ကချင်ပြည်နယ် မြစ်ကြီးနားမြို့မှာ မိန်းကလေးတစ်ဦး လည်ပြွန်ဓားထိုးခံရတဲ့ ဒဏ်ရာနဲ့ အသတ်ခံထားရတယ်လို့ ဧရာဝတီဂရုဏာလူမှု ကယ်ဆယ်ရေးအသင်းကနေ သိရပါတယ်။
ဖြစ်စဉ်မှာ စက်တင်ဘာလ ၂၈ ရက်နေ့ ညနေ ၄ နာရီခွဲခန့်မှာ သီတာရပ်ကွက် ဆုတောင်းပြည့်ဘုရားလမ်းကြားမှာ အသက် ၂၀ ဝန်းကျင် အရွယ်ရှိ မိန်းကလေးတစ်ဦး လည်ပြွန်ဓားထိုးခံထားရတဲ့ ဒဏ်ရာနဲ့ သေဆုံးနေတယ်လို့ သိရပါတယ်။
“ညာဘက်လက်မှာလည်း ကာလိုက်လို့ထိတာထင်တယ်။ လက်သန်းကြွယ်မှာလည်းတစ်ခု တော်တော်တော့ နက်တယ် ဓားဒဏ်ရာက။ ကျွန်တော်တို့ အမြင်နဲ့ ကြည့်ရလို့ရှိရင်တော့ နားအောက်ပေါ့ လည်ပင်းနား လည်ပြွန်ကို ထိတယ်” လို့ ဧရာဝတီဂရုဏာ လူမှုကယ်ဆယ်ရေးအသင်းရဲ့ အဖွဲ့ဝင်တစ်ဦးက ဆိုပါတယ်။
သေဆုံးသူ အမျိုးသမီးရဲ့ ရုပ်အလောင်းကို မြစ်ကြီးနားရင်ခွဲရုံသို့ ပို့ဆောင်ထားပြီး မနေ့ညအထိ မိသားစုဝင်တွေနဲ့ အဆက်အသွယ်မရရှိသေးတဲ့အတွက် ဘယ်သူ ဘယ်ဝါ ဖြစ်တယ်ဆိုတာကိုတော့ မသိရှိရသေးဘူးလို့ ဆက်ပြောပါတယ်။
ပြစ်မှုကျူးလွန်သူတွေမှာ အမျိုးသားနှစ်ဦး ဖြစ်တယ်လို့ ကနဦးသိရပေမယ့် အတည်ပြုနိုင်ခြင်းတော့ မရှိသေးပါဘူး။
မြစ်ကြီးနားမြို့မှာ ပြီးခဲ့တဲ့ ဩဂုတ်လက လက်နက်ကြီး ထိမှန်သူ၊ ဓားထိုးခံရမှု နဲ့ ပစ်ခတ်ခံရမှုတွေကြောင့် သေဆုံးသူ ၄ဦးနဲ့ ထိခိုက်ဒဏ်ရာရရှိသူ ၄ဦးထိရှိခဲ့ပါတယ်။
KNG စုစည်းထားတဲ့စာရင်းတွေအရ မြစ်ကြီးနားမြို့မှာ ၂၀၂၅ ခုနှစ် ဇန်နဝါရီလမှာ ခိုးဆိုးလုယက်မှု ၈ ကြိမ်၊ ဖေဖော်ဝါရီလ ၁၄ ကြိမ်၊ မတ်လ ၁၀ ကြိမ်နဲ့ ဧပြီလ ၁၂ ကြိမ်၊မေလ ၆ ၊ ဇွန် ၅ ကြိမ်၊ ဇူလှိုင်လ ၄ကြိမ်နဲ့ ဩဂုတ်လမှာတော့ ၅ကြိမ်ဖြစ်ပွားခဲ့ပြီး သေဆုံးသူ ၁ဦး ရှိခဲ့ပါတယ်။
ဆက်သွယ်ရေး အခက်အခဲကြားကနေ လူမှုကယ်ဆယ်ရေးအသင်းတွေနဲ့ ဒေသခံပြည်သူတွေဆီကနေ မေးမြန်းထားတာ ဖြစ်တဲ့အတွက် မြေပြင်အခြေအနေမှာတော့ အနည်းငယ် ကွဲလွဲမှုတွေ ရှိနေနိုင်ပါတယ်။
ခုလို မြစ်ကြီးနားမြို့မှာ သတ်ဖြတ်မှုတွေ ၊ ခိုးဆိုးလုယက်မှုတွေ မကြာခန ခပ်စိပ်စိပ် ဖြစ်လာပေမယ့်လည်း မြစ်ကြီးနားမြို့ကို အုပ်ချုပ်နေတဲ့ သက်ဆိုင်ရာ တာဝန်ရှိသူတွေအနေနဲ့ ထိရောက်စွာ အရေးယူဆောင်ရွက်နိုင်ခြင်း မရှိတဲ့အတွက် မြစ်ကြီးနား ပြည်သူတွေအတွက် သွားရေးလာရေး ပိုမိုခက်ခဲလာတယ်လို့ ဆိုပါတယ်။
By – Hope
