![](https://i0.wp.com/burmese.kachinnews.com/wp-content/uploads/2023/02/329333154_1083953542556165_9207549318897316610_n.jpeg?resize=720%2C445&ssl=1)
ရှမ်းပြည်မြောက်ပိုင်း ကွတ်ခိုင်မြို့အနီး KIA တပ်ရင်း ၉ ကောင်းဆတ်ဘွမ် (Kawng Sak Bum) ဘက်ကသို့ စစ်ကောင်စီတပ်မှ ယနေ့နေ့လည် ၁၁ နာရီဝန်းကျင်မှစကာ ဂျက်လေယာဉ်တစ်စီးဖြင့် ပစ်ခတ်နေပြီး တိုက်ပွဲပြင်းထန်နေကြောင်း ဒေသခံများမှ သိရသည်။
KIA တပ်မဟာ ၆ တပ်ရင်း ၉ နေရာ ကွတ်ခိုင်မြို့အနီး ခိုမုန်းရွာအရှေ့ဘက် ကောင်းဆတ်ဘွမ်၌ တိုက်ပွဲဖြစ်ပွားနေသည်မှာ ၅ ရက်ဆက်တိုက်ရှိနေပြီဖြစ်ပြီး စစ်ကောင်စီဘက် နမ်ဖတ်ကာဗျူဟာကုန်းမှ လက်နက်ကြီးများဆက်တိုက် ပစ်ခတ်နေသည့်အပြင် ယနေ့တွင် ဂျက်လေယာဉ်ဖြင့်ပါ အသုံးပြုပြီးတိုက်ခိုက်နေကြောင်း နမ်ဖတ်ကာဒေသခံတစ်ဦးပြောသည်။
“မနေ့ညကနေ အခုထိ မရပ်မနားတိုက်ပွဲဖြစ်ပွားနေတာဟုတ်တယ်။ လက်နက်ကြီးနဲ့လည်း ပစ်နေတယ်။ နေ့တိုင်းလိုလိုဖြစ်နေတယ်တိုက်ပွဲက အခုဒီနေ့က လေယာဉ်နဲ့ လည်း ဆက်တိုက်လာပစ်နေပြီ။ အခု ၅ ရက်လောက်ရှိနေပြီ ဒီမှာတိုက်ပွဲ ပြင်းထန်နေတယ်” ဟု ပြောသည်။
စစ်ကောင်စီလက်နက်ကြီးပစ်ခတ်မှုကြောင့် ဒေသခံရွာသား ၂ ဦး ထိခိုက်ဒဏ်ရာရရှိထားကြောင်းလည်း သိရသည်။
ဖေဖော်ဝါရီ ၉ ရက်နေ့မှစပြီး စစ်ကောင်စီတပ်နှင့် KIA တို့ ရှုခင်းသာအနီးမှစတင်ကာ တိုက်ပွဲဖြစ်ပွားခဲ့ရာမှ လက်ရှိချိန်နားဖိုင်ရွာဘက် ကောင်းဆတ်ဘွမ်အထိ တိုက်ပွဲဆက်တိုက်ဖြစ်ပွားနေကြောင်း သိရသည်။
ထို့အပြင် ပြီးခဲ့သည့် ၂၀၂၂ ခုနှစ် စက်တင်ဘာလ၌လည်း ကချင်လွတ်လပ်ရေးတပ်မတော် KIA တပ်ရင်း ၉ နေရာကို စစ်ကောင်စီတပ်မှလေယာဉ်နှင့် အင်အားအလုံးအရင်းသုံး တိုက်ခိုက်ခဲ့သည်။