မလေးရှားနိုင်ငံမှာကျင်းပတဲ့ သိုင်းပေါင်းစုံ Rage(MMA) Semi Final Welterweight မှာ ကချင်သားလေး အနိုင်ရ
မလေးရှားနိုင်ငံအခြေစိုက် သိုင်းပေါင်းစုံ Rage(MMA)Amateur level ချန်ပီယံသစ်ရှာဖွေပွဲမှာ မြန်မာပြည်ဖွား ကချင်သားလေး Joseph Sut Du Aung ဆီမီးဖိုင်နယ်ပွဲကို အနိုင်ရပြီး ဗိုလ်လုပွဲကိုတက်ရောက်သွားခဲ့ပြီ ဖြစ်ပါတယ်။
အဆိုပါပြိုင်ပွဲကိုတော့ မလေးရှားနိုင်ငံ ကွာလာလမ်ပူမြို့က Lalaport shopping mall the Cage မှာ ဇူလိုင်၂၀ ရက်နေ့က ကျင်းပခဲ့တာဖြစ်ပြီး Joseph Sut Du Aung ကနေပြီးတော့ ပြိုင်ဘက်ကစားသမားဖြစ်တဲ့ မလေးရှားနိုင်ငံသား Galvin Steven ကို ပထမအချီ ၁ မိနစ်နဲ့ ၅၇ စက္ကန့်မှာ အလဲထိုးအနိုင်ရရှိခဲ့တာဘဲ ဖြစ်ပါတယ်။
“ပျော်သလောက်တော့ပျော်ပါတယ် ဒါပေမယ့်လည်း ကျွန်တော့်အတွက် ဖိအားရှိတာကတော့ နောက်ပွဲဆိုတော့ ဒီပွဲအတွက်တော့ ထူးထူးခြားခြားပြင်ဆင်တာတော့ မရှိပါဘူး။ ဘာလို့လဲဆိုတော့ ထရိန်နင်ပုံမှန်လုပ်နေတာဆိုတော့”လို့ ဂျိုးဆပ်ဆွတ်ဒူအောင် (Joseph Sut Du Aung)ကပြောပါတယ်။
လက်ရှိချိန်ထိ Joseph Sut Du Aung ကတော့ ကစ်ဘောက်ဆာ ၆ ပွဲထိုးတဲ့ထဲမှာ ၃ ပွဲနိုင်၃ပွဲရှုံးထားပြီး သိုင်းပေါင်းစုံ Rage(MMA) ၃ ပွဲမှာ ၃ပွဲစလုံးအနိုင်ရရှိထားပြီး ဗိုလ်လုပွဲ(Grand Final)ကိုတော့ စက်တင်ဘာလ ၇ရက်နေ့မှာ ပြန်လည် ထိုးသတ်သွားမယ်လို့ သိရပါတယ်။
တစ်ကမ္ဘာလုံး တိုးတက်ပြောင်းလဲလာပြီး ဆိုရှယ်မီဒီယာတွေတွင်ကျယ်လာတာနဲ့အမျှ တိုက်ခိုက်ရေးအားကစားတွေဖြစ်တဲ့ သိုင်းပေါင်းစုံ(MMA)၊ဘောက်ဆာ(Boxing)၊လက်ဝှေ့နဲ့ မွေထိုင်းလို အားကစားတွေလည်း လူငယ်တွေအကြားစိတ်ဝင်စားမှုအလွန်မြင့်တက်လာတာဘဲ ဖြစ်ပါတယ်။
“ကျွန်တော့်အနေနဲကတော့ လူငယ်တွေကို ပေါ်ပြူလာဖြစ်ရုံလောက်နဲ့တော့ ဒီလောကကို မဝင်လာစေချင်ဘူး အရမ်းပင်ပန်းတယ် ကိုယ်ရဲ့လူငယ်အချိန်တွေကို အားလုံးပေးဆပ်ရတာမို့လို့ တကယ်ကို စိတ်အားထက်သန်ပြီး လုပ်ချင်တယ်ဆိုတော့ ပျော်တယ်ဆိုမှ လုပ်ဖို့ အကြံပေးချင်တယ်”လို့ ဂျိုးဆပ်ဆွတ်ဒူအောင် (Joseph Sut Du Aung)ကဆက်ပြောပါတယ်။
Joseph Sut Du Aung ဟာ ၁၉၉၇ခုနှစ် ဖေဖော်ဝါရီလ၁၅ရက်နေ့ မွေးဖွားခဲ့တာဖြစ်ပြီး ရန်ကုန် သင်္ကန်းကျွန်းမြို့နယ်မှာဘဲ ကြီးပြင်းခဲ့တာဘဲ ဖြစ်ပါတယ်။
မွေးချင်းညီအစ်ကိုမောင်နှမ ၇ယောက်ထဲမှာ အငယ်ဆုံးဖြစ်ပြီး မိဘနှစ်ပါးလုံးကတော့ ဘာသာရေးဆရာတွေဖြစ်တယ်လို့ သိရပါတယ်။
ဒါ့အပြင် သူဟာ ငယ်စဉ်ကတည်းကနေ အစ်ကိုတွေကြောင့် ကရာတေးပညာရပ်နဲ့ထိတွေ့မှုရှိခဲ့တာဖြစ်ပြီး ၂၀၁၇ လောက်မှာ အစ်ကိုတွေရှိတဲ့မလေးရှားနိုင်ငံကို အလုပ်လုပ်ဖို့ ရောက်ရှိလာရာကနေ ၂၀၂၀ ဝန်းကျင်လောက်ကနေ ကစ်ဘောက်ဆာ၊နပန်းစတဲ့ သိုင်းပေါင်းစုံတွေကိုလေ့လာသင်ယူခဲ့တယ်လို့ သူကဆိုပါတယ်။
By – Hope
