ကချင်ပြည်နယ် ပူတာအိုဒေသထဲမှာ ခွေးရူးကိုက်ခံရတာကြောင့် သေဆုံးသူ ၅ ဦးထက်မနည်းရှိလာပြီဖြစ်တယ်လို့ ဒေသခံတွေဆီကနေ သိရပါတယ်။
ပူတာအိုမြို့ပေါ်နဲ့ မြို့နဲ့အနီးပတ်ဝန်းကျင်ကျေးရွာတွေမှာ ဒီနှစ် မတ်လကစပြီး ခွေးရူးကိုက်ခံရသူ ၅၀ ဦးထက်မနည်းရှိခဲ့ပြီး အဲ့ဒီထဲက သေဆုံးသူ ၅ ဦီးနဲ့အထက်ရှိပြီလို့ ပူတာအိုမြို့ ကောင်ကထောင်ရပ်ကွက်နေအမျိုးသမီးတစ်ဦးက KNG ကိုပြောပါတယ်။
ခုလို ခွေးရူးကိုက်ခံရပြီးသေဆုံးနှုန်းမြင့်မားနေတာဟာ ခွေးရူးပြန်ကာကွယ်ဆေးမထိုးနိုင်တာကြောင့်ဖြစ်သလို ခွေးရူးကိုက်ပြီးနောက်မှာလည်း အဆိပ်ဖြေဆေးကို အချိန်မှီဆေးမထိုးနိုင်တာကြောင့်ဖြစ်တယ်လို့ ဒေသခံတွေကဆိုပါတယ်။
“အဓိကတော့ ခွေးရူးပြန်ကာကွယ်ဆေးတွေက ဆေးရုံကြီး(ပြည်သူ့ဆေးရုံ) မှာမထိုးပေးလို့ဟုတ်တယ်။ ဆေးရုံကြီးမှာဆေးမရှိလို့တဲ့အပြင်မှာထိုးရတာဆေးသိပ်စျေးကြီးတယ် နာမ်ရှယ်ရှီးဒီရွာက သေသွားတဲ့ကလေး နှစ်ယောက်လည်းဆေးမထိုးထားဘူးပြောတယ်။ ပြီးတော့ ကောင်ကထောင်ရပ်ကွက်ထဲကအဖွားကြီးလည်းကာကွယ်ဆေးမထိုးထားဘူး မှေးခိုင်ဆေးပဲထိုးထားတာတဲ့“လို့ ပူတာအိုမြို့ခံအခြားဒေသခံတစ်ဦးက ပြောပါတယ်။
ပူတာအိုဒေသ ပြည်သူတွေဟာ ခွေးရူးပြန်ရောဂါကာကွယ်ဆေးထိုးဖို့လိုအပ်ပေမယ့် ပြည်သူ့ဆေးရုံကြီးမှာ ကာကွယ်ဆေးမထိုးပေးနိုင်တာကြောင့် အပြင်ဆေးခန်းတွေမှာ ဆေးတစ်ချောင်းကို ငွေကျပ်လေးသောင်း ဝန်းကျင်ပေးပြီးထိုးနေရတယ်လို့လည်း သိရပါတယ်။
ဒါ့အပြင် ခွေးတစ်ခါကိုက်ခံရရင်ကာကွယ်ဆေးနဲ့အတူ အဆိပ်ဖြေဆေးထိုးဖို့လိုအပ်ပြီး သုံးကြိမ်ပြည့်အောင်ထိုးနှံရမှာဖြစ်ပေမယ့် အခက်ခဲအမျိုးမျိုးကြောင့် ဆေးမထိုးတဲ့သူတွေပိုများနေတယ်လို့လည်း သိရပါတယ်။
“တချို့က အိမ်မှာပဲ ခွေးရူးပြန်ပြီးဆုံးသွားတယ်တစ်ယောက်က ဆေးရုံမှာဆုံးသွားတယ်။ သူ့ကိုထိတဲ့ဆရာမတွေအားလုံးက်ိုတောင်ကာကွယ်ဆေးထိုးလိုက်ရတယ်။ ဒါပေမယ့် အများပိုင်က အစစအရာရာခက်တော့ မထိုးနိုင်ကြဘူး“လို့ ကောင်ကထောင်ရပ်ကွက်နေအမျိုးသမီးတစ်ဦးကပြောပါတယ်။
အထက်မှာဖော်ပြခဲ့တဲ့ သေဆုံးသူ ၅ ဦီးဟာ KNG သတင်းဌာနကအတည်ပြုရရှိထားတဲ့ စာရင်းသာဖြစ်ပြီး မြေပြင်မှာဒီထက်လည်းပိုများနိုင်တယ်လို့ ဒေသခံတွေက ပြောပါတယ်။
ခုလိုခွေးရူးကိုက်ခံရတာဟာ ပူတာအိုမြို့နဲ့ကျေးရွာတစ်ချို့မှာ ခွေးလေခွေးလွှင့်တွေများလာတာကြောင် ဖြစ်တယ်လို့လည်း သိရပါတယ်။
ပူတာအိုမြို့နယ်ထဲမှာ အခုလိုခွေးရူးကိုက်ခံရလို့သေဆုံးသူ နှစ်စဉ်နှစ်တိုင်းရှိပေမယ့် ဒီနှစ်သေဆုံးနှုန်းအမြင့်ဆုံးဖြစ်တယ်လို့ ဒေသခံတွေကဆိုပါတယ်။
By – Zaw Zaw
