ကချင်ပြည်နယ် မြို့နယ် ၃ ခုတွင် အသေးစားရွှေလုပ်ကွက်နှင့် လက်လုပ်လက်စား လုပ်ကိုင်ခွင့် ပဉ္စမအကြိမ်မြောက် ထပ်မံခွင့်ပြုလိုက်ပြီ ဖြစ်ကြောင်း သိရပါ သည်။
ရွှေဂူမြို့နယ်၊ ဆွမ်ပရာဘွမ်မြို့နယ် နှင့် ပူတာအိုမြို့နယ် စသည့်နေရာ ၃ ခုတွင် ခွင့်ပြုလိုက်ခြင်း ဖြစ်ပြီး အသေးစားရွှေလုပ်ကွက် ၂၀ ကွက်နှင့် လက်လုပ်လက်စားရွှေလုပ်ကွက် ၁ ကွက်ကို ဇူလိုင်လ ၉ရက်နေ့ ပြည်နယ်သတ္ထုရုံးတွင် ခွင့်ပြုမိန့် လက်မှတ်ပေးအပ်ခဲ့ပါသည်။
“လုပ်ကွက်တွေပေးတာဖြစ်တယ်။ အားလုံးက ဥပဒေဘောင်အတွင်းမှာ ဆောင်ရွက်ပေးတာပါ။ အဓိကတော့ တရားမဝင် လုပ်ကိုင်နေတဲ့ သူတွေများလာတော့ ဒီလို နည်းလမ်းမှန်မှန် ဥပဒေနဲ့ အညီဆောင်ရွက်ပေးတာဖြစ်တယ်” ဟု ပြည်နယ်သယံဇာတဝန်ကြီး ဦးဒါရှီလဆိုင်း ပြောပါသည်။
အသေးစားနှင့် လက်လုပ်လက်စားလုပ်ကိုင်လိုသူများက ကချင်ပြည်နယ်အစိုးရထံ တင်ပြတောင်းဆိုလာသောကြောင့် လုပ်ထုံးလုပ်နည်းအရ တရားဥပဒေနှင့်အညီ ခွင့်ပြုလိုက်ခြင်း ဖြစ်ကြောင်း ပြောပါသည်။
လက်ရှိ ကချင်ပြည်နယ်အစိုးရ အနေဖြင့် တရားဝင် အသေးစားနှင့် လက်လုပ်လက်စား သတ္ထုတူးဖော်ခွင့်ကို မြို့နယ် ၈ ခုအတွင်း လုပ်ကွက်စုစုပေါင်း ၁၃၅ ခန့်ကို ချထားပေးကြောင်း ဆက်လက်ပြောဆို ပါသည်။
ထို့အပြင် ကချင်ပြည်နယ် အစိုးရထံသို့ ခွင့်ပြုမိန့်တင်ထားသော ဖားကန့်မြို့နယ်နှင့် တနိုင်းမြို့နယ်အတွင်းရှိ လုပ်ငန်းရှင်များကို လည်း သေချာစီစစ်ပြီးနောက် မကြာမှီ ချပေးသွားမည်ဖြစ်ကြောင်း ကချင်ပြည်နယ် သတ္ထုရုံး ပြောဆိုချက်မှ သိရပါသည်။
