ကန့်ဘလူတွင် စစ်ကောင်စီတပ်စခန်းတစ်ခု တိုက်ခိုက်ခံရသဖြင့် လေယာဉ်ဖြင့် ပြန်လည်ပစ်ခတ်တိုက်ခိုက်
စစ်ကိုင်းတိုင်းဒေသကြီး ကန့်ဘလူမြို့နယ် ချပ်ကြီးကျေးရွာတွင် အထိုင်ချထားသော စစ်ကောင်စီတပ်စခန်းကို ဒေသကာကွယ်ရေးတပ်များပူးပေါင်းကာ ယနေ့ ဝင်ရောက်စီးနင်းတိုက်ခိုက်ချိန် စစ်ကောင်စီဘက်မှ ဂျက်လေယာဉ်ဖြင့် ပြန်လည်လာရောက်တိုက်ခိုက်ခဲ့သည်ဟု ကာကွယ်ရေးတပ်ဖွဲ့များထံမှ သိရသည်။
ယနေ့ မနက်ပိုင်း ၅ နာရီဝန်းကျင်တွင် ကာကွယ်ရေးတပ်ဖွဲ့များ ပူးပေါင်းကာ ပျူစောထီးအားကောင်းသည့် ချပ်ကြီးကျေးရွာကို တိုက်ခိုက်သိမ်းပိုက်နိုင်ခဲ့ပြီးနောက် စစ်ကောင်စီက အထိနာခဲ့သဖြင့် ဂျက်လေယာဉ်ဖြင့် ပြန်လည်တိုက်ခိုက်ခဲ့ခြင်း ဖြစ်သည်ဟု ကာကွယ်ရေးတပ်ဖွဲ့ဝင်တစ်ဦးက ပြောသည်။
“ချပ်ကြီးက ပျူစောထီးအားကောင်းတဲ့ရွာပါ။ စကစတွေလည်း အထိုင်ချထားတာပေါ့။ ဒီမနက်မှာ ကာကွယ်ရေး တပ်တွေပေါင်းပြီး တိုက်ခိုက်တာ စခန်းသိမ်းလိုက်နိုင်တယ်လို့ပြောပါတယ်။ သူတို့ဘက်ကအထိနာတော့ ချပ်ကြီး တစ်ဝှိုက်က ပိတောက်ပင်ရွာပတ်ဝန်းကျင်ကို ရဟတ်ယာဥ်နဲ့ပစ်သွားတာ”ဟုကန့်ဘလူဒေသခံကာကွယ်ရေးတပ်ဖွဲ့ဝင်တစ်ဦးက ဆိုသည်။
ထို့အပြင် စခန်းသိမ်းတိုက်ပွဲတွင် စစ်ကောင်စီဘက်မှ Mi 35 နှင့် Mi17 တစ်စီးတို့ဖြင့် တိုက်ခိုက်ခဲ့ပြီးနောက် နှစ်ဖက်အကျအဆုံးနှင့် ဒေသခံများထိခိုက်မှုရှိ မရှိကိုတော့ အတည်မပြုနိုင်သေးကြောင်း သူကဆက်ပြောသည်။
ချပ်ကြီးကျေးရွာသည် ကန့်ဘလူမြို့နယ်မြောက်ဘက်ခြမ်း ချပ်သင်းတိုက်နယ်ရှိ ရွှေဘို-မြစ်ကြီးနား ဗျူဟာလမ်းမကြီးဘေးတွင် တည်ရှိသည့် ကျေးရွာဖြစ်သည်ဟု ဒေသခံများထံမှ သိရသည်။
