အကူအညီလိုအပ်

ဆိုင်းတောင် စစ်ဘေးရှောင် ၄ ထောင်ကျော်အတွက် အကူအညီလိုအပ်နေ

ဖားကန့်မြို့ ဆိုင်းတောင်တိုက်ပွဲကြောင့် ထွက်ပြေးတိမ်းရှောင်နေကြတဲ့ စစ်ဘေးရှောင် ၄ ထောင်ကျော်အတွက် အစားသောက်ဆေးဝါးနဲ့သောက်သုံးရေ အဓိကလိုအပ်နေတယ်လို့ ဖားကန့်ဒေသခံတွေပြောပါတယ်။ စက်တင်ဘာလ ၇ ရက်နေ့နောက်ပိုင်း စစ်တပ်နဲ့ KIA ပူးပေါင်းတပ်အကြားပြင်းထန်နေတဲ့ တိုက်ပွဲကြောင့် ဒေသခံပြည်သူတွေဟာ နေ့တိုင်းလိုလို ရွာကနေစွန့်ခွာပြီး ဖားကန့်မြို့ဘုန်းကြီးကျောင်းနေရာ၊ဘာသာရေးကျောင်းတွေအပြင်…

Read More »

အောင်မြေ ၂ စစ်ရှောင်များ ကိုယ်ထူကိုယ်ထဆောက်ထားတဲ့ ကျောင်းဆောင်ပျက်စီးသွားလို့ အကူအညီလိုအပ်နေ

ကချင်ပြည်နယ် ဝိုင်းမော်မြို့နယ် အောင်မြေ ၂ စစ်ဘေးရှောင်များ ကိုယ်ထူကိုယ်ထဖွင့်ထားတဲ့ စာသင်ကျောင်းဆောင်ပျက်စီးသွားတဲ့အတွက် အကူညီလိုအပ်နေတယ်လို့ အောင်မြေ ၂ စစ်ရှောင်စခန်းပညာရေးတာဝန်ခံ အမျိုးသမီးတစ်ဦး ပြောပါတယ်။ ပြီးခဲ့တဲ့ ဇူလိုင်လ လဆန်းပိုင်း မြစ်ကြီးနားမြို့နယ်နဲ့ ဝိုင်းမော်မြို့နယ်တွေ ဧရာဝတီမြစ်ရေကြီးရေလျှံမှုကြောင့် အောင်မြေ ၂ စစ်ရှောင်စခန်း ကိုယ်ထူကိုယ်ထဖွင့်ထားတဲ့ စာသင်ဆောင် ၄ ဆောင်ထဲက စာသင်ဆောင် ၂ ဆောင်ပျက်စီးသွားခဲ့တယ်လို့ အောင်မြေ ၂ စစ်ရှောင်စခန်းပညာရေးတာဝန်ခံ အမျိုးသမီးတစ်ဦးက ဆိုပါတယ်။ “ကျောင်းသုံးပစ္စည်းတွေအကုန်ပျက်စီးသွားတယ် သုံးလို့မရတော့ဘူးပေါ့ အရင်ကတည်းကနေခက်ခဲနေတဲ့ကြားက မိဘပြည်သူတွေစုပေါင်းလုပ်ထားတဲ့အဆောင်တွေ ပျက်စီးသွားတော့ နောက်တစ်ခေါက်ပြန်ဆောက်ဖို့ခက်ခဲနေတာပေါ့”လို့ သူမကပြောပါတယ်။ ရေဘေးကြောင့် ပျက်စီးသွားတဲ့ ကျောင်းဆောင်ပြန်ပြီးတည်ဆောက်နိုင်ဖို့ ငွေကြေးအကူအညီလိုအပ်နေသလို တစ်ဖက်မှာလည်း ကလေးသူငယ်တွေရဲ့ ဖတ်စာအုပ်၊ရေးစာအုပ်၊လွယ်အိတ် အများအပြားပျက်စီးသွားတဲ့အတွက် ကျောင်းသုံးကိရိယာအမျိုးမျိုးကူညီတွေလိုအပ်နေတယ်လို့ စစ်ဘေးရှောင်တွေက ဆိုပါတယ်။ အောင်မြင် ၂ စစ်ရှောင်စခန်းက ပျက်စီးသွားတဲ့ စာသင်ကျောင်းဆောင်မှာတက်ရောက်နေကြတဲ့ ကျောင်းသား၊သူ စုစုပေါင်း ၆၀ ကျော်ရှိတယ်လို့ သိရပြီး  ဒုတိယတန်းအထက် ကလေးသူငယ်တွေဟာ လဘန်ကျေးရွာမှာဖွင့်ထားတဲ့ နီးစပ်ရာစာသင်ကျောင်းတွေမှာတက်ရောက်နေတယ်လို့ သိရပါတယ်။ ဒါ့အပြင် ဝိုင်းမော်မြို့နယ်  ဝူယန်ရွာကနေ ဒိန်ဂျာယန်ကျေးရွာဘက်ထွက်ပြေးတိမ်းရှောင်နေတဲ့ စစ်ရှောင်စခန်းမှာလည်း ကျောင်းနေမယ့်အရွယ် ကလေးသူငယ် ၃၀ ကျော်ရှိတယ်လို့ သိရပါတယ်။ ဒီကလေးသူငယ်တွေဟာ ဒိန်ဂျာယန်ကျေးရွာ အလယ်တန်းကျောင်းမှာတက်နေကြတာဖြစ်ပေမယ့် ဇွန်လကနေ ကျောင်းပိတ်လိုက်တဲ့အတွက် မိဘတွေအနေနဲ့ သားသမီးပညာရေးအတွက် စိုးရိမ်နေကြတယ်လို့ သိရပါတယ်။ “ကျွန်တော်တို့စစ်ရှောင်က ကလေးတွေကလည်းကျောင်းတက်ချင်တဲ့အတွက် မိဘတွေအားလုံးကလည်း လိုအပ်တာတွေဝယ်ဖို့ကို လုပ်ဖို့ ပိုက်ဆံတွေလည်း ဝိုင်းထည့်ကြတာပေါ့ အဲဒီနေ့ပြီးတာနဲ့ နောက်တစ်နေ့ဆိုကျောင်းကပြန်ပိတ်သွားတာပေါ့”လို့  ဝူယန်စစ်ရှောင်စခန်းက တာဝန်ခံတစ်ဦးကပြောပါတယ်။ လက်ရှိအချိန်ထိလည်း စာသင်ကျောင်းကိုပိတ်ထားပြီး ပြန်ဖွင့်မယ့်အချိန်တိတိကျကျ မသိတဲ့အတွက် ဝူယန်စစ်ရှောင်များ ကလေးပညာရေးအတွက် ဒိန်ဂျာယန်ကျေးရွာကနေ လဘန်ကျေးရွာဘက် တစ်ဖန်ပြောင်းရွေ့ဖို့ပြင်ဆင်နေကြပြီဖြစ်တယ် ဝူယန်စစ်ရှောင်တာဝန်ခံဆီကနေသိရပါတယ်။ ပြီးခဲ့တဲ့ မေလ ၇ ရက်နေ့ KIA စစ်ဆင်ရေးစတင်လာတဲ့နောက်ပိုင်း ဝိုင်းမော်မြို့နယ်ထဲမှာ နှစ်ဖက်စစ်ရေးတင်းမာနေဆဲဖြစ်တဲ့အတွက် ကျေးရွာ ၂၀ ရွာ ထက်မနည်းထွက်ပြေးတိမ်းရှောင်စစ်ဘေးရှောင်တွေဟာ နေရာဒေသအသီးသီးမှာ စစ်ရှောင်နေကြတာဖြစ်ပါတယ်။ စစ်ရှောင်ပြည်သူတွေ ကျေးရွာတွေကို စွန်ခွာပြီးထွက်ပြေးတိမ်းရှောင်လာတာဟာ  ၅လဝန်းကျင်ထိကြာမြင့်လာပြီဖြစ်ပြီး တစ်ဖက်မှာလည်း စစ်ဘေးကနေ ရေဘေးသင့်ဘဝကြုံတွေ့ခဲဲ့ကြလို့ အဖက်ဖက်ကနေ ခက်ခဲနေကြတာဖြစ်ပါတယ်။ ဒါပေမယ့် ဝိုင်းမော်မြို့နယ်မှာ KIA /KPDF ပူးပေါင်းတပ်နဲ့ စစ်ကောင်စီတပ်နဲ့ ပြည်သူ့စစ်တပ်တို့အကြား စစ်ရေးတင်းမာနေတာဆဲဖြစ်တာကြောင့် ဒေသခံတွေ နေရပ်ပြန်လို့မရသေးတဲ့အခြေနေမှာရှိနေတာလည်း ဖြစ် ပါတယ်။ By – Hope

Read More »

ဗန်းမော်မှာ ဧရာဝတီမြစ်ရေ စိုးရိမ်ရေအမှတ်ထက် ၄ ပေကျော်မြင့်တက်နေပြီး သောက်သုံးရေအကူညီလိုအပ်နေ

ကချင်ပြည်နယ် ဗန်းမော်မြို့နယ်မှာ ဧရာဝတီမြစ်ရေဟာ စိုးရိမ်ရေအမှတ်အထက် ဆက်လက်မြင့်တက်နေပြီးတော့ ရေဘေးပြည်သူတွေအတွက် သောက်သုံးရေအကူညီအဓိကလိုအပ်နေတယ်လို့ ဒေသခံတွေနဲ့လူမှုကူညီရေးအသင်းတွေကပြောပါ တယ်။ ဒီကနေ့ မနက်ပိုင်း ၇ နာရီခွဲတိုင်းထွာချက်အရတော့ ဗန်းမော်မြို့ရဲ့ဧရာဝတီမြစ်ရေဟာ စိုးရိမ်ရေအမှတ်အထက် ၄ ပေကျော်(၁၂၈ စင်တီမီတာ) ရောက်ရှိနေပြီးတော့ နောက်တစ်ရက်အတွင်း ပေဝက်လောက် ဆက်လက်မြင့်တက်နိုင်တယ်လို့ မိုး/ဇလက ထုတ်ပြန်ထားပါတယ်။ လက်ရှိဗန်းမော်မြို့နယ်ထဲက မြေနိမ့်ပိုင်းရပ်ကွက် ၅ ခုလောက်က အိမ်တစ်လုံးစာလောက်ရေနစ်မြုပ်နေပြီ ဖြစ်ပြီးတော့ ပိတ်မိသူတွေလည်းရှိသလို ကူညီကယ်ဆယ်ရေးတွေဆက်တိုက်လုပ်နေရတဲ့အခြေနေလို့ မိုးစက်ပွင့်လူမှုကူညီရေးအသင်းကတာဝန်ရှိသူတစ်ယောက်ကပြောပါတယ်။ “ကယ်ဆယ်ရေးကတော့ ဖြန့်ကျက်ပြီးတော့လုပ်နေပါတယ်။ ဒေသခံတွေအတွက် အဓိကကသောက်သုံးရေ ပါပဲ။ ဘာလို့လဲဆိုတော့ ရေတွင်းတွေ ရေစက်တွေက မြုပ်သွားတော့ သောက်သုံးရေကလိုအပ်နေပါတယ်။ ပိတ်မိတာတွေလည်းရှိပါတယ်။ ဒါပေမဲ့ လူမှုကူညီရေးအသင်းတွေကချိတ်ဆက်ပြီးတော့ ဆောင်ရွက်နေတဲ့ အခြေနေပါ”လို့ပြောပါတယ်။ ဗန်းမော်မြို့နယ်ဟာ ပြီးခဲ့တဲ့ ဇူလိုင်လ ၁ ရက်နေ့က အထက်ပိုင်း မြစ်ကြီးနားမြို့‌ရေဘေးကြုံခဲ့ရတဲ့အတိုင်း ရေဘေးသင့်နိုင်တယ်ဆိုတဲ့အကြောင်း သေချာတဲ့ခန့်မှန်းချက်တွေကြောင့် ဒေသခံတွေနဲ့လူမှုကူညီရေးအသင်း အဖွဲ့တွေက ကြိုတင်ပြင်ဆင်မှုတွေလုပ်ခဲ့ကြတာဖြစ်ပါတယ်။ ဗန်းမော်မြို့နယ်မှာ လက်ရှိ လူမှုကူညီရေးအသင်း ၁၃ ဖွဲ့နဲ့ ကူညီကယ်ဆယ်ရေးတွေအဓိကလုပ်ဆောင်နေပြီး ရေဘေးရှောင်စခန်းက ၄ ခုဖွင့်လှစ်ထားသလို အဲ့ဒီစခန်းတွေမှာ ရေဘေးရှောင်လူဦးရေ ထောင်နဲ့ချီရှောင်နေ ကြတယ်လို့သိရပါတယ်။ လက်ရှိအချိန်ထိ အခြေနေဆိုးတွေမကြုံနေရပေမဲ့လည်း တရုတ်နိုင်ငံ ယူနယ်ပြည်နယ်ကနေ ဗန်းမော်မြို့နယ် ဧရာဝတီမြစ်ထဲ စီးဆင်းလာတဲ့ တာပိန်မြစ်ရေဒီထက်တက်လာမှာကိုတော့ စိုးရိမ်တယ်လို့ ဒေသခံတွေက ပြောပါတယ်။ “လောလောဆယ်မြစ်ရေကတော့ချိန်လို့ရတဲ့အနေအထားပေါ့ တစ်ချက်စိုးရိမ်တာကတော့ တာပိန်ရေကနေ ဆင်းလာမှာကိုစိုးရိမ်တယ်။ ဒီထက်တိုးလာမှာကို ဒီရေမလာရင်တော့လည်း အခြေနေငြိမ်မှာပေါ့ တာပိန်ရေ ကလည်းမှန်းရခက်တယ်။ တရုတ်ပြည်ကလာတော့ မိုးများရင်များသလိုပဲ ဟိုဘက်အထက်မှာက ဆည်တွေ ရှိတယ်။ အဲ့ဒီဆည်တွေကနေ လျှော့ချရင် ဒီဘက်မှာတိုးလာမှာစိုးရိမ်တယ်”လို့ဒေသခံတစ်ယောက်ကပြောပါတယ်။ တစ်ဖက်မှာ လူမှုကယ်ဆယ်ရေးအသင်းတွေအနေနဲ့ ကယ်ဆယ်ရေးအတွက် စက်သုံးဆီတစ်လီတာကို ကျပ် ၄၀၀၀ ကနေ ၅၀၀၀ ဝန်းကျင်အထိဝယ်ယူသုံးစွဲကြရပြီး ရေကြီးရေလျှံမှုကြောင့် ရပ်ကွက်တစ်ချို့တော့ မီးပျက်နေတယ်လို့ သိရပါတယ်။ လက်ရှိ ဗန်းမော်မြို့နယ်ထဲက မြေနိမ့်ပိုင်းရပ်ကွက်တွေဖြစ်တဲ့ ရွှေကြီးနား၊ ခွန်သာ၊ နမ့်ဖား စတဲ့မြို့ပေါ် ရပ်ကွက်တွေအပြင် ကောင်းစင့်၊ ရေလှဲ၊ မံမလင်း၊ ပါပေါင်း၊ လက်ပံတန်း စတဲ့ကျေးရွာတွေက ရေဘေး ကြုံနေကြရတတယ်လို့ သိရပါတယ်။ ဗန်းမော်မြို့နယ်ရဲ့ စိုးရိမ်ရေအမှတ်ဟာ ၁၁၅၀ စင်တီမီတာဖြစ်ပြီး အန္တရာယ်ရေအမှတ်ကတော့ ၁၂၄၅ စင်တီမီတာ ဖြစ်ပါတယ်။ လက်ရှိတော့ ဗန်းမော်မြို့ရဲ့ ဧရာဝတီမြစ်ရေဟာ ၁၂၇၆ စင်တီမီတာရှိပြီလို့ ဒီကနေ့ မနက်ပိုင်းမှာပဲ ထုတ်ပြန် ထားသလို ပြီးခဲ့တဲ့ နှစ်ပေါင်း၂၀ (၂၀၀၄ ခုနှစ်) တုန်းကတော့ ဗန်းမော်မြို့ရဲ့ ဧရာဝတီမြစ်ရေဟာ ၁၃၃၈ စင်တီမီတာအထိစံချိန်တင်မြင့်တက်ခဲ့ဖူးတာဖြစ်ပါတယ်။ By – အမိုး

Read More »

ကောလင်းမြို့နယ်က စစ်ဘေးရှောင်တွေ အကူညီတွေလိုအပ်နေ

စစ်ကိုင်းနဲ့ကချင်အစပ် ကောလင်းမြို့နယ်ထဲက စစ်ဘေးရှောင်တွေ စားနပ်ရိက္ခာ နဲ့ အမိုးအကာအကူညီတွေလိုအပ်နေတယ်လို့ စစ်ဘေးရှောင်ကူညီပေးရေးအဖွဲ့တွေဆီကသိရပါတယ်။ ဘေးလွှတ်ရာတောတောင်တွေထဲဖြစ်သလို တဲထိုးပြီးနေထိုင်နေရတဲ့ ကောလင်းစစ်ဘေးရှောင်တွေဟာ မိုးတွင်းရောက်လာတာနဲ့အတူ အကူညီတွေပိုပြီးလိုအပ်လာပြီး အစားအသောက်နဲ့ အမိုးအကာတွေက အဓိကလိုအပ်ချက်ဖြစ်တယ်လို့ ကောလင်းအနောက်ဘက်ခြမ်းက စစ်ဘေးရှောင်တစ်ယောက်ကပြော ပါတယ်။ “ဒီဘက်မှာက အကူညီပေးတဲ့အဖွဲ့တွေကမရောက်ခဲ့တဲ့အခါကျတော့ အကူအညီတွေကတော့ လိုအပ်ချက် တွေပဲဖြစ်နေတာပေါ့။ နောက်ဒီမှာက ဖြစ်သလိုပဲ အင်ဖက်တွေနဲ့မိုးပြီးနေရတဲ့အနေအထားဖြစ်တယ်။ ဒီနေရာမှာ စားရေးသောက်ရေးနဲ့ပတ်သက်ပြီး တကယ်ခက်ခဲတဲ့သူတွေလည်းရှိတယ် အကူညီတွေက တော်တော်ကြီးကိုလိုအပ်နေတာ”လို့ပြောပါတယ်။ ဒါ့အပြင် သောက်သုံးရေရရှိဖို့ခက်ခဲတဲ့အတွက် စစ်ဘေးရှောင်တွေ ကျန်းမာရေးထိခိုက်တာတွေအထိ ဖြစ်လာပြီး အဲ့ဒီအတွက်လည်း ဆေးဝါးအကူညီတွေလိုအပ်ချက်တွေရှိတယ်လို့ သိရပါတယ်။ တစ်ဖက်မှာ ကောလင်းဒေသခံတွေဟာ မြို့နယ်အတွင်းက စစ်ကောင်စီနဲ့လွှတ်ကင်းတဲ့နေရာတွေဆီ တိမ်းရှောင်ရတာဖြစ်တဲ့အတွက် ချောင်ကျတဲ့နေရာတွေကိုတိမ်းရှောင်ကြတဲ့ဒေသခံတွေဆိုရင် အကူအညီ မရတာမျိုးတွေရှိတယ်လို့ စစ်ဘေးရှောင်အမျိုးသမီးတစ်ယောက်ကအခုလိုပြောပါတယ်။ “ကျမတို့ပြေးတဲ့နေရာကျတော့ ချောင်လည်းကျတယ်။ ကျမတို့ဘက်မှာ ဆန်တော့တစ်ခေါက် ရဖူးပါ တယ်။ တော်တော်လေးအဆင်မပြေတဲ့မိသားစုတွေရှိတယ်။ ကျမတို့လည်းပါလာတဲ့ပစ္စည်းတွေကို ဝေငှရင်းနဲ့ မမျှ နိုင်တော့ဘူး ကိုယ့်ဟာကိုယ်အနိုင်နိုင်ပေါ့။ တစ်ခြားဘက်မှာလည်းလာလှူပေမယ့် ကျမတို့ဘက်မှာကျတော့ ချောင်လည်းကျတယ် လမ်းမကောင်းတော့မရောက်ရှိသေးတာပေါ့နော်”လို့ပြောပါတယ်။ ကောလင်းမြို့နယ်ကို ပြီးခဲ့တဲ့ ၂၀၂၃ ခုနှစ် နိုဝင်ဘာ ပထမအပတ်လောက်က KIA နဲ့ပူးပေါင်းအဖွဲ့တွေက သိမ်းပိုက်ကာ ၃ လကြာထိန်းချုပ်ထားခဲ့ပြီး ၂၀၂၄ ခုနှစ် ဖေဖော်ဝါရီလ ၁၃ ရက်နေ့မှာ စစ်ကောင်စီတပ် ဆီ ပြန်လက်လွှတ်ခဲ့ရတာဖြစ်ပါတယ်။ အဲ့ဒီလို လက်လွှတ်ခဲ့ရပြီးတဲ့နောက် စစ်ကောင်စီတပ်က ကောလင်းမြို့တွင်းရပ်ကွက်နဲ့ ရွာတစ်ချို့က ကနေအိမ်တွေကို ဆက်တိုက်မီးရှို့ဖျက်ဆီးခဲ့တဲ့အတွက် ဒေသခံတွေဒုနဲ့ဒေးဘေးလွှတ်ရာထွက်ပြေးခဲ့ ကြရပြီး အိုးမဲ့အိမ်မဲ့ဖြစ်ခဲ့ရပါတယ်။ လက်ရှိ ကောလင်းမြို့နယ်မှာ ဘေးလွှတ်ရာကိုထွက်ပြေးတိမ်းရှောင်နေကြရတဲ့ လူဦးရေ ၄ သောင်း ဝန်းကျင်လောက်ရှိပြီး ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး UNOCHA ရဲ့ စာရင်းအရ တစ်နိုင်ငံလုံးမှာ ဘေးလွှတ်ရာထွက်ပြေးနေရတဲ့ လူဦးရေ သုံးသန်းကျော်ရှိနေပြီလို့ဖော်ပြထားပါတယ်။ By – အမိုး

Read More »

ဝိုင်းမော်မြို့နယ်က စစ်ရှောင်ပြည်သူများ ဆေးဝါးနဲ့အမိုးအကာ အကူညီလိုအပ်နေ

ဝိုင်းမော်မြို့နယ်ထဲက  စစ်ဘေးရှောင်ပြည်သူများ  စားနပ်ရိက္ခာတွေပြတ်လပ်လုနီးပါးဖြစ်နေတဲ့အပြင် ဆေးဝါးနဲ့အမိုးအကာတွေလည်း အရေးပေါ်အကူညီလိုအပ်နေတယ်လို့ စစ်ရှောင်ပြည်သူတွေဆီကနေ သိရပါတယ်။ မတ်လ ၇ ရက်နေ့ KIA ပူးပေါင်းတပ်တွေရဲ့စခန်းသိမ်းတိုက်ပွဲစတင်လာတဲ့ချိန်ကနေ ထွက်ပြေးတိမ်းရှောင်နေကြတဲ့ အောင်မြေ(၁)၊ အောင်မြေ(၂)၊ရွှေညောင်ပင်ကျေးရွာအပါအဝင် နောက်ထပ် မေလ ၂၁ ရက်နေ့ကနေ ထွက်ပြေးတိမ်းရှောင်နေတဲ့ ဝူယန်နဲ့ ခကွမ်၊ နမ့်ဝါ၊ လမြန်စတဲ့ ကျေးရွာတစ်လျှေက်ပြည်သူတွေဟာ မုတ်ကျိတ်(MUK Chyik)၊ နောင်ခယူး (Nawng Hkyu)၊ဒိန်ဂျာယန်(Ding Jayang) လဘန်ရွာစတဲ့ရွာတစ်လျှောက်မှာ ထွက်ပြေးခိုလုံနေကြတာဘဲဖြစ်ပါတယ်။ စစ်ရှောင်ပြည်သူတွေဟာ သယ်ယူလာတဲ့အစားအသောက်တွေလည်း ပြတ်လပ်လာတဲ့အပြင် စစ်ရေးတင်းမာနေဆဲချိန်ဖြစ်တာကြောင့် အလုပ်အကိုင်တွေရရှိဖို့လဲခဲယဉ်းတဲ့အတွက် စားဝတ်နေရေးစိုးရိမ်ပူပန်နေရတယ်လို့ ခကွမ်ကျေးရွာက စစ်ရှောင်အမျိုးသားတစ်ဦးက ခုလိုပြောပါတယ်။ “စားနပ်ရိက္ခာတွေကတော့ အရင်ကတည်းက အိမ်ကအနည်းယူလာတဲ့ဟာတွေကို စားနေကြတာပေါ့။ အဲတာတွေကုန်ရင်တော့ ဒုက္ခရောက်ပြီပေါ့ အိမ်ကိုလည်း သွားသွားလာလာလုပ်လို့မရ  စိုးရိမ်ရတော့ရှိနေတဲ့ ဆန်တွေတောင်မသွားယူရဲဘူးပေါ့”လို့ ဆိုပါတယ်။ ဒါ့အပြင် အခုစစ်ရှောင်နေတဲ့စစ်ရှောင်စခန်းတွေဟာ စားနပ်ရိက္ခာပြတ်လပ်လာရုံသာမက နေရာထိုင်ခင်းတွေလည်း ဝါး၊ မိုးကာတွေနဲ့သာဆောက်လုပ်ပြီးနေထိုင်နေတာဖြစ်တဲ့အတွက် မိုးသက်လေပြင်းကျရောက်ချိန်တိိုင်း နေရာ၊ထိုင်ခင်းအဆင်မပြေဖြစ်ရတယ်လို့ စစ်ရှောင်အမျိုးသမီးတစ်ဦးက ခုလိုပြောပါတယ်။ “အဆောင်တွေဆိုရင်လည်း မိုးကာတွေနဲ့ဘဲ တစ်ချို့ဆိုရင်နံရံတွေမှာ ဘာမှမကာထားဘူး မိုးရွာပြီဆိုရင် မိုးတွေယိုတယ်။ မိုးကာတွေကလည်း လှန်တော့ အဆင်မပြေဘူး”လို့ ဆိုပါတယ်။ စစ်ဘေးရှောင်တွေဟာ နေရာထိုင်ခင်းအဆင်မပြေမှုတွေနဲ့အတူ တစ်ဖက်မှာလည်း သောက်ရေသုံးရေ၊အိမ်သာအခက်အခဲနဲ့ ခြင်တွေပေါ်များမှုကြောင့် ကလေးငယ်တွေနဲ့ သက်ကြီးရွယ်အိုတစ်ချို့ ဝမ်းလျှောဝမ်းပျက်ဖြစ်ပြီး ဖျားနေသူတွေလည်း ရှိနေတယ်လို့ စစ်ရှောင်ပြည်သူတွေ ဆီကနေ သိရပါတယ်။ စစ်ရှောင်စခန်းတွေမှာ ယာယီဆေးပေးခန်းတွေရှိပေမယ့် လူဦးရေများတဲ့အတွက် ဆေးဝါးလုံလောက်မှုမရှိဘဲ ဆေးဝါးလိုအပ်ချက်‌တွေရှိနေတယ်လို့ သိရပါတယ်။ စစ်ရှောင်တွေရဲ့ ဆေးဝါးလိုအပ်ချက်‌နဲ့ပက်သက်ပြီး ကချင်တောင်ပေါ်ဒေသက ပြည်သူတွေရဲ့ကျန်းမာရေးအတွက် လှည့်လည်ဆေးကုသပေးနေတဲ့ ကချင်နယ်လှည့်ကျန်းမာရေးလုပ်သားအဖွဲ့(Kachin Backpack) အဖွဲ့ရဲ့တာဝန်ရှိသူကို မေးမြန်းကြည့်ရာမှာတော့ အခုလိုပြောပါတယ်။ “မနေ့လောက်ကတည်းကနေ ကျွန်တော်တို့လည်းဆေးဝါးတွေပြတ်သွားပြီ အကူအညီတောင်းလာတဲ့သူတွေကိုရော ရှိသလောက်ကူညီပေးလိုက်တော့  ဆေးကပြတ်သွားပြီ။ donorတွေ ကျွန်တော်တို့ကို ဆေးဝါးတွေ ပြန်ကူညီပေးတဲ့ချိန်မှဘဲ ကူညီပေးနိုင်တော့မယ်ထင်တယ်”လို့ ဆိုပါတယ်။ ဒါ့အပြင် အခုလက်ရှိစစ်ရှောင်ပြည်သူတွေမှာ ကလေးငယ်လေးတွေ ဝမ်းပျက်ဝမ်းလျှော ရောဂါတွေအဖြစ်များနေတာဖြစ်တယ်လို့ သူက ဆက်ပြောပါတယ်။ လက်ရှိ မုတ်ကျိတ်(MUK Chyik)၊ နောင်ခယူး (Nawng Hkyu)၊ဒိန်ဂျာယန်(Ding Jayang)၊ နဲ့ လဘန် ကျေးရွာ ဒေသတစ်လျှောက်မှာ ခိုလုံနေကြတဲ့ စစ်ရှောင်ပြည်သူတွေ ဟာ အိမ်ခြေ ၅၀၀ ကျော်ဝန်းကျင်ရှိတယ်လို့ စစ်ရှောင်စခန်းတာဝန်ခံတွေဆီကနေ သိရပါတယ်။ အလားတူဘဲ ဝူယန်ကျေးရွာပြည်သူတွေကလည်း  ပြီးခဲ့တဲ့ ဧပြီလ ၇ ရက်နေ့ကနေ KIA/KPDF တွေနဲ့ ဝူယန်ပြည်သူ့စစ်တွေကြား တိုက်ပွဲစတင်ဖြစ်လာချိန်ကတည်း  နီးစပ်ရာကျေးရွာတွေဆီ ထွက်ပြေးတိမ်းရှောင်လာကြတာဖြစ်ပါတယ်။…

Read More »

လဝါးရွာမှာ လေမုန်တိုင်းနဲ့ မိုးသီးကျလို့  ပျက်စီးသွားတဲ့ စစ်ရှောင်စခန်းအဆောင်များပြုပြင်ဖို့ အရေးပေါ်အကူအညီလိုအပ်နေ

ဖားကန့်မြို့နယ် တနိုင်းမြို့သွားတဲ့ လမ်းမပေါ် ရှိ လဝါကျေးရွာမှာ လေမုန်တိုင်း နဲ့ မိုးသီးကျလို့ ပျက်စီးသွားတဲ့စစ်ရှောင်စခန်းပြုပြင်ဆောက်လုပ်ဖို့ အရေးပေါ်အကူအညီလိုအပ်နေတယ်လို့ စစ်ရှောင်စခန်းတာဝန်ခံတွေကပြောပါတယ်။ လဝါးကျေးရွာမှာ ပြီးခဲ့တဲ့ မေလ ၅ရက်နေ့ ညနေ ၆ နာရီဝန်း လေမုန်တိုင်းတိုက်ခတ်ပြီး မိုးသီးအများအပြားကျလို့ ကတ်သလစ်ဘုရားကျောင်းဝန်းထဲက စစ်ရှောင်စခန်း အဆောင်၊ အိမ်သာနဲ့ ဘုရားကျောင်းအပြင် စပါးတွေသိုလောင်ထားတဲ့ စပါးကျီနဲ့ နေအိမ်တစ်ချိုလည်း ပျက်စီးခဲ့တယ်လို့ သိရပါတယ်။ ဒါကြောင့် စစ်ရှောင်နေတဲ့ အဆောင်နဲ့ စပါးကျီတွေကို ပြန်ပြုပြင်ဖို့ အလှူငွေတွေလိုအပ်နေတယ်လို့ စစ်ရှောင်တာဝန်ခံ စစ်စတာ ထရေဇာက ခုလိုပြောပါတယ်။ “လောလောဆယ်တော့ အိမ်သာက ပျက်စီးသွားတော့ အသစ်ပြန်လုပ်ရမှာ ခေါင်မိုးတွေလည်း ပျက်စီးသွားလို့ ပိုက်ဆံမရှိရင်လည်း မလုပ်ရင် မရတဲ့ အတွက် ဆိုင်ကနေ အကြွေးနဲ့ဘဲ အရင်ဝယ်ထားပြီး အမိုးမိုးဖို့လုပ်နေတာ”လို့ ဆိုပါတယ်။ လက်ရှိ ပျက်ဆီးသွားတဲ့ စစ်ရှောင်စခန်းမှာ အိမ်ထောင်စု ၂၃ ခု စုပေါင်းပြီး နေထိုင်ကြတာဖြစ်ပြီး တနိုင်းမြို့နယ် ကားမိုင်းနဲ့ ရှဒူဇွပ်ရွာဘက်က ဒေသခံတွေလာရောက်တိမ်းရှောင်နေတာဖြစ်တယ်လို့ သိရပါတယ်။ လတ်တလော စစ်ရှောင်စခန်းအဆောင်တွေဟာ မိုးသီးကြောင့် လုံးဝနေလို့မရတဲ့အထိ အမိုး၊အကာ လန်ထွက်ပျက်စီးသွားတာကြောင့် စစ်ရှောင်တွေကို ဘုရားကျောင်းဝန်းထဲက ဆောက်လုပ်လို့ မပြီးစီးသေးတဲ့ အဆောင်တစ်ခုမှာ ယာယီရွေ့ပြောင်းပြီးနေနေကြတယ်လို့ သိရပါတယ်။ မတ်လ ၅ ရက်နေ့ ကျခဲ့တဲ့ မိုးသီးဟာ တစ်လက်မခန့်ရှိပြီး လဝါးကျေးရွာမှာ ဆယ်နှစ်အတွင်း မတွေ့ခဲ့ရဘူးလို့ စစ်စတာ ထရေဇာက ခုလို ဆက်ပြောပါတယ်။ “တစ်သက်လုံးမတွေ့ဖူးဘူး အခုမှတွေ့ဖူးတာ မိုးသီးက တစ်လက်မလောက်ရှိတယ် ပျက်ဆီးသွားတဲ့ အိမ်တွေသွားကြည့်တော့ ပျဉ်ပြားတွေတောင် ပိန့်ကုန်တာ “လို့ ဆိုပါတယ်။ ဒါ့အပြင် ဧပြီလ ၃ ရက်နေ့မှာလည်း တနိုင်းမြို့ရဲ့ ချောင်းတစ်ဖက်ကမ်းမှာရှိကြတဲ့ လမုန်၊ ပန္နက်၊ မကောနဲ့ ဓါတ်ဆီရွာစတဲ့ ကျေးရွာ ၄ မှာ မုန်တိုင်းထန်ပြီးမိုးသီးကျလို့ အိမ်ခြေ ၁၀၀ ကျော် အိမ်ခေါင်မိုး ပေါက်ပြဲသွားတဲ့အပြင်  မိုးညှင်းမြို့နယ်မှာ အိမ်ခြေ ၁၀၀ ကျော်၊မံစီမြို့နယ်မှာ အိမ်ခြေ ၂၀ ကျော် လေမုန်တိုင်းနဲ့မိုးသီးကြွေကျမှုကြောင့် လူနေအိမ်များအပြား ထိခိုက်ပျက်စီးခဲ့ပါတယ်။ By – Hope

Read More »

ဆယ်ဇင်းရွာကစစ်ဘေးရှောင်တစ်ချို့ စားနပ်ရိက္ခာခက်ခဲနေ

ကချင်ပြည််နယ် ဖားကန့်မြို့နယ် ဆယ်ဇင်းကျေးရွာကနေ ဘကြီးကွင်းဘက် တိမ်းရှောင်နေတဲ့စစ်ဘေးရှောင်တွေ စားနပ်ရိက္ခာခက်ခဲနေပြီး ကူညီထောက်ပံ့မှုတွေလိုအပ်နေတယ်လို့ သိရပါတယ်။ ဆယ်ဇင်းကျေးရွာအဝင်မှာရှိတဲ့ စစ်ကောင်စီနဲ့ SNA ပူးပေါင်းတပ်ထိုင်တဲ့စခန်းကို ကချင်လွတ်လပ်ရေးတပ်မတော် KIA၊ ကချင်ပြည်သူ့ကာကွယ်ရေးတပ် KPDF ပူးပေါင်းတပ်တွေဝင်တိုက်နေတာကြောင့် ဒေသခံရာချီစစ်ဘေးရှောင်နေရပြီး အစားသောက်ရေးအခက်အခဲဖြစ်နေတယ်လို့ ဆယ်ဇင်းကျေးရွာနေအမျိုးသမီးတစ်ဦးက KNGကိုပြောပါတယ်။ “ဒီနေ့နဲ့ဆိုတော့ ၃ ရက်ရှိပြီပေါ့ တချို့ရှိတဲ့လူကတော့စုထားဆောင်းထားတာရှိတော့ လောလောဆယ်အထိတော့အဆင်ပြေကြတယ်မခက်ခဲသေးဘူး။ အခုအခက်အခဲဖြစ်နေတာကတစ်နေ့လုပ်မှတစ်န့စားရတဲ့မိသားစုဝင်တွေတော့ခက်ခဲတာပေါ့အဓိကကိုပြောရမယ်ဆိုရင်စားဖို့သောက်ဖို့မရှိကြဘူးပြီးတော့သူတို့ကတောတောင်တွေထဲ ဘကြီးကွင်းဘက်ကိုရှောင်နေကြတယ်”လို့ အသက် ၅၀ ကျော်အရွယ်ရှိတဲ့အထက်ပါအမျိုးသမီးကပြောပါတယ်။ KIA၊KPDF နှင့်စစ်ကောင်စီတပ်တို့ကြား နှစ်ဖက်တိုက်ပွဲတွေကြောင့် လက်ရှိဆယ်ဇင်းကျေးရွာထဲက ချမ်းသာကုန်းရပ်ကွက်၊ အမှတ် ၁ ရပ်ကွက်၊အမှတ် ၂ ရပ်ကွက်နှင့် အမှတ် ၃ စတဲ့ရပ်ကွက်နေပြည်သူတွေ ဧပြီ ၉ ရက်နေ့ကတည်းက စတင်တိမ်းရှောင်နေတာဖြစ်တယ်လို့သိရပါတယ်။ “တချို့မရှောင်ကြတဲ့ရပ်ကွက်တွေလည်းရှိတယ် အများပိုင်းရှောင်ကြတာက စခန်းနဲ့နီးတဲ့ချမ်းသာကုန်ဘက်တွေရှောင်ကြတာအခုလောလောဆယ် ဘုန်းကြီးကျောင်းထဲမှာ ၂၀၀ ကျော် ၃၀၀ လောက်ရှိတယ် အများပိုင်းက တောတောင်တွေထဲ မှာရှောင်နေကြတယ်”လို့ ဆယ်ဇင်းဒေသခံတစ်ဦးကပြောပါတယ်။ လက်ရှိတောတောင်တွေထဲမှာတိမ်းရှောင်နေတဲ့ တစ်နေ့လုပ်မှတစ်နေ့စားရတဲ့ မိသားစုဝင် ၃၀၀ ဦးထက်မနည်းရှိနေတာဖြစ်ပြီး အစားအသောက်အကူအညီတွေအရေးပေါ်လိုအပ်နေတာဖြစ်တယ်လို့ စစ်ဘေးရှောင်တွေကဆိုပါတယ်။ KIA၊ KPDF နဲ့မဟာမိတ်ပူးပေါင်းတပ်တွေဟာ ဆယ်ဇင်းကျေးရွာထဲက ရဲစခန်းနဲ့စစ်တပ်ကုန်းကို ဧပြီ ၉ ရက်နေ့မနက်အစောပိုင်းမှာဝင်တိုက်ခဲ့တာဖြစ်ပြီး ရဲစခန်းကတော့ စဝင်တိုက်တဲ့နေ့မှာပဲလက်ချအညံ့ခံသွားပေမယ့် စစ်တပ်စခန်းကုန်းလက်နက်မချသေးတာကြောင့် ဒီနေ့နေ့လည်ပိုင်းထိနှစ်ဖက်တိုက်ပွဲ ဖြစ်ပွားနေဆဲ ဖြစ်ပါတယ်။ By – Zaw Zaw

Read More »

ကျောက်စခန်းရွာစစ်ဘေးရှောင်များအတွက် စားသောက်ကူညီထောက်ပံ့မှုလိုအပ်နေ

မိုးမောက်မြို့နယ် ကျောက်စခန်းကျေးရွာအနီး ကချင်လွတ်လပ်ရေးတပ်မတော် KIA နဲ့ စစ်ကောင်စီတပ်တို့ကြားတိုက်ပွဲကြောင့် ထွက်ပြေးတိမ်းရှောင်လာကြတဲ့ စစ်ရှောင်ပြည်သူတွေအတွက် အစားသောက်ကူညီထောက်ပံ့မှုလိုအပ်နေတယ်လို့ ဒေသခံတွေက ပြောပါတယ်။ ပြီးခဲ့တဲ့ ဧပြီလ ၄ ရက်နေ့ ကျောက်စခန်းရွာနားမှာ နှစ်ဖက်တိုက်ပွဲပြင်းထန်ခဲ့တဲ့အပြင်  စစ်တပ်ဘက်ကမိုးမောက်ဘက်ကနေလက်နက်ကြီးအပြင် လေကြောင်းတွေနဲ့ပစ်ခတ်ခဲ့တဲ့အတွက် ဧပြီလ ၅ ရက်နေ့ ဒေသခံပြည်သူတွေမိုးမောက်မြို့ဘက်ကို ထွက်ပြေးတိမ်းရှောင်လာခဲ့ကြတာ ဖြစ်ပါတယ်။  ကျောက်စခန်း ဒေသခံပြည်သူတွေအနေနဲ့ ကိုယ်လွတ်ရုန်းထွက်ပြေးတိမ်းရှောင်လာခဲ့ ကြတာဖြစ်တဲ့အတွက် စားနရိက္ခာ၊ ဆေးဝါးနဲ့ အဝတ်အထည် အကူအညီတွေ လိုအပ်နေတယ်လို့ စစ်ရှောင်အမျိုးသမီးတစ်ယောက်က KNG ကိုပြောပါတယ်။ “ကျွန်မတို့က ထွက်ပြေးလာတဲ့ချိန် ပစ္စည်းတွေဘာတွေယူဖို့ ဘာမှအချိန်မရခဲ့ဘူး၊ ကိုယ်လွတ်ထွက်ပြေးလာခဲ့ရတာ၊ အဝတ်အစားတွေလည်းမပါ၊ စားစရာတွေလည်းမယူလာခဲ့ရဘူး၊ အိပ်တဲ့အချိန် စောင်တွေလည်းမလောက်၊ အခင်းတွေလည်းမလောက်ဘူး၊ ခြင်တွေက ပြန်ကိုက်နဲ့ အခက်အခဲတွေအများကြီးကြုံနေရတယ်”လို့ပြောပါတယ်။ ဒါ့အပြင် သက်ကြီးရွယ်အို၊ နားမကျန်းဖြစ်တဲ့သူတွေ၊ ကလေးသူငယ်တွေနဲ့ ကိုယ်ဝန်ဆောင် မိခင်တွေအတွက် ဆေးဝါးအကူအညီတွေလိုအပ်နေတဲ့အပြင် သောက်သုံးရေမလောက်တာကြောင့် ချောင်းရေသုံးတဲ့အခါတွေဆိုရင်လည်း ရေမသန့်တဲ့အတွက် အရေပြားယားယံတာတွေလည်း ဖြစ်နေတယ်လို့ ဆိုပါတယ်။ ပြီးခဲ့တဲ့ ဧပြီလ ၆ရက်၊ ၇ရက်၊ ၈ ရက်မှာတော့ ကချင်နှစ်ခြင်းခရစ်ယာန်အဖွဲ့ချုပ်  လူမှုဝန်ထမ်းနှင့် ဖွံဖြိုးရေးဌာန(KBC HDD ) တွေအနေနဲ့ တစ်ယောက် ၁၀၀၀၀ ကျပ်၊ မေတ္တာဖောင်ဒေးရှင်းက တစ်အိမ်ထောင် ၃၀၀၀၀ကျပ်နဲ့ မိုးမောက် စိန်လုံရေသန့်ကုမ္ပဏီကတစ်အိမ်ထောင် ကြက်ဥ ၁၀လုံး၊ ဆား၊ ဆီ တွေလာရောက်ကူညီပေးခဲ့တယ်လို့လည်း သိရပါတယ်။ ကျောက်စခန်းဒေသခံတွေထဲက အိမ်ထောင်စု ၅၀ ကျော်ဟာ နီးစပ်ရာတောတွေမှာထွက်ပြေးတိမ်းရှောင်နေရတဲ့အတွက် ကူညီထောက်ပံ့မှုတွေမရတဲ့အပြင် အဆက်အသွယ်ပြုလို့ဖို့ ဖုန်းလိုင်းတွေလည်းအဆင်မပြေဖြစ်နေတယ်လို့ စစ်ရှောင်အမျိုးသားတစ်ယောက်က KNG ကိုအခုလို ပြောပါတယ်။ “ကျွန်တော်တို့ အပိုင်းကျတော့ အိမ်ထောင်စု ၂၀ ကျော်လောက်ဘဲ မြို့ပေါ် မှာထွက်ပြေးပေမဲ့ အများပိုင်းက တောဘက်ကို ထွက်ပြေးသွားကြတာပေါ့၊ သူတို့ကတော့ ပိုခက်ခဲနေမှာ အခုဆို ဖုန်းလိုင်းက ဖြတ်ထားတာနဲ့ ဆို အဆက်အသွယ်လုပ်ဖို့ကလည်း ခက်ခဲနေတယ်”လို့ဆိုပါတယ်။ လက်ရှိမှာတော့ ဒေသခံအများစု မိုးမောက်မြို့ ပေါ် မန္တလေးကျောင်းတိုက်၊ နိသောဂကျောင်းတိုက်၊ ကြေးနန်းရပ်ကွက်၊ အောက်ချိုင့် ရပ်ကွက်နဲ့ ဆွေမျိုးအိမ်တွေမှာ တိမ်းရှောင်နေကြတာဖြစ်ပြီး တစ်ချို့ကတော့ တောဘက်ကိုထွက်ပြေးတိမ်းရှောင်နေရတာဖြစ်ပါတယ်။ ပြီးခဲ့တဲ့ မတ်လ ၇ ရက်နေ့ ၆ နာရီလောက်မှာ ကျောက်စခန်းရွာ ဆုတောင်းကုန်းပေါ်မှာတပ်ချထားတဲ့ တပ်စခန်းကို KIA တပ်တွေထိုးစစ်ဆင်ပြီးတိုက်ခိုက်သိမ်းပိုက်နိုင်ခဲ့ပေမယ့် ရွာနီးမှာတိုက်ပွဲပြင်းထန်နေတာဖြစ်ပါတယ်။  ဧပြီလ ၄ ရက်နေ့မှာတော့ ကျောက်စခန်းရွာမှာစစ်ကောင်စီတပ်နဲ့ KIA ပူးပေါင်းတပ်တို့ နှစ်ဖက်တိုက်ပွဲအတွင်း လက်နက်ကြီးကျရောက်ပေါက်ကွဲတာအပြင် လေကြောင်းနဲ့ ဗုံးကြဲတိုက်ခိုက်ခဲ့တဲ့အတွက် ရွာထဲကနေအိမ် တော်တော်များများလည်းပျက်စီးသွားခဲ့ပြီး ဒေသခံ ၃ ယောက်လည်း ထိခိုက်ဒဏ်ရာရရှိခဲ့ပါတယ်။  မိုးမောက်မြို့နဲ့ ၃မိုင်အကွာမှာရှိတဲ့ ကျောက်စခန်းကျေးရွာမှာ အိမ်ခြေ ၁၆၀၊ လူဦးရေ ၇၀၀ ဝန်းကျင်ရှိပြီး ရှမ်းနဲ့ ကချင်လူမျိုးများအများဆုံးနေထိုင်ကြတာဖြစ်ပြီး စားဝတ်နေရေးအတွက်လယ်ယာစိုက်ခင်းကို အဓိကလုပ်ကိုင်ကြတာလည်းဖြစ်ပါတယ်။ By – Bu Bu

Read More »

ဆွမ်ပရာဘွမ်ဒေသ စစ်ဘေးရှောင်တွေတွက် အစားသောက်နဲ့ နေရာထိုင်ခင်းပြင်ဆင်ပေးဖို့ကူညီလိုအပ်နေ

ပူတာအိုခရိုင် ဆွမ်ပရာဘွမ်မြို့သိမ်းတိုက်ပွဲကြောင့် ဘေးလွတ်ရာထွက်ပြေးတိမ်းရှောင်နေရတဲ့ ဒေသခံပြည်သူတစ်ထောင်ကျော်တွက် နေရာထိုင်ခင်းနဲ့အစားသောက်ကူညီထောက်ပံ့ဖို့လိုအပ်နေတယ်လို့ ဆွမ်ပရာဘွမ်ဒေသခံအသင်းတော်တာဝန်ရှိသူတွေက ပြောပါတယ်။ မတ်လ ၉ ရက်နေ့ကစတင်ခဲ့တဲ့ ဆွမ်ပရာဘွမ်မြို့စခန်းသိမ်းတိုက်ပွဲအတွင်း ဒေသခံပြည်သူစုစုပေါင်း ၁၃၀၀ ဝန်းကျင်ဟာ နီးစပ်ရာ တောတောင်တွေနဲ့ ကျေးရွာတွေဆီ ထွက်ပြေးတိမ်းရှောင်နေရတာ ခုဆိုရင် ၁၀ ရက်ကျော်ရှိလာပြီဖြစ်ပြီး ဆေးဝါးနဲ့အစားအသောက်လိုအပ်လာနေတယ်လို့ ဒေသခံတွေဆီကနေ သိရပါတယ်။ “တချို့က တောတောင်တွေထဲ တိမ်းရှောင်နေတယ်။ တချို့က ကျေးရွာတွေထဲ တိမ်းရှောင်နေတယ်။ အခုအရေးပေါ်က ရက်ကြာလာတာတော့ ဆေးဝါးနဲ့ အစားအသောက်တွေ လိုအပ်နေတယ်။ အခုက ရွာတွေထဲရှိတဲ့ စျေးဆိုင်တွေကနေပဲ ဖြစ်သလို ဝေစားမျှစားဖြေရှင်းနေတယ်။ ကားလမ်းလည်းပိတ်ထားတော့ အချိန်ကြာလာတာနဲ့ တော်တော်ဒုက္ခရောက်မဲ့ အနေအထားဖြစ်နေတယ်”လို့ ဆွမ်ပရာဘွမ်ဒေသ အသင်းတော်တာဝန်ရှိသူ တစ်ဦး ကပြောပါတယ်။ တိုက်ပွဲအခြေအနေကြောင့် မြစ်ကြီးနား – ပူတာအိုကားလမ်းမကြီး ပိတ်ထားတဲ့အတွက် မြို့ဘက်ကနေကူညီမှုတွေ ပို့ပေးနိုင်ဖို့လည်းခက်ခဲနေတယ်လို့ ဆိုပါတယ်။ လက်ရှိ ဆွမ်ပရာဘွမ်မြို့ဒေသခံပြည်သူတွေထဲက တော၊တောင်တွေထဲ  တိမ်းရှောင်နေသူ  ၂၀၀ ကျော်ရှိပြီး မြစ်ကြီးနားအဆင်းဘက် ကားလမ်းမတစ်ကြောကျေးရွာတွေမှာ အများအပြားတိမ်းရှောင်နေတယ်လို့ သိရပါတယ်။ ဆွမ်ပရာဘွမ် – မြစ်ကြီးနား ကားလမ်းမတစ်ကြောရှိ ဆူယာန်(Su Yang) ၊ မိုင်ထောင်း( Mai Htawng) ၊ ခဂရန်းယန်(Hka garan Yang)၊ အင်တားဂလိုကျေးရွာ( Nta galu mare) စတဲ့ ကျေးရွာ ၄ ခုမှာ အများပိုင်းတိမ်းရှောင်နေတယ်လို့  သိရပါတယ်။ စစ်ရှောင်နေတဲ့ လူဦးများတဲ့အတွက် ကျေးရွာတွေထဲပျံ့ကြဲပြီး တိမ်းရှောင်နေသူတွေအတွက်လည်း ရက်ကြာလာရင်အဆင်မပြေသလို တောထဲတွေမှာ ထွက်ပြေးတိမ်းရှောင်နေသူတွေအတွက်လည်း နေရာသတ်မှတ်ပြီး နေရာထိုင်ခင်း ပြင်ဆင်ပေးဖို့လိုအပ်နေတယ်လို့ သိရပါတယ်။ “မြို့မှာက အခုဘယ်သူမှမရှိတော့ဘူး။ ဆွမ်ပရာဘွမ်မြို့ထဲ ရှိရှိသမျှပြည်သူအားလုံး တိမ်းရှောင်နေတယ်။ တောထဲတိမ်းရှောင်နေသူတွေက ကိုယ်သိသလို မိုးကာတဲတွေ၊ ဝါးတဲတွေ ထိုးပြီး နေနေတယ်။ ကျေးရွာတွေထဲ တိမ်းရှောင်နေသူတွေက အသိအိမ်တွေ ၊ မိတ်ဆွေတွေရဲ့ အိမ်တွေထဲ နှစ်အိမ်ထောင်၊ ၃ အိမ်ထောင်အဲ့လို ကြပ်ပြွတ်ပြီး နေနေတယ်။ ဒါကြောင့် အခုရက်ကြာလာရင်တော့ သူတို့အတွက် နေရာသတ်မှတ်ပြီး နေရာထိုင်ခင်းပြုလုပ်ပေးဖို့ လိုအပ်နေတယ်”လို့  ဆွမ်ပရာဘွမ်ဒေသ အသင်းတော်တာဝန်ရှိသူ ပြောပါတယ်။ ပြီးခဲ့တဲ့ မတ်လ ၉ ရက်နေ့ကစပြီး ဆွမ်ပရာဘွမ်မြို့နယ် မလိယာန်စစ်ကောင်စီတပ်စခန်းကို KIA နဲ့ PDF ပူးပေါင်းတပ်ဖွဲ့တွေ တိုက်ခိုက်သိမ်းပိုက်လိုက်ပြီးနောက် ဆွမ်ပရာဘွမ်မြို့မှာ တပ်စွဲတဲ့ စစ်ကောင်စီတပ်ရင်း ခလရ ၄၆ တပ်စခန်းကို သိမ်းပိုက်နိုင်ဖို့ ဆက်လက်တိုက်ခိုက်နေတာ ဖြစ်ပါတယ်။ တိုက်ပွဲပြင်းထန်နေတာ ၁၀ ရက်ကျော်လာပြီဖြစ်ပြီး စစ်ကောင်စီဘက်ကလည်း စခန်းလက်မလွတ်ရေးအတွက် လေယာဉ်နဲ့ နေ့တိုင်းနီးပါး အပြင်းအထန်ဗုံးကြဲတိုက်ခိုက် ကာကွယ်နေတာဖြစ်ပါတယ်။ ဒါ့အပြင် လက်ရှိမှာတော့ စစ်ကောင်စီဘက်က စစ်ကူတွေ လေကြောင်းနဲ့အပါအဝင် မြေပြင်နဲ့ပါစစ်အင်အားထပ်ဖြည့်နေပြီး စစ်ရေးတင်းမာလျက်ရှိနေတာကြောင့် တိုက်ပွဲအတွင်း KIA ဘက်ကလည်း ထိခိုက်ကျဆုံးသူတွေရှိနေသလို စစ်ကောင်စီဘက်ကလည်း အများအပြားသေဆုံးမှုရှိတယ်လို့ သိရပါတယ်။ တိုက်ပွဲကြောင့် မြစ်ကြီးနား – ပူတာအိုကားလမ်းမကြီးပိတ်ထားတာလည်း တစ်ပတ်ကျော်လာပြီဖြစ်ပြီး ဆွမ်ပရာဘွမ်မြို့ထဲက ဒေသခံပြည်သူ တစ်ဦးမကျန် ဘေးလွတ်ရာတွေတိမ်းရှောင်နေကြပြီဖြစ်ပါတယ်။ By – ဂျာဘောက်ရာ

Read More »

မီးဘေးသင့် ဟွေထိုက်ကျေးရွာပြည်သူတွေအတွက် အစားသောက်၊နေရာထိုင်ခင်း အရေးပေါ်အကူအညီလိုအပ်နေ

စစ်ကိုင်းဒေသကြီး နာဂကိုယ်ပိုင်အုပ်ချုပ်ခွင့်ဒေသ လဟယ်မြို့နယ်ထဲက ရွာလုံးကျွတ်နီးပါး မီးလောင်သွားတဲ့ ဟွေထိုက်ကျေးရွာနေ ပြည်သူတွေအတွက် ကူညီထောက်ပံ့မှုတွေအရေးပေါ်လိုအပ်နေတယ်လို့ ဒေသခံတွေဆီကနေ သိရပါတယ်။ မတ်လ ၁၄ ရက်နေ့ နေ့လည်ပိုင်း တောမီးကူးစက်မီးလောင်ကျွမ်းရာကနေ ဟွေထိုက်ကျေးရွာက ရွာလုံးကျွတ်နီးပါး မီးဘေးသင့်နေပြီး ပျက်စီးဆုံးရှုံးမှုတွေများတာကြောင့် အကူအညီတွေလိုအပ်နေတယ်လို့  လဟယ်မြို့နေအမျိုးသားတစ်ဦးက ပြောပါတယ်။ “နေ့လည်၁၂ နာရီကြီးမှာလောင်သွားတာ အဲ့နေ့ကကြာသာပတေးနေ့လည်း အဲ့ဆိုတော့ အားလုံးကတောင်ယာသွားနေကြတာ အိမ်မှာက ကလေးတွေနဲ့သက်ကြီးရွယ်အိုတွေလောက်ပဲကျန်တာ ဘာမှမလုပ်နိုင်ဘူးလေသူတို့ အဲ့ကြောင့် တစ်ရွာလုံးနီးပါးကိုလောင်သွားတာ ဘာမှမရလိုက်ကြဘူး”လို့သူကပြောပါတယ်။ ရွာလုံးကျွတ်နီးပါး မီးလောင်သွားတဲ့ ဟွေထိုက်ကျေးရွာ (CRD- Ngai Thang ဖေ့စ်ဘုတ်) အိမ်ခြေ ၅၀ ဝန်းကျင်လောက်သာရှိတဲ့ အဲ့ဒီကျေးရွာမှာ အိမ်ခြေ ၃၅ လုံးအထိမီးလောင်သွားတာဖြစ်ပြီး အိမ်သုံးပစ္စည်း၊ တကိုယ်ရေအသူံးအဆောင်တွေမီးလောင်သွားတဲ့အပြင် အချို့တစ်နှစ်စာသိုလောင်ထားတဲ့စပါးတွေပါ မကျန် မီးလောင်သွားတဲ့အတွက် အစားအသောက်၊ အဝတ်အထည်ကအစအကူအညီလိုအပ်နေတာလို့ဒေသခံတွေကဆိုပါတယ်။ “ရွာရဲ့သင်းအုပ်ဆရာအိမ်ကအစပါသွားတယ် တချို့က စပါးကိုရွာထဲမှာပဲ စပါးသိုက်ဆောက်ပြီးထားတာလေး အဲ့တာတွေကအစ ပါသွားတယ်ဗျ စောင်တွေ အဝတ်အထည်တွေ အိုးခွက်ပန်းကန်ကစ မရလိုက်ကြဘူး အဓိကတော့အခု အဝတ်အထည်တို့ အစားအသောက်တို့လိုအပ်နေတယ်လို့”လို့ အထက်မှာဖော်ပြခဲ့တဲ့ အမျိုးသားကဆက်ပြောပါတယ်။ မီးလောင်မှုကြောင့် အိမ်မွေးရိတိစ္ဆာန်သေဆုံးမှုအနည်းငယ်ရှိခဲ့ပြီး အရပ်သား ၂ဦးလည်း မီးလောင်ဒဏ်ရာရရှိသွားတယ်လို့သိရပါတယ်။ အဲ့ဒီဟွေထိုက်ကျေးရွာမီးဘေးသင့်ပြည်သူတွေကို ကူညီလှူဒါန်းလိုတယ်ဆိုရင်တော့ ဖုန်းနံပတ် 09764817340 ကိုဆက်သွယ်ပြီးလျှူဒါန်းနိုင်ကြောင်း Ngai Thang ဖေ့စ်ဘုတ် အကောင့်မှာ ဖော်ပြထားပါတယ်။ လဟယ်မြို့နယ်မှာ ၂၀၂၃ ခုနှစ် ဖေဖော်ဝါ ရီလကလည်း ဆော်လော်နောက်ကုန်းကျေးရွာမှာအိမ်သုံး ဆိုလာပြားအပူလွန်ကဲပြီး အိမ်ခြေ ၇၀ ကျော်မီးလောင်ခဲ့တဲ့ ဖြစ်စဉ်တွေလည်းရှိခဲ့ပါတယ်။ By – Zaw Zaw

Read More »