မိုးမောက်မြို့နယ် ဒါ့ဆိုင်းကျေးရွာအနီးတွင် ယနေ့ နံနက်ပိုင်းက စစ်ကောင်စီယာဉ်တန်းကို ကချင်လွတ်လပ်ရေးတပ်မတော် KIA က မိုင်းခွဲတိုက်ခိုက်ခဲ့ရာ ၃ စီးပျက်စီးသွားသည်ဟု သိရသည်။
ယနေ့နံနက် ၉ နာရီခွဲဝန်းကျင်ခန့်တွင် ဗန်းမော်ဘက်မှ တက်လာသည့် စစ်ကား ၁၆ စီးပါသော စစ်ယာဉ်တန်းကို မြို့သစ်ကျေးရွာမရောက်မှီ ဒါ့ဆိုင်းကျေးရွာအနီးတွင် KIA က မိုင်းခွဲတိုက်ခိုက်ခဲ့သည်ဟု မြို့သစ်ဒေသခံတစ်ဦးက KNG သတင်းဌာနကို ပြောဆိုခဲ့သည်။
“တိုက်ပွဲဖြစ်တဲ့နေရာက ကားလမ်မကြီး နားမှာဘဲ။ နောင်လိုက်ကျေးရွာကျော်သွားပြီး တာဆိုင်းရွာအဝင်နားမှာပေါ့။ တိုက်ပွဲဖြစ်တာက ခဏဘဲလို့ကြားတာ။ စစ်ကောင်စီဘက်ကနေ KIA ကိုပြန်ပြီး လက်နက်ကြီးတွေနဲ့ပြန်ပစ်တာက ၁နာရီလောက်ကြာတယ်။ စစ်ကား ၃စီးလောက်က တော်တော်ထိသွားတယ်လို့ကြားတယ်” ဟု ပြောဆိုသည်။
အဆိုပါ မိုင်းခွဲတိုက်ခိုက်မှုတွင် စစ်ကောင်စီဘက်က စစ်ကား ၃စီးထက်မနည်း ထိခိုက်ပျက်စီးသွားသည်ဟု ပြောဆိုမှုများရှိနေသလို ဒေသခံတစ်ချို့က ၅စီး ပျက်စီးသွားပြီး ထိခိုက်သေဆုံးမှု များသည်ဟုလည်း ဆိုကြသည်။
တိုက်ခိုက်ခံရသော စစ်ယာဉ်တန်းမှာ ဒါ့ဆိုင်းကျေးရွာ အခြေစိုက် ခလရ ၂၃၇ တပ်ရင်း အတွင်းသို့ဝင်ရောက်ကြိုးစားနေသောအဖွဲ့ဖြစ်ပြီး လွန်ခဲ့သည့် မေလအတွင်း မြို့သစ်တိုက်ပွဲကြောင့် ထွက်ပြေးသွားသော တပ်မိသားစုဝင်များဖြစ်သည်ဟု သိရသည်။
ဒါ့ဆိုင်းကျေးရွာမှာ အလော့ဘွမ်တောင်ခြေ စလောင်းကုန်း တာဝါတိုင်စခန်းဟု လူသိများသောတပ်ရှိရာ မြို့သစ်ကျေးရွာနှင့် နီးကပ်သော ကျေးရွာဖြစ်သည်။
