နှစ်လအကြာ မြို့သိမ်းတိုက်ပွဲဖော်ဆောင်နေတဲ့ ဗန်းမော်တိုက်ပွဲမှာ ဗန်းမော်မြို့လက်မလွတ်ရေးအတွက် စစ်ကောင်စီတပ်ဘက်ကနေ အပြင်အထန်ခုခံတိုက်ခိုက်နေတဲ့ ဒရုန်း ၇ စီး ကို ကချင်လွတ်လပ်ရေးတပ်မတော် KIA ပစ်ချပေးလိုက်တယ်လို့ KIA ရှေ့တန်းသတင်းအရင်းအမြစ်တွေဆီကနေ သိရပါတယ်။
ဗန်းမော် စကခ (၂၁) တပ်ရင်းမှာ မတ်လ ၈ ရက်နေ့စပြီး စစ်ကောင်စီတပ်နဲ့ KIA နှစ်ဖက်တပ် တိုက်ပွဲပြင်းပြင်းထန်ထန် ဆက်လက်ဖြစ်ပွားနေပြီး ၁၀ ရက်နေ့ဖြစ်တဲ့ တိုက်ပွဲမှာ စစ်ကောင်စီတပ်ရဲ့ ဒရုန်းလက်နက်ကြီးတွေကို ပစ်ချပေးနိုင်ခဲ့တယ်လို့ KIA ရှေ့တန်းသတင်းအရင်းအမြစ်တွေဆီကနေ သိရပါတယ်။
“ဟုတ်ပါတယ်။ ၆ လုံးနဲ့ ၇ လုံးကြားမှာ ပစ်ချနိုင်ခဲ့တယ်။ ကျနော်တို့ တွေ့တာကတော့ ၆ လုံးရှိတယ်”လို့ KIA ရှေ့တန်းသတင်းအရင်းအမြစ်တစ်ဦးက KNG ကိုပြောပါတယ်။
မတ်လ ၁၀ ရက်နေ့မှာ ခုခံတိုက်ခိုက်နေတဲ့ စစ်ကောင်စီတပ်ရဲ့ဒရုန်းလက်နက်ကြီး ၇ စီးကို KIA ဘက်က ပစ်ချနိုင်ခဲ့တဲ့အတွက် စကခ (၂၁) တပ်ရင်းပတ်ပတ်လည်မှာ ဒီကနေ့ ၁၁ ရက်နေ့ အထိ နှစ်ဖက်တပ် တိုက်ပွဲပြင်းထန်နေဆဲဖြစ်တယ်လို့ သိရပါတယ်။
KIA ပူးပေါင်းတပ်တွေဟာ သံချပ်ကာတပ်၊ အမြောက်တပ် ၃၆၆ ၊ လေယာဉ်ကွင်းနေရာတွေကို ဇန်နဝါရီလကုန်ပိုင်းမှာ အပြီးသတ် သိမ်းပိုက်ထားပြီးတော့ လက်ရှိမှာ စကခ (၂၁) နေရာကို ထိုးစစ်ဆင်တိုက်ခိုက်နေတာဖြစ်ပါတယ်။
ဒါ့အပြင် KIA ဘက်ကနေ ဗန်းမော်တက္ကသိုလ်ဝင်းနေရာနဲ့ ခလရ ၄၇ တပ်ရင်းနေရာရှိတဲ့ လမ်းကြောင်းတွေလည်း ပိတ်ဆို့တိုက်ခိုက်နေတယ်လို့ ဆက်သိရပါတယ်။
လက်ရှိ ဗန်းမော်တိုက်ပွဲ ပြင်းထန်နေတဲ့အခြေအနေနဲ့ ပတ်သက်ပြီး KIO သတင်းနှင့်ပြန်ကြားရေးတာဝန်ခံ ဗိုလ်မှူးကြီးနော်ဘူက အခုလိုပြောပါတယ်။
“ဒရုန်း ၇ လုံးပစ်ချနိုင်တာနဲ့ သတင်းကအသေးစိတ်မသိရသေးပါဘူး။ စကခ ၂၁ နေရာမှာ ပြင်းပြင်းထန်ထန်ပြန်ဖြစ်နေတာက ၃ ရက်လောက်ရှိလာပြီ။ ခါတိုင်းထက်ပိုပြင်းထန် တယ်လို့တော့ပြောလို့ရပါတယ်”လို့ပြောပါတယ်။
စစ်ကောင်စီဘက်ကနေ တိုက်ပွဲဖြစ်နေတဲ့ ဗန်းမော်မှာ လေကြောင်းနဲ့ မရေတွက်နိုင်လောက်အောင် ဗုံးကြဲတိုက်ခိုက်နေတယ်လို့လည်း ဗိုလ်မှူးကြီးနော်ဘူပြောပါတယ်။
မတ်လ ၁၀ ရက်နေ့ စစ်ကောင်စီတပ်ရဲ့ ဒရုန်းပစ်ချနိုင်တာနဲ့ ပတ်သက်ပြီး စစ်တပ်ထောက်ခံတဲ့ Telegram Channal တွေမှာကတော့ ‘ရန်သူဘက်က မိမိတို့ရဲ့ ဒရုန်း ၉ ခုကို ပစ်ချပေးလိုက်တယ်။ ဒရုန်းတွေ အလုပ်မဖြစ်တော့ဘူး’လို့ ရေးသားဖော်ပြထားတာကိုလည်း မြင်တွေ့ရပါတယ်။
By – နော်ထွယ့်(ဟူးကောင့်)
