သတင်း

ငြိမ်းစုစီ ပုဒ်မ ၁၉ ဖြင့်တရားစွဲဆိုခံရသောအမှု တရားလို ယာယီဒုရဲမှူးကို စတင်စစ်ဆေး

ကချင်စစ်ဘေး ၈ နှစ်ပြည့် လူငယ်များ၏ လမ်းဘေး တေးသရုပ်ဖော် ပြဇတ်ဦးဆောင်ခဲ့သူ၂ ဦးကို ငြိမ်းစုစီ ပုဒ်မ ၁၉ ဖြင့် အရေးယူထားမှု တရားလို မြို့နယ် ရဲတပ်ဖွဲ့ ယာယီ ဒုရဲမှူး မင်းသန့်ဇော် ကို စစ်ဆေးခဲ့ကြောင်း သိရပါသည်။

ဇွန်လ ၉ ရက်နေ့ မြစ်ကြီးနား စိမ်းမြဧရာပန်းခြံ နှင့် ပြည်သူ့ရင်ပြင်အားကစားကွင်း နေရာ ၂ ခုတွင် ခွင့်ပြုချက်မတောင်းခံဘဲ လူစုလူရုံးပြုခဲ့သည်ဟုဆိုကာ ကိုပေါလု နှင့် မဆိုင်းနူးပန် တို့ ၂ ဦးကို တရားစွဲဆိုထားမှု နှင့်ပတ်သက်ပြီး တရားလို ဒုရဲမှူး အား သတင်းမီဒီယာများ မေးမြန်းခွင့်ရန် ကြိုးစားခဲ့သော်လည်း မရရှိခဲ့ပါ။

ထို့ကြောင့် ဒုတိယအကြိမ်မြောက် ရုံးချိန်းဖြစ်သော ယနေ့ စစ်ဆေးချက်များနှင့် ပတ်သက်ပြီး တရားစွဲဆိုခံရသူ ကိုပေါလု ယခုလို ပြောဆိုပါသည်။

“သူ့ဘက်က(တရားလို) တင်ပြထားတာကတော့ ခွင့်ပြချက် မတောင်းခံဘဲ စုရုံးတယ်။ တေးသရုပ်ဖော်တဲ့အတွက် ငြိမ်းစုစီ ပုဒ်မ ၄ အရ တရားစွဲတာလို့ ပြောလာတယ်။ တချို့အချက်တွေကိုတော့ သူက မသိဘူးလို့ပြောလာတယ်။ အဲလောက်ပါဘဲ။” ဟု ပြောပါသည်။

လွန်ခဲ့သည့်အပတ် ဇွန်လ ၁၂ ရက်နေ့ ပထမအကြိမ် ရုံးချိန်းတွင် လမ်းဘေး တေးသရုပ်ဖော်အစီစဉ် ဦးဆောင်သူ ၂ ဦးမှ အပြစ်မရှိကြောင်း ငြင်းဆိုထားသည့်အတွက် ထပ်မံ စစ်ဆေးခြင်း ဖြစ်သည်ဟု သိရပါသည်။

“ဒါက အစိုးရကို ဆန့်ကျင် သပိတ်မှောက်နေတာလည်း မဟုတ်ဘူး။ စစ်ရှောင်တွေ ဘယ်လိုခံစားနေရတယ်ဆိုတာကို ဖော်ပြရုံလောက်ပဲ။ ဒါကြောင့် ဒါကို အရေးယူရလောက်အောင် မလိုဘူး။ ပွဲမလုပ်ခင်လည်း တာဝန်ရှိ ရဲတာဝန်ရှိသူနဲ့ ဆွေးနွေးပြီးပြီ။” ဟု တရားစွဲဆိုခံရသူ မဆိုင်းနူးပန် ပြောပါသည်။

ထို့ကြောင့် တရားလိုဘက် သက်သေများကို လာမည့်အပတ် ဇွန် ၂၆ တွင်ထပ်မံ စစ်ဆေးသွားမည်ဟု သိရပါသည်။

ကချင်ပြည်နယ် ပြည်တွင်းစစ်အတွင်း ပြည်သူများ သတ်ဖြတ်ခံရပုံ၊ စစ်ရှောင်ကာလာအတွင်း ခွဲခြား ဆက်ဆံ ခံရမှုနှင့် ငြိမ်းချမ်းစွာ နေရပ်ပြန်လိုကြောင်း ရင်းတွင်းဖြစ် လမ်းဘေး တေးသရုပ်ဖော် ပြဇတ်ကို သက်ဆိုင်ရာအား ခွင့်ပြုချက် မတောင်းခံဘဲ ပြုလုပ်ခဲ့သည်ဟု ဆိုကာ အရေးယူထားခြင်း ဖြစ်သည်ဟု သိရပါသည်။

Show More

Related Articles

Back to top button