ဝိုင်းမော်မြို့နယ်အတွင်း တရားမဝင် ဝင်ရောက်နေထိုင်မှုကြောင့် ဖမ်းဆီးထိန်း သိမ်းခံထားရသော တရုတ်နိုင်ငံသား ၈ ဦးကို လူဝင်မှုကြီးကြပ်ရေးဥပဒေ အရ ဇွန်လ ၂၈ နှင့်၂၉ ရက်နေ့တို့တွင် အသီးသီး ပြည်နှင်ဒဏ်ပေးခဲ့ကြောင်း သိရသည်။
လွန်ခဲ့သည့် သောကြာနေ့တွင် ၃ ဦး ၊ စနေနေ့ ၅ ဦး စသည်တို့ကို တရုတ်နယ်စပ်သို့ ပို့ဆောင်လိုက်ခြင်း ဖြစ်သည်ဟု ဝိုင်းမော် လူဝန်မှုကြီးကြပ်ဌာနမှ ဆရာ အားဆီ ထံမှ သိရပါသည်။
“ ပြည်နယ်အမိန့်ကျလာတယ်။ ၅ယောက်ကတော့ လ.၀.က အမှုနဲ့ သစ်တောအမှု နှစ်မှုရောယှက်ပြီးတော့ဆွဲထားတယ်။ ငွေဒဏ် နဲ့ပဲပြီးသွားတယ်။ လ.၀.က တရားသူကြီးချမှတ်ဒါက ဒဏ်ငွေဆောင်မယ်ဆို မြန်မာငွေ ၅သိန်း ဆောင်ရမယ်။ မဆောင်နိုင်ရင် ထောင် ၆ လဆိုတော့။ ငွေနဲ့ပဲဆောင်သွားတယ်။ သစ်တောက တစ် ဦးကို ၃ သိန်းဆောင်ခိုင်း တယ်လို့ ကြားတယ်။ အတိအကျတော့ မသိဘူး။” ဟု ၀ိုင်းမော်မြို့နယ် လူဝန်မှုကြီးကြပ်ရေးဌာနမှ ဆရာ အားဆီ ပြောပါတယ်။
တရုတ်နိုင်ငံသို့ ပြန်လည်ပို့ဆောင်ခံရသော ၈ ဦးအနက် ၃ ဦးမှာ ဇွန်လ ၅ ရက်နေ့ ဆဒုံ စုပေါင်းစစ်ဆေးရေးဂိတ်တွင် အထောက်အထားမပါ ဝင်ရောက်လာသူများ ဖြစ်ပြီး ကျန် ၅ ဦးမှာ အောင်မြေ ၂ ကျေးရွာရှိ သစ်တော်ကြိုးဝိုင်းတွင် တရုတ်သစ်သျှူးငှက်စိုက်ပျိုးရေးလုပ်ငန်း လုပ်ကိုင်နေသူများ ဖြစ်သောကြောင့် ထိုသူတို့ကို လ.၀.က အမှု နှင့် သစ်တောအမှု တို့ဖြင့် အရေးခံထားရသူများ ဖြစ်သည်ဟု ပြောပါသည်။
ထို့အပြင် သစ်တော်ကြိုဝိုင်းအတွင်း စိုက်ပျိုးရေးလုပ်ငန်း လုပ်ကိုင်မှုနှင့် အထောက်အထားမဲ့နေထိုင်မှု တို့ဖြင့် တရားစွဲဆို ခံရသော နောက်ထပ် တရုတ်နိုင်ငံသား ၄ ဦးကိုလည်း ထိန်းသိမ်းထားသေးကြောင်း သိရပါသည်။
“အခုကျန်နေသေးတဲ့ ၄ ယောက်က ရွှေညောင်ပင်သစ်တောကြိုးဝိုင်းက ၂ ယောက်၊ နမ့်ဝါသစ်တောကြိုးဝိုင်းနဲ့ ညှိတဲ့ ၂ ယောက် အမှုနှစ်မှုနဲ့ရောနေတယ်။ ကျွန်တော်တို့ လ၀က အမှုနဲ့တော့ ပြီးသွားပြီ။ ဒဏ်ငွေဆောင်ပြီးသွားပြီ။ ဒါပေမဲ့ သစ်တော်အမှုက မပြီးသေးလို့ ဝိုင်းမော်မြို့နယ်မြို့မရဲစခန်းမှာ ဆက်လက်ထိန်းသိမ်းထားသေးတယ်။” ဟု ဆရာ အားဆီ က ကချင်သတင်းဌာနကို ဆက်ဆိုထားပါသည်။
ထို့အပြင် ဇွန်လ ၃၀ ရက် ယမန်နေ့တွင်လည်း သက်တမ်းကုန်နေထိုင်သည့် တရုတ်အမျိုးသား ၁ ဦးကို ဝါးရှောင်စုပေါင်း စစ်ဆေးရေး ဂိတ်တွင် ဖမ်းဆီး ရမိပြီး လဝက ဥပဒေအရ ဖမ်းဆီး ထိန်းသိမ်းထားကြောင်း ထပ်မံ သိရပါသည်။
လွန်ခဲ့သည့် ဇွန်လ ၁၃ ရက်နေ့ကလည်း တရားမဝင်နေထိုင်မှုကြောင့် ဖမ်းဆီးခံရသော တရုတ်နိုင်ငံသား ၁၁ ဦးကို ပြည်နှင်ဒဏ်ပေးခဲ့ပါသည်။
