စစ်အာဏာသိမ်းမှုကို ဆန့်ကျင်သော မြစ်ကြီးနား လူထုဆန္ဒဖော်ထုတ်မှုများသည် ၁၀ ရက်မြောက်နေ့ထိ ငြိမ်းချမ်းစွာပြီးစီးခဲ့သော်လည်း ၁၁ ရက်နေ့မြောက်နေ့မှစတင်ကာ တင်းကြပ်ခံရပြီးနောက် ၁၂ ရက်မြောက်နေ့ဖြစ်သော ယနေ့ဖေဖောဝါရီလ ၁၉ ရက်နေ့တွင် ဆန္ဒဖော်ထုတ်သူများ လူမစုနိုင်သည့်အခြေအနေထိပင် ရောက်ခဲ့သည်။
ပညာရေးဝန်ထမ်းဆရာမ ၂ ဦးကို ရဲတပ်ဖွဲ့က ရိုက်နက်ကာ ဖမ်းဆီးခေါ်ဆောင်သွား
နံနက် ၉ နာရီ ပထမဆုံး စတင်ကြားရသည့်သတင်းမှာ မြစ်ကြီးနား ပညာရေးကောလိပ်ရှေ့တွင် CDM လုပ်နေသော ဝန်ထမ်း ဆရာမ ၂ ဦးကို ရဲတပ်ဖွဲ့က ရိုက်နက်ကာ ဖမ်းဆီးခေါ်ဆောင်သွားသောသတင်းဖြစ်သည်။
အဆိုပါဖြစ်စဉ်နှင့်ပတ်သက်ပြီး ရဲတပ်ဖွဲ့၏ ဖြိုခွင်းမှုကို ခံခဲ့ရသော ဆရာမတစ်ဦးက ကချင်သတင်းဌာန KNG ကို ယခုလိုပြောသည်။
“အစ်မတို့ ၈ နာရီခွဲပြီး ၅ မိနစ်မှာ စုရပ်ကိုရောက်တယ်။ လေ့ကျင်ရေးကျောင်းရှေ့ပေါ့။ ဆရာမတွေ ဆိုင်ကယ်ထားနေတဲ့အချိန် အစီး ၂၀ လောက်ဘဲ ရှိသေးတယ်။ ၄၅ မိနစ်လောက်မှာ ရဲကားတွေ ဖြည်းဖြည်းလေးမောင်းဝင်လာတယ်။ ရေ့ဆုံးက နည်းနည်းဝဝ ရဲတစ်ယောက်က မိုက်ကိုင်ပြီး ဆင်းလာတယ်။ ဒါပေမယ့် နောက်ဆုံးက ရဲတစ်ယောက်က အရမ်းရိုက်ချင်တဲ့ဇောနဲ့ ကျမတို့ဆီပြေးလာတော့ အစ်မတို့ကလည်း ပြေးသွားတယ်။ အဲမှာ ဆရာမ ၂ ယောက်ကျန်ခဲ့တယ်။ သူတို့ ၂ ယောက်လည်းပြေးပေမယ့် တစ်ယောက်ကိုတော့ အစ်မရှေ့မှာတင် ဖမ်းမိသွားတယ်။ အဲဒီဆရာမကိုသူတို့က ဒူးထောက်ထားခိုင်းပြီး ခြေထောက်မှာ ရိုက်နေတယ်။” ဟု ယနေ့ ပညာရေးကောလိပ်ရှေ့မှ အဖြစ်အပျက်ကို ထိုနေရာရောက်ရှိခဲ့သည့် ဆရာမ တစ်ဦးက ပြောပြသည်။
ယနေ့ မနက်ဖြစ်စဉ်တွင် ဆရာမ ၂ ဦး ဖမ်းဆီးခံရကြောင်း သိရသည်။
လမ်းလျှောက် ဆန္ဒဖော်ထုတ်သူများ ဖြိုခွင်းခံရသော်လည်း ဆိုင်ကယ်ဖြင့် လှည့်ပတ်ဆန္ဒဖော်ထုတ်သူများမှာ နေ့လည်အချိန်ထိ ဆက်လက်သွားလာနေဆဲဖြစ်သည်ဟု သိရသည်။
တိုက်ရိုက်ထုတ်လွင့်နေသော သတင်းမီဒီယာများ၏ ဖုန်း လုယက်မှုဖြစ်
လူထုဆန္ဒဖော်ထုတ်သူများကို တိုက်ရိုက်တင်ဆက် (LIVE) နေသော သတင်းမီဒီယာသမားများ၏ ဖုန်းကို ဆိုင်ကယ်ဖြင့် လူ ၂ ဦးက လိုက်လုနေသည်ကို တွေ့ရသည်။
မြစ်ကြီးနားအခြေစိုက် The 74 Media ၏ တိုက်ရိုက်တင်ဆက်နေသော ဖုန်းကို နယ်ထိန်းဆိုသူက လိုက်လုခဲ့သည်။ သို့သော်လည်း အလုမခံရပဲ ကာကွယ်နိုင်ခဲ့သည်ဟု သိရသည်။
Video Credit – The 74 Media (ဗီဒီယိုကြည့်ရန်)
ဖမ်းဆီးခံရသူများ ညနေ ၄ နာရီတွင် ပြန်လည်လွှတ်မြောက်လာ
ရိုက်နက် ဖမ်းဆီးခံရသော ဆရာမ ၂ ဦးအပါအဝင် နေ့လည်ခင်းအချိန်က ဖမ်းဆီးခံရသူ စုစုပေါင်း ၁၃ ဦးတို့သည် ကချင်ငြိမ်းချမ်းရေးအကျိုးဆောင်အဖွဲ့ PCG ညှိနှိုင်းပေးမှုကြောင့် ညနေ ၄ နာရီအချိန်တွင် ပြန်လည်လွှတ်မြောက်လာခဲ့သည်။
ဆရာမ ၂ ဦးအနက် ၁ ဦးမှာ ရိုက်နက်ဒဏ်ရာကြောင့် လက်တစ်ဖက် ထိခိုက်ခံထားရကြောင်း သိရသည်။
