ယနေ့ ကျရောက်သော (၄၄) နှစ်ပြည့် ကချင် အာဇာနည်နေ့အထိမ်းအမှတ် ဆုတောင်းပွဲကို ကချင်လွတ်လပ်ရေးအဖွဲ့ KIO ဗဟိုဌာနချုပ် လိုင်ဇာမြို့ နှင့် အခြား ထိန်းချုပ်နယ်မြေများတွင် ပြုလုပ်ခဲ့ကြောင်း သိရပါသည်။
လွန်ခဲ့သော ၁၉၇၅ ခုနှစ် သြဂုတ် ၁၀ ရက်နေ့ ကချင်လွတ်လပ်ရေးအဖွဲ့ KIO ကို စတင်တည်ထောင်ခဲ့သူ GOC Lahtaw Zau Seng နှင့် ထိပ်ပိုင်းခေါင်းဆောင်တချို့ ကျဆုံးခဲ့သောနေ့ကို ကချင်အာဇာနည်နေ့ အဖြစ် သတ်မှတ်ခဲ့ခြင်း ဖြစ်ပါသည်။
ယခုနှစ် အာဇာနည်နေ့တွင်လည်း KIO ဥက္ကဌ ဗိုလ်ချုပ်ကြီးအင်ဘန် မှ မိန့်ခွန်း ထုတ်ပြန်ခဲ့ပြီး ၄င်းအာဇာနည်ခေါင်းဆောင် များသည် တိုင်းပြည်နဲ့လူမျိုးအတွက် နိုင်ငံရေးဖိနှိပ်ခံရမှု မှ လွတ်မြောက်ရန် မိမိတို့ အင်အား၊ အရည်အချင်း၊ စိတ်နှလုံးတို့ဖြင့် အသက်စွန့် တော်လှန်ရေးတိုက်ပွဲဝင်ခဲ့ကြသူများ ဖြစ်သည်ဟု ဂုဏ်ပြုထားပါသည်။
ထို့ကြောင့် လက်ရှိ ပညာသင်ကြားနေဆဲ လူငယ်များသည် ကချင်အာဇာနည် သမိုင်းကြောင်းကို သိထားရန် လိုအပ်ကြောင်းနှင့် တော်လှန်ရေးတာဝန်ကို လက်ဆင့်ကမ်းယူရမည့်အကြောင်း ဖော်ပြထားပါသည်။
“နိုင်ငံရေးအရ တော်လှန်တာက အဓိကဖြစ်တယ်။ စစ်ရေးက ဒုတိယမှ လိုက်လာတယ်။ လူငယ်တွေ ဒီတာဝန်ကို ဆက်ထမ်းရမယ်ဆိုတာ ကျွန်တော်တို့ လိုချင်တဲ့ နိုင်ငံရေးပန်းတိုင် မရောက်မချင်း ဆက်သွားရမှာပဲ။ နိုင်ငံရေး အခွင့်အာဏာမရဘဲ တော်လှန်ရေးခရီး ရပ်လိုက်ရအောင်ပြောလို့ မရဘူးလေ။ အခုလက်ရှိ ဦးဆောင်နေတဲ့ အသက်ကြီးခေါင်းဆောင် သူတွေရဲ့ လက်ထက် နိုင်ငံရေး အခွင့်အာဏာ မရခဲ့ရင်တောင် လူငယ်တွေက ဆက်လက် လုပ်ဆောင်ရမယ်ဆိုတဲ့ အဓိပ္ပာယ် ဟုတ်တယ်။” ဟု ကချင်လွတ်လပ်ရေးအဖွဲ့ KIO ဒုတိယဥက္ကဌ – ၂ (ငြိမ်း) ဒေါက်တာ တူးဂျာ မှ ကချင်သတင်းဌာန KNG ကို ပြောပါသည်။
လက်ရှိ KIO သည် အပစ်အခတ် ရပ်စဲနိုင်ရန် အစိုးရ NRPC နှင့် ဆွေးနွေးနေဆဲဖြစ်ပြီး အာမခံချက်ရှိသော အပစ်ရပ် လက်မှတ်ရေးထိုးပြီးပါက ကချင် စစ်ပြေးဒုက္ခသည်များ နေရပ်ပြန် အခြေချနိုင်ရေးကို ကြိုးစားလုပ်ဆောင်သွားမည်ဖြစ်ကြောင်း မိန့်ခွန်းတွင် ပြောဆိုထားပါသည်။
အစိုးရတပ်မတော်နှင့် ကချင်လွတ်လပ်ရေးအဖွဲ့ KIO တို့ ၁၉၉၄ ခုနှစ် အပစ်ရပ်သဘောတူညီမှုသည် ၂၀၁၁ ခုနှစ် ဇွန်လတွင် ပျက်စီးခဲ့ပြီး ကချင်ပြည်နယ်နှင့် ရှမ်းမြောက်ဒေသအနှံတွင် တိုက်ပွဲများ တဖန်ဖြစ်ပွားနေသည်မှာ ယနေ့ထိ ဖြစ်ပါသည်။
ကချင်လွတ်လပ်ရေးအဖွဲ့ KIO ကို ၁၉၆၀ အောက်တိုဘာ ၂၅ ရက်နေ့တွင် ဖွဲ့စည်းခဲ့ပြီး လက်နက်ကိုင်တပ်ဖွဲ့ ကချင်လွတ်လပ်ရေးတပ်မတော် KIA ကို ၁၉၆၁ ဖေဖော်ဝါရီ ၅ ရက်နေ့တွင် ဖွဲ့စည်းခဲ့ပါသည်။
