ညမထွက်ရအမိန့်အကြောင်းပြပြီး အဖမ်းဆီးကြမ်းနေ

မြစ်ကြီးနားမှာ စစ်တပ်နဲ့ရဲ့တွေဟာ ညမထွက်ရအမိန့်ကိုပြန်လည်အသက်သွင်းနေပြီး အဖမ်းဆီးအစစ်ဆေးကြမ်းနေတယ်လို့ မြို့ခံတွေပြောပါတယ်။

ဧပြီလ ၂၅ ရက် ဒီမနက် ၃ နာရီဝန်းကျင် ရမ်ပူ၊ရွှေညောင်ပင် ၊ လယ်ကုန်းရပ်ကွက်ထဲက မိုးမလင်းဈေးရောင်းဖို့ ထွက်လာကြတဲ့ ဈေးသည်တစ်ချို့ကို ရဲနဲ့စစ်ကောင်စီတပ်ဖွဲ့က ဖမ်းဆီးကာခံဝန်ကတိထိုးပြီး ပြန်

လွတ်ပေးခဲ့သလို ဧပြီလ ၂၆ ရက် မနေ့ညမှာလည်း တပ်ကုန်းရွှေလမ်းမမှာ အမျိုးသား ၃ ဦးဖမ်းဆီးခဲ့တယ်လို့ ဖြစ်စဉ်ကိုသိတဲ့ မြို့ခံတစ်ဦး KNG ကိုပြောပါတယ်။

“လူငယ် ၃ ယောက် ဆိုင်ကယ်နဲ့လာတာ တားပြီးအရင်မေးနေတာဟုတ်တယ်။ နောက်တော့ လက်ထိပ်ခတ်ပြီးကားပေါ်တင်သွားတယ်။  ဆိုင်ကယ်တော့ အဲရဲတွေစီးသွားတာပဲမြင်လိုက်တယ်။ဘယ်သူတွေလဲဆိုတာ မသိရဘူးလေ ကျနော်တို့လည်းအနားမကပ်ရဲတာ”လို့ ဖြစ်စဉ်ကိုတွေ့ရှိတဲ့အမျိုးသားတစ်ဦးပြောပါတယ်။

ဖမ်းဆီးခံရသူတွေဟာ ဘယ်သူဘယ်ဝါဆိုတာကို အသေးစိတ်မသိရသလို စစ်တပ်က ညမထွက်ရအမိန့်ကြောင့်ဖမ်းဆီးခြင်းဖြစ်တယ်လို့သာ ပြောဆိုပြီးဖမ်းဆိီးသွားတာဖြစ်တယ်လို့ သိရပါတယ်။

စစ်ကောင်စီတပ်ဟာ အာဏာသိမ်းပြီး ၄ နှစ်အကြာ မတရားရွှေးကောက်ပွဲကျင်းပပြီးနောက် မတရားအစိုးရဖွဲ့စည်းထားပြီး အစိုရအသစ်လက်ထက် မြိုလုံခြုံရေး ရက် ၁၀၀ လို့ဆိုကာ  မြို့တွင်းစစ်ဆေးကြမ်းနေတာဖြစ်ပါတယ်။

ဒါ့အပြင် ဒီရက်ပိုင်း မြို့တွင်းရပ်ကွက်တစ်ချို့မှာ ကင်းပုန်းဝပ်တာ၊ ကင်းလှည့်တာတွေ အရင်ကထက်ပိုဆိုးဆိုးရွားရွားလုပ်လာနေတယ်လို့ မြို့ခံတွေပြောပါတယ်။

အာဏာသိမ်းစစ်တပ်ဟာ ၂၀၂၁ ခုနှစ် အောက်တိုဘာလ ၁၁ ရက်နေ့ကစပြီး ကချင်ပြည်နယ်၊ မြစ်ကြီးနားမြို့နယ်၊ ဖားကန့်မြို့နယ်မှာ ညမထွက်ရအမိန့်ကိုထုတ်ပြန်ပြီး ၆ လတစ်ကြိမ်သက်တမ်းတိုး‌နေသလို ပြီးခဲ့တဲ့ ၂၀၂၅ ခုနှစ် အောက်တိုဘာလ ၈ ရက်မှာ သက်တမ်းတိုးထားပါတယ်။

အလားတူ ၂၀၂၆ ခုနှစ် ဧပြီလ ၂၇ ရက်နေ့မှာလည် ညမထွက်ရအမိန့်ကိုထပ်မံသက်တမ်းတိုးထားတာလည်းဖြစ်ပါတယ်။ ဒါကြောင့်လူငယ်တွေအနေနဲ့သတိထားသွားလာဖို့လိုအပ်တယ်လို့ မြစ်ကြီးနားမြို့မှာနေထိုင်တဲ့ နိုင်ငံရေးတက်ကြွလှုပ်ရှားသူတစ်ဦး ခုလိုအကြုံပြုထားပါတယ်။

“ခုသူတို့က အစိုရသစ်ဆိုတော့ စပြီလေ အကြောင်းမျိုးမျိုး ခေါင်းစဉ်မျိုးမျိုးတပ်ပြီး ဖမ်းနေမှာပဲ  အဲတော့ဖြစ်နိုင်လို့ရှိရင် မလိုအပ်ပဲအပြင်မထွက်ကြတာကောင်းတယ်။လူငယ်တွေပိုသတိထားရမယ့်အချိန်ဖြစ်တယ်”လို့ပြောပါတယ်။

ညမထွက်ရ အမိန့်မှာ ည ၁၀ နာရီမှ နံနက် ၄ နာရီအတွင်း လမ်းမကြီးများ၊ အများပြည်သူသွားရာ လမ်းများ၊ လမ်းသွယ်များ၊ လမ်းကြားများ၊ ဥယျာဉ်များနှင့် အများပြည်သူနှင့် သက်ဆိုင်သောနေရာများတွင် လူငါးဦးနှင့်အထက် စုဝေးခြင်းမပြုလုပ်ကြရန်ပါရှိသလို လုံခြုံရေးနှင့် တရားဥပဒေစိုးမိုးရေးကို ထိခိုက်ပျက်ပြားစေရန်လုပ်ဆောင်နေတဲ့ အဖွဲ့အစည်းများရှိနေသောကြောင့် ရာဇဝတ်ကျင့်ထုံးဥပဒေပုဒ်မ ၁၄၄ အရ ထုတ်ပြန်ထားခြင်းဖြစ်တယ်လို့ထုတ်ပြန်ချက်မှာဖော်ပြထားပါတယ်။

ဒါပေမယ့် တစ်ဖက်မှာတော့ ညမထွက်ရအမိန့်ထုတ်ပြန်ထားတဲ့ မြစ်ကြီးနားမှာတော့ ခိုးဆိုးလုယက်မှုပိုများလာနေတဲ့အပေါ် ပြည်သူတွေကြားဝေဖန်မှုရှိနေတာလည်းဖြစ်ပါတယ်။

By – Zami