ကသာတွင် ၃ ရက်အတွင်း ကျေးရွာ ၅ ရွာမှ နေအိမ် ၇၀၀ ကျော်မီးရှို့ခံရ
ကသာမြို့နယ်တွင် ၃ ရက်အတွင်းကျေးရွာပေါင်း ၅ ရွာမှ နေအိမ် ၇၀၀ ကျော်မီးရှို့ဖျက်ဆီးခံရကြောင်း ဒေသခံများက ပြောသည်။
စစ်အင်အား ၂၀၀ ဝန်းကျင်ရှိသည့် စစ်ကောင်စီ စစ်ကြောင်းသည် ပြီးခဲ့သည့် ဖေဖော်ဝါရီလ ၉ ရက်နေ့မှ စတင်ကာ ရှမ်းပြည်မြောက်ပိုင်း ငအိုးဘက်မှ ထွက်ခွာလာခဲ့ပြီး ဖေဖော်ဝါရီလ ၁၁ ရက်နေ့မှစတင်ကာ မယ်ညိုရွာကို စတင်ကာမီးရှို့ခဲ့ကြောင်း သိရသည်။
“ သူတို့က စစ်ကြောင်းနှစ်ကြောင်းခွဲပြီး ၉ ရက်နေ့ညက ရှမ်းမြောက်ကနေထွက်လာတာ ၁၁ ရက်နေ့မှာ ရွာတွေကိုမီးစရှို့တာ အခုထိဆိုရွာပေါင်း ၅ ရွာရှို့ခံထားရတယ်။ ခန့်မှန်းအိမ်ခြေ ၇၀၀ ကျော်လောက်ပါနိုင်တယ်။ ဘာလို့ဆို ရှို့ခံထားရတဲ့ ၅ ရွာထဲက ၂ရွာကရွာကြီး အဲ့ရွာကြီးတွေကအိမ်ခြေ တော်တော်ပါသွားတယ်“ ဟု ကသာပြည်သူ့ကာကွယ်ရေးတပ်ဖွဲ့ဝင် တစ်ဦးက ဆိုသည်။
မီးရှို့ခဲ့ရသည့် ကျေးရွာများမှာ မယ်ညို၊ တက်တူလယ်၊ သာယာကုန်း၊ အင်းကြီး၊ လှေဘိုစသည့် ကျေးရွာများဖြစ်ပြီး ကသာမြို့နယ် အရှေ့တောင်ဘက်ခြမ်း ကသာနှင့်မဘိန်းအစပ် ရွှေလီမြစ်ကမ်းနံဘေးတွင်တည်ရှိသည့် ကျေးရွာများဖြစ်သည်။
ယင်းစစ်ကြောင်းဟာ ရှမ်းပြည်နယ်မြောက်ပိုင်း မဘိန်းမြို့နယ်အခြေစိုက် ခလရ-၁၂၁ဖြစ်ပြီး စစ်ကြောင်း နှစ်ကြောင်းခွဲကာ ကသာမြို့နယ်သို့ ဝင်ရောက်စစ်ကြောင်းထိုးနေခြင်းဖြစ်သည်ဟု သိရသည်။
အဆိုပါစစ်ကြောင်း နှစ်ကြောင်းအနက် တစ်ကြောင်းမှာအင်းကြီးကျေးရွာရှိ ဆေးရုံတွင်တပ်စွဲထားပြီး နောက်ထပ် စစ်ကြောင်းတစ်ကြောင်းသည် လောင်းတော်ဦးဘုရားကုန်းဘက်သို့ ထွက်ခွာသွားကြောင်း ဒေသခံများက ပြောသည်။
ထို့ကြောင့် လက်ရှိချိန်တွင် ကသာမြို့နယ်အရှေ့တောင်ဘက်ခြမ်းရှိ ကျေးရွာ ၅ ရွာမှ ဒေသခံပြည်သူ ၅၀၀၀ ဝန်းကျင်သည် ဘေးလွှတ်ရာသို့ အိုးအိမ်စွန့်ခွာထွက်ပြေးတိမ်းရှောင်နေကြရသည်။
