနိုင်အောင် ခုခံကာကွယ်သွားမယ်လို့ NUG အစိုးရအောက် PDF တပ်ပေါင်းစုတွေနဲ့ ကျောင်းသားတပ်များက ထုတ်ပြန်ပြီး ပြင်ဆင်မှုတွေ လုပ်ဆောင်ခဲ့ပေမဲ့ TNLA ရဲ့ဖိအားပေးမှုကြောင့် PDF တွေ မြို့ထဲကနေ ထွက်ခွာခဲ့တာဖြစ်တယ်လို့ဒေသခံတွေပြောပါတယ်။
မိုးကုတ်မြို့ဒေသခံတွေက တိုက်ပွဲဖြစ်ပွားလာမှာကို စိုးရိမ်တာကြောင့် မန္တလေး၊ ရန်ကုန်တွေဘက်ဆီ တိမ်းရှောင်သွားကြပြီး မိုးမိတ်မြို့ဒေသခံတွေကတော့ မဘိမ်း၊ ရွှေလီမြစ်တစ်ကြော ရွာတွေမှာ တိမ်းရှောင်နေကြရတယ်လို့ သိရပါတယ်။
တအာင်းအမျိုးသားလွတ်မြောက်ရေးတပ်ဖွဲ့ PSLF/TNLA ဟာ တရုတ်ဖိအားနဲ့ စစ်တပ်ရဲ့ လေကြောင်းဒဏ်ကို မခံနိုင်တဲ့အဆုံး စစ်တပ်နဲ့ အပစ်ရပ်ပြီး မိုးကုတ်၊မိုးမိတ်မြို့တွေကို စစ်တပ်ထံ
ပြန်အပ်ပေးဖို့ ပြီးခဲ့တဲ့ အောက်တိုဘာ ၃၀ ရက်နေ့မှာ သဘောတူလက်မှတ်ရေးထိုးခဲ့ကာ ဒီမြို့တွေထဲထိစစ်တပ်ဝင်ရောက်နိုင်အောင် ကူညီပေးနေတာလည်း ဖြစ်ပါတယ်။
By – ဂျာဘောက်ရာ
